1. E teianei, e manganui te au mea ta Samuela te ngati Lamana i totou tei kore i tataia.

2. E i na, kua tuatua atura aia kia ratou, e teianei, ka oronga atu au kia kotou i tetai akairo, e rima mataiti toe, i na, e tae mai ei te tamaiti a te Atua, ei akaora i te aronga ka akarongo ki tona ingoa.

3. E teia taku akairo ka oronga atu kia kotou no te tuatau e aere mai ei aia, e i na, e marama maata tei te rangi, i te po i mua ake i tona aereanga mai, kare rava e poiri, ka riro te reira i te tangata nei, ei ra.

4. No reira, e riro oki e, ko tai ra, e te po, e te ra akaou, mei te mea rai e, ko tai rai ra, e kare rava e po, ko te akairo teia ta kotou ka kite, e ka kite oki kotou i te kake anga mai o te ra, e tona opuanga, ei reira kotou e kite ei e, e rua ïa ra e te po oki, kare ra oki te po e poiri, e riro oki te reira i te po i mua ake ka anau mai ei.

5. E i na, e etu ou te ka kake mai mei tei kore rava kotou i kite ana, e ka riro teia ei akairo na kotou.

6. E i na, kare e ko teia anake ua, e manganui te au akairo e te au mea vavaria o te rangi.

7. E ka umeremere ua kotou i te reira ma te vavaria, e te openga iora ka inga kotou ki runga i te one.

8. E ko te aronga e akarongo i te tamaiti a te Atua, e ora mutu kore tona.

9. E teianei, kua na reira te Atua i te akaue mai iaku na roto i tana angela kia aere mai au, e akakite i teia au mea kia kotou, ae, e nana oki i akaue mai iaku kia totou au i teia au mea kia kotou, ae, kua karanga mai aia kiaku, e kapiki au ki teia nei au tangata, e tataraara e akamaka i te arataa o te Atu.

10. E teianei, e ngati Lamana oki au, e te tuatua atu nei au kia kotou i ta te Atua i akaue mai iaku, e no te mea, ka akaapa atu te reira ia kotou, kua riri mai kotou iaku, e kua umuumu mai oki kia mate au, e kua opara ke atu kotou iaku mei roto ia kotou na.

11. E rongo ra kotou i taku nei tuatua, no teia akakoroanga nei i tae mai ei au ki runga i te patu o teia nei oire, kia rongo kotou, e kia kite oki i te akavaanga a te Atua tei tiaki ua mai ra ia kotou no ta kotou au ara, e kia kite oki kotou i te tu o te tataraara.

12. E kia kite katoa oki kotou i te aereanga mai o Iesu Mesia te tamaiti a te Atua, te Metua o te rangi e te enua nei, ko tei anga i te au mea ravarai mei te akamata anga, e kia kite katoa oki kotou i te au akairo o tona aereanga mai e kia akarongo oki kotou i tona ra ingoa.

13. E me akarongo kotou i tona ingoa, ka tataraara kotou i ta kotou au ara, kia matara te reira na roto i tona ra aroa ua.

14. E i na, ka oronga akaou atu au i tetai akairo kia kotou, ae, te akairo o tona mateanga.

15. E teianei, kia mate tikai aia kia tae mai te akaoraanga, ae, kua tau tikai iaia kia mate, kia rauka mai te tuakaouanga o tei mate, kia rauka te tikaanga no te au tangata kia oki akaou ki mua i te aroaro o te Atua.

16. E tika rava, e na teia mate e akatupu mai i te tuakaouanga, e ka akaoraia te au tangata katoatoa mei te mate mua, koia te mate vaerua, no te au tangata ravarai, no te topaanga o Adamu ka tipuiaʼi aia mei mua mai i te aroaro o te Atua, i riro ei ratou ei aronga mate, i to te kopapa nei, e to te vaerua katoa.

17. Ina ra, na te tuakaouanga o te Mesia i akaora i te au tangata ravarai, e tika, te au tangata ravarai, e kua akaoki akaou mai ia ratou ki mua i te aroaro o te Atua.

