1 Oh met, kilang, rieiko, nin duwen ei ndahiong kumwail me I pahn kohpada, kilang, iet ei kokohpen—me soahng kan me soukohp Sihnos mahsanih uhdahn pahn pweida, nin duwen peneinei en Israel, e karasahiong irail tuhkehn olip me epwel mwahu.

2 Oh rahno me e pahn pwurehng ketikihdo lime kan, keriapak en ahnsou, pwe en kapwurehdo sapwellime aramas, iei ih rahno me wia kaimwiseklahn ahnsou, me sapwellimen Kauno ladu kan pahn kohwei sang ni sapwellime manaman, pwe re en apwalih mwahu oh kamwakele sapwellime mwetuwelo; oh mwuri imwilao ahpw pahn leledo.

3 Oh ia uwen kapai ong irail akan me pahn pwerisekiong doadoahk nan sapwellime mwetuwelo; oh ia uwen keriah ong irail akan me pahn lekidekila sang nan pein dewerail! Oh sampah pahn mwasingkihla kisiniei.

4 Oh ia uwen kupwur kalahngan en atail Koht ong kitail, pwe e kin ketin tamataman peneinei en Israel, kalowe kan oh rah kan koaros; oh e kin ketin kapahwei nin lime kan ong irail koaros rahno pwon; oh irail kin keptakai oh wia aramas aklapalap; ahpw irail akan me pahn sohte ahneki mohngiong keptakai pahn komourla nan wein Koht.

5 Eri, riei kesempwal ko, I peki rehmwail ni ngidingid sang ni lokaia mehlel, me kumwail pahn koluhla, oh kohdo sang ni mohngiong unsek, oh mehlelohng Koht duwehte e pahn ketin mehleliong kumwail. Oh sang ni sapwellime kalahngan e ketin kapkapahweite lime ong kumwail ni marain en rahn, kumwail dehr kakeptakaila amwail mohngiong kan.

6 Ei, rahn wet, ma kumwail pahn rong kepitiehu, dehr kakeptakaila amwail mohngiong kan; pwe dahme kumwail pahn mehkihla?

7 Pwe kilang, mwurin amwail pahn momourki mahsen en Koht ahnsou koaros, dah, kumwail pahn kin wah suwed, pwe kumwail en palidi oh lekidekiong nan kisiniei?

8 Kilang, dah, kumwail pahn soikalahte mahsen pwukat? Kumwail pahn soikalahte mahsen en soukohp akan; kumwail pahn soikalahte mahsen kan koaros me pid duwen Krais, mwurin aramas tohto ahr kalohngkier duwen ih; oh soikala mahsen mwahu en Krais, oh manaman en Koht, oh kisakis en Ngehn Sarawi, oh kawehla pepehm en Ngehn Sarawi, oh lahlahwe koasoandi lap en poadoandoarlao, me kasansaldahr mwohmwail?

9 Kumwail sohte ese me ma kumwail pahn wia mepwukat, manaman en poadoandoarlao oh iasadao, me kohsang rehn Krais, pahn kapwureikumwaildo en kesihnenda mwohn mwoalen kopwung en Koht ni amwail pahn namenek oh pwukoahkihdi amwail sapwung kan?

10 Oh nin duwen manaman en kopwung pahrek, pwehki kopwung pahrek sohte kak en sohte pweida, kumwail uhdahn pahn kohla nan lehn kisiniei oh suwepel, me lullulih sekehkun, oh me edinieih kin kohkohda kohkohlahte, lehn kisiniei oh suwepel me iei lokolok soutuk.

11 Eri, riei kempoakepahi ko, kumwail koluhla, oh pidelong nan ewen kehl ineno, oh douluhlahte nan ahl tehtiko, lao kumwail pahn alehdi mour soutuk.

12 Eri kumwail loalokongla; dahme I pahn pil kak koasoia?

13 Eri, I pahn kamwurkumwailla, lao I pahn tuhwong kumwail ni mwoalen kopwung mwahu en Koht me wia wasa kamasepwehk oh kasaloh ong aramas suwed kan. Ahmen.