Tusitusiga Paia
Eteru 9


Mataupu 9

E faasolo atu le malo mai le tasi i le isi e ala i le gafa, togafiti, ma le fasioti tagata—Sa vaai Emera i le Atalii o le Amiotonu—E toatele perofeta ua latou alaga atu le salamo—Ua malaia tagata i se oge ma gata uogo.

1 Ma o lenei o a’u, o Moronae, ou te faasolo atu i la’u talafaamaumau. O lea, faauta, ona o afaalapotopotoga faalilolilo a Akiso ma ana uo, faauta, sa oo ai ina latou faatoilaloina le malo o Omera.

2 Ae ui i lea, sa alofa mutimutivale le Alii ia Omera, ma ona atalii foi ma ona afafine o e sa latou le saili lona faaumatiaga.

3 Ma sa lapata’ia Omera e le Alii i se miti e tatau ona ia alu ese atu mai le laueleele; o le mea lea na alu ese atu ai Omera faatasi ma lona aiga mai le laueleele, ma malaga i aso e tele, ma o a’e ma ui ane i tafatafa o le maupu’epu’e o aSemi, ma o mai i tafatafa ane o le nofoaga elea sa faaumatia ai sa Nifaē, ma mai iina i sasae, ma o atu i se nofoaga sa ta’ua o Apeloma, i tala ane o le apitaogalu, ma o iina na ia faatu ai lona faleie, ma ona atalii foi ma ona afafine, ma lona auaiga uma, vagana ai Iareto ma lona aiga.

4 Ma sa oo ina faauuina Iareto o se tupu i luga o le nuu, e le lima o le amioleaga; ma tuu atu ia Akiso lona afafine e fai ma ana avā.

5 Ma sa oo ina saili e Akiso le ola o le tamā o lana avā; ma sa ia talanoa atu ia i latou o ē na ia faatautoina i le tautoga a tagata anamua, ma sa latou vavae ese mai le ulu o le tamā o lana avā, a’o nofo o ia i luga o lona nofoalii, a’o alo faafofoga atu i ona tagata.

6 Ona sa matuā tele lava le sosolo o lenei sosaiete amioleaga ma faalilolilo sa faaleaga ai loto o tagata uma; o lea na fasiotia ai Iareto i luga o lona nofoalii, ma nofotupu ai Akiso i lona tulaga.

7 Ma sa oo ina amata ona fuā Akiso i lona atalii, o lea na ia lokaina ai o ia i le falepuipui, ma tausi o ia i nai meaai itiiti po o le leai foi seia oo ina mafatia o ia i le oti.

8 Ma o lenei o le uso o ia lē na mafatia i le oti, (ma o lona igoa o Nimara) sa ita i lona tamā ona o lena mea na faia e lona tamā i lona uso.

9 Ma sa oo ina faapotopoto e Nimara se aofai toaitiiti o tagata, ma sosola ese mai le laueleele, ma sa o a’e ma ua nonofo faatasi ma Omera.

10 Ma sa oo ina fanauina e Akiso isi atalii, ma sa fiafia le nuu ia te i latou, e ui ina sa latou tauto ia te ia o le a latou faia uiga amioletonu eseese uma e tusa ma mea sa manao i ai o ia.

11 O lenei sa mananao tagata o Akiso i ’oa, e pei ona manao Akiso i le pule; o le mea lea, na tuu atu ai ia te i latou e atalii o Akiso o tupe, o se ala lea na latou faatosina ese atu ai le vaega tele o tagata ia mulimuli atu ia te i latou.

12 Ma sa amata ona i ai o se taua i le va o atalii o Akiso ma Akiso, lea sa faia mo le va o tausaga e tele, ioe, seia oo ina toetoe a faaumatia ai tagata uma o le malo, ioe, tagata uma lava, vagana ai ni tagata e tolusefulu, ma i latou o ē na sosola faatasi ma le aiga o Omera.

13 O le mea lea na toefuatai ai Omera i le laueleele o lona tofi.

14 Ma sa oo ina amata ona toeaina o Omera; ae ui i lea, sa fanauina e ia Emera i tausaga o lona toeaina; ma sa ia faauuina Emera e avea ma tupu e nofo e suitulaga ia te ia.

15 Ma ina ua uma ona ia faauuina o Emera e avea ma tupu sa vaai o ia i le filemu i le laueleele mo le va o le lua tausaga, ma oti ai o ia, ina ua mavae ona vaai i le tele o aso, ia sa tumu i le faanoanoa. Ma sa oo ina nofo Emera e suitulaga ia te ia, ma sa mulimuli o ia i tulaga o lona tamā.

16 Ma sa toe amata ona aveese e le Alii le fetuu mai le laueleele, ma sa manuia tele lava le aiga o Emera i lalo o le nofoaiga a Emera; ma i le va o le ono sefulu ma le lua o tausaga sa avea i latou ma ni tagata malolosi tele, sa oo ina latou matuā mauoa lava—

17 Sa latou maua fualaau aina eseese, ma saito, ma silika, ma lino lelei, ma le auro, ma le ario, ma mea taua.

18 Ma ituaiga eseese uma o povi, o povi po’a, ma povi fafine, ma mamoe, ma meatuaolō, ma ’oti, ma isi ituaiga o manu e tele sa aoga mo meaai a tagata.

