Buk blong Jerom
Japta 1
Ol Man blong Nifae oli holem loa blong Moses, oli stap wet from taem we Kraes bae i kam, mo oli kam antap gud long graon—Plante profet oli wok blong holem ol pipol long rod blong trutok. Raonabaot 399–361 B.K.B.
1 Nao luk, mi, Jerom, mi raetem smol toktok folem komanmen blong papa blong mi, Inos, blong mekem se oli save kipim famli laen blong mifala.
2 Mo from ol buk ia oli smol, mo from ol samting ia oli bin raetemdaon wetem stamba tingting blong helpem ol brata blong mifala, Ol Man blong Leman, taswe, i mas nid i stap blong mi raet smol, be bae mi no raetem ol samting blong taem we mi stap profesae long hem, o ol revelesen blong mi. ?From wanem bae mi save raet moa bitim ol samting we ol papa blong mi oli bin raetem? ?From i no tru se oli bin soemaot plan blong fasin blong sevem man? Mi talem long yufala se, Yes; mo hemia i inaf long mi.
3 Luk, i gat nid se plante samting i mas hapen long medel blong ol pipol ia, from hat blong olgeta i strong, mo sora blong olgeta i fas, mo maen blong olgeta i blaen, mo oli stronghed; be, God i gat bigfala sore long olgeta, mo kasem naoia, hem i no brumaot olgeta yet long fes blong graon.
4 Mo i gat plante long medel blong yumi we oli kasem plante revelesen, from i no evriwan we i stronghed. Mo evriwan we oli no stronghed mo oli gat fet, oli gud fren wetem Tabu Spirit, we i soemaot long ol pikinini blong ol man folem fet blong olgeta.
5 Mo nao, luk, tu handred yia i bin pas, mo ol pipol blong Nifae oli bin kam strong long graon. Oli bin wokhad blong kipim loa blong Moses mo sabat dei i tabu long Lod. Mo oli no talem ol rabis toktok; mo oli no tok agensem Lod. Mo ol loa blong graon oli bin strong tumas.
6 Mo oli bin seraot i go olbaot long fulap ples long fes blong graon, mo Ol Man blong Leman tu. Mo olgeta ia, oli moa plante tumas bitim Ol Man blong Nifae; mo oli bin laekem blong kilimded ol man mo dring blad blong ol animol.
7 Mo i bin hapen se oli bin kam plante taem agensem mifala, Ol Man blong Nifae, blong faet. Be ol king mo ol lida blong mifala oli ol strong man long fet blong Lod; mo oli tijim ol pipol long ol fasin blong Lod; taswe, mifala i stanap strong agensem Ol Man blong Leman mo fosem olgeta blong oli aot long ol graon blong mifala, mo stat blong mekem i kam strong ol bigtaon blong mifala, o eni ples blong mifala we i kam long ol papa blong mifala.
8 Mo mifala i kam plante tumas, mo mifala i go olbaot long fes blong graon, mo mifala i kam rij tumas long gol, mo long silva, mo long ol gudgudfala samting, mo long fasin blong flas mo naes wok long wud, long ol haos, mo long ol masin, mo tu, long ol samting wetem aean mo kopa, mo bras mo stil, blong mekem ol kaen tul blong evri kaen blong wok long graon, mo ol tul blong faet—yes, ol ara we oli sap, mo basket blong ara, mo dat, mo javelin, mo evri samting blong rere blong faet.
9 Mo from olsem ia nao we mifala i bin rere blong mitim Ol Man blong Leman, nao oli no bin kam antap gud agensem mifala. Be Lod i bin pruvum ol toktok blong hem, we hem i bin talemaot long ol papa blong mifala, we i talem se: “Folem hamas we bae yufala i stap obei ol komanmen blong mi, bae yufala i kam antap gud long graon ia.”
10 Mo i bin hapen se ol profet blong Lod oli bin wonem ol pipol blong Nifae, folem toktok blong God, se sapos oli no obei long ol komanmen, be bae oli foldaon long fasin blong brekem loa, nao bae hem i prapa spolem gud olgeta we oli nomo gat long fes blong graon.
11 Taswe, ol profet, mo ol pris, mo ol tija, oli bin wok strong wetem strong tingting oltaem, wetem fasin blong gat longfala tingting tru long hadtaem, oli stap askem strong ol pipol blong wok wetem strong tingting oltaem; oli tijim loa blong Moses, mo tijim from wanem God i bin givim loa ia; blong winim tingting blong olgeta blong lukluk fored i go long Mesaea, mo biliv long hem blong kam olsem se hem i bin kam finis. Mo long fasin ia nao oli bin tijim olgeta.
12 Mo i bin hapen se from oli bin mekem samting ia, oli blokem olgeta blong oli no save ded long fes blong graon; from oli bin stikim hat blong olgeta wetem trutok, mo oli gohed blong pusum olgeta blong sakem sin.
13 Mo i bin hapen se tu handred mo teti mo eit yia i bin pas—wetem ol fasin blong ol wo, mo ol rao, mo plante fasin blong strong raorao, blong wan longfala taem.
14 Mo mi, Jerom, mi no raet moa, from ol buk ia oli smol. Be luk, ol brata blong mi, yufala i save go long ol narafala buk blong Nifae; from luk, long olgeta, ol histri blong ol wo blong mifala i stap, folem ol raeting blong ol king, o olgeta we oli bin mekem se oli mas raetemdaon olgeta samting ia.
15 Mo mi givim ol buk ia long ol han blong boe blong mi, Omnae, blong mekem se hem i save kipim olgeta folem ol komanmen blong ol papa blong mi.