Jacob Kuatiañeʼẽ
Nefi Joykeʼy

1 Ha péina ápe, ojehu ohasáma 55 ary Lehi osẽhague Jerusalén-gui; upévare, Nefi omeʼẽ chéve, Jacob, peteĩ tembiapoukapy umi pláncha michĩvéva rehegua, ojehaihápe koʼã mbaʼe.

2 Ha omeʼẽ chéve, Jacob, peteĩ tembiapoukapy ahaivaʼerãha mbovymi koʼã pláncha ári umi mbaʼe chéve g̃uarã hepyvéva; ha ani hag̃ua ahai, ndahaʼéiramo mbykymi, kóva ko tavayguakuéra rembiasakue rehe hérava Nefi tavayguakuéra.

3 Heʼígui itavayguakuéra rembiasakue ojehaivaʼerãha ambue iplanchakuéra ári, ha che añongatuvaʼerãha koʼã pláncha ha ambohasa che ñemoñarépe, ñemoñareʼatýgui ñemoñareʼatýpe.

4 Ha oĩramo mboʼepy imarangatúva, térã rrevelasiõ tuicháva, térã profesía, che ahaivaʼerãha umi ijapytégui imbaʼeguasuvéva koʼã pláncha ári, ha ahai umívagui ikatuháicha, Cristo rehe, ha ore tavayguakuéra ñeimeporãrãre.

5 Jerovia ha tuicha jepyʼapy rupi, añetehápe ojehechauka oréve ore tavayguakuéra rehegua, umi mbaʼe ojehútava chupekuéra.

6 Ha roguereko avei heta rrevelasiõ, ha heta espíritu profesía rehegua; upévare, roikuaa Cristo ha irréinogui, ouvaʼerãha.

7 Upévare rombaʼapo jesarekópe ore tavayguakuéra apytépe, roipyʼamovã hag̃ua chupekuéra ou hag̃ua hikuái Cristo-pe, ha ohupyty Tupã pyʼaporã, oike hag̃ua hikuái ipytuʼúpe, ani hag̃ua mbaʼevéicharõ haʼe oñeʼẽmeʼẽ iñekoʼõime ndoikemoʼãiha hikuái, ñembopochypeguaréicha umi jeipyʼaraʼã árape Israel raʼykuéra oĩramoguare taveʼỹme.

8 Upévare, toipota Tupã roipyʼamovã mayma yvypórape ani hag̃ua oñemoĩ Tupãre, ombopochy hag̃ua chupe, ha katu opa yvypóra toguerovia Cristo-pe, ha tomaña iñemanóre, ha togueraha ikurusu ha togueropuʼaka yvóra ñembohory; upévare, che, Jacob, ajagarra che ári akumpli che joykeʼy Nefi rembiapoukapy.

9 Koʼág̃a Nefi oñepyrũ ituja, ha ohecha pyaʼéma omanotaha; upévare, omoñandyry peteĩ yvypórape haʼe hag̃ua itavayguakuéra rréi ha sãmbyhyhára, umi rreikuéra rreinádo reheguáicha.

10 Ha tavayguakuéra ohayhuetereígui Nefi-pe, haʼégui chupekuéra g̃uarã tuicha moʼãhára, oiporúgui Labán kysepuku oñorairõ hag̃ua hesekuéra, ha ombaʼapógui opa hiʼára pukukue iñeimeporã.

11 Upévare, tavayguakuéra oñongatuse manduʼa hérare. Ha umi orreináva hendaguépe oñehenói tavayguakuérare, Nefi mokõiha, Nefi mbohapyha, ha upéicha, umi rreikuéra rreinádoicha; ha upéicha oñehenói chupekuéra umi tavayguakuérare, tahaʼe haʼéva herakuéra.

12 Ha ojehu Nefi omano.

13 Ha koʼág̃a umi tavaygua ndahaʼéiva lamanita haʼe nefita; upevére, oñehenói chupekuéra nefita-kuéra, jacobita-kuéra, zoramita-kuéra, lamanita-kuéra, lemuelita-kuéra, ha ismaelita-kuéra.

14 Ha katu che, Jacob, ndaikuaaukamoʼãi chupekuéra koʼã térã rupi, ha katu ahenóita lamanita-kuéra umi ohundiséva Nefi tavayguakuérape, ha umi ohayhúva Nefi-pe ahenóita nefita-kuéra, térã Nefi tavaygua, umi rreikuéra rreinádope oĩháicha.

15 Ha koʼág̃a ojehu Nefi tavayguakuéra, rréi mokõiha rreinádo guýpe, oñepyrũ omohatã hikuái ikorasõ, ha oñemeʼẽʼimi tembiapo añáme, ha hembireko ha ikuña hetase, David ojapo haguéicha yma, ha avei Salomón, itaʼýra.

16 Heẽ, ha oñepyrũ avei oheka hikuái heta óro ha pláta, ha oñepyrũ oñembotuichaʼimi hikuái orgúllope.

17 Upévare che, Jacob, haʼe koʼã ñeʼẽ chupekuéra amboʼe aja témplope, ahupytyraẽvo che rembiapoukapy Ñandejáragui.

18 Che, Jacob, ha che joykeʼy José roñekonsagrágui haʼe hag̃ua sacerdote ha mboʼehára ko távape, Nefi po rupive.

19 Ha romombaʼe ore rembiapo Ñandejára renondépe, rojagarrávo orejehe pe ojejeruréva oréve, romoĩvo ore akã ári tavayguakuéra angaipa noromboʼéiramo chupekuéra Tupã ñeʼẽ opa jesarekópe; upévare, rombaʼapóvo opa ore puʼakápe huguykuéra ani hag̃ua hoʼa ore ao ári; ndaʼupéichairamo huguykuéra hoʼáne ore ao ári, ha ndorojejuhumoʼãi maraʼỹme ára pahápe.