Te Puka a Hilamana

1. E teianei, kia tae akera ki te a ngauru o te mataiti, mei te akamataanga mai o te au akava i te akaaereanga i te au tangata o Niphai kua tupu mai tetai au manamanata pakari ki rotopu i te au tangata o te ngati Niphai.

2. I na oki, kua mate a Pahorana, e kua aere atu aia na te mataara o teianei ao; i reira kua akamata te tauetono anga koia oki, ka riro kiaai te nooanga o te akavaanga i rotopu i te au tamariki a Pahorana.

3. Teia to ratou au ingoa, tei inangaro i te taoonga akava, e tei taoriori i te au tangata katoatoa, ko Pahorana, ko Paanaki e Pakumeni.

4. Kare ra e ko te au tamariki anake teia a Pahorana, (e maata oki tana tamariki) ina ra, ko te aronga teia tei noinoi i te taoonga e na ratou i vavai i te tangata ki nga tuanga e toru.

5. Ina ra, ko Pahorana tei ikiia e te vaa o te tangata kia riro ei akavanui, e ei kavana ki runga i te au tangata o Niphai.

6. E kia kite akera a Pakumeni e, kare i rauka iaia te taoonga, kua akatika aia i ta te katoatoa.

7. Kareka a Paaniki e te tuanga o te tangata tei anoano e koia te kavana, kua riri akera ratou, i reira, te vaitata ra aia i te akanauru i te katoatoa o te tangata kia kai tamaki atu ki to ratou au taeake.

8. Kia tamata ra aia kia akapera, e i na, kua ravea keia atu aia, e kua akavaia kia tau ki te reo o te tangata, e kua akaapaia aia ki te utunga mate, no te mea, kua akatupu aia i tetai orureau, ei akakore i te au o te au tangata.

9. Kia kite ra taua au tangata ra tei manako e koia to ratou kavana, kua akaapaia aia ki te utunga mate, kua riri akera ratou, e i na, kua tonokiaia atu tetai Kitikumeni, ki te nooanga akava anga o Pahorana, e kia ta ia Pahorana te taime e noo ei aia ki te nooanga akava.

10. E kua arumakiia aia e te au tavini o Pahorana, ina ra, no te viviki ia Kitikumeni, kare atura aia i mou.

11. E kua aere atura aia ki te aronga tei tono iaia, e kua papau iora ratou i te koreromotu, i te taputouanga i Tei Anga ia ratou e, kare rava ratou e akakite ki tetai ua atu tangata e na Kitikumeni i ta ia Pahorana.

12. No reira, kare atura a Kitikumeni i kiteaia i rotopu i te au tangata o Niphai, no te mea kua rakeiia aia i te tuatau ka taʼi aia ia Pahorana. E ko Kitikumeni e tona au tangata tei koreromotu kiaia, kua iropu ua ia ratou ki roto i te au tangata, te akakoroanga auraka rava ratou kia kiteaia, ina ra, ko te aronga tei kitea mai kua tamateia ratou.

13. E teianei, kua ikiia akera a Pakumeni e te vaa tangata kia riro ei akavanui e ei kavana ki rungao i te au tangata, ei akaaere i te ngai o tona tuakana ia Pahorana. Ko tona tika oki teia. Ko teia tei raveia i te mataiti a ngauru, i te tutaraanga o te au akava, e tae akera ki te openga o taua mataiti ra.

14. E kia tae akera ki te ngauru ma tai o te mataiti i te tutaraanga o te au akava, i akaputuputu ei te ngati Lamana i te au nuku vaeau e manganui, e kua rakei ia ratou ki te koke, te paruru, te ana, te kakao ana, te arai katu, te arai umauma, e te au tu paruru ravarai.

15. E kua aere mai ratou ki raro e kua akamata i te tamaki ki te ngati Niphai. E kua riro a Korianetuma ei arataki no ratou, e uanga oki aia no Zarahemela, e kua orureau atu aia ki te ngati Niphai, e tangata maata aia e te ririnui.

16. No reira, ko te ariki o te ngati Lamana, ko Tupalota te ingoa, e tamaiti na Amarona, kua manako aia e, e tangata ririnui a Korianetuma, e ka rauka iaia kia tamaki ki te ngati Niphai na roto i tona maroiroi e tona kite maata, no reira, e mea tau kia tonokia aia na mua, kia rauka iaia te mana ki rungao i te ngati Niphai.

17. I reira, kua taoriori iora aia ia ratou kia riri, e kua akaputuputu maira i tona au vaeau ki te ngai okotai, e kua iki iora aia ia Korianetuma ei arataki no ratou, e kia aere atu oki ratou ki raro i te enua ko Zarahemela, kia tamaki atu ki te ngati Niphai.

