1 Ja’ jech c’ot ta pasel ti c’alal jelo ti sjabilal chanlajuneb xcha’vinic (34) xchi’uc ti vo’lajuneb xcha’vinic (35) jabile, ja’ jech ti yajchanc’optac Jesuse la sliquesic jun xch’ulna Cristo ti te ta scotol banamil bu nopol xil sbaique, ti c’alal ta xbatic ta stojolalique ta sutes yo’ntonic ta bats’imelel ti ta sventa smulique, jech ta xich’ic vo’ ta sbi Jesús, xchi’uc ta xich’ic Ch’ul Espíritu.

2 Ja’ o jech ti ta sjabilal sbaclajunebal xcha’vinic (36) jabile la xch’unic Cristo scotol quirisianoetic ta scotol sba banamil, jech chac c’u cha’al nefitaetic xchi’uc lamanitaetic, xchi’uc muyuc xa ta xut sbaic xchi’uc muyuc xa ta spasic c’op, yu’un lec tuc’ xa ta x abtejic ta jujuntal.

3 Xchi’uc lec jmoj oy yu’nic scotol c’usitic oy, ja’ jech, muyuc jc’ulej xchi’uc muyuc jme’on, xchi’uc muyuc boch’o sujbil ta abtel xchi’uc me ja’uc oy boch’o colemic. Yu’un colemic comic scotolic, ti jech ta xich’ic slequilal vinajele.

4 Ja’ o jech jelo ti sjabilal svuclajunebal xcha’vinic (37) jabile, jech muyuc la spasic o c’op ta banamil.

5 Ti yajchanc’optac Jesuse la spasic muc’tic xchi’uc alaq’uic sba abtelal, ti jech la scoltaananic jchameletique, xchi’uc ti la xcha’cuxesanic animaetique, xchi’uc ti la jyac’anic xanoicuc coxoetique, xchi’uc ti la sjambeic sat ma’satetique, xchi’uc ti boch’otic macajtic xchiquinique la jya’yic c’ope, jech abtejic ep ta chop sq’uelubil tsatsalil ti te ta xnich’nab viniquetique, jech mu xu’ x abtejic ta sq’uelubil tsatsalil ti me mu ja’uc ta spasic ta sbi Jesuse.

6 Xchi’uc ja’ jech jelo ti sjabilal xvaxaclajunebal xcha’vinic (38) jabile, xchi’uc ti sbalunlajunebal xcha’vinic (39) jabile, xchi’uc ti cha’vinique (40) xchi’uc ti jun yoxvinique (41), xchi’uc xchibal yoxvinique (42), jech, c’alalto ta sbalunebal yoxvinic (49) jabil, xchi’uc sbuluchibal yoxvinic (51) xchi’uc slajchabal yoxvinique (52), jech, ja’ to ti c’uxi jelo c’alal to ta sbalunlajunebal yoxvinic (59) jabile.

7 Jech ta Cajvaltic la jyich’ic muq’uimtasel ti li’ ta sba banamile, jech, ja’ to ti c’uxi la spasic muc’tiquil jteclum ti te bu c’aq’uic yantique.

8 Jech, ti muc’ta jteclum Zarahemlae la scha’ liquesic yan velta.

9 Jech ep o no’ox ti muc’tiquil jteclum but’ijemic o no’oxe, xchi’uc ti la sts’ananan sba vo’etic ti te bu to ox oy jteclume, ja’ yo, mu xa xu’ la jyich’ liquesel yanvelta ti va’ay muc’tiquil jteclume.

10 Ja’ jech c’ot ta pasel ti pas ta tsots steclumal Nefie, xchi’uc ti epajic ta anil no’oxe, ti jech c’ot ta jun alac’ sba jteclume, xchi’uc ti tu jlec’ tajmeque.

11 Jech xchi’uc ti c’alal ta xic’ sbaique ta xnupinic, xchi’uc jech la jyich’ic benticion jech chac c’u cha’al yepalic te tsobolic ta sventa c’usi yich’ojic albel yu’un Cajvaltique.

12 Yu’un ma’uc xa tspasic ti c’u x elan mantaletic yu’un Moisese, yu’un ja’ xa te chanoic o ti c’u x elan mantaletic yich’ojic albel yu’un yajvalique xchi’uc ti Xrioxique, xchi’uc ta xicta yiximic xchi’uc ta sc’opanic Riox, xchi’uc ta stsob sbaic ta jujuliquel ta sventa tsc’opanic Riox xchi’uc ta sventa cha’ybeic ya’yej Cajvaltic.

