1. E tae akera ki te a ngauru ma rua o te mataiti i te tutaraanga o te au akava, kia akatupu akaou a Moroniha i te au i rotopu i te ngati Niphai e te ngati Lamana, e i na, kare rava e tangata ei noo i te taoonga akavanui, e no reira, kua akamata akaou te tauetonoanga ki rotopu i te au tangata, no runga i te tangata te ka noo ki te nooanga o te akavanui.

2. Kua ikiia a Hilamana te tamaiti a Hilamana, ki taua taoonga ra e te vaa o te au tangata.

3. Ina ra, te tapapa ua ra a Kitikumeni tei ta ia Pahorana, kia ta ia Hilamana, e kua tauturuia aia e tona pupu, ko tei papau i te koreromotu, kia kore rava te tangata e kite i tana angaanga kino.

4. Te noo ra tetai tangata Katianetona, e tangata kikite i te tuatua e i tana uaorai angaanga, kia rave i te au angaanga ngaro, te ta tangata e te keikeia, no reira, kua riro aia ei arataki no te pupu o Kitikumeni.

5. E kua taparu atura aia ia ratou, e ia Kitikumeni, e me ka tuku ratou iaia ki te nooanga o te akavanui, ka oronga aia i te tika e te mana kia ratou e te aronga tei piri mai ki taua pupu nei ei akaaere i te au tangata katoatoa, e no reira, kua kimi a Kitikumeni ia Hilamana e ta.

6. I tona aereanga atu ki te nooanga o te akavanui, kia ta ia Hilamana, e i na, tei vao mai tetai tavini o Hilamana, e kua rauka iaia, na roto i te rakei anga iaia uaorai na roto i te kite i te au ravenga a teia pupu, kia tamate ia Hilamana.

7. Kua aravei maira aia ia Kitikumeni, e kua akakite atura kiaia i tetai akairo, no reira, kua akakitekite atura a Kitikumeni kiaia i tona akakoroanga, ma te manako oki e, kia aratakiia aia ki te nooanga o te akavanui kia rauka iaia kia ta ia Hilamana,

8. E kia kite akera te tavini o Hilamana i te ngakau katoa o Kitikumeni e tona inangaro kia ta tangata, e te inangaro katoa ïa o te au tangata i roto i tona pupu kia ta tangata e te keia e kia rauka to ratou mana, e ko ta ratou ravenga muna teia e ta ratou i taputou, kua na ko atura te tavini o Hilamana kia Kitikumeni: Aere mai ka aere taua ki te nooanga akava.

9. Kua rekareka rava a Kitikumeni no te reira, kua manako oki aia e, ka akaoti aia i tana angaanga, ina ra, i to raua akavaitata anga atu ki te nooanga o te akavanui, kua patia akera te tavini o Hilamana ia Kitikumeni ki te pukuatu tikai, kua topa iora aia ki raro e kua mate takiri, e kare rava i ngunguru ana. E kua oro atura aia kia akakite kia Hilamana i te au mea katoatoa tana i kite, e i akarongo, e i rave.

10. E i reira, kua akaue atura a Hilamana kia aratakiia mai taua pupu keia ra, te ta tangata ngaro, e kia akavaia ratou kia tau ki ta te ture.

11. Ina ra, i te kiteanga a Kitianetona e kare a Kitikumeni i oki mai, kua mataku akera aia, ko te tamateia aia, i reira, kua karanga atura aia ki tona pupu kia aru iaia. E kua oro atu ratou ki vao mai i te enua, na tetai ara ke, e tae atu ki te metepara. E kia unga atura a Hilamana i te tangata kia tiki ia ratou kare ra i kitea ia ratou.

12. E ka tuatuaia teia Katianetona a muri ake, e ko te openga rai teia o te ā ngauru ma rua o te mataiti i te tutaraanga o te au akava i rungao i te au tangata o Niphai.

13. E i na, kia tae ki te openga o teia puka, ka kite kotou e, na teia tangata ko Katianetona i akaorureau i te ngati Niphai, i na, kua vaitata oki aia i te akapou takiri ia ratou.

14. I na, kare au i tuatua e, i te openga o te puka a Hilamana, mari ra, i te openga i te puka a Niphai, no reira mai oki te ngai i rauka mai ei te akapapaanga taku e tata nei.