18. E no te maata oki o te pekapeka, e te manamanata i roto i te kavamani, kare rava ratou i akanoo i te au tiaki kia rava i roto i te enua ko Zarahemela, kare oki ratou i manako e, ka aere mai te ngati Lamana ki rotopu tikai i to ratou enua, e takore ei i taua oire maata ra, ko Zarahemela.

19. Ina ra, kua arataki mai a Korianetuma i tona au nuku, e kua aere mai ki runga i te aronga e noo i roto i te oire, e viviki rava to ratou aereanga mai, kare atura o te ngati Niphai taime kia akaputuputu mai i to ratou au vaeau.

20. Kua tairi poti akera a Korianetuma i te au tiaki o te ngutupa o taua oire ra, e kua aere tika atura tona au vaeau ki roto i te oire, e kua ta oki i te au tangata tei arai mai ia ratou, e kua rave akera i taua oire maata no ratou.

21. Kua oro atura te akavanui ko Pakumeni, na mua atu ia Korianetuma ki te patu o te oire. Kua ta a Korianetuma iaia ki runga i te patu, e kua mate iora aia. E ko te openga rai ïa o te au ra o Pakumeni.

22. E kia kite akera a Korianetuma e tei iaia te oire maata ko Zarahemela, e kua akara i te ngati Niphai i te oro ke anga na mua ia ratou, e kua mate, e kua apainaia, e kua uriia ki roto i te are tapeka anga, e kua riro mai oki kiaia te punanga maroiroi rava atu i roto i te enua katoatoa, kua maroiroi akera tona ngakau i reira, e manako akera e ka aere aia na roto i te enua katoatoa.

23. E teianei, kare atura aia i noo ki te oire ko Zarahemela, ina ra, kua aere atu aia ma tona nuku maata, ki te oire Bounetifula, ko tona akakoroanga oki teia, kia tuku i te koke i te akakore anga i te au mea katoatoa ei mataara nona, kia rauka mai iaia te au tuanga enua i te pae tokerau.

24. E kua manako oki ratou e, tei rotopu tikai i te enua to ratou maroiroi maata, no reira, kua aere tika atura, ma te kore e akaputuputuia ratou ki te ngai okotai, mari ra, ki roto i te pupu meangiti ua, e kua na reira ratou i te taeanga mai ki runga ia ratou.

25. Ina ra, kua maroiroi maata a Moroniha no teia aereanga a Korianetuma na roto i te enua, no atu e, kua maata te ngati Niphai tei mate.

26. E i na, kua manako akera a Moroniha e, kare te ngati Lamana e na rotopu mai i te enua, mari ra, ka tamaki ratou ki te au oire i vao ake i te kotinga enua, mei ta ratou i matau i te rave, e no reira, kua akanoo a Moroniha i tona vaeau maroiroi ki taua au tuanga ra.

27. Ina ra, kare ua te ngati Lamana i mataku ana mei tana i manako, ina ra, kua aere mai ratou ki rotopu i te enua e kua rave i te oire maata koia a Zarahemela e kua aere atu na roto i te tuanga maata o te enua, i te ta anga i te au tangata, te tane, te vaine, te tamariki, e ma te rave i te au oire, e te au punanga pakari.

28. Kia kite ra a Moroniha i teia, kua tono atura aia ia Lihai ma tona vaeau na mua ake ia ratou, kia aere mai ratou ki te enua ko Bounetifula.

29. E kua pera oki a Lihai, e kua na mua rai ia ratou, ki te enua ko Bounetifula, e kua tamaki atu ia ratou, e i na, kua oki akera ratou ki muri ki te enua ko Zarahemela.

30. E i na, kua na mua akera a Moroniha ia ratou i to ratou oki anga ki muri, e kua tamaki maira ia ratou, e i na, e tamakianga rikarika tei raveia ki reira, kua tae a vai ua te toto, e tika oki, e manganui tei mate ki reira, e i rotopu i te aronga i mate, kua kitea a Korianetuma.

31. E teianei, e i na, kare rava e rauka i te ngati Lamana kia oro atu na tetai ara ke, kare oki ki tokerau, kare oki ki tonga, kare ki te itinga, kare ki te opunga, kua koropiniia ratou e te ngati Niphai.

32. E, i na reira oki a Korianetuma i te aratakianga mai i te ngati Lamana ki rotopu i te ngati Niphai, no reira, i riro ei ratou ki roto i te mana o te ngati Niphai, e kua mate rai oki aia, e kua riro te ngati Lamana ki roto i te rima o te ngati Niphai.

33. E i na, kua riro akaou maira te enua ko Zarahemela ki roto i te rima o Moroniha, e kua akatika akera i te au mou auri o te ngati Lamana kia oki ma te au.

34. E ope akera te a ngauru ma tai mataiti i te tutaraanga o te au akava.