1. E tae akera ki te varu ngauru ma ono o te mataiti, te noo rai te ngati Niphai ki roto i te kino, ae, e kino maata, kareka te ngati Lamana kua maroiroi tikai ratou i te akono i te au akaueanga a te Atua, e tau ki te ture a Mose.

2. I roto i teia mataiti, kua aere mai tetai tangata, no te ngati Lamana aia, ko Samuela tona ingoa, kua aere mai ki te enua ko Zarahemela, e kua akamata i te ako i te au tangata. E kua ako aia no tetai au ra e manganui, kia tataraara te au tangata, e kua arumakiia aia ki vao, e te vaitata ua ra aia i te oki atu ki tona enua.

3. E i na, kua tae maira te reo o te Atua kiaia, e kia oki akaou aia, e kia totou ki te au tangata i te au mea katoatoa te ka tae mai ki tona ngakau.

4. E i na, kare akera ratou i akatika iaia kia tomo ki roto i te oire, no reira kua kake atura aia ki runga i te patu, e kua akatika atura i tona rima, ma te kapiki nui atu kia ratou ma te totou atu i te au mea ta te Atu i tuku ki roto i tona ngakau.

5. E kua tuatua atura kia ratou: I na, ko au ko Samuela no te ngati Lamana, te tuatua atu nei au kia kotou i te tuatua a te Atua, tana i tuku mai ki roto i toku ngakau kia tuatua au ki teia nei au tangata, e te tautau ua ra te koke o te tuatua tika ki runga i teia nei au tangata e kare oki e ope te a anere mataiti, e topa mai ei te koke o te tuatua tika ki runga i teia nei au tangata.

6. I na, e akapouanga maata tei vaitata ua mai nei ki teia iti tangata, e kare atu e ravenga e oraʼi ratou, mari ra, e tataraara e e akarongo i te Atu ia Iesu Mesia, te ka tae mai ki teianei ao, e ka akakoromaki i te au mea e manganui, e ka taiaia no tona au tangata.

7. E i na, na te angela oki a te Atua i akakite mai kiaku, e nana rai i apai mai i te tuatua rekareka ki toku vaerua. E i na, i tonokia mai ei au kia kotou, kia akakite i te reira kia kotou kia rekareka katoa kotou, ina ra, kare oki kotou i ariki mai iaku.

8. No reira, te tuatua maira te Atu, no te marokiakia o te ngakau o te au tangata o te ngati Niphai, me kare ratou e tataraara, ka rave ke au i taku nei tuatua ia ratou e ka rave ke katoa au i toku vaerua mei ia ratou, e kare au e maara akaou atu ia ratou, e i reira au e akariri mai ei i te ngakau o to ratou au taeake ia ratou.

9. E kare e ope te a anere mataiti, e akatikaʼi au kia papaia ratou, ae, e ta au ia ratou ki te koke, e te onge, e te maki mate.

10. Ae, e aravei au ia ratou i toku riri otooto, e te vai ra i roto i te a o te uki, tetai aronga no to kotou au enemi te ka ora, kia kite i to kotou akapou takiri anga, e ka tae mai tikai teia me kore ratou e tataraara te tuatua maira te Atu, e ko te aronga o te a o te uki te ka kite i to kotou akapou angaia.

11. Kareka ra, me tataraara kotou, e ariu mai ki to kotou Atua, ka ariu ke au i toku nei riri ia kotou, te tuatua maira te Atu, i na, ko ta te Atu ïa tuatua, e ao to ratou tei tataraara e tei ariu mai kiaku, i na, aue oki ratou tei kore e tataraara.

12. Aue oki teianei oire maata ko Zarahemela, e i na, no teia au tangata tuatua tika nei, ka oraʼi ratou, i na, e mate to teia oire nei, kua kite oki au, te tuatua maira te Atua, e manganui oki ratou, ko te tuanga maata o teia oire nei, te ka akamarokiakia i to ratou ngakau kiaku nei, te tuatua maira te Atua.

13. E ao ra to ratou tei tataraara, ko ratou oki taku ka akaora, naringa e kare te aronga tuatua tika i roto i teianei oire maata, i na, kua akaue atu au ki te ai no te rangi mai kia topa mai ki raro nei kia akapou takiri ia ratou.

14. Ina ra, no te aronga tuatua tika ua i akaoraiaʼi. Ka tae mai ra te tuatau, te tuatua maira te Atu, kia tuaru atu kotou i te aronga tuatua tika ki vao ia kotou, ei reira kotou e tau ei no te akapouanga. I na, e mate oki to teia oire maata, no te kino e te au mea viivii i roto iaia.