13 Ja’ jech c’ot ta pasel ti muyuc spasic c’op ta scotol viniquetic ta scotol sba banamile, jech ti yajchanc’optac Jesuse abtejic ta c’usi muc’tic lavalic sbaic.

14 Ja’ jech c’ot ta pasel ti c’alal jelo sjabilal buluchib xchanvinic (71) jabile, xchi’uc lajchab xchanvinique (72), jech ti ta slajebal xae, ja’ to ti c’alal jelo sbalunlajunebal xchanvinic jabile (79), jech ja’ to ti c’alal jelo vo’vinic (100) jabile, ti jchanc’opetic bu st’ujoj Jesuse, batic te ta slequilal Riox, (paraiso) ja’ xa no’ox muyuc xbatic ti oxibic boch’otic chcomique, xchi’uc la jyich’ t’ujanel yantic ta sventa xq’uexolic, xchi’uc ep xa chamenic ti boch’otic ja’ic o no’ox ta vo’neje.

15 Ja’ jech c’ot ta pasel ti muyuc c’op ta banamile, ja’ ta sventa ti slequil yo’nton Riox oy ta yo’ntonic jteclume.

16 Xchi’uc muyuc it’ix o’ntonal, xchi’uc sa’ c’op, xchi’uc utbail, xchi’uc epal c’op, xchi’uc milbail, xchi’uc me ja’uc jchopuc c’usi chopol tspasic; xchi’uc ta bats’imelel yu’un muyuc bu jech junuc jteclum tu jlec’ ta scotol ti bu la spas ta sc’ob stuc Rioxe.

17 Yu’un muyuc j eleq’uetic, xchi’uc jmilvanejetic, xchi’uc jlamanitaetic, xchi’uc me ja’uc jchopucal Litasetic (litas) yu’un junic no’ox o ta jmoj, nich’onilic yu’un Cristo xchi’uc yajvaltaquic bu ta spas mantal Rioxe.

18 ¡Ep la jyich’ic benticion! yu’un ti Cajvaltique la jyac’be benticion ta scotol yabtelic, jech, la jyich’ic benticion xchi’uc ch’iic o lec ja’ to ti c’alal jelo lajuneb svacvinic (110) jabile, ti ba’yuc quirisianoetic ta ts’acal ti c’alal cham Cristoe, muyuc c’op yu’nic ta scotol banamil.

19 Ja’ jech ti Nefi, boch’o yich’oj ti slajeb poco’ lo’iletique, icham (xchi’uc ja’ sts’ibaoj batel ti poco’ lo’il sventa taq’uin vunetique) xchi’uc ti xnich’on Amose ja’ te la jyich’ ts’acbel batel ti yabtele, xchi’uc te la spas ta sba staq’uin vuntac Nefi.

20 Jech la spas batel chanib yo’vinic (84) jabil, jech oyto ox lequilal ti ta muc’ta jteclume, ja’ xa no’ox oy juteb ti te ta jteclum ti jech ilinic ta stojolal ch’ulnae xchi’uc ti la stsaquic ta jech no’ox yanvelta ti sbi jlamanitaetique, ja’ jech lic ayinuc yanvelta ti jlamanita ta banamile.

21 Ja’ o jech cham ti Amose, (ta sjabilal xchanlajunebal slajunvinical [194] jabil, c’alal ja’o tal Cristo) jech ti snich’on Amose, la jyich’ batel ta yavil ti poco’ lo’iletique, xchi’uc la sts’iba ta sba staq’uin vuntac Nefi, xchi’uc xtoc te ts’ibabil ta svun Nefi ti ja’ li’ vune.

22 Ja’ jech c’ot ta pasel ti c’alal jeloven xa ox lajunvinic (200) jabile jech ti boch’otic xcha’ cojalic xa oxe, scotolic xa ox chamenic, ja’ xa no’ox jayibicuc ti muyuc xchamique.

23 Jech ti vu’un Mormonune, ta jc’an ac’o xa na’ic ti muc’ta jteclum bu ech’em epajic xchi’uc ti bu tanijemic batel ta scotol sba banamile, xchi’uc ti bu ech’em la staic sc’ulejalic ta sventa yu’un ja’ la xch’unic Cristoe.

24 Ja’ jech ti li’ ta sjabilal chibciento xchi’uc jun (201) jabile, te sjapoic stoyel sbaic jayibicuc yu’nic, jech chac c’u cha’al la slapic c’uil toyolic stojol, xchi’uc scotol ta chop nats’il lec xcuch yu’un, xchi’uc scotol c’usitic alac’ sba ta banamil.

