1 Tan natan agawa a say laki ya agi nen Jared, (natan say bilang na sakayan a niparaan so walora) so linma ed palandey, a saya so tinawag da a palandey na Shelem, lapu ed mapalalo a kaatagey to, tan nantaping ed sakey a baleg a bato na labinanem ya ankelag a bato; tan saraya so amputi tan malinew, angan mankaninag a siñga salming; tan saraya so inawit to ed lima to a linma ed tuktok na palandey, tan sikato lamet so tinmawag ed Katawan, a nankuan:

2 O Katawan, inkuan mo a sikami so nasakop a naliktob na delap. Natan nia, O Katawan, tan ag ka komon mampasnok ed aripen mo lapu ed kakapuyan to ed arapan mo; lapu ed kabat mi a sika so masanto tan manaayam ka ed saray katawenan, tan sikami so ag-manepeg ed arap mo; lapu ed inkigapol say kagagawa mi so nanmaliw ya andi-tonda a mauges; manwari ya ontan, O Katawan, initer mo ed sikami so sakey a gangan a sikami so nakaukolan ya ontawag ed sika, pian manlapu ed sika naawat mi so unong ed saray pilalek mi.

3 Nia, O Katawan, sikami so binakbak mo lapu ed saray kasalanan mi, tan sikami so sinunson mo, tan dia ed dakel a taon sikami so wala ed kalawakan; manwari ya ontan, sika so mapañgasi ed sikami. O Katawan, onnengneng ka ed siak a napno na panagabagey, tan iyarawim so pasnok mo ed saraya a totoo, tan ag mo itetepel a sikara so onla ya ombaliw ed saya a masanok a kaaraleman ed biluñget; balet nia so saray beñgatla a tinaping ko a nanlapu ed baleg a bato.

4 Tan amtak, O Katawan, a wala ed sika so amin a pakapanyari, tan nagawaan mo so beñgatla a kaliktan mo ya onkana ed pankaabigan na too; dia ed ontan, diwit mo so saraya a bato, O Katawan, ed gamet mo, tan iparaan mo so saraya pian onliwawa ed kabiluñgetan; tan saraya so onliwawa a mansilew ed sikami ed dalem na sakayan ya imparaan mi, pian nawalaan kami na liwawa legan a sikami so ombaliw ed dayat.

5 Nia, O Katawan, saya so nayarian mo a gawaen. Kabat mi a nayarian mo ya ipanengneng so baleg a pakapanyari, a saya so melag ed pakanengneng na too unong ed pakatalus to.

6 Tan agawa a sanen say laki ya agi nen Jared so nankuan ed saraya a salita, nia, say Katawan iniunat to so lima to tan diniwit to so saray bato a sansansakey na gamet to. Tan say sakbong so naekal ed mata na say laki ya agi nen Jared, tan anengneng to so gamet na Katawan; tan saya so siñga gamet na too, a kapara na laman tan dala; tan say laki ya agi nen Jared so niparukol ed arap na Katawan, lapu ed sikato so dinagsaan na takot.

7 Tan say Katawan anengneng to a say laki ya agi nen Jared so niparukol ed dalin; tan say Katawan nankuan ed sikato: Alagey ka, akin kasi sika so niparukol?

8 Tan inkuan to ed Katawan: Anengneng ko so gamet na Katawan, tan ataktakot ak ag la piga siak so bakbaken to; lapu ed ag ko amta a say Katawan so awalaan na laman tan dala.

9 Tan say Katawan inkuan to ed sikato: Lapu ed pananisiam anengneng mo a siak alaen ko so laman tan say dala; tan angapo ni so too a linma ed siak ed ontan la a mapalalo a pananisia a siñga say wala ed sika; tan no ag ontan ag mo komon anengneng so gamet ko. Akanengneng ka la na nagkalalo ni nen say saya?

10 Tan sikato so inmebat: Andi; Katawan, ipanengneng mo ed siak so inkasika.

11 Tan say Katawan inkuan to ed sikato: Sisiaen mo so saray salita ya ibalikas ko?

12 Tan sikato so inmebat: On, Katawan, amtak a tua so sasalitaen mo, lapu ed sika so sakey a Dios na katuaan, tan ag mo nayarian so mantila.

13 Tan sanen imbalikas to so saraya a salita, nia, say Katawan impanengneng to so inkasikato ed sikato, tan inkuan to: Lapu ed akabatan mo so saraya a beñgatla sika so adundon manlapu ed inkigapol; dia ed ontan sika so nipawil ed arapan ko; dia ed ontan ipanengneng ko so inkasiak ed sika.

14 Nengneng mo, siak so saman so niparaan nanlapu la ed inletneg na mundo a mandundon ed saray totook. Nia, siak si Jesu Cristo. Siak so Ama tan say Anak. Dia ed siak amin a katooan so nawalaan na bilay, tan dia ed andi-angaan, iñgen saray manisia ed ñgaran ko; tan sikara so manmaliw ya anak ko a lalaki tan anak ko a bibii.

15 Tan ag ni agawa ya impanengneng ko so inkasiak ed too a pinalsak, lapu ed angapo ni so too ya anisia ed siak a siñga say sika. Anengneng mo a sika so pinalsa a miolibay ed siak ed indeñgan? On, angan amin a totoo so pinalsa ed gapo ed indeñgan ko.

16 Nia, saya a laman, a nanenengneng mo natan, saya so laman na espirituk; tan say too a pinalsak ed indeñgan na laman na espirituk, tan angan siak so ompapanengneng ed sika ed espiritu ontan met siak so ompanengneng ed saray totook ed inkalaman.

17 Tan natan, siak, Moroni, inkuan ya ag ko nayarian a gawaen so nagnap a pakatungtoñgan ed saraya a beñgatla a nisulat, dia ed ontan masarag la ed siak so pañgikuan ko a si Jesus impanengneng to so inkasikato ed saya a too dia ed espiritu, angan dia ed kanengneñgan tan indeñgan lamlamang na laman ya angan say impampanengneng to ed inkasikato ed saray Nephite.

18 Tan sikato so nampulong ed sikato a siñga met say impampulong to ed saray Nephite; tan saya ya amin, pian saya a too nakabatan to komon a sikato so Dios, lapu ed saray amayamay a makana a kimey ya impanengneng na Katawan ed sikato.

19 Tan lapu ed kakabatan na saya a too sikato so ag asebelan ed impakanengneng to ed dalem na sakbong; tan anengneng to so gamet nen Jesus, a saya, sanen anengneng to, sikato so niparukol ed takot; lapu ed kabat to a saya so gamet na Katawan, tan angapo la so pananisia to, lapu ed amta to la, ya angapo la so panduarua.

20 Lapu ed ontan, wala ed sikato so nagnap a kakabatan nipaakar ed Dios, sikato so ag asebelan ed dalem na sakbong; dia ed ontan anengneng to si Jesus; tan sikato so nantalima ed sikato.

21 Tan agawa a say Katawan nankuan ed say laki ya agi nen Jared; Nia, ag mo aabuloyan a saraya a beñgatla ya anengneng tan nadñgel mo so makasabi ed mundo, anga ed isabi na panaon ya igloriak so ñgaran ko ed laman; dia ed ontan, pablim so saray beñgatla ya anengneng tan nadñgel mo, tan ag mo ipapanengneng ed siopaman a too.

22 Tan nia, sano sika so ondago ed siak, isulat mo so saraya tan ikapot mo so saraya, pian angapo so makapañgipatalus ed saraya; tan isulat mo so saraya ed sakey a salita ya ag da nabasa.

23 Tan nia, saraya so duara a bato so iter ko ed sika, tan ikapot mo met a kaiba so saray beñgatla ya isulat mo.

24 Tan nia, say salita ya ikanam ed pansulat mo so kinewkew ko; lapu ed ontan gawaen ko ed isabi na dili a panaon ko a saraya a bato so mamalinew ed mata na saray totoo nipaakar ed saraya a beñgatla ya insulat mo.

25 Tan sanen say Katawan ayari to la ya imbaga so saraya a salita, impanengneng to ed say laki ya agi nen Jared so amin a nanayam ed mundo nen saman, tan ontan met ed amin ya onsabi ni; tan saraya so ag to insebel ed pakanengneng to, angan dia ed saray kasampotan na dalin.

26 Tan inkuan to ed sikato ed saman a panaon, a no sikato so manisia ed sikato nayarian to ya ipanengneng ed sikato so amin a beñgatla—saya so nipanengneng ed sikato; dia ed ontan say Katawan ag to nayari ya isanib ed sikato, lapu ed kabat to a say Katawan nayarian to ya ipanengneng so amin a beñgatla ed sikato.

27 Tan say Katawan inkuan to ed sikato: Isulat mo so saraya a beñgatla tan saraya so kapotan mo; tan saraya so ipanengneng ko ed isabi na dili a panaon ko ed saray anak na totoo.

28 Tan agawa a say Katawan ingangan to ed sikato ya ikapot to so saray duara a bato ya inawat to, tan saraya so ag to ipapanengneng, anga ed say Katawan ipanengneng to so saraya ed saray anak na totoo.