1 Tan natan siak, Moroni, insulat ko so saray salita a nigangan ed siak, unong ed natandaan ko; tan imbagak la ed sikayo so saray beñgatla a kinapotan ko; dia ed ontan ag yo didiwiten so saraya pian komon saraya so ipatalus yo; lapu ed saman a beñgatla so nisebel ed sikayo, likud no ag-mabayag saya so kakabatan ed Dios.

2 Tan nia, nayari a niiter ed sikayo so pankanawnawa a mañgipanengneng ed saray piligo ed saray ontulong ed sikayo ed pañgipaway na saya a kimey.

3 Tan dia ed saray talora nipanengneng ed sikara ed panamegley na pakapanyari na Dios; dia ed ontan nakabatan da a petepeteg a saraya a beñgatla so tua.

4 Tan dia ed panamegley na sañgi na talora a tasi saraya a beñgatla so niletneg; tan say pamaneknek na talora, tan saya a kimey, a dia ed saraya nipatnag so pakapanyari na Dios tan ontan met ed salita to, a dia ed saya say Ama, tan say Anak, tan say Espiritu Santo so mantasi—tan saraya ya amin so ontalindeg a sakey a pamaneknek sumpa ed mundo dia ed sampot ya agew.

5 Tan no nagawa a sikara so mambabawi tan ondago ed Ama dia ed ñgaran nen Jesus, sikara so naawat ed panarian na Dios.

6 Tan natan, no angapo so pakaoley ko ed saraya a beñgatla, okom yo ak; tan nakabatan yo a wala so pakaoley ko sano siak so nanengneng yo, tan sikatayo so ontalindeg ed arap na Dios, dia ed sampot ya agew. Amen.