25 Ti ta va’aye muyuc c’usi yu’nic liquel xchi’uc muyuc xa c’usi oyuc ta jmoj yu’nic.

26 Xchi’uc la svoc’ sbaic ta jujuchop, xchi’uc la spasic ch’ulna ta jech no’ox ti c’uxi tstaic o taq’uine. Ja’ jech muyuc la jyalic ta jamal ti xch’ulna ta bats’imelel Cristoe.

27 Ja’ jech ti c’alal jelo chibciento xchi’uc lajuneb (210) jabile, oy xa ox epal ch’ulna ti ta banamile, jech, oy xa ox ep ch’ulna ti ta sc’an ta xaq’uic ta otquinel Cristoe, ti va’yique muyuc jamaluc ta xalic scotol ti smantaltac Cristoe, jech te la spasic ep ta chop bolililetic, xchi’uc ja’ la spasic ti c’usi lecta ta sventa c’usi mu xu’ spasique, ti yu’un jech muyuc lequique.

28 Ti va’ay ch’ulnae epaj ta sventa bolililetic, ta sventa stsatsal pucuj ti yu’un ja’ la spas mantal ta yo’ntonique.

29 Xchi’uc oy yan ch’ulna ti muyuc ta xal me oy Cristoe; ti va’yique ja’ ta snutsic batel ti boch’otic ja’ xch’unojic ta bats’imelel xch’ulna Cristoe, ta slequil yo’ntonic xchi’uc ti ja’ xch’unojic Cristoe, xchi’uc ta sbajic ta sventa ti yu’un ep sq’uelubil tsatsalil ta xc’ot ta pasel ta stojolalique.

30 Ja’ jech, ta xaq’uic ta ilel tsatsalil ti jchanc’opetic yu’un Jesús ta boch’otic te oyic ta stojolalique, jech la jyich’ic tiq’uel ta chuquel; ta sventa stsatsal ya’yej Riox te oy ta stojolalique, ti chuquinabe la svoc’ sba ta chib, jech te chloq’uic xchi’uc ta xaq’uic ta ilel muc’tic sq’uelubil tsatsalil ti te ta jteclume.

31 Ja’ jech, ti c’alal jech va’ay ta xaq’uic ta ilel scotol ti sq’uelubil tsatsalile, ti jteclume la stsatsubtas yo’nton xchi’uc ta sc’anic ox tsmilic, jech chac c’u cha’al Judioetic ta Jerusalen ti ta sc’anic ox tsmilic Jesús jech chac c’u cha’al ya’yej stuque.

32 Xchi’uc ta xich’ic jipel ta tsanal horno, jech muyuc c’usi spasojic jlec’uc chloq’uic.

33 Xchi’uc ta xich’ic aq’uel ta xch’en jti’vanej chon bolometic, jech te ta xtajinic xchi’uquic ti jti’vanej chon bolometic jech chac c’u cha’al jun olol ta xchi’in ta tajimol jcot chije, jech te muyuc c’usi spasojic jlec’uc chloq’uic.

34 Ja’ jech, la stsatsubtas yo’ntonic ti jteclume, yu’un la jyich’ aq’uel epal paleetic, j epal c’op lequil viniquetic ta sventa ti yu’un ac’o spasic epal ch’ulnae, xchi’uc ti ta spasic scotol ta chop bolililetique. Xchi’uc ja’ ta suts’intaic ti steclumal Jesuse, jech ti steclumal Jesuse muyuc ta spaquic ti c’usi ta xich’ic pasbele, ja’ jech oyic o ta jujun jabil ti ta c’usi chopole xchi’uc ti ta bolilile, ja’ to ti c’alal jelo chibciento xchi’uc lajuneb xcha’vinic (230) jabile.

35 Ja’ jech c’ot ta pasel ti ta sjabilal chib ciento xchi’uc buluchib xcha’vinic (231) jabile, la svoc’sbaic ti jteclume.

36 Jech ti li’ ta sjabilale lic stsob sbaic jtsopic ti ja’ la sbiinic Nefitaetique, xchi’uc ja’ic ti jch’unolajeletic ta bats’imelel ta sventa Cristoe, jech ti va’yique te xchi’uquic xtoc ti boch’otic sbiinoj yu’nic Jacobita xchi’uc Josefita xchi’uc Zoramita jlamanitaetique.