19 Ma sa i ai foi ia te i latou o asolofanua, ma asini, ma sa i ai elefane ma kureloma ma kumoma; o ni mea uma ia sa aoga i le tagata, ma aemaise lava elefane ma kureloma ma kumoma.

20 Ma sa faapea ona liligi ifo e le Alii ana faamanuiaga i luga o lenei laueleele, lea sa asilisili ona lelei i luga o isi laueleele uma; ma sa ia poloaiina soo se tasi na te mauaina le laueleele e tatau ona ia mauaina mo le Alii, a leai o le a efaaumatia i latou pe a latou matua i le amioletonu; ona o luga o i latou faapea, ua fetalai mai ai le Alii: O le a ou sasaa atu i ai le atoatoa o lo’u ita.

21 Ma sa fai e Emera faamasinoga i le amiotonu i ona aso uma, ma sa fanauina e ia atalii ma afafine e toatele; ma sa fanauina e ia Korianetumu, ma sa ia faauuina Korianetumu e suitulaga ia te ia.

22 Ma ina ua uma ona faauu e ia Korianetumu e suitulaga ia te ia, sa soifua o ia i tausaga e fa, ma sa vaai o ia i le filemu i le laueleele; ioe, ma sa vaai lava o ia i le aAtalii o le Amiotonu, ma sa olioli ma vivii e uiga i ona aso; ma sa maliu filemu o ia.

23 Ma sa oo ina savali Korianetumu i tulaga o lona tamā, ma ia fausia aai tetele e tele, ma faia i lona nuu mea lelei i ona aso uma. Ma sa oo ina sa leai sana fanau seia oo ina toeaina lava o ia.

24 Ma sa oo ina maliu lana avā, ina ua selau ma le lua ona tausaga. Ma sa oo ina ave e Korianetumu e fai ma ana avā, ina ua toeaina o ia, se tamaitai talavou, ma fanauina ai ni atalii ma afafine; o le mea lea sa soifua ai o ia seia oo i le selau fa sefulu ma le lua tausaga o lona soifua.

25 Ma sa oo ina fanauina e ia Komi, ma sa nofo Komi e suitulaga ia te ia; ma sa nofotupu o ia i tausaga e fa sefulu ma le iva, ma sa fanauina ai e ia Hetu; ma sa ia fanauina foi ni isi atalii ma afafine.

26 Ma sa toe salalau atu le nuu i luga o le laueleele atoa, ma sa toe amata ona i ai o le amioleaga tele i luga o le laueleele, ma sa amata e Hetu ona toe opogi o fuafuaga faalilolilo mai anamua, e faaumatia ai lona tamā.

27 Ma sa oo ina aveese e ia lona tamā mai le nofoalii, auā sa ia fasioti ia te ia i lana lava pelu; ma sa nofo o ia e suitulaga ia te ia.

28 Ma sa i ai perofeta sa toe o mai i le laueleele, ma alaga mai le salamo ia te i latou—e faapea e ao ina latou teuteu le ala o le Alii a leai o le a oo mai se fetuu i luga o le laueleele; ioe, o le a oo mai lava se oge tele, lea o le a faaumatia ai i latou pe afai latou te le salamo.

29 Peitai sa le talitonu tagata i upu a perofeta, ae sa latou tutuli i latou i fafo; ma o ni isi o i latou sa latou lafo i totonu o lua ma tuu i latou ia fano ai. Ma sa oo ina latou faia nei mea uma e tusa ma le poloaiga a le tupu, o Hetu.

30 Ma sa oo ina amata ona i ai o se oge tele i luga o le laueleele, ma sa amata ona faaumatia vave lava tagata ona o le oge, ona ua leai se timu i luga o le fogaeleele.

31 Ma sa oo mai foi gata uogo i luga o le laueleele, ma ūtia oona ai tagata e toatele. Ma sa oo ina amata ona sosola ese a latou lafu mai gata uogo, e agai atu i le laueleele i saute, lea sa ta’ua e sa Nifaē o aSara’emila.

32 Ma sa oo ina fano le tele o i latou i le ala; ae ui i lea, e i ai ni isi sa sosola atu i le laueleele i saute.

33 Ma sa oo ina faia e le Alii ia le toe tuliloaina i latou e agata uogo, ae ia latou punitia le ala ina ia le mafai e tagata ona ui atu ai, ma po o ai lava e taumafai e ui atu ai e mafai ai ona ūtia o’ona e gata uogo.

34 Ma sa oo ina mulimuli atu tagata i le ala o manu, ma aai i tino o manu na pa’u’ū i le ala, seia oo ina latou faaaogaina uma i latou. O lenei ina ua vaai tagata o le a latou fano sa amata ona latou asalamo i a latou amioletonu ma tagi atu i le Alii.

35 Ma sa oo ina ua lava lo latou afaalotomaualalaloina o i latou lava i luma o le Alii sa ia auina ifo i le timu i luga o le fogaeleele; ma sa amata ona toe faamalolosia tagata, ma sa amata ona i ai o fualaau aina i laufanua i matu, ma laufanua uma o faataamilo ai. Ma sa faaali mai e le Alii lona mana ia te i latou i le faasaoina lea o i latou mai le oge.