1 Na afei, ɔbaa dɛ dodowara na wɔtsee Samuel, Lamannyi no, ne nsɛm no a ɔkãa wɔ afasu no do no. Na dodowara a wɔgyee n’asɛm no dzii no kɔree kɔhwehwɛɛ Nephi; na aber a wohun no no, wɔkãa hɔn bɔn kyerɛɛ no na wɔammfa ennsuma, na wɔpɛɛ dɛ wobonuma hɔn esu ama Ewuradze.

2 Mbom dodowara a wɔwɔ hɔ a wɔanngye Samuel ne nsɛm enndzi no, hɔn bo fuuw no; na wɔtotoow no abo wɔ afasu no do, na dodowara so totoow no egyen ber a ogyina afasu no do no; mbom nna Ewuradze no Sunsum kã no ho ma dɛm ntsi hɔn abo nye egyen no mu biara annka no.

3 Afei ber a wohun dɛ wonntum ntow mbɔ no no, hɔn mu dodowara a wɔwɔ hɔ no gyee ne nsɛm dzii, na wɔkɔr Nephi hɔ ama oeenuma hɔn.

4 Na hwɛ, nna Nephi runuma, na ɔrehyɛ nkɔm, na ɔrekã asɛmpa no, na ɔrekã nnuho ho asɛm kyerɛ nkorɔfo no, na ɔreyɛ nsɛnkyerɛdze na anwanwadze kyerɛɛ hɔn, na ɔreyɛ ^aetumdze wɔ nkorɔfo no mu, ama woeehu dɛ ^bɔnnkɛkyɛr na Christ aba—

5 Nna ɔrekã ndzɛmba a ɔnnkɛkyɛr na aba ho asɛm, ama woeehu na wɔakaa wɔ aber a ɔbɛba no ama woeehu dɛ ɔakã akyerɛ hɔn dada, na dɛm bɛma wɔagye edzi; dɛm ntsi dodowara a wɔgyee Samuel ne nsɛm dzii no kɔr no hɔ ama oeenuma hɔn, na wɔbaa dɛ woenu hɔnho na wɔkãa hɔn bɔn.

6 Mbom hɔn mu dodowara so anngye Samuel ne nsɛm no enndzi; dɛm ntsi ber a wohun dɛ hɔn abo nye hɔn egyen-menaba no nntum nnkã no no, wɔtseatseaa mu frɛɛ hɔn nsordaafo mpanyimfo no see dɛ: Hom mfa dɛm nyimpa yi na wɔnkyekyer no, osiandɛ ɔwɔ sunsum bɔn; na osian abɔnsam no tum a ɔwɔ no mu ntsi na hɛn abo nye hɔn egyen-menaba nntum nnkã no no; dɛm ntsi hom mfa no na wɔnkyekyer no na hom mfa no nkɔ.

7 Na aber a wɔkɔree dɛ wɔdze hɔn nsa rekɛkã no ara, nna hwɛ, ɔtoow noho san famu fii afasu no do, na oguanee fii hɔn asaase no do kɔr nankasa no kurow mu, na ɔhyɛɛ ase kãa nsɛmpa no na ɔhyɛɛ nkɔm wɔ nankasa no nkorɔfo mu.

8 Na hwɛ, wɔanntse ne nkã bio wɔ Nephifo no mu; na dɛm na nkorɔfo no hɔn asetsena mu nsɛm tse.

9 Na dɛm na afe a ɔtɔ do eduowɔtwe esia wɔ atsɛmbuafo no aber do wɔ Nephi no nkorɔfo do no dze baa ewiei.

10 Na dɛm ara so na afe a ɔtɔ do eduowɔtwe esuon wɔ atsɛmbuafo no aber do no dze baa ewiei a dɔm no hɔn mu dodowara kɔr do tsenaa hɔn ntsɛnyɛ nye emumuyɛ mu, na hɔn mu kumaabi na wɔnantseew ahwɛyie mu wɔ Nyankopɔn enyim.

11 Na dɛmara so na asetsena bɛyɛɛ wɔ afe a ɔtɔ do eduowɔtwe awɔtwe no mu wɔ atsɛmbuafo no aber do.

12 Na mbom nsakyer kakraabi na ɔbaa nkorɔfo no hɔn asetsena mu, dza ɔbae ara nye dɛ nkorɔfo no hyɛɛ ase dɛ wɔreyɛ emumuyɛ kɛse, na wɔkɔr do yɛɛ dza ɔnye Nyankopɔn ne mbrasɛm bɔ ebira pii, wɔ atsɛmbuafo no aber do, wɔ afe a ɔtɔ do eduowɔtwe akron no mu.