15. I na, aue te oire o Kitiona e, tei roto ia koe te kino e te au mea viivii katoa.

16. Aue te au oire tei vai i roto i te au enua e takapini ake tei nooia e te ngati Niphai, no to ratou kino oki e te au mea viivii i roto ia ratou.

17. E i na, ka taumaaia te enua, te tuatua maira te Atua Sabaota no te au tangata oki e noo i te enua nei, no to ratou kino oki, e to ratou viivii.

18. Te tuatua maira te Atua Sabaota, to tatou Atua tika, e ko tetai ua atu tangata te ka uuna i tetai apinga ki roto i te one, kare aia e kite akaou, no te taumaanga o te enua, mari ua ra, me e tangata tuatua tika aia, e kua uuna aia ki te Atua ra.

19. Te na ko maira oki te Atu e, ko toku inangaro, kia uuna ratou i ta ratou apinga kiaku nei, e kia taumaaia ratou tei kore i uuna i ta ratou apinga kiaku nei, kare rava tetai e uuna i ta ratou apinga kiaku nei, mari ra, te aronga tuatua tika, e koia oki ko tei kore i uuna i tana apinga kiaku nei, e taumaaia aia, e tana apinga katoa e kare rava e rauka i tetai tangata kia rave akaou mai i te reira, no te taumaa oki o te enua.

20. Te tae maira te au ra, e uunaʼi ratou i ta ratou au apinga no te mea, kua tuku oki to ratou ngakau ki runga i to ratou apinga nui, e no tei tuku oki ratou i to ratou ngakau ki to ratou apinga nui, ka uuna au i ta ratou au apinga, me oro ke ratou mei mua i to ratou au enemi, no te mea, kare oki ratou i uuna mai i te reira kiaku nei, kia taumaaia ratou, e ta ratou au apinga, i taua tuatau ra e papaiaʼi ratou te tuatua maira te Atua.

21. I na, ko kotou te au tangata o teia oire maata nei, ka akarongo mai ana ki taku nei tuatua, i na, ka akarongo mai ki te tuatua ta te Atua ka tuatua mai, e i na oki, te tuatua maira aia, kua taumaaia kotou, no ta kotou apinga, e pera katoa ta kotou au apinga oko maata, no te mea, kua tuku kotou i to kotou ngakau ki runga i te reira, e kare oki e akarongo ki te tuatua a tei oronga mai i te reira kia kotou.

22. Kare oki kotou i akamaara i te Atu to kotou Atua i te au apinga tana i akameitaki mai ia kotou, kua akamaara ra kotou i to kotou apinga nui anga, kare oki i akameitaki atu i te Atua no taua au mea ra, e kare oki to kotou ngakau i inangaro atu i te Atua, kua akaketaketaia ra te reira i te ngakau parau, e te tuatua akapaapaa, e te akamaata, e tupu ei te noinoi, te maro, te taitoito, e te takinga kino, te ta tangata, e te au tu ara ravarai.

23. No teia au mea nei, i tuku ei te Atua i te taumaa ki te enua nei, e ki runga oki i ta kotou au apinga, no ta kotou au ara oki.

24. I na, e mate tikai teia au tangata, no teia tuatau tei tae mai, te opara atu ra ratou i te au peroveta ki vao, e kua akakino atu ia ratou, e kua pei ia ratou ki te toka, e kua tamate ia ratou e kua rave i te au tu ara kia ratou mei ta ratou oki i rave i te tuatau taito.

25. E teianei, me tuatua kotou ka karanga kotou e, naringa ua ake to matou nei tuatau, e ko te tuatau o to matou ai metua i te tuatau taito, kare rava matou e ta i te au peroveta, e kare rai matou e pei ia ratou ki te toka, e tuaru atu ia ratou ki vao.

26. I na, e kino atu to kotou ia ratou, te ora nei te Atu, me aere mai tetai peroveta e akakite kia kotou i te tuatua a te Atua, ko tei akapapu mai i ta kotou au ara e te kino, ka riri kotou kiaia, e ka opara kotou iaia ki vao, ma te kimi i te au ravenga e mate ei aia, ae, e karanga oki kotou e, e peroveta pikikaa aia, e e rave ara aia, e no te tiaporo aia, no tei akapapu mai aia e, ko ta kotou angaanga e rave ra, e mea viivii ïa.

