1 Iwe iei ngang, Moronai, ua sopweno ai we uruo. Iei minne, nengeni, non ewe fansoun pwe pokiten ekkewe mwicheich mi monomon an Akis me chiechian kewe, nengeni, ra akkufu ewe muun Omer.

2 Nge inamo, ewe Samon a uren umoumoch ngeni Omer, me pwan ngeni noun kewe anuon me noun kewe fopun ekkewe rese kutta an epwe mano.

3 Iwe ewe Samon a auroura Omer non ew tan pwe i epwe tou seni ewe fonu; ina minne Omer a tou seni ewe fonu fiti an we famini, me sai chommong ran, me feito ngeni me nuno seni ewe chukuchukuta Sim, me feito unukun ewe neni ikewe ekkewe chon Nifai ra ninnino me ie, iwe seni ikena ngeni otiw, me feito ngeni ew neni minne a iteni Aplom, unukun orossetin ewe fonu, iwe ikewe a aueta imwan we imw mangaku, me pwan noun kewe anuon me noun kewe fopun, me chon non imwan we meinisin, tiwenon chok Jared me an famini.

4 Iwe non ewe fansoun pwe Jared a kepitino pwe epwe emon king won ekkewe aramas, me ren poun fofforungaw; iwe a ngeni Akis noun we fopun pwe punuwan.

5 Iwe non ewe fansoun pwe Akis a kutta manauen seman punuwan we; iwe a tingor aninis seni ir ekkewe a fen fori pwe repwe akkapon me ren ewe pwonen chon nom, iwe ra angei mokuren seman punuwan we, nupwen an a mommot won nenian we nenien mwottun king, nupwen an ausening ngeni noun kewe aramas.

6 Pun a fokkun ennet cheewnon ei ngaw me mwich mi monomon pwe a fen angawano netipen ekkewe aramas meinisin; iei minne Jared a ninnino me won an we nenien mwottun king, iwe Akis a nemenem non nenian we.

7 Iwe non ewe fansoun pwe Akis a poputa ne nonowoiti noun we anuon, iei minne a appungano i non kanapus, me a annomu i won kukkun are ese fen wor mwongo tori an riaffouni mano.

8 Iwe iei ewe pwin i a riaffouni mano, (iwe itan Nimrah) a song ren seman we pokiten met minne seman we a fen fori ngeni pwin we.

9 Iwe non ewe fansoun pwe Nimrah a ionfengeni ew kukkunun chochon mwan, me suno seni ewe fonu, me feito me nonnom ren Omer.

10 Iwe non ewe fansoun pwe Akis a nouni ekkoch anuon, iwe ra fich me ren netipen ekkewe aramas, nge inamo ra fen akkapon ngeni i pwe repwe fori sokopaten ngaw meinisin anongonong won met minne i a mochen.

11 Iei ekkewe aramasen Akis ra fokkun mochen pisekisek, pwan mwo usun an Akis a fokkun mochen nemenem; ina minne, ekkewe anuon noun Akis ra ngeni ir moni, ren minne popun ra emmwenano chommongun kinikinin ekkewe aramas mwirir.

12 Iwe a poputa ne wor ew maun nefinen ekkewe anuon noun Akis me Akis, minne a soposopono ren ukukun chommong ier, ewer, tori arap ngeni kiteterinon ekkewe aramasen ewe muu meinisin, ewer, pwan mwo meinisin, tiwenon chok inik aramas, me ir ekkewe ra suno fiti chon non imwen Omer kewe.

13 Ina minne, Omer a niwin sefan ngeni ewe fonuen an neuo.

14 Iwe non ewe fansoun pwe Omer a poputa ne chinnapeno; nge inamo, non an ierin chinnap a nouni Imer; iwe a epitano Imer pwe epwe king pwe epwe nemenem non nenian we.

15 Iwe mwirin an a epitano Imer pwe epwe king a kuna kinamwe non ewe fonu ren ukukun ru ier, iwe a mano, pun a fen manau non fokkun chommong ran, minne ra uren netipechou. Iwe non ewe fansoun pwe Imer a nemenem non nenian we, iwe a tapweno non aanen seman we.

16 Iwe ewe Samon a poputa sefan ne angeiano ewe anumamau seni ewe fonu, iwe ewe imwen Imer a fokkun feiochuno fan nemenemen Imer; iwe non ukukun wone me ru ier ra fokkun pochokun, ina popun pwe ra fokkun pisekisek—

17 Iwe a wor rer sokopat seni foun ira meinisin, me seni grain, me seni silk, me seni mangaku mi pwetete, me seni gold, me seni silver, me seni mettoch mi auchea;

18 Me pwan sokopaten cattle, seni oksen, me kou, me seni siip, me seni pik, me seni sike, me pwan chommong ekkoch sokkun man minne ir mi auchea ren mwongo ngeni aramas.

19 Iwe mi pwan wor rer oris, me tongki, iwe mi wor anafan me curelom me cumoms; ir meinisin ir mi auchea ngeni aramas, me kon akkaewin ekkewe anafan me curelom me cumom.

