1 Koʼág̃a, péina ápe, ojehu che, Jacob, heta aministra ñeʼẽme che tavayguakuérape (ha ndaikatúi ahai che ñeʼẽnguéra térã mbovymínte, hasyetereígui ojehai pláncha ári oreñeʼẽnguéra) ha roikuaa umi rohaíva plánchakuéra ári opytavaʼerãha;

2 Ha katu umi rohaíva ambue mbaʼe ári ndahaʼéiva pláncha omano ha opareivaʼerã, ha katu rohaikuaa planchakuéra ári ñeʼẽ mbovymínte, omeʼẽtava ore raʼykuérape, ha avei ore joykeʼykuéra rohayhuetévape, jeikuaa michĩmi orehegui, térã, ituvakuéragui—

3 Ha koʼã mbaʼépe rovyʼa, ha rombaʼapo jesarekópe rohai hag̃ua koʼã ñeʼẽ planchakuéra ári, rohaʼarõvo ore joykeʼykuéra rohayhuetéva ha ore raʼykuéra ohupyty koʼãva korasõ aguyjépe, ha ojerovia hese oñehekomboʼe hag̃ua vyʼápe, ha ani vyʼaʼỹme, ni jejaʼeʼỹme, ituvakuéra ypykue reheguáva.

4 Ha, upevarã rohaivaʼekue koʼã mbaʼe, oikuaa hag̃ua hikuái ore roikuaahague Cristo-gui, ha roguerekohague ñehaʼarõ iverapýre heta ary haʼe ou mboyve; ha ndahaʼéi orénte roguerekóva ñehaʼarõ iverapýre, ha katu avei opavave umi proféta marangatu oikovaʼekue ore mboyve.

5 Péina ápe, haʼekuéra ogueroviavaʼekue Cristo-pe ha otupaitũ Túvape hérape, ha avei ore rotupaitũ Túvape hérape. Ha upevarã oreñeʼẽrendu Moisés léire, oguerahágui ore ánga chupe; ha upévare oñemomarangatu oréve tekojojáramo, ojehuhaguéicha Abraham-pe taveʼỹme iñeʼẽrendúgui Tupã rembiapoukapýre oikuaveʼẽvo itaʼýra Isaac-pe, omohaʼangáva Tupã ha taʼýra Unihénitope.

6 Upévare, rohesaʼỹijo profetakuérape, ha roguereko heta rrevelasiõ ha espíritu de profesía; ha roguerekóvo opa koʼã testimónio rohupyty peteĩ ñehaʼarõ, ha ore jerovia imbareteve, añetehápe ikatu peve roñeʼẽ Jesús rérape ha umi yvyramáta jepe iñeʼẽrendu orerehe, térã umi yvyty, térã umi yguasu ypuʼã.

7 Upevére, Tupã Ñandejára ohechauka oréve orekangyha roikua hag̃ua haʼeha igrásia rupive, ha pyʼaporãite oguerekóva rupi yvypóra raʼykuéra ndive, roguerekoha puʼaka rojapo hag̃ua koʼã mbaʼe.

8 Péina ápe, tuicha ha techapyrã Ñandejára rembiapokuéra. Imbaʼeñemimbykuéra pypuku niko hasyete jaikuaapa hag̃ua; arakaʼeve yvypóra ndoikuaapamoʼãi hapekuéra. Ha ndaipóri avave yvypóra oikuaáva umi hape haʼe ndohechaukáiramo chupe; upévare, joykeʼykuéra, ani pembotove Tupã rrevelasiõnguéra.

9 Ha péina ápe, iñeʼẽ puʼaka rupive yvypóra oñemoĩvaʼekue yvy ape ári, yvy ojejapovaʼekue iñeʼẽ puʼaka rupive. Upévare, Tupã ikatúramokuri oñeʼẽ, ha pe yvóra oiko; ha oñeʼẽ ha pe yvypóra ojejapo, O upéicharõ, mbaʼére piko ndaikatumoʼãi heʼi pe yvýpe, térã pe ipo ojapovaʼekuépe oĩva hiʼári, haʼe oipotaháicha ha oikuaaháicha?

