1 Tan agawa a si Jared tan say agi to a laki, tan saray boleg da, tan ontan met ed saray kakaaro nen Jared tan say agi to a laki tan saray boleg da, so linma ed patar a wala ed mamabaybay, (tan say ñgaran na saya a patar so Nimrod, imboloy da ed ñgaran na makapanyari ya umaanop) a kaiba ra so saray ayayep a tinipon da, kalakian tan kabaian, ed amin a kanengneñgan.

2 Tan nangagawa ra na patit tan pasiklong ya impanerel da ed saray manok ed liwang; tan añgiparaan met ira na panañginan, a dia ed saya inawit da so saray sira ed danum.

3 Tan nanawit ira met na deseret, a no, ipatalus, bayaong; kanian nanawit ira na ontan la ya olop na bayaong, tan amin a kanengneñgan a narumog ed tapew na dalin, saray bokel a nanduroma a nengneng.

4 Tan agawa a sanen akasabi la ra ed patar na Nimrod say Katawan so linma tan akisalita ed laki ya agi nen Jared; tan sikato so wala ed lurem, tan say laki ya agi nen Jared sikato so ag to anengneng.

5 Tan agawa a say Katawan ingangan to ra ya onla ed kalawakan, on, ed saman a sulok ya angapo ni so too ya akakar. Tan agawa a say Katawan so linma ed unaan da, tan sikato so akisalita ed sikara a manalalagey ed lurem, tan initer to ed sikara so wanwan no iner so pambaroyan da.

6 Tan agawa a sikara so nambaroy ed kalawakan, tan sikara so nangawa na saray sakayan, ya inkana ra a binmaliw ed dakel a danum, lapu ed sikara so andi-tonda ya inwanwan ed panamegley na lima na Katawan.

7 Tan say Katawan ag to nitepel a sikara so ontonda diman ed labas na dayat ed kalawakan, balet pilalek to a sikara so makasabi ed dalin a sipan, a saya so apili-pili ed amin a dalin, a saya so ingena na Katawan a Dios ya onkana ed saray totoo a matunong.

8 Tan insamba to ed sanok to ed laki ya agi nen Jared, a siopaman a mankayarian ed saya a dalin a sipan, manlapu ed saman a panaon ya anga ed arapen, so manlingkor ed sikato, say tua tan saksakey a Dios, odino andi sikara so naderal sano magenap la so sanok to ya onsabi ed sikara.

9 Tan natan, nanengneng tayo so saray pananontunan na Dios nipaakar ed saya a dalin, a saya so dalin a sipan; tan antokaman a bansa a mankayarian ed saya so manlingkor ed Dios, odino andi sikara so naderal sano onsabi so pakagnap na sanok to ed sikara. Tan say pakagnap na sanok to so onsabi ed sikara sano sikara so nagnap la ed kasalanan.

10 Tan nia, saya so dalin ya apili-pili ed amin ya arum a dalin; lapu ed onia siopaman so mankayarian ed saya nepeg a manlingkor ed Dios odino andi sikato so naderal; lapu ed saya so andi-angaan a pananontunan na Dios. Tan saya so ag-nagawa anga ed inkagnap na kasalanan ed limog na anak na saya a dalin, dia ed ontan sikara so naderal.

11 Tan saya so onsabi ed sikayo, O sikayo a Gentiles, pian nakabatan yo so pananontunan na Dios—pian komon sikayo so mambabawi, tan ag yo la ituloy so saray kasalanan yo ya anga ed say inkagnap so onsabi, pian ag yo napalasur so inkagnap na sanok na Dios ed sikayo ed siñga ginawa na totoo a nanayam ed saya a dalin.

12 Nengneng yo, saya so sakey ya apili a dalin, tan antokaman a bansa so mankayarian sikato so bulos ed inkaaripen, tan inkadakep, tan ed amin a bansa a wala ed silong na tawen, no sikara so manlingkor labat ed Dios na saya a dalin, a si Jesu Cristo, a sikato so nipanengneng ed saray beñgatla ya insulat mi.

13 Tan natan ituloy ko la so kasulatan ko; tan nia, agawa a say Katawan inawit to si Jared tan saray kaagian to ya anga ed saman so baleg a dayat ya añgapag ed dalin. Tan sanen akasabi la ra ed dayat impaalagey da so saray abong-abong da ya abel; tan inñgaran da so saman a pasen na Moriancumer; tan sikara so nanayam ed saray abong-abong ya abel, tan nanayam ira ed abong-abong ya abel ed gilig na dayat ed loob na apat taon.

