1 Mahsen kan me Seikop, rien Nihpai pwutak, padahkihong aramas en Nihpai kan, mwurin mehlahn Nihpai:

2 Riei ohl kesempwal oko, met ngehi, Seikop, nin duwen pwukoah me I ahneki ong Koht, en kapwaiada ei pwukoah doadoahk ni mehlel, oh pwe I en kak kamwakelehsang dipamwail akan sang ni ei likou kan, I kohdo nan tehnpas sarawi rahn wet pwe I en kak kalohkihong kumwail mahsen en Koht.

3 Oh kumwail pein esehier me I kin loaloapwoat nan malipilip en ei pwukoah doadoahk; ahpw rahn wet I toutouki mehlel ei kin nsenohki oh pwunodiki epwelpen palingenamwail kan laud sang mwoweo.

4 Pwe kilang, lel met, kumwail kin peikiong mahsen en Kauno, me I padahkihong kumwail.

5 Ahpw kilang, kumwail rong ie mwahu, oh ese me sang ni sawas en Sounkepikipik en nanleng oh sampah me ketin manaman en wia mehkoaros, I kak ndahiong kumwail duwen amwail madamadau kan, duwen amwail tepidahr wiewia dihp, iei dihp ehu me I suwedki mehlel ong ie, iei, oh Koht kin kupwursuwedkihla.

6 Ei, e kansensuwediala palingeniet oh kahrehda ei roingkipene ei namenek mwohn silangin Sounwiepeio, me I anahne kadehdehiong kumwail duwen suwedlahn amwail mohngiong kan.

7 Oh e pil kansensuwed ong ie, me I anahne doadoahngki koasoai en eimah ong kumwail, mwohn amwail pwoud kan oh noumwail seri kan, pali tohtohn irail me arail pepehm kan mwuterek oh mwakelekel oh keneinei mwohn Koht, me wia mehkot kesempwal ong Koht;

8 Oh I medewe me irail kohdahdo pwe irail en rong mahsen kesempwal en Koht, ei, mahsen me kin kamwahuwiala palingehn me kin ohla.

9 Eri, e katoutouialahr palingeneiet dahme I idihdiong en wia pwehki kosonned kehlail me I alehdi sang rehn Koht, ien padahkihong kumwail duwen amwail wiewia suwed kan, e pahn kalaudehla ohlahn mehtei kan me olahr, kaidehn kakehlaka oh kamwahuiala arail ohla kan; oh irail akan me saikinte ohla, e pahn doakoahki kisin naip palingenerail kan oh kawehla arail madamadau keneinei kan ahpw kaidehn kamakamadipwki mahsen kesempwal en Koht.

10 Ahpw, mendahte apwal en pwukoah wet, I pahn wia nin duwen kosonned kehlail inen en Koht, oh ndahiong kumwail duwen amwail suwed oh sakanakan kan, mwohn mesen irail me mohngiong mwakelekel, oh mohngiong karakarahk, oh mwohn silangin Koht Wasa Lapalap.

11 Eri, I anahne ndahiong kumwail ni mehlel nin duwen mahsen sansal en Koht. Pwe kilang, ni ahnsou me I wie kapakapohng Kauno, e ngihl ehu ahpw mahsaniong ie: Seikop, kohdahla nan tehnpas sarawio lakapw, oh kalohki mahsen me I pahn kihong uhk en kihong aramas pwukat.

12 Oh met kilang, riei ko, met iei mahsen me I pahn kalohngki ong kumwail, me tohto kumwail tepdahier rapahki kohl, oh silper, oh soahngen mete kesempwal koaros, me rek nan sahpwet, me iei sahpw en inou ong kumwail oh kadaudokemwail kan.

13 Oh limen kupwurokong kin polouliki kumwail mehlel, me kahrehda amwail kepwehpwelahr; oh pwehki ekei kumwail amwail paiamwahu sang ekei riemwail kan, a kumwail pohnmwahsolahr nan mohngiongimwail kan, oh kumwail keptakailahr oh masilehda pwehki amwail likou pweilaud kan, oh kumwail kin kaloke riomwailkan pwehki kumwail kin medewe me kumwail mwahu sang irail.

14 Oh met, riei ko, kumwail lemeleme me Koht ketin kupwurki soahng wet me kumwail kin wiewia? Kilang, I ndahiong kumwail me, Soh. Ahpw e pahn ketin kerieikumwailla, oh ma kumwail pahn wenlahte nan soahng pwukat, sapwellime kadeik kan pahn mwadangete kohdohng kumwail.

15 Oh e pahn ketin kasalehiong kumwail me e kak ketin kaweikumwailla, oh sihlangi pahn kadarlangih kumwailte, a kumwail pahn wiepwella!

16 E pahn mwahu ma E pahn ketin soikeweisang rehmwail wiewia suwed oh wiewia sapwung wet. Oh, e pahn mwahu ma kumwail pahn rong mahsen en sapwellime kosonned kan, oh dehr mweidohng pohnmwahsohn nan kapehdomwail kan en kawehla palingenamwail kan!

17 Kumwail medewe riomwail akan duwehte pein kumwail, oh eseirailla koaros oh mweidehng irail amwail dipwisou kan, pwe irail en kak kepwehpwehla duwehte kumwail.