20 Iwe iei ewe Samon a wau an kewe feioch won ei fonu, minne a kefinita nap seni pwan ekkoch fonu; iwe a annuku pwe ion chok epwe fonueni ewe fonu epwe fonueni ngeni ewe Samon, are repwe ninnino nupwen repwe wachemukeno non angangangaw; pun won ekkena sokkun, anon ewe Samon: Upwe wau unusochun ai ningeringer.

21 Iwe Imer a fori kapung non wenechar non unusen ranin kewe, iwe a nouni chommong anuon me fopun; iwe a nouni Koriantum, iwe a epitano Koriantum pwe epwe nemenem non nenian we.

22 Iwe mwirin an a epitano Koriantum pwe epwe nemenem non nenian we a manau ruanu ier, me a kuna kinamwe non ewe fonu; ewer, me a pwan kuna ewe Noun mi Wenechar, iwe a pwapwa me mwar non ranin we; iwe a mano non kinamwe.

23 Iwe non ewe fansoun pwe Koriantum a fetan non eerenien seman we, me a forata chommong teninimw mi watte, me a awora met minne mi öch ngeni noun kewe aramas non unusen ranin kewe. Iwe non ewe fansoun pwe ese wor noun semirit pwan mwo tori an a fokkun chinnapeno.

24 Iwe non ewe fansoun pwe punuwan we a mano, pun a ipuku ru ierin. Iwe non ewe fansoun pwe Koriantum a angei punuwan, non an ierin chinnap, emon serafo fopun, me nouni ekkoch anuon me fopun; ina minne a manau tori an a ipuku faik me ru ierin.

25 Iwe non ewe fansoun pwe a nouni Kom, iwe Kom a nemenem non nenian we; iwe a nemenem non faik me tiu ier, me a nouni Heth; me a pwan nouni ekkoch anuon me fopun.

26 Iwe ekkewe aramas ra pwan toropas fetan won unusen unungen ewe fonu, iwe a poputa sefan ne wor fokkun watten fofforungaw won unungen ewe fonu, iwe Heth a poputa sefan ne etiwa ekkewe kokkoten nom mi monomon, pwe epwe nieno seman we.

27 Iwe non ewe fansoun pwe a etetiwa seman we seni an nenien mwottun king, pun a nieno i ren pwisin noun ketinas; iwe a nemenem non nenian we.

28 Iwe ra feito sefan ekkoch soufos non ewe fonu, ra afanafana aier ngeni ir—pwe repwe fokkun amonnata aanen ewe Samon are esap ina epwe feito ew anumamau won unungen ewe fonu; ewer, epwe pwan wor ew eriaffoun nengita, non minne repwe ninnino ika pwe resap aier.

29 Nge ekkewe aramas rese nuku ekkewe kapas an ekkewe soufos, nge ra aturareu; iwe ekkoch me neir ra aturarenong non pwang me nikitireno pwe repwe mano. Iwe non ewe fansoun pwe ra fori ekkei mettoch meinisin anongonong won annukun ewe king, Heth.

30 Iwe non ewe fansoun pwe a poputa ne wor ew riaffoun mwongo won ewe fonu, iwe aramasan kewe ra poputa ne fokkun mwitir ninnino pokiten ewe riaffoun mwongo, pun ese wor pungun ran won unungen fonufan.

31 Iwe ra pwan feito ekkoch serepenit mi poison won unungen ewe fonu, me ra poisonini chommong aramas. Iwe non ewe fansoun pwe nour kewe penen man ra poputa ne suno me mwen ekkewe serepenit mi poison, ngeni ewe fonu eor, minne a iteni me ren ekkewe chon Nifai Saraemla.

32 Iwe non ewe fansoun pwe mi wor chommong me neir minne ra mano won ewe aan; nge inamo, mi wor ekkoch minne ra suno ngeni ewe fonu eor.

33 Iwe non ewe fansoun pwe ewe Samon a annuku ekkewe serepenit pwe resap chiwen tapweno mwirir, nge pwe repwe eppeti ewe aan pwe ekkewe aramas resap feino ewe epek, pwe ion chok epwe sossot ne feino epwe feiengaw me ren ekkewe serepenit mi poison.

34 Iwe non ewe fansoun pwe ekkewe aramas ra tapweno non aanen ekkewe man, me ocheno inisin ekkewe man mi mano minne ra mano won ewe aan, tori ar ocheno ir meinisin. Iei nupwen ekkewe aramas ra kuna pwe repwe mano ra poputa ne aier seni ar anganganaw me sio ngeni ewe Samon.

35 Iwe non ewe fansoun pwe nupwen a naf ar etipetekisona inisir me mwen ewe Samon a tinatiw pungun ran won unungen ewe fonufan; iwe ekkewe aramas ra poputa ne pochokun sefan, iwe a poputa ne wor foun ira non ekkewe fonu ennefen, me non ekkewe fonu mi rokopwanireno meinisin. Iwe ewe Samon a pwarano an manaman ngeni ir ne tumunur seni nengita.