1. E tae akera ki te itu ngauru ma rua o te mataiti i te tutaraanga o te au akava, kua maata takiri te pekapeka, e kua tupu iora te tamaki i roto i te au enua o te ngati Niphai.

2. Na teia pupu keia e rave ana i teia au angaanga kikino e te mate, i tau mataiti katoa ra, e kia tae ki te itu ngauru ma toru o te mataiti te vai rai teia tamaki anga.

3. E i roto rai i teia mataiti kua kapiki atu a Niphai ki te Atua ka na ko atu ei,

4. E te Atua, auraka ana teia nei au tangata e mate ki te koke, ina ra e te Atua, ei onge taau e tuku mai ki te enua nei, kia rauka ia ratou kia akamaaraara akaou ia koe to ratou Atua, e penei ake ka tataraara ratou e ka ariu mai kia koe.

5. E kua peraia rai, mei ta Niphai i tuatua. E kua tupu maira te onge maata ki te enua nei, ki te au tangata katoa o Niphai. E tae akera ki te itu ngauru ma ā o te mataiti, te vai rai te onge, e kua akamutu akera te mate ki te koke, kua maata ra te mate ki te onge.

6. Kua tupu akaou teia angaanga takinga kino i te mataiti itu ngauru ma rima. Kua taumaaia te enua, e kua maro akera, e kare oki i ua mai te sitona i tona ra tuatau tikai, e kua taumaaia te enua katoatoa mei to te ngati Lamana atu e to te ngati Niphai oki, kua papaia, e kua mate iora ratou i te tausani anga i te tuanga kino rava atu i te enua nei.

7. E kia kite oki te tangata e, te mate nei ratou i te onge, kua akamata iora ratou kia akamaara i te Atua to ratou Atua, e kua maara katoa ia ratou te tuatua a Niphai.

8. Kua akamata iora te au tangata kia maro atu i to ratou akava e to ratou au arataki kia tuatua atu kia Niphai, e teianei, kua kite tatou e, e tangata koe no te Atua, e no reira, e kapiki atu koe ki te Atua, kia akaanga ke atu i teianei onge maata, ko te tupu aea te au tuatua taau i akakite mai no runga i to matou nei akapouangaia.

9. Kua tuatua akera te au akava kia Niphai, i te au tuatua tei manakoia e ratou. E kia kite ra a Niphai e kua tataraara te au tangata, e kua taakaaka ia ratou uaorai i roto i te kakau paoa, kua kapiki akera aia ki te Atua, na ko atura.

10. E te Atua e, kua tataraara teia nei au tangata, e kua takore oki ratou i te pupu o Katianetona mei rotopu ia ratou e kua pou takiri te reira, e kua tanu i ta ratou au ravenga ngaro ki roto i te one.

11. E teianei, e te Atua, no tei taakaaka oki ratou, ka tika ainei kia anga ke koe i toou riri, kia rava te reira i te aronga kino, i taau oki i takore takere ana.

12. E te Atua e, ka akaanga ke ainei koe i toou riri, ae, toou riri maata e kia akamutuia teia onge i te enua nei.

13. E te Atua e, ka akarongo mai ainei koe iaku, e kia tupu oki taku tuatua, e kia ungaia mai te ua ki runga i te enua nei, e kia akaua mai aia i tana ua e te sitona i tona ra tuatau tika.

14. E te Atua e, kua akarongo ana koe i taku nei tuatua, ka tuatua ei au e ei onge kia akamutu oki te mate koke, e te kite nei au e, ka rauka ia koe, i teianei, e akarongo mai i taku nei tuatua, ko taau oki ïa i tuatua mai, me tataraara teia au tangata, ka akaora au ia ratou.

15. E tika e te Atua, kua kite oki koe e kua tataraara ratou no te onge oki, te maki, e te akapouanga tei tae ki runga ia ratou.

16. E teianei, e te Atua, e akaanga ke atu i toou riri, e tamata akaou, me ka kauraro ratou kia koe? Me ka pera, e te Atua ei reira koe ka akameitaki atu ei ia ratou mei taau i tuatua mai.

17. E tae akera ki te itu ngauru ma ono o te mataiti, kua ariu ke akera te Atu i tona riri mei te au tangata, e kua akatopa maira i te ua ki te enua nei, e kua ua maira te ua i te tuatau o tona ra ua anga, e te sitona i tona tuatau.

18. E i na, kua rekareka iora te tangata, e kua akakaka iora i te Atua. E kua ki rava te enua i te rekareka maata, e kare oki ratou i kimi akaou i te ravenga kia ta ia Niphai, mari ra, kua manako ratou iaia ei peroveta maata, e tangata oki no te Atua tei iaia oki te mana maata e te au tika anga tei orongaia mai kiaia mei te Atua mai.