18. Ae, na te reira i akatupu i te tataraara, e ko teia tataraara ra, kare aia e uriia ki roto i te ai, kareka tei kore i tataraara ra, ka uriia aia ki roto i te ai, ei reira te mate vaerua e oki akaou mai ei kia ratou, i na, koia te rua o te mate, ka tipu ke akaouia ratou mei te au mea o te tuatua tika.

19. No reira, e tataraara kotou, e tataraara kotou, kua kite ana oki kotou i teia nei au mea, e kare oki e rave i te reira, ka akaapaia kotou, e ka tuku akaakaia kotou ki raro i te rua o te mate.

20. Ina ra, te karanga atu nei au, no runga i tetai akairo, te akairo o tona mate anga, i na, e taua ra ra e mate ei aia, ka akapoiriia te ra e kare aia e oronga mai i te marama kia kotou, pera katoa te marama e te au etu, e kare rava e marama i runga i te aro o te enua, mei te taime e vaitataʼi aia i te mate, no nga ora e toru, e tae ua atu ki te taime e tuakaou mai ei mei te mate mai.

21. I na, kia tae ki te taime e tuku atu ei aia i tona vaerua, ka aruru mai te mangungu e te uira no tetai au ora e manganui, e ka ngaueue te enua ma te ruketekete, e te au toka i runga i te enua, e to raro ake i te enua, mei ta kotou e kite i teianei e marokiakia me kare ra, ko tetai tua e pakari tikai ïa, ka ngaangaa uaia.

22. Ae, ka ngaa tikai i rotopu, e ka kitea te reira a muri ake i roto i te au va o te enua, e kua ungaunga iti rava te reira, ki runga i te enua nei, e i raro ake oki.

23. E teianei, e tupu mai te uriia mamaata, e manganui oki te au maunga ka tuku akaakaia ki raro, mei te au ō rai, e e manganui oki te au ngai i teianei tei tuatuaia e, e ō. te ka riro ei maunga, e teitei maata rava atu oki to reira.

24. E manganui te au mataara maata te ka ngaangaa, e manganui oki te au oire ke ka takoreia.

25. E manganui te au tanumanga te ka tuera, e manganui oki te ka tu mai mei te mate, e manganui te aronga tapu i mate te ka aere mai ki te au tangata e manganui.

26. E i na, ko ta te angela teia i tuatua mai kiaku, kua na ko mai oki aia kiaku, ka tae mai te mangungu e te uira no tetai au ora e manganui.

27. E kua karanga mai aia kiaku, e te tupu ua ra taua mangungu ra, e te uira, e te uriia, e ka poiri oki te ao katoa nei i roto i nga ra e toru, ko te akaaereanga ïa o teianei au mea.

28. E kua tuatua maira te angela kiaku, e manganui te aronga te ka kite i te tupuanga i teianei au akairo e te au mea umere te ka tae mai ki runga i te tua o te enua nei, kia kore rava e tumu e raukaʼi i te tamariki a te tangata kia ekoko.

29. Ko te akakoroanga oki teia, kia ora te aronga i akarongo ra, e ko ratou oki tei kore i akarongo ra, kia tae mai te akavaanga tuatua tika kia ratou, e me akaapaia ratou, ei runga rai ia ratou to ratou akaapaanga.

30. E teianei, e akamaara, e akamaara e aku au taeake, ko tei mate ra, kua mate ïa iaia uaorai, e ko tei rave i te kino ra, ei runga rai ïa iaia uaorai, e i na, kua rangatira kotou, kua tika ia kotou kia rave i ta kotou ka rave, e i na, oronga mai te Atua i te kite kia kotou, e kua akarangatira oki ia kotou.

31. Kua oronga oki aia kia kotou, e kia kite kotou i te meitaki mei te kino, e kua oronga oki aia kia kotou, kia kite kotou i te iki i te ora, me ko te mate, e me rave kotou i te meitaki, ka akaokiia mai kotou ki te meitaki, me kore ra, ka akaokiia mai te meitaki kia kotou, me ko te kino ra, ka akaokiia mai te kino kia kotou.