10 Upévare, joykeʼykuéra, ani peñemoñeʼẽse Ñandejárape, ha katu pehendu ñemoñeʼẽ ipógui oúva. Ha péina ápe, peẽ peikuaa haʼe oñemoñeʼẽha arandúpe, ha hustísia, ha tuicha poriahuverekópe, opa hembiapokuéra ári.

11 Upévare, che joykeʼykuéra ahayhuetéva, peñemoĩporã hendive Cristo expiasiõ rupive, Taʼýra Unihénito, ha ikatúta pehupyty jeikovejey, pe jeikovejey puʼaka rupi oĩva Cristo-pe, peñemoĩ hag̃ua Cristo yva pyahúramo Tupã renondépe, peguerekóvo jerovia, ha pehupyty rire hese peteĩ ñehaʼarõ verapy haʼe ojehechauka mboyve hoʼópe.

12 Ha koʼág̃a, ahayhuetéva, ani pemombaʼeguasu haʼehague peẽme koʼã mbaʼe; ha mbaʼe rehe piko nañañeʼẽmoʼãi Cristo expiasiõ rehe, ha jahupyty peteĩ jeikuaaporã chugui, ha jahupyty jeikuaaporã pe jeikovejey ha pe yvóra oútavagui?

13 Péina ápe, che joykeʼykuéra, oprofetisáva, toprofetisa yvyporakuéra oikuaa hag̃ua; pe Espíritu oñeʼẽgui añetegua ha ndaijapúi. Upévare, oñeʼẽ umi mbaʼe haʼeháicha añetépe, ha umi mbaʼe haʼetaháicha añetépe; upévare, koʼã mbaʼe ojehechauka ñandéve tesakãme, ñane ánga ojesalva hag̃ua. Ha katu péina ápe, ndahaʼéi ñande añónte testígo koʼã mbaʼégui; Tupã heʼígui avei koʼãva profetakuéra ymaguarépe.

14 Ha katu péina ápe, judio-kuéra haʼékuri peteĩ tavayguakuéra ipyʼahatãva; ha ndoipotái hikuái umi ñeʼẽ hesakãva, ha ojuka profetakuérape, ha oheka mbaʼe ikatuʼỹva oikũmby. Upévare, ohechaʼỹ rupi hikuái, techaʼỹ oúva chupekuéra omaña haguére hikuái mombyryve pe jehupytyrãgui, hoʼamantevaʼerã hikuái; Tupã oipeʼágui chuguikuéra tesakã, ha omeʼẽ chupekuéra heta mbaʼe ndaikatúiva oikũmby, upéicha oipotágui hikuái. Ha péicha oipotágui hikuái Tupã ojapókuri, oñepysanga hag̃ua.

15 Ha koʼág̃a che, Jacob, ajegueraha pe espíriture aprofetisa hag̃ua; ahechágui pe Espíritu oĩva che pype rupi, judio-kuéra oñepysanga rupi orrechasáta pe ita ikatumoʼãhague ári omopuʼã hikuái ha oguereko peteĩ pyenda mbarete.

16 Ha katu péina ápe, umi escritura-pe heʼiháicha, kóva ko ita haʼéta tuichavéva, ha ipaháva, ha péva añónte haʼéta pyenda mbarete, judio-kuéra ikatuhápe omopuʼã.

17 Ha koʼág̃a, peẽ ahayhuetéva, mbaʼéicha piko koʼãva, orrechasa rire upe pyenda mbarete, ikatúta arakaʼeve omopuʼã hiʼári, haʼe hag̃ua pe ita upéva ári oñemopuʼãva?

18 Péina ápe, che joykeʼykuéra ahayhuetéva, amyesakãta peẽme kóva ko mbaʼeñemimby; nahániriramo haʼéta nachembaretéigui Espíritu-pe, ha añepysangágui pe jepyʼapy aguerekóva pende rehe rupi.