1 Na afei ɔbaa dɛ ^aSamuel Lamannyi no hyɛɛ nkɔm akɛse pii a woenntum annkyerɛw.

2 Na hwɛ, ɔsee hɔn dɛ: Hwɛ, mema hom asɛnkyerɛdze; na mfe enum bio bɛba no, na hwɛ Nyankopɔn ne Ba bɛba abɔpon hɔn a wɔbɛgye ne dzin edzi no.

3 Na hwɛ, iyi nye ne mbae ber mu ^aasɛnkyerɛdze a medze rema hom; na hwɛ, kan kɛse bi bɛhyerɛn wimu na ansaana ɔbɛba no sum biara rennhyɛ dɛm anafua no araa ma aayɛ nyimpa dɛ gyama ɔyɛ adzekyee.

4 Dɛm ntsi, adzekyee na adzesaa na adzekyee bio bɛyɛ dɛ mbrɛ ɔyɛ da kor na adzesaa nnyi hɔ; na iyi na ɔbɛyɛ asɛnkyerɛdze dze ama hom; na hom bohu dɛ ewia epue na ɔakɔtɔ so; dɛm ntsi wobohu ampaara dɛ ɔyɛ nda ebien na adzesaa; naaso adzesaa no rennyɛ sum; na dɛm adzesaa no ekyir na ^awɔbɔwo no.

5 Na hwɛ, ^anworaba fofor bi bopue a hom nnhun ne saso da; na iyi so bɛyɛ asɛnkyerɛdze ama hom.

6 Na hwɛ, nnyɛ ne nyinara nye iyi, na asɛnkyerɛdze nye anwanwadze pii bopue wimu.

7 Na ɔbɛba dɛ homho bɔbow hom, na ayɛ hom nwanwa araa ekesi dɛ hom ^abɔhwehwe famu.

8 Na ɔbɛba dɛ obiara a ^aɔbɛgye Nyankopɔn ne Ba no edzi no, obenya daapem nkwa.

9 Na hwɛ, dɛm na Ewuradze maa no bɔfoe bɛhyɛɛ me dɛ membra mebɛkã nkyerɛ hom; nyew ɔhyɛɛ me dɛ membɛhyɛ nkɔm wɔ dɛm ndzɛmba yi ho nkyerɛ hom; nyew, ɔsee me dɛ: Tsẽa mu kã kyerɛ nkorɔfo yi dɛ, hom nnu homho na hom nsiesie Ewuradze no kwan no mu.

10 Na hwɛ, osiandɛ meyɛ Lamannyi na makã nsɛm a Ewuradze ahyɛ me dɛ menkã, na osiandɛ otsia hom kɛse ntsi, hom bo efuw me na hom rohwehwɛ asɛɛ me, na hom ^aeyi me edzi efi hom mu.

11 Na hom bɛtse me nsɛm, osiandɛ, iyi ho ntsi na mibegyinaa kurow yi n’afasu yi do, ama hom aatse na hom eehu Nyankopɔn n’atsɛmbu no a ɔrotweɔn hom osian hom emumuyɛ ntsi, na bio ama hom eehu nnuho ne ngyinado.

12 Na bio, ama hom eehu Jesus Christ, Nyankopɔn ne Ba no, sor nye asaase ^aEgya, adze nyina Bɔadze fitsi ahyɛse no ne mbae; nye ne mbae ho asɛnkyerɛdze, ama hom aagye ne dzin no edzi.

13 Na sɛ hom gye ne ^adzin dzi a hom bonu homho wɔ hom bɔn nyina ho, na hom nam ^bne ndwuma pa do enya bɔnfakyɛ.

14 Na hwɛ, nsɛnkyerɛdze bio so a medze rema hom nye dza ɔfa no wu ho.

15 Na hwɛ, ɔsɛ dɛ owu ama ^ankwagye aaba; nyew, otwar dɛ ɔba no dɛm, naaso ohia dɛ owu, ama ^bwusoɛr aaba, ama wɔnam dɛm kwan no do wɔdze adasa aaba Ewuradze enyim.

16 Nyew, hwɛ, dɛm owu yi na ɔdze owusoɛr bɛba, na ^aɔbɔpon adasamba nyina efi owu a odzi kan no mu—dɛm sunsum mu owu no a ɔwɔ hɔ ma adasamba nyina no, wɔnam Adam ^bn’asehwe no do ^cetwa hɔn efi Ewuradze enyim akyen, na iyi na wɔfa no dɛ ɔyɛ ^dowu dze ma honam mu ndzɛmba na sunsum mu ndzɛmba so.