13 Mbom ɔbaa dɛ afe a ɔtɔ do eduokron wɔ atsɛmbuafo no aber do no, woyii ^ansɛnkyerɛdze akɛse nye anwanwadze kyerɛɛ dɔm no; na nkɔnhyɛfo no hɔn nsɛm no ^bhyɛɛ ase dɛ ɔrehyɛ mã.

14 Na ^aabɔfo yii hɔnho kyerɛɛ nyimpa, enyansafo, na wɔdaa nsɛmpa a ɔyɛ dɛw kɛse no edzi kyerɛɛ hɔn; dɛm afe yi mu na kyerɛwsɛm no hyɛɛ ase dɛ ɔrehyɛ mã.

15 Naaso iyi nyina ekyir no, nkorɔfo hyɛɛ ase piriim hɔn akoma. Hɔn nyina kɔree ma ɔkaa agyedzifo mapã no nko, Nephifo nye Lamanfo so, na wɔhyɛɛ ase tweer hɔnankasa hɔn ahoɔdzen nye ^ahɔnankasa hɔn nyansaa na wɔsee dɛ:

16 Ndzɛmba bi wɔ hɔ a wɔbɔɔ hɔn tsirmu kãe na ɔbaa mu; mbom hwɛ, yenyim dɛ dɛm ndwuma akɛse na ɔyɛ nwanwa yi nyina a wɔakã ho nsɛm no orunntum nnsi.

17 Na wɔhyɛɛ ase dɛ wɔrodwen ho na wɔregye kyim wɔ hɔn mu se dɛ:

18 ^aOnnkehia dɛ nyimpa a ɔtse dɛ Christ bi bɛba; sɛ dɛm so a, nna ɔyɛ dɛn ntsi na Nyankopɔn ne Ba no, sor nye asaase Egya, dɛ mbrɛ wɔakã no, nnda noho edzi nnkyerɛ hɛn so dɛ mbrɛ ɔbɛda noho edzi akyerɛ hɔn a wɔwɔ Jerusalem no?

19 Nyew, ɔyɛ dɛn ntsi na ɔrennda noho edzi wɔ asaase yi do dɛ mbrɛ ɔbɛyɛ wɔ Jerusalem asaase do no?

20 Mbom hwɛ, yenyim dɛ iyi yɛ emumuyɛ ^aamambra a hɛn egyanom dze akyerɛkyerɛ hɛn, ama yɛaagye edzi dɛ anwanwadze kɛse bi bɛba, mbom nnyɛ hɛn mu, na mbom wɔ asaase bi a ɔwɔ ekyirekyir do, asaase bi a yennyim do; ama dɛm ntsi woeetum woefura hɛn adwen, osiandɛ yerunntum mmfa hɛn enyiwa ^bnngye ho dase dɛ ɔyɛ nokwar ntsi.

21 Na wɔnam hɔn ndaadaa nye abɔnsam no ndwuma a ɔyɛ hu do, edzi dwuma akɛse a ɔyɛ hu a yerunntum nntse ase, dza ɔbɛbrɛ hɛn ase ma yɛabɛyɛ nkowaa ama hɔn nsɛm, na yɛayɛ nkowaa ama hɔnankasa so, osiandɛ hɔn na wɔbɛkyerɛkyerɛ hɛn asɛm no; na dɛm na sɛ yegyaa hɛnho ma hɔn a wobofura hɛn adwen mu wɔ hɛn nkwa nda nyina mu.

22 Na ndzɛmba pii na nkorɔfo no susui wɔ hɔn akoma mu, dza ɔyɛ nkwaseadze nye ^aegyangyandze; na wɔtseetsee pii, osiandɛ Satan nunuu hɔn ma wɔkɔr do yɛɛ emumuyɛ; nyew, okyinii dze dza ɔnnyɛ nokwar nye wentwiwentwi tahyee asaase n’enyi nyina do, ama oepirim nkorɔfo no hɔn akoma ma woeetsia dza oye na woeetsia dza ɔbɛba no.

23 Naaso nsɛnkyerɛdze nye anwanwadze a wɔyɛe wɔ Ewuradze no nkorɔfo no mu nyinara ekyir no nye etumdze pii a wɔyɛɛ no; Satan nyaa kwan suoo nkorɔfo a wɔwɔ asaase n’enyi nyinara do no hɔn akoma mu.

24 Na dɛm na afe a ɔtɔ do eduokron wɔ atsɛmbuafo no aber do wɔ Nephi no nkorɔfo do no dze baa ewiei.

25 Na dɛm na Helaman nwoma no a nankasa nye ne mbabanyin kyerɛwee no wɔdze baa ewiei.