1 Na afei ɔbaa dɛ afe a ɔtɔ do eduanan ebiasa wɔ atsɛmbuafo no hɔn aber do mu no, wentwiwentwi biara ennsi Nephifo no mu kã ahantanyɛ kakraabi a ɔbaa asɔr no mu no, ɔno na ɔmaa etuatsew kakraabi baa dɔm no mu, na wosiesiee dɛm nsɛm yi wɔ mfe eduanan ebiasa dze rokɔ n’ewiei no mu.

2 Na wentwiwentwi biara ennsi dɔm no mu wɔ mfe eduanan anan no mu; eso wentwiwentwi biara ennsi wɔ afe a ɔtɔ do eduanan enum no mu.

3 Na ɔbaa dɛ afe a ɔtɔ do eduanan esia no mu no, nyew, wentwiwentwi na etuatsew pii sii; na iyi maa hɔn mu dodowara fii Zarahemla asaase do, na wɔkɔr asaase a ɔwɔ ^aetsifi afamu no do kɛtsenaa hɔ.

4 Na wotuu kwan kɔr ekyir kodur dɛ wɔkɔtoo ^aesu taaye akɛse nye esutsen pii.

5 Nyew, na wɔpetsee asaase no nyinara do, kɔr beebiara a hɔn a wodzii kan kɛtsenaa asaase no do no nnyɛɛ no amamfo na ndupɔn nnyi hɔ.

6 Na afei asaase ne beebiara nnyɛ amamfo, gyedɛ ndupɔn nko; na osian dɔm a wodzii kan kɛtsenaa hɔ no mbrɛ wosii ^asɛɛ hɔn no ntsi na wɔfrɛɛ asaase no ^bamamfõ.

7 Na ndupɔn a ɔwɔ asaase n’enyi do no suar dze, naaso dɔm a wɔkɔr hɔ no nyaa nyimdzee mbordo wɔ adanpa ne si, dɛm ntsi wosisii adan pa na wɔtsenaa mu.

8 Na ɔbaa dɛ wɔdɔree na wɔtserɛwee, dze fii asaase no po mu afamu dze kɔr n’etsifi afamu, na wɔdɔree araa ma wɔhyɛɛ ase dɛ wɔrekata asaase no nyina enyi, fitsi po no n’anaafo dze kɛpem po no n’etsifi, fitsi ^apo n’anee afamu dze kɛpem po no boka.

9 Na nkorɔfo a wɔwɔ asaase no n’etsifi afamu no tsenaa ntamadan na adan pa mu, na wogyaa dua biara a ofiir asaase n’enyi do ma onyinii bɛyɛɛ odupɔn ama mber bi a ɔbɛba no woeenya ndupɔn dze esisi hɔn adan, nyew, hɔn nkurow akɛse, na hɔn temple, hɔn nhyiamudan nye hɔn krɔnkrɔnbea, na hɔn adan ahorow nyina.

10 Na ɔbaa dɛ osiandɛ nna ndupɔn ho yɛ na dodow wɔ etsifi mantam no mu ntsi, wɔdze pii guu ^awusihɛn mu kɔr hɔ.

11 Na dɛm maa nkorɔfo a wɔwɔ asaase n’etsifi afamu hɔ no tumii dze ndua sisii adan pa na wɔ kyekyeer nkurow akɛse.

12 Na ɔbaa dɛ ^aAmmon no dɔm pii a wɔyɛ Lamanfo no so kɔr dɛm asaase yi do.

13 Na afei dza dɛm nkorɔfo yi yɛe no, hɔn mu pii kyerɛɛw ho nsɛm dze siei a ɔyɛ tsitsir na ɔdɔɔsõ na ɔfa hɔn ho.

14 Mbom hwɛ, dza dɔm yi yɛe no, nyew, dza ɔfa Lamanfo nye Nephifo ho, nye hɔn akõkoekõ, na wentwiwentwi, na etuatsew, nye hɔn nsɛmpa nkae, na hɔn nkɔnhyɛ, nye hɔn wusihɛn mu akwantu na hɔn wusihɛn mpamee, nye hɔn ^atemple ne nsisii, na hɔn nhyiamudan, nye hɔn krɔnkrɔnbea ne nsisii na hɔn ndzeyɛtsenenee nye hɔn emumuyɛdze, nye hɔn ewudzi nye hɔn edwotwa nye hɔn epoobɔ nye ekyiwadze, nye ndwamambɔ ahorow nyina, sɛ wɔkyɛ mu ɔha a worunntum nnkyerɛw ne nyinara wɔ nwoma yi mu.