18 Ahpw mwohn amwail pahn rapahki kepwehpwe kan en sampah, kumwail rapahki mahs wein Koht.

19 Oh mwurin amwail pahn koapwoaroapwoarkihla Krais kumwail pahn alehdi dipwisou en kepwehpwe kan, ma kumwail pahn rapahki; oh kumwail pahn rapahki pwe kumwail en doadoahngkihong wiewia mwahu—kalikawi me kilisou kan, oh kamwenge me semwehmwe kan, oh kasaledekihala me sensel kan, oh sewesehda me soumwahu oh lokolok kan.

20 Oh met, riei ko, I koasoaiahiong kumwailehr duwen pohnmwahso; oh kumwail me kin kahpwalehla mehn mpamwail kan, oh kalokeirail pwehki amwail pohnmwahsohla nan kapehdamwail kan, soahng kan me Koht ketkihong kumwail, dahme kumwail kak koasoia duwe?

21 Kumwail sohte medemedewe me ih me ketin kapikada mour koaros kin kupwursuwedkihla soahng pwukat? Oh uwen kesempwal en aramas men mwohn silangi pahrekiong mehteio. Oh mour koaros wiawihda sang pwehl; a ih kahrepehute me e ketin kapikinirailda, pwe irail en kapwaiada sapwellime kosonned akan oh kalinganahla ih kohkohlahte.

22 Oh met I pahn kaimwisekala ei koasoai ong kumwail duwen pohnmwahso. Oh ma I sohte pahn anahne koasoaiahiong kumwail duwen wiewia sapwung laud ehu, mohngiongi pahn perenda mehlel pwehki kumwail.

23 Ahpw mahsen en Koht katoutowihiehla pwehki amwail wiadahr sapwung laud kan. Pwe kilang, Kauno ketin mahsanih: Aramas pwukat tepidahr kalaudehla arail wiewia suwed kan; irail sohte kin wehwehki pwuhk sarawi kan, pwe re kin songosong en peikidki arail wiewia tiahk en kamwahl akan, pwehki soahng kan me ntingdi duwen Depit, oh sapwellime pwutak Solomon.

24 Kilang, Depit oh Solomon pwoudiki lih tohto oh pekehi kei, a I kupwursuwedkihla mwekid wet, Kauno me mahmahsen.

25 Eri, Kauno ketin mahsanih, I kahluwahsang aramas pwukat nan sahpw en Serusalem, sang ni manaman en pehi kat, pwe I en kak kakairada kadaudok pwung ehu sang ni wahn kadaudok en Sosep.

26 Eri, ngehi Kauno Koht sohte pahn mweidohng aramas pwukat en duwehte aramas en mahsoko.

27 Eri, riei ohl oko, rong ie, oh rong mwahu mahsen en Kauno: Sohte ohl nan pwungamwail me pahn pwoudiki lih tohto, ahpw e pahn pwoudiki lih tehmen; oh e sohte pahn ahneki pekehi men;

28 Pwe ngehi, Kauno Koht, kin pereniki mwakelekel en lih akan. Oh I kin kupwursuwedkihla tiahk en kamwahl; Kauno Wasa Lapalap ketin mahsanih.

29 Eri, aramas pwukat pahn anahne kapwaiada ei kosonned akan, Kauno ketin mahsanih, ma soh a sahpw wet pahn keriahla pwehki irail.

30 Kauno ketin mahsanih, ma I pahn kupwurki katohtohwehla kadaudoken nei aramas akan, I pahn kin poahngokieng nei aramas akan; ma soh, irail pahn kin rong oh kapwaiada mepwukat.

31 Pwe kilang, ngehi, Kauno, kilangadahr pahtou, oh rongehr mwahiei en serepein kan en nei aramas akan nan sahpw en Serusalem, ei, oh sahpw en nei aramas akan koaros, pwehki wiewia suwed oh sapwung kan en ahr pwoud kan.

32 Oh Kauno Wasa Lapalap ketin mahsanih, I sohte pahn mweidohng nein aramas pwukat serepein kan, me I kahluwaieisang nan sahpw en Serusalem, en wie sengiseng, oh ngilarail akan kedikedipa nein nei aramas akan ohl akan, Kauno Wasa Lapalap ketin mahsanih.

33 Pwe irail sohte pahn kahluwahlahng nein nei aramas akan serepein kan en lohdi pwehki ahr mpai, ma iei, I pahn pwarek kin irail keria kalok ehu, iei lao irail kamwomwla; pwehki irail sohte pahn kin wia mwekid en tiahk en nenek, duwehte mehn mahs ako, Kauno Wasa Lapalap ketin mahsanih.

34 Oh met kilang, riei ko, kumwail ese me kosonned pwukat kohiengehr atail pahpao, Lihai; eri, kumwail esehier mwoweo; oh kumwail lelohngehr kalokolok laud; pwe kumwail wiadahr mepwukat me kumwail sohte konehng en wia.

35 Kilang, kumwail wiadahr dihp laudsang riatail Mehn Leimen ko. Kumwail kamedekalahr mohngiong en amwail pwoud mpai kan, noumwail seri kan solahr koapwoaroapwoarkin kumwail, pwehki amwail karasaras suwed akan mwohrail; oh nsensuwed en mohngiongarail kan kin leldahla rehn Koht pwe en uhwong kumwail. Oh pwehki sapwellimen Koht mahsen kehlail, me lelohng kumwail, mohngiong tohto melahr, nan ahr ohkihla ohla loal akan.