1 Iwe ra pwan feito non ekkewe ranin Kom chommong soufos, me osini usun kiteterinon ekkena aramas mi napanap tiwenon chok ika repwe aier, me kun ngeni ewe Samon, me nikitano ar nii manau me fofforungaw.

2 Iwe non ewe fansoun pwe ekkewe soufos rese ketiw me ren ekkewe aramas, iwe ra suno ngeni Kom fan iten eppet, pun ekkewe aramas ra kutta ar repwe nireno.

3 Iwe ra osini ngeni Kom chommong mettoch; iwe a feioch non unusen nussun ranin kewe.

4 Iwe a manauatam ngeni ierin chinnap, me nouni Siplom; iwe Siplom a nemenem non nenian we. Iwe pwin Siplom we a ungeni i, iwe a poputa ne wor ew fokkun watten maun non unusen ewe fonu.

5 Iwe non ewe fansoun pwe pwin Siplom we a annuku pwe ekkewe soufos meinisin ekkewe ra osini kiteterinon ekkewe aramas repwe ninnino.

6 Iwe a wor weiresin osukosuk non unusen ewe fonu, pun ra fen pwarata pwe ew weiresin anumamau epwe feito won ewe fonu, me pwan won ekkewe aramas, me epwe wor ew weiresin kiteterino neir, ew sokkun esamo fen fis me won unungen ewe fonufan akkom, iwe chur repwe winiti usun chukuchukutan puun won unungen ewe fonu tiwenon chok ika repwe aier seni ar fofforungaw.

7 Iwe rese ausening ngeni mongungun ewe Samon, pokiten ar mwicheich mi ngaw; ina minne, a poputa ne wor maun me anini fengen non unusen ewe fonu, me pwan chommong nengita me samau, ina popun pwe a wor ew weiresin kiteterino, ew sokkun resamo fen sinei usun won unungen ewe fonufan; iwe ekkei meinisin ra fis non ekkewe ranin Siplom.

8 Iwe ekkewe aramas ra poputa ne aier seni ar angangangaw; iwe non ukukun ar aier a wor an ewe Samon umoumoch wor.

9 Iwe non ewe fansoun pwe Siplom a ninnino, iwe Seth a katonong non fotek, me a nonnom non fotek non unusen ranin kewe.

10 Iwe non ewe fansoun pwe Ahah, noun we anuon, a angei ewe muu; iwe a nemenem won ekkewe aramas non unusen ranin kewe. Iwe a fori sokopaten anganganaw meinisin non unusen ranin kewe, ren minne a efisi assukun watten cha; iwe mi chokukkun ranin kewe.

11 Iwe Item, pokiten i mwirimwirin Ahah, a angei ewe muu; iwe i a pwan fori met minne mi ngaw non unusen ranin kewe.

12 Iwe non ewe fansoun pwe non ranin Item kewe ra feito chommong soufos, me osini sefan ngeni ekkewe aramas; ewer, ra osini pwe ewe Samon epwe unusen nireno seni unungen ewe fonufan tiwenon chok ika repwe aier seni ar angangangaw.

13 Iwe non ewe fansoun pwe ekkewe aramas ra apochokunano netiper, me rese mochen ausening ngeni ar kewe kapas; iwe ekkewe soufos ra netipeta me marsefan seni nein ekkewe aramas.

14 Iwe non ewe fansoun pwe Item a fori kapung non fofforungaw non unusen ranin kewe; iwe a nouni Moron. Iwe non ewe fansoun pwe Moron a nemenem non nenian we; iwe Moron a fori met minne mi ngaw me mwen ewe Samon.

15 Iwe non ewe fansoun pwe a poputa ew ungeni me nein ekkewe aramas, pokiten ena mwicheich mi monomon minne a fisita pwe repwe angei pochokun me pisekisek; iwe a pwato emon mwan mi napanap me neir non angangangaw, me maun ngeni Moron, non minne i a atano esopun ewe muu; iwe a nemeni esopun ewe muu ren chommong ier.

16 Iwe non ewe fansoun pwe Moron a akkufu i, me angei ewe muu sefan.

17 Iwe non ewe fansoun pwe a pwato pwan emon mwan mi napanap; iwe i emon mwirimwirin pwin Jared we.

18 Iwe non ewe fansoun pwe a akkufu Moron me angei ewe muu; ina minne, Moron a nonnom non fotek non unusen ranin kewe; me a nouni Koriantor.

19 Iwe non ewe fansoun pwe Koriantor a nonnom non fotek non unusen ranin kewe.

20 Iwe non ranin Koriantor kewe ra pwan feito chommong soufos, me osini usun auchean me amwararen mettoch, me afanafana aier ngeni ekkewe aramas, iwe tiwenon chok ika repwe aier ewe Samon Kot epwe fori kapung ngeni ir tori ar unusen kiteterino.

21 Iwe pwe ewe Samon Kot epwe tinato are wato pwan ew aramas pwe repwe fonueni ewe fonu, me ren an manaman, non ewe pwan chok napanap ren minne i a fen wato semer kewe.

22 Iwe rese etiwa ekkewe kapas meinisin an ekkewe soufos, pokiten ar we mwich mi monomon me angang mi anieput.

23 Iwe non ewe fansoun pwe Koriantor a nouni Ether, iwe a mano, ren an nonnom non fotek non unusen ranin kewe.