19. E teianei, ko Lihai oki tona teina, kare oki aia i te meangiti i muri ake iaia, i te au tuatua tika ravarai.

20. Kua akamata akaou te tangata i te puapinga i te enua nei, e kua patu akaouia te au ngai i kino ra, e kua maata mai ratou, e kua oora ki roto i te enua, e tapoki iora i te enua katoatoa, ki tokerau, e ki tonga, mei te tai i te opunga, ki te tai i te itinga.

21. E ope akera te itu ngauru ma ono o te mataiti ma te au. E pera katoa te itu ngauru ma itu o te mataiti ma te au, e kua akamata akera te akonoanga i te tupu e totoa atura ki roto i te enua katoatoa, e te maataanga o te tangata, mei te ngati Niphai ki te ngati Lamana, tei roto anake ratou i te akonoanga, e kua noo tikai te enua ma te au e ope ua atu te itu ngauru ma itu o te mataiti.

22. Kua pera katoa te itu ngauru ma varu o te mataiti, mari ua ra, tetai taumaro anga no runga i tetai akoanga tei apiiia e te au peroveta.

23. E kia tae akera ki te itu ngauru ma iva o te mataiti, kua akamata mai te pekapeka. Kareka ra ko Niphai e Lihai, e tetai au taeake e manganui ko tei kite i te au apiianga tika, e kua kite i te au eeuanga i te au ra katoatoa, no reira kua ako pakari atu ratou ki te au tangata, e na te reira i akaoti i te pekapeka i rotopu ia ratou i taua mataiti ra.

24. E tae akera ki te varu ngauru o te mataiti i te tutaraanga o te au akava ki rungao i te au tangata o Niphai, te noo ra tetai nga tangata orureau, tei akaruke i te au tangata o Niphai, tei noo ana i tetai au mataiti ki ko i te ngati Lamana, e kua rave rai ratou i te ingoa o Lamana ki runga ia ratou, e tetai nga tangata e uanga Lamana tikai ratou, ko tei taorioriia e ratou kia riri ratou, koia oki, taua aronga orureau ra, no reira kua akamata akera te tamaki ki to ratou au taeake.

25. E kua ta i te tangata, e kua keia oki, e kua oro atu ki te maunga, e ki roto i te metepara, e te au ngai muna, i te pipini anga ia ratou uaorai, kia kore e kiteaia, ma te kapiti mai kia ratou tetai aronga ou i te au ra ravarai, te aere katoa ra te au tangata orureau kia ratou.

26. E kare i roa rava ana nga mataiti, i tupu mai ei tetai pupu keikeia maata rava, e kua kimi akera ratou i te au ravenga muna a Katianetona, e riro atu rai ratou te keikeia a Katianetona.

27. E teianei, kua riro teia aronga keikeia ei tumu kino maata, e e tumu mate i roto i te au tangata o Niphai, e pera katoa ki te au tangata o te ngati Lamana.

28. E no reira e tau kia akamutuia teia angaanga mate, no reira, kua tonokia tetai aronga vaeau maroiroi tikai ki te metepara, e ki te au maunga, kia kimi i teia anana keikeia, e akapou atu ia ratou.

29. Ina ra, i taua mataiti rai, kua arumakiia mai ratou ki to ratou uaorai enua. E ope akera te varu ngauru o te mataiti i te tutaraanga o te au akava i rungao i te au tangata o Niphai.

30. I te akamataanga o te varu ngauru ma tai o te mataiti, kua aere akaou atura ratou ki taua anana keikeia, e manganui oki tei takoreia, e kua tae katoa kia ratou te mate maata.

31. E kua oki mai ratou mei te metepara, e mei te au maunga ki to ratou uaorai enua, no te maata rava o te au anana keikeia, tei noo ki te metepara e te au maunga.

32. E ope akera taua mataiti ra, e kua maata maira taua anana keikeia ra, e te maroiroi oki, e kua akavaavaa maira i te au nuku o te nagti Niphai, e to te ngati Lamana, e kua riro ratou ei mataku rikarika anga no te au tangata e noo ki runga i te enua.

33. Ae, kua aere ratou e tutaka i te au tuanga o te enua, e kua ta ia ratou, e kua arataki tuikaa ia ratou ki te metepara, i na, kua ta ratou i te vaine e te tamariki atu.

34. E teianei, ko teia kino maata, kua tae mai ki runga i te au tangata no ta ratou ara oki, ei akaariu teia ia ratou, kia akamaara i to ratou Atu i to ratou Atua.

35. E oti akera te varu ngauru ma tai o te mataiti i te tutaraanga o te au akava.

36. E tae akera ki te varu ngauru ma rua o te mataiti, kua akamata akaou ratou kia akangaropoina i to ratou Atua. E kia tae akera ki te varu ngauru ma toru o te mataiti kua maroiroi akera ratou i te rave ara. E kia tae ki te varu ngauru ma a o te mataiti, kare ratou i tataraara.

37. E kia tae ki te varu ngauru ma rima o te mataiti, kua tupu to ratou ngakau parau e ta ratou raveanga ara ki te maata, e kua tau ratou no te mate.

38. E ope akera te varu ngauru ma rima o te mataiti.