14 Tan agawa dia ed sampot na komapat a taon say Katawan linma lamet ed say laki ya agi nen Jared, tan nanalagey ed lurem tan akitungtong ed sikato. Tan dia ed loob na talora ya oras say Katawan so akitungtong ed say laki ya agi nen Jared, tan sikato so nampasnokan to lapu ed ag to anunotan so tinmawag ed ñgaran na Katawan.

15 Tan say laki ya agi nen Jared so nambabawi ed saray mauges a ginawa to, tan sikato so tinmawag ed ñgaran na Katawan onkana ed saray kaagian to a kaolop to. Tan say Katawan inkuan to ed sikato: pirdonaen taka tan saray kaagian mo ed saray kasalanan da; balet ag kayo la mankakasalanan lamet, tan nunoten yo a say Espirituk ag lawas misonduan ed saray totoo; dia ed ontan, no sikayo so mankasalanan ya anga ed sikayo so nagnap la sikayo so nabatang ed kawalaan na Katawan. Tan saraya so kanunotan ko ed say dalin ya iter ko ed sikayo ya onkana a tawir yo; tan saya so dalin ya apili-pili ed amin ya arum a dalin.

16 Tan say Katawan inkuan to: Onla ka a mankimey tan mangawa ka, unong ed kanengneñgan na saray sakayan a ginawam nen saman. Tan agawa a say laki ya agi nen Jared so linma la a nankimey, tan ontan met ed saray kaagian to, tan nangawa ra na saray sakayan a siñga unong ed ginawa da la, unong ed bilin na Katawan. Tan saraya so ankelag, tan anlemew ed danum, angan siñga lemew na manok a wala ed danum.

17 Tan saraya so ginawa ra ed kanengneñgan a mapalalo a malet, ya angan nayari a kargaan na danum a siñga sakey a plato; tan say banda ed ebet so malet a siñga plato; tan saray gilig da so malet a siñga plato; tan saray sampot da so tinmambukol; tan say toktok to so malet a siñga plato; tan say karokey to so siñga karokey na sakey a kiew; tan saray puerta to, no akakapot, so malet a siñga plato.

18 Tan agawa a say laki ya agi nen Jared so tinmawag ed Katawan a nankuan: O Katawan, agawak la so kimey ya ingangan mo ed siak, tan ginawak so saray sakayan unong ed impañgiwanwan mo ed siak.

19 Tan nia, O Katawan, dia ed dalem angapo so liwawa; iner so pañgipaarapan mi? Tan ontan met sikami so ompatey, lapu ed diman ed dalem ag kami makalinawa, likud labat ed saman so dagem a wala la ed dalem; dia ed ontan sikami so ompatey.

20 Tan say Katawan inkuan to ed say laki ya agi nen Jared: Nia, mangawa ka na abot ed tuktok tan ontan met ed ebet; tan sano nakukulañgan kayo la na dagem, ekal yo so polet na abot tan makaala kayo na dagem. Tan no bilang onloob so danum ed sikayo, nia, poletan yo so abot, pian ag kayo ompatey ed delap.

21 Tan agawa a say laki ya agi nen Jared saya so ginawa to, unong ed ingangan na Katawan.

22 Tan sikato lamet so tinmawag ed Katawan ya inkuan to: O Katawan, nia sinumpal ko so unong na ingangan mo ed siak; tan niparaan ko la so saray sakayan ya onkana ed saray totook, tan nia, angapo so liwawa ed dalem da. Nengneng mo, O Katawan, natepelan mo a baliwen mi so saya a baleg a danum ed ontan la a biluñget?

23 Tan say Katawan inkuan to ed say laki ya agi nen Jared: Anto so labay mo a gawaen ko pian nawalaan kayo na liwawa ed dalem na sakayan? Tan nia, ag kayo nayari a nawalaan na duroñgawan, lapu ed saraya so naboybuyak; ni say nayarian yo so manawit na apoy, lapu ed ag yo nayarian so onla a say liwawa na apoy so ikana yo.

24 Tan nia, siñga kayo sakey a balyena ed pegley na dayat; tan saray pinmalandey a daluyon so ombasig ed sikayo. Manwari ya ontan, sikayo so awiten ko manlapu ed kaaraleman na dayat; tan saray dagem so insibok la na sañgik, tan ontan met saray uran tan delap so imbakik.

25 Tan nia, sikayo so imparaan ko sumpa ed saraya a beñgatla; lapu ed ag yo nayarian a baliwen so saya a baleg a kaaraleman likud no sikayo so imparaan ko sumpa ed saray daluyon na dayat, tan say dagem a sinmiplog, tan say delap ya onsabi. Dia ed ontan anto so labay mo pian sikayo so niparaan ko pian nawalaan kayo na liwawa sano sikayo so akmonen na kaaraleman na dayat?