17 Mbom hwɛ, Christ no wusoɛr no ^abɔpon adasamba, nyew, adasamba nyina mpo, na ɔdze hɔn asan aba Ewuradze enyim.

18 Nyew, na ɔdze nnuho nhyehyɛɛ aba, dɛ obiara a obonu noho no, worunntwa no na wɔnntow no nnkyen ogya mu; na mbom obiara a onnu noho no wobotwa no na wɔatow no akyen ogya mu; na sunsum mu owu aba hɔn do bio, nyew, owu mprɛnu, na woetwa hɔn akyen bio dɛ ɔyɛ ndzɛmba a ɔfa tsenenee ho.

19 Dɛm ntsi hom nnu homho, hom nnu homho, na sɛ hom nyim dɛm ndzɛmba yi nyina na sɛ hom annyɛ a, hom dze homho bɛba abɛhyɛ afɔbu ase, na wɔdze hom aba owu mprɛnu mu.

20 Mbom hwɛ, dɛ mbrɛ mekãa kyerɛɛ hom a ɔyɛ asɛnkyerɛdze kor so, dza ɔyɛ no wu ho ^aasɛnkyerɛdze no, hwɛ, da no a obowu no ewia ^bbɛhyɛ sum na ɔbɔpow dɛ ɔdze ne kan ma hom; bosoom nye nworaba so dɛmara; na kan remmba asaase yi enyi do, fitsi ber a obowu dze kesi nda ^cebiasa ntamu mpo, dze ekesi aber a ɔbɔsoɛr efi owu mu bio.

21 Nyew, aber a obegyaa no sunsum mu no, ^awimu bɔbobɔmu na enyinam atsetsew wɔ ndɔnhwer pii mu, na asaase bɔwosow na oehihim; na mbotan a ɔwɔ asaase enyi do, dza ɔwɔ asaase do nye n’ase nyina a hom nyim aber yi mu dɛ ɔyɛ dzen, anaa dɛ ɔyɛ botantsim kor ^bbɛpaapaa;

22 Nyew, hɔn mu bɛpaapaa ebien, ebien, na ofi dɛm aber no rokɔ no ^awobohu hɔn esinesin na mpaapae, mpaapae wɔ asaase nyina enyi do, nyew, yebohu bi wɔ asaase n’enyi do na bi so wɔ asaase ase.

23 Na hwɛ, ehum akɛse botutu, na akoko pii botutu efi hɔ ma hɔn ananmu ayɛ dɛ mbɔnsa, na mbea pii a hɔ yɛ mbɔnsa aber yi mu no bɛyɛ akoko a ɔyɛ atsentsen ara yie.

24 Na akwan akɛse pii bɛpaapaa, na ^ankuropɔn pii adan amamfo.

25 Na ^anda pii do bobuebue, na woeyi hɔn ewufo ama; na ahotseweefo pii bɛda hɔnho edzi akyerɛ dodowara.

26 Na hwɛ, dɛm na ^aɔbɔfo no kãa kyerɛɛ me; na ɔsee me dɛ wimu bɔbobɔmu na enyinam atsetsew wɔ ndɔnhwer pii mu.

27 Na ɔsee me dɛ aber a wimu mbobɔmu nye enyinam nye ehum no ano bɔbɔ adze no na ndzɛmba yinom wɔ dɛ ɔba no, ^asum bɛkata asaase nyinara enyi do bɛyɛ nda ebiasa ntamu.

28 Na ɔbɔfo no see me dɛ, dodowara bohu ndzɛmba akɛse sen iyinom, ama wɔaagye edzi dɛ ^ansɛnkyerɛdze nye anwanwadze yinom besi asaase nyinara enyi do, ama woeehu dɛ siantsir biara nnyi hɔ dɛ adasamba bɛgye kyim.

29 Na iyi na ɔbɛma hɔn a wɔbɛgye edzi no wɔagye hɔn nkwa, na hɔn a wɔnnkɛgye edzi no ^aatsɛmbu tsenenee aba hɔn do; na sɛ wobu hɔn fɔ so a nna hɔnankasa na wɔatwe afɔbu aba hɔn do.

30 Na afei, mo nuanom, hom nkaa, hom nkaa, dɛ hom mu biara a ɔbɔhwer no nkwa no, ɔhwer no ma noara noho; na hom mu biara so a ɔyɛ emumuyɛ no, ɔyɛ ma noara noho; na hwɛ, hom wɔ ^afahodzi; na ɔama hom kwan dɛ hom nyɛ dza hom pɛ; na hwɛ, Nyankopɔn ama hom ^bnyimdzee na ɔama hom fahodzi so.

31 Ɔdze ama hom ama hom dze ^aeehu dza oye efi bɔn ho, na ɔdze ama hom ama hom ^basan mu aafa nkwa anaa owu; na hom botum ayɛ dza oye na wɔdze hom ^casan aba dza oye ho, anaadɛ wɔdze dza oye bɛsan ama hom; anaadɛ hom botum ayɛ bɔn, na wɔdze dza ɔyɛ bɔn so asan ama hom.