37 Ja’ jech, ti jch’unolajeletic ta bats’imelel ta sventa Cristoe, xchi’uc ti boch’otic ta xich’ic ta muc’ Cristoe, (xchi’uc te xchi’uquic xtoc ti oxibic bu c’omic yajchanc’op Jesús) ti ja’ sbiinojic nefitaetic xchi’uc josefitaetique, xchi’uc zoramitas.

38 Ja’ jech ti boch’otic mu sc’an xch’unic mantale, ja’ la sbiin lamanitaetic, lemuelitaetic xchi’uc Ismaelitaetic, ti va’yique muyuc la snopic me lec, ja’ no’ox iliquic ta scontrainel ti smantaltac Cristoe, xchi’uc la xchanubtas xnich’nabic ti ac’o mu xch’unique, ja’ jech chac c’u cha’al stotic muyuc la xch’unic ta sliquebal o no’oxe.

39 Ja’ jech, ja’ ta sventa sbolilic xchi’uc ta sventa c’u x elan la jyich’ic bajel stotic, jech chac c’u cha’al ta sliquebal o no’ox, xchi’uc la xchanubtasic ta sbajel xnich’nab Riox, jech chac c’u cha’al la jyich’ic chanubtasel lamanitaetic ta sbajel xnich’nab Nefitaetic ta sliquebal o no’oxe.

40 Ja’ jech jelo o ti chibciento xchi’uc chanib yoxvinic (244) jabile, ja’ jech x elan o ti jteclume. Ti bu tu j ech’em sbolil ti jteclume ja’ la sta stsatsal xchi’uc ja’ epajic jech chac c’u cha’al steclumal Riox.

41 Xchi’uc sbats’elic spasel ti ch’ulna ta jech no’oxe, xchi’uc ta xich’ic ta muc’ scotol ti c’usi alaq’uic sba muyuc cuxuluque. Ja’ jech jelo o ti chibciento xchi’uc lajuneb yoxvinic (250) jabile, xchi’uc xtoc ti chibciento xchi’uc oxvinic (260) jabile.

42 Ja’ jech ti boch’otic ech’em sbolilic ta jteclume sjapoic xcha’ liquesel yanvelta ti c’u x elan la jyal xchi’uc ti c’u x elan ta sc’an stuc ta mucul tspas Gadiantone.

43 Xchi’uc xtoc ti te ta jteclum, ti ja’ sbiinoj steclumal Nefie, sjapoic stoyel sbaic ta yo’ntonic ta sventa yepal sc’ulejalic, xchi’uc la stoy sbaic jech chac c’u cha’al jlamanitaetic ti ja’ yermanoique.

44 Ja’ o ti va’aye, ti jchanc’opetique la jyat yo’ntonic ti ta sventa smul sbejel banamile.

45 Ja’ jech ti c’alal jelo oxibciento (300) jabile, jech chac c’u cha’al steclumal nefitaetic xchi’uc steclumal lamanitaetic pasic ta jmulavil o, xchi’uc co’ol sbaic ta jujuntal.

46 Ja’ jech ti j eleq’uetic yu’un Gadiantone la spuc sbaic ta scotol sba banamil, yu’un muyuc xa boch’o junucal lec, ja’ xa no’ox lequic ti oxobic yajchanc’optac Jesuse, xchi’uc la stsobic ep c’anal taq’uin, xchi’uc saquil taq’uin, xchi’uc ep c’usi la stsob xchonic ta ch’ivit.

47 Ja’ o jech ti c’alal jelo oxib ciento xchi’uc vob (305) jabile, (ti jteclume sbats’elic spasel o ti c’usitic chopole) cham ti Amose, ja’ xa no’ox yermano Ammaron la snac’ ta yabil ti poco’ lo’iletique.

48 Ja’ o jech ti c’alal jelo oxib ciento xchi’uc jtob (320) jabile, Ammaron, la jyich’ sujel yu’un Ch’ul Espíritu ti jech la snac’ poco’ lo’iletic ti yu’un ja’ ch’ul vune, jech, scotol ch’ul poco’ lo’iletic ti bu yich’oj aq’uel ta jujucoj quirisianoetic ti yu’un ja’ ch’ul vune, jech ja’ o no’ox ta sjabilal oxib ciento xchi’uc jtob (320) jabil ti c’alal ja’ o tal Cristoe.

49 Jech la snac’ ta sventa Cajvaltic, ti c’uxi ac’o xc’ot yanvelta ta stojolalic boch’otic ja’ scomelalic snailal Jacob, jech chac c’u cha’al la xcholbe smelolal xchi’uc jech chac c’u cha’al la jyal Cajvaltique. Ja’ jech laj o ti poco’ lo’iletic yu’un Ammarone.