27. Ina ra, me aere mai tetai tangata ki rotopu ia kotou ma te karanga e, e rave i teia, kare e ara i te reira, e e rave i tera kare kotou e mate, ae, ka tuatua aia, e aru i te parau o to kotou ngakau, e tika, e aru rai i te parau o to kotou mata e ma te rave i ta to kotou ngakau e anoano, e me aere mai tetai tangata i rotopu ia kotou ma te tuatua i teia au tuatua, ka ariki kotou, e ka karanga kotou e, e perovota aia.

28. E tika, ka akateitei kotou iaia, e ka oronga kotou i ta kotou au apinga nana, e ka oronga atu kotou i te auro e te ario nana e ka akakakau kotou iaia ki te kakau moni maata, e no te reka oki o tana tuatua kia kotou, te karanga ra aia kia kotou, kia meitaki te au mea katoatoa, e kare rava kotou e kimi tarevake nona.

29. E kotou e te aronga kino e, te uki paketaketa, e te marokiakia, e te au tangata kaki maro, mei te aa te roa i to te Atua akakoromaki anga ia kotou? I na, mei te aa te roa i to kotou akatika anga ia kotou uaorai ka aratakiiaʼi kotou e te au tiaki matapo e te neneva? I na, eaa te roa i to kotou iki anga i te poiri e te akaruke anga i te marama?

30. I na oki, te tupu nei te riri o te Atua kia kotou i teia nei, i na, kua taumaa aia i te enua no ta kotou au ara.

31. E i na, te vaitata maira te tuatau, e taumaaʼi aia i ta kotou au apinga e ka pateka oki te reira ia kotou, e kare e rauka kia mouria, e kia tae akera ki te au ra e ngere ei kotou, kare rava ra e rauka ia kotou kia tāpū mai i te reira.

32. E i te au ra o to kotou ra ngereanga, ei reira kotou e kapiki atu ei ki te Atua, e ka puapinga kore ua oki ta kotou kapiki anga i reira, kua tae takere mai oki to kotou taumaaanga. e kua mou oki to kotou taumaaanga, ei reira oki kotou ka aue ei, ma te mii i taua ra ra, te tuatua maira te Atua Sabaota ra. Ei reira kotou e kaku ei, ka na ko ei e,

33. Naringa ake matou i tataraara, e kare i ta i te au peroveta, e pei oki ia ratou ki te toka, e tuaru atu ia ratou ki vao, i na, ei taua ra ra, e karangaʼi kotou e, naringa matou i akamaara i te Atu to tatou Atua i te ra i oronga mai ei i to tatou puapinga kia tatou, kare i reira e pateka, e e ngaro ke atu te reira, i na, kua ngaro ke atu to tatou apinga nui ia tatou.

34. E i na, kua vaio tatou i te apinga angaanga ki konei e apopo kua ngaro ke atu ïa, e i na oki, ka rave keia ta tatou koke mei ia tatou i te ra tikai e manako ei tatou e ka rave mai tatou no te tamakianga.

35. Ae, kua uuna oki tatou i ta tatou au apinga, e kua ngaro ke atu te reira mei ia tatou nei, no te taumaa oki o te enua.

36. Aue oki e, naringa oki tatou i tataraara i te ra, ka tae mai ei te tuatua a te Atua kia tatou, kare e ravenga, kua taumaaia te enua, e kua pateka te au apinga ravarai, kare e tika kia tāpū mai i te reira.

37. E teianei, kua koropiniia tatou e te au demoni, ae, kua takako takiriia tatou e te au angela ana tei kimi e kia akapou i to tatou au vaerua, i na, no te maata oki o ta tatou au ara. E te Atua e, kare ainei koe e ariu ke atu i to riri ia matou nei? Ko to kotou reo oki teia a taua au ra ra.

38. Kareka ra, kua topa ke ana to kotou au ra no te oraanga, e kua tavarevare oki te ra o to kotou akaoraanga, e tae ua atu ki te tuatau kare te ora e rauka akaou mai, e kua papu oki to kotou akautungaanga, ae, kua kimi pu tikai kotou i roto i te roa anga o to kotou oraanga i te mea kare e rauka mai ia kotou, e kua kimi i te rekareka i te rave anga i te ara, ko te mea oki tei kore e tau i te tuatua tika, tei vai ki to tatou Upoko Maata e te Mutu kore.

39. Aue kotou e te au tangata o te enua nei, tei akarongo mai i taku nei tuatua. Te pure nei au e kia akaanga ke te Atua i tona riri ia kotou, e kia tataraara kotou e kia rauka te ora.