15 Mbom hwɛ, nwoma pii na kyerɛwsɛm horow pii wɔ hɔ, na Nephifo tsitsir na wɔdze siei.

16 Na Nephifo no dze ^amaa fi ebusuasantsen kor kɔ kor so do kɛpeem dɛ wɔhwee ase wɔ mbrato mu ma wokum hɔn, wɔbɔɔ hɔn epoo, wɔbɔɔ hɔn atwee, wɔbɔɔ hɔn petsee asaase enyi, ma wɔkɔforaforaa Lamanfo no mu kesii dɛ ^bwoyii dzin a ɔda hɔn do dɛ wɔyɛ Nephifo no fii hɔ, na wɔbɛyɛɛ emumuyɛdze, yerɛyerɛw, na ndam, nyew, wɔdanee bɛyɛɛ dɛ Lamanfo mpo.

17 Na afei masan aba me nsɛm do bio; dɛm ntsi, dza mekãe a ɔfa hɔn wentwiwentwi nye basabasayɛ pii ho na akõkoekõ nye etuatsew a ɔbaa Nephi no dɔm mu no ebotwa mu kɔ.

18 Atsɛmbuafo no hɔn mfe eduanan esia no baa ewiei.

19 Na ɔbaa dɛ nna wentwiwentwi pii da ho wɔ asaase no do, nyew, wɔ afe a ɔtɔ do eduanan esuon, na eduanan awɔtwe no so mpo mu.

20 Naaso iyi nyinara mu no nna Helaman tse atsɛmbu egua no do wɔ pɛrpɛrdzi na pɛrpɛryɛ mu; nyew, ɔbɔɔ mbɔdzen dzii Nyame n’ahyɛdze, n’atsɛmbu na ne mbrasɛm do dɛ mbrɛ ɔsɛ, na ɔyɛɛ dza oye wɔ Nyame enyim aber nyina; na ɔnantseew n’egya n’anamɔn mu ma dɛm ntsi ɔyɛɛ prɔmprɔm wɔ asaase no do.

21 Na ɔbaa dɛ onyaa mbabanyin beenu. Ɔdze ^aNephi ne dzin too panyin no, na kakraba no so, ɔdze ^bLehi ne dzin too no. Na wɔhyɛɛ ase nyinii wɔ Ewuradze mu.

22 Na ɔbaa dɛ akõkoekõ na wentwiwentwi no hyɛɛ ase dɛ ɔrobɔ adze kakra, wɔ Nephifo no mu, dze kɛpeem ber a afe eduanan awɔtwe rokɔ ewiei no, wɔ ber a atsɛmbuafo hwɛ Nephi no nkorɔfo do no.

23 Na ɔbaa dɛ afe a ɔtɔ do eduanan akron wɔ atsɛmbuafo no hɔn aber do no, nna asomdwee da ho wɔ asaase no nyinara do gyedɛ nsumaamu fɛkuw a ^aGadianton edwotwafo no atsetsew wɔ asaase ne mbea a nyimpa pii tsetsee nyinara a dɛm aber no nna hɔn a wɔyɛ ɔman no ne banodzifo no nnyim hɔn; dɛm ntsi wɔannsɛɛ hɔn wɔ asaase no do.

24 Na ɔbaa dɛ dɛm afe yi ara mu no prɔmprɔmyɛ kɛse baa asɔr no mu ma dɔm mpempem kɔdɔɔm asɔr no, ma wonumaa hɔn kɔr nnuho mu.

25 Na asɔr no no prɔmprɔm a ɔyɛe, na nhyira a wohuee guu dɔm no do no yɛɛ kɛse araa ma asɔfo mpanyimfo nye akyerɛkyerɛfo no mpo hɔn ho boow hɔn kɛse.

26 Na ɔbaa dɛ Ewuradze n’edwuma yɛɛ prɔmprɔm ma akra pii nyaa enuma na wɔbɛkãa Nyankopɔn n’asɔr ho, nyew mpempem na wɔkɛkãa hɔnho.

27 Dɛm ma yehu dɛ Ewuradze yɛ mbɔbɔrhufo ma hɔn a wɔdze akoma a no mu tsew bɔ ne dzin krɔnkrɔn no.

28 Nyew, dɛm ma yehu dɛ wobue sor ^aabobow ma ^bobiara, nkanka hɔn a wɔbɛgye Jesus Christ a ɔyɛ Nyankopɔn ne Ba no ne dzin edzi.

29 Nyew, yehu dɛ obiara a ɔpɛ, na obosuo Nyankopɔn ^an’asɛm a ɔyɛ ^bndam na tum wɔ mu, dza obotum etwitwa abɔnsam ne ndabraba nye ne mfir a oesua na ne ndaadaa nyina mu, na ɔafa nyimpa a ɔwɔ Christ no edua kwan ^cheaheaba na nkekãnkekã no mu etwa ^dawerɛhow no bun no a ɔwɔ hɔ daapem a woesiesie ato hɔ ama emumuyɛfo no—

30 Na ɔagye hɔn akra, nyew hɔn akra a onnwu da no esi Nyankopɔn ^an’abanyimfa wɔ sor ahenman no mu, ma wɔnye Abraham, na Isaac, nye Jacob, nye hɛn egyanom ahotseweefo no nyina atsena ase, na worimmfi hɔ nnkɔ beebiara bio.

31 Na dɛm afe yi mu enyigye hyɛɛ Zarahemla asaase do mã nye mbea nyina a etwa ho ehyia, wɔ asaase nyina a ɔyɛ Nephifo dze mpo no do.

32 Na ɔbaa dɛ nda a aka ma mfe eduanan akron aba ewiei no, wonyaa asomdwee nye enyigye mbordo; nyew, wonyaa asomdwee na enyigye kɛse wɔ afe a ɔbɔ do eduonum no so mu wɔ atsɛmbuafo no hɔn aber do.

33 Na atsɛmbuafo hɔn afe a otsĩa eduonum-biako mu no nna asomdwee so wɔ hɔ, na mbom ahantanyɛ na ɔhyɛɛ ase dɛ ɔrehɛn asɔr no mu—ɔannhɛn Nyankopɔn n’asɔr no mu, mbom ɔhɛɛn hɔn a wɔagye ato mu dɛ wɔdɔm Nyankopɔn n’asɔr no mu.

34 Na ^aahantanyɛ dodow ntsi wɔtseetsee hɔn enuanom no mu pii. Afei dɛm adze yi yɛ ebusudze kɛse, na iyi maa hɔn mu ahobrɛadzefo no tseetsee kɛsenara, na woduaa amandzehu pii mu.

35 Naaso iyi nyina mu no wɔfaa ^aakɔnkye na wɔbɔɔ ^bmpaa mpɛn pii, na wonyaa ahoɔdzen mu ahoɔdzen wɔ hɔn ^cahobrɛadze mu, na wonyaa gyedzi a otsim wɔ Christ mu, iyi maa dɛw na awerɛkyekyer hyɛɛ hɔn akra mã, nyew, ^dɔtseew hɔn akoma mu na ɔmaa hɔn ^eahosan so mpo, dɛm ahosan yi bae osiandɛ ^fwogyaa hɔn akoma mu maa Nyankopɔn.

36 Na ɔbaa dɛ mfe eduonum ebien so baa ewiei asomdwee mu, mbom nna ahantanyɛ kɛse kɛse ahyɛ dɔm no mu binom akoma mu mã; osian hɔn ^aahonya dodow nye hɔn prɔmprɔm a wɔayɛ wɔ asaase no do ntsi; na onyinii wɔ hɔn mu fi ber to ber.

37 Na ɔbaa dɛ afe a ɔtɔ do eduonum ebiasa mu wɔ atsɛmbuafo aber do no, Helaman wui, na ne babanyin panyin Nephi bɛhyɛɛ n’ananmu dzii adze. Na ɔbaa dɛ ɔdze pɛrpɛrdzi nye pɛrpɛryɛ tsenaa atsɛmbu egua no do; nyew, odzii Nyankopɔn ne mbrasɛm do, na ɔnantseew n’egya n’akwan mu.