Scriptures
Ether 14


Tekap 14

Say kasalanan na saray totoo so añgawit na ayew ed saman a dalin—Si Coriantumr so akibakal ed si Gilead, tinmumbok si Lib, tan tinmumbok si Shiz—Say dala tan baleg a panagpatey so tinmayak ed dalin.

1 Tan natan ginmapo so sakey a baleg ya ayew ed amin a dalin lapu ed kasalanan na saray totoo, a dia ed saya, sano say sakey a too igaton to so kagawaan to odino say espada to ed tapew na panagamotan to, odino dia ed pasen a panañgisinopan to, nia, dia ed kaimbuasan, ag to la naalmo, baleg so ayew ed saman a dalin.

2 Lapu ed onia balang sakey a too so bembenan to so saray beñgatla a kayarian to, ed saray lima to, tan ag la ombayes ni say mañgipabayes; tan balang sakey a too sankabemben to so putan na espada to ed kawanan a lima to, dia ed pañgiagel to ed saray kayarian to tan say dili a bilay to tan say asawa to tan anak to.

3 Tan natan, dia ed kayari na duara a taon, tan kayari na impatey nen Shared, nia, tinmalindeg so laki ya agi nen Shared tan akilaban ed si Coriantumr, a dia ed saya tinalo nen Coriantumr tan sikato so inosilan to anga ed kalawakan na Akish.

4 Tan agawa a say laki ya agi nen Shared diman to nilabanan ed kalawakan na Akish, tan say bakal nanmaliw a mapalalo a makapaermen, tan dakel a nilibo so inatey ed panamegley na espada.

5 Tan agawa a si Coriantumr niliktob to so kalawakan; tan say laki ya agi nen Shared so nankurang a pinmaway ed kalawakan dia ed labi, tan pinatey to so kabiañgan na ñgayew nen Coriantumr, sanen sikara so abuek.

6 Tan sikato so linma ed dalin na Moron, tan impasen to so inkasikato ed trono nen Coriantumr.

7 Tan agawa a si Coriantumr so nanayam ed dalem na kalawakan a kaiba to so ñgayew to ed loob na duara a taon, a dia ed saman naawat to so baleg a biskeg ed ñgayew to.

8 Natan saman so laki ya agi nen Shared, a say ñgaran to Gilead, so akaawat met na baleg a biskeg ed ñgayew to, lapu ed saray maamot a pannununoñgan.

9 Tan agawa a sikato so pinatey na atagey a sacerdote to sanen sikato so akayurong ed trono to.

10 Tan agawa a sakey ed saray kabiañgan na maamot a pannununoñgan so amatey ed sikato ed sakey a maamot a labasan, tan inala ed inkasikato so panarian; tan say ñgaran to Lib; tan si Lib so sakey a too a baleg so laman to, nen say siopaman a laki ed limog na amin na totoo.

11 Tan agawa a dia ed unaan a taon na impanoley nen Lib, si Coriantumr so linma a pinmegdat ed dalin na Moron, tan linabanan to si Lib.

12 Tan agawa a sikato so akilaban ed si Lib, a dia ed saya asigbat nen Lib si Coriantumr ed taklay kanian sikato so asugatan; manwari ya ontan, saray ñgayew nen Coriantumr sinunson da si Lib, kanian sikato so binmatik ya anga ed ketegan ed gilig na dayat.

13 Tan agawa a si Coriantumr so inmosil ed sikato, tan si Lib akilaban dia ed gilig na dayat.

14 Tan agawa a si Lib binakbak to so ñgayew nen Coriantumr, kanian sikara lamet so binmatik ed kalawakan na Akish.

15 Tan agawa a si Lib so inmosil ed sikato ya anga ed saray patar na Agosh. Tan si Coriantumr inawit to ya amin so totoo a kaiba to sanen sikato so binmatik ed arap nen Lib ed saman a sukong na dalin a batikan to.

16 Tan sanen sikato so akasabi ed saray patar na Agosh nilabanan to si Lib, tan sikato so binakbak to anga ed sikato so inatey; manwari ya ontan, say laki ya agi nen Lib so linma sumpa ed si Coriantumr a sinmublay ed pasen to tan nilabanan to si Coriantumr, tan say bakal nanmaliw a mapalalo a makapaermen, a dia ed saya si Coriantumr so binmatik lamet ed arap na ñgayew na say laki ya agi nen Lib.

17 Natan say ñgaran na saman so laki ya agi nen Lib so atawag na Shiz. Tan agawa a si Shiz inosilan to si Coriantumr, tan asamsam to so dakel a ciudad, tan pinapatey to so saray bibii tan ugogaw, tan pinopoolan to so saray ciudad.

18 Tan sinmabi so takot da ed si Shiz ed lapag na amin na dalin; on, sakey a nañgis ed segsegang so pinmaway ed lapag na dalin—Siopa so ontalindeg sumpa ed ñgayew nen Shiz? Nia, dineral to so dalin!

19 Tan agawa a saray totoo ginapoan da so mantitipon ed saray ñgayew, ed lapag na amin na tapew na dalin.

20 Tan sikara so naapag-apag; tan say kabiañgan da so tinmipon ed si Shiz, tan say arum a kabiañgan so binmatik ed ñgayew nen Coriantumr.

21 Tan ontan la a kabaleg tan kinabayag so saman a bakal, tan ontan la kinarukey so saray impamaterter na dala tan baleg a panagpatey, kanian say amin a tapew na dalin so amayakmakan na bangkay na saray inaatey.

22 Tan ontan la so peles tan siglat na bakal kanian angapo so too a nakdaan a mañgikutkot ed saray inaatey, balet sikara so nankurang manlapu ed pamaterter na dala paonla ed pamaterter na dala, a tinataynan da so saray bangkay na mandapag a lalaki, bibii, tan saray ugogaw ya atayak ed tapew na dalin, a manmaliw a panañgan ed saray bigis na laman.

23 Tan say añgob tinmayak ed tapew na dalin, angan say amin a tapew na dalin, lapu ed ontan saray totoo so agonigon ed agew tan labi, makaseñgeg ed añgob diman.

24 Manwari ya ontan, si Shiz ag to tinondaan ya inosilan si Coriantumr; tan insamba to ed inkasikato ya ibales to ed si Coriantumr so dala nen agi to a laki, ya apatey, tan say salita na Katawan a sinmabi ed si Ether a si Coriantumr so ag ompatey ed panamegley na espada.

25 Tan dia ed onia nanengneng tayo a say Katawan dinalaw to ra ed inkagnap na sanok to, tan say karelmeñgan da tan say karumsisan da imparaan to so dalan ed andi-angaan a kaderal da.

26 Tan agawa a si Shiz inosilan to si Coriantumr ed mamabukig, angan dia ed ketegan ed gilig na dayat, tan diman nilabanan to si Shiz ed loob na talora ya agew.

27 Tan makapataktakot so inkaderal ed limog na saray ñgayew nen Shiz kanian saray totoo ginapoan da so nataktakot, tan ginapoan da so ombatik ya ontaynan ed arap na saray ñgayew nen Coriantumr; tan sikara so binmatik ed dalin na Corihor, tan dineral da so saray manaayam ed arapan da, amin ya ag da labay so mikasakey ed sikara.

28 Tan impaalagey da so saray abong-abong da ya abel ed patar na Corihor; tan si Coriantumr impaalagey to so saray abong-abong to ya abel ed patar na Shur. Natan say patar na Shur so asinger ed pukdol na Comnor; dia ed ontan, si Coriantumr tinipon to so saray ñgayew to ed pukdol na Comnor, tan pinaknol to so trompita ed saray ñgayew nen Shiz pian bagaan to ra a mibakal.

29 Tan agawa a sikara so linma a dinmago, balet sikara lamet so asunson; tan sikara lamet so dinmugpa ed komadua a panaon, tan sikara lamet so asunson da ed komadua a panaon. Tan agawa a sikara lamet so linma ed komatlo a panaon, tan say bakal nanmaliw a mapalalo a makapaermen.

30 Tan agawa a si Shiz binakbak to si Coriantumr tan asugatan to na aralem; tan si Coriantumr, lapu ed inkaekalan to na dala, so naandian na liknaan, tan sikato so inawit da a siñga inatey.

31 Natan say inkabalang na saray lalaki, bibii, tan ugogaw ed nantupag a diking so agay la, kanian si Shiz ingangan to ed saray totoo to ya ag da la osilan so ñgayew nen Coriantumr; dia ed ontan, sikara la so pinmawil ed campo ra.