1 Ha péina ápe, che, Jacob, añeʼẽse peẽ pene korasõ potĩvape. Pejerovia Tupãre apytuʼũ mbaretépe, ha peñemboʼe chupe jeroviaitépe, ha haʼe penemoangapyhýta pende jeikoʼasýpe, ha oñorairõta penderehe, ha omboúta hustísia umi ohekáva ári pene ñehundi.

2 O maymáva peẽ pene korasõ potĩva, pemopuʼã pene akã ha pehupyty pe Tupã ñeʼẽ iporãitéva, ha penderory imborayhúpe; ha ikatúta pejapo, pene apytuʼũ noñemovãiramo, tapiaite peve.

3 Ha katu, ái, ái, peẽ pene korasõ naipotĩrivagui, ko árape pendekyʼáva Tupã renondépe; napeñearrepentíriramo pe yvy oñemoñeʼẽngáita peẽ rupi; ha lamanita-kuéra, ndaikyʼáiva peẽicha, oñemoñeʼẽngáiva jepe ñeʼẽngái vaietépe, pendejopýta jepe ñehundi peve.

4 Ha ára pyaʼe ou, peẽ napeñearrepentíriramo haʼekuéra ohupytýta pende yvy jehejapyre, ha Tupã Ñandejára oguenohẽta hekojojávape pende apytégui.

5 Péina ápe, lamanita-kuéra pende joykeʼy, ndapehayhúiva ikyʼáre ha pe ñeʼẽngái ouvaʼekue ipirekuéra ári rupi, hekojojave pendehegui; ndahesaráigui hikuái Ñandejára rembiapoukapýgui, oñemeʼẽvaʼekue ñande rúpe—oguerekovaʼerãha hikuái peteĩ tembirekónte, ha noñemokuñaivaʼerãha, ha ndaiporivaʼerãha tembiapokyʼa ijapytepekuéra.

6 Ha koʼág̃a, oñehaʼã hikuái iñeʼẽrendu ko tembiapoukapýre; upévare, oñehaʼã rupi hikuái iñeʼẽrendu ko tembiapoukapýre, Tupã Ñandejára nohundimoʼãi chupekuéra, ha katu iporiahuverekóta hendivekuéra; ha og̃uahẽta ára oikotaha chuguikuéra peteĩ tavayguakuéra jehovasapyre.

7 Péina ápe, imenakuéra ohayhu hembirekópe, ha hembirekokuéra ohayhu iménape; ha imenakuéra ha hembirekokuéra ohayhu imitãnguérape; ha ijeroviaʼỹ ha ijehayhuʼỹ pende rehe haʼe ituvakuéra rembiapovaikue rupi; upévare, mboýpa peẽ pene porãve chuguikuéra, pende Apohare guasu renondépe?

8 O che joykeʼykuéra, akyhyje napeñearrepentíriramo pene angaipágui ipirekuéra morotĩvetaha pende pirégui, pejegueraha vove hendivekuéra Tupã apykajegua renondépe.

9 Upévare, ameʼẽ peẽme peteĩ tembiapoukapy, haʼéva Tupã ñeʼẽ, anive hag̃ua peñeʼẽvai hesekuéra pe ipire hũ haguére; ha ani peñeʼẽvai hesekuéra imbaʼekyʼa rupi; ha katu penemanduʼavaʼerã pene mbaʼekyʼáre, ha penemanduʼavaʼerã imbaʼekyʼakuéra ouhague ituvakuéra rupi.

10 Upévare, penemanduʼavaʼerã pende raʼykuérare, mbaʼéichapa pejopyvaʼekue ikorasõkuéra techapyrã pemeʼẽvaʼekue chupekuéra rupi; ha penemanduʼáke avei, penderekokyʼa rupi, ikatuha pegueraha pende raʼykuérape ñehundípe, ha iñangaipakuéra oñembyatýta pene akã ári pe ára pahápe.

11 O che joykeʼykuéra, pehendu che ñeʼẽnguéra; pemokyreʼỹ pene ánga kuaapy; pejeityvyro pepáy hag̃ua pe ñemano kerarechágui; ha pejehekýi umi jehasaʼasýgui oĩva añaretãme ani hag̃ua oiko pendehegui aña ángel, pejeity hag̃ua pe lágo tata ha asufreguiguápe haʼéva pe ñemano mokõiha.

12 Ha koʼág̃a che, Jacob, añeʼẽve heta mbaʼe Nefi tavayguakuérape, amomarandúvo chupekuéra pe tekokyʼa ha tekotieʼỹ rehe, ha opáichagua angaipáre, haʼévo chupekuéra koʼãva ogueruha heta mbaʼe ivaietereíva.

13 Ha ni peteĩ pehẽnguemi ojapovaʼekue umi che tavayguakuéra, oñepyrũmava heta, ndaikatúi ojehai koʼã pláncha ári; ha katu heta hembiapokuéra ojehai umi pláncha tuichavéva ári, ha iñorairõguasu, ha ijeikovaikuéra, ha irreikuéra rreinádo.

14 Koʼã pláncha oñembohéra Jacob pláncha, ha ojejapovaʼekue Nefi po rupi. Ha che ambopaha koʼã ñeʼẽ.