1 Be luk, mi, Jekob, bae mi toktok long yufala we hat blong yufala i klin. Luk long God wetem strong tingting, mo prea long hem wetem fet we i bigwan tumas, mo bae hem i leftemap tingting blong yufala long ol hadtaem blong yufala, mo bae hem i toktok from stamba tingting blong yufala, mo sendem daon jastis long olgeta we oli lukaotem blong prapa spolem gud yufala.

2 O yufala evriwan we hat blong yufala i klin, leftemap hed blong yufala mo kasem gudfala toktok blong God, mo kakae gud long lav blong hem; from yufala i save mekem, sapos ol tingting blong yufala oli stap strong blong oltaem.

3 Be, sore tumas, sore tumas, long yufala we hat blong yufala i no klin, we yufala i doti long dei ia long fored blong God; from se, sapos yufala i no sakem sin blong yufala, bae Lod i sakem wan strong nogud tok long graon from yufala; mo Ol Man blong Leman, we oli no doti olsem yufala, be Lod i bin sakem wan strong nogud tok long olgeta we i wan strong nogud tok we i soa tumas, bae oli mekem nogud long yufala i go kasem taem we oli prapa spolem gud yufala.

4 Mo taem i kam kwik tumas, se sapos yufala i no sakem sin blong yufala, bae Ol Man blong Leman oli tekem graon blong yufala we yufala i kasem long ol papa blong yufala, mo Lod God bae i lidim olgeta we oli stret mo gud oli aot long medel blong yufala.

5 Luk, Ol Man blong Leman ol brata blong yufala, we yufala i no laekem olgeta from ol doti blong olgeta mo strong nogud tok we oli sakem mo i bin kam long skin blong olgeta, oli moa stret mo gud bitim yufala; from oli no bin fogetem komanmen blong Lod, we hem i bin givim long papa blong yumi—blong bae oli gat wan waef nomo, mo ol narafala woman, bae oli no gat wan, mo oli no mas gat ol fasin blong stap slip olbaot long medel blong olgeta.

6 Mo nao, komanmen ia, oli wokhad blong obei; taswe, from oli wokhad blong obei long komanmen ia, Lod God bae i no prapa spolem gud olgeta, be bae i gat sore long olgeta; mo wan dei bae Lod i blesem olgeta.

7 Luk, ol hasban blong olgeta oli lavem ol waef blong olgeta, mo ol waef blong olgeta oli lavem ol hasban blong olgeta; mo ol hasban mo ol waef blong olgeta oli lavem ol pikinini blong olgeta; mo fasin blong no bilif blong olgeta mo fasin blong no laekem yufala i from ol rabis fasin blong ol papa blong olgeta; taswe, ?hamas moa nao yufala i gud bitim olgeta, long ae blong bigfala Krieta blong yufala?

8 O, ol brata blong mi, mi fraet se sapos yufala i no sakem ol sin blong yufala bae ol skin blong olgeta bae i moa waet bitim ol skin blong yufala, taem we yufala i kam stanap long fored blong jea blong God wetem olgeta.

9 Taswe, wan komanmen mi givim long yufala, we i toktok blong God, se yufala i nomo toktok nogud agensem olgeta from skin blong olgeta i dak; mo tu, bae yufala i nomo toktok nogud long olgeta from ol doti blong olgeta; be bae yufala i tingbaot ol doti blong yufala nomo, mo tingbaot se ol doti blong olgeta i bin kam from ol papa blong olgeta.

10 Taswe, bae yufala i tingbaot ol pikinini blong yufala, olsem wanem we yufala i bin mekem hat blong olgeta i harem nogud from eksampol we yufala i bin soem long fored blong olgeta; mo tu, tingbaot se, from ol doti blong yufala, yufala i save lidim ol pikinini blong yufala oli go lus, mo ol sin blong olgeta bae i foldaon long hed blong yufala long las dei.

11 O, ol brata blong mi, lisin gud long ol toktok blong mi; wekemap ol paoa blong sol blong yufala; seksekem yufala bakegen blong wekap long slip blong ded; mo mekem yufala i go fri long ol soa blong hel blong mekem se bae yufala i no kam ol enjel blong devel, blong oli sakem yufala i go long lek blong faea mo salfa, we i nambatu ded.

12 Mo nao, mi, Jekob, mi bin talem plante moa samting long ol pipol blong Nifae, blong wonem olgeta agensem fasin ia blong slip wetem man o woman bifo long mared mo fasin blong gat rabis tingting, mo evri kaen sin, mo mi bin talem long olgeta ol nogud samting we bae i hapen long olgeta sapos oli mekem ol rabis samting ia.

13 Mo wan handred pat blong ol histri blong pipol ia, we nao i stat blong kam plante, oli no save raetem olgeta long ol buk ia; be plante long ol histri ia, mi bin raetem olgeta long olgeta buk we oli moa bigfala, wetem ol wo blong olgeta, mo ol rao blong olgeta, mo ol rul blong ol king blong olgeta.

14 Olgeta buk ia oli singaotem olgeta ol buk blong Jekob, mo Nifae i mekem olgeta wetem han blong hem. Mo mi stop blong talemaot ol toktok ia.