Ko e Tohi ʻa ʻEtá

1 Pea ko ʻeni ko au, ^aMolonai, ʻoku ou hanga ke fai ha fakamatala ʻo e kakai ʻi muʻa ʻa ia naʻe fakaʻauha ʻi he ^btoʻukupu ʻo e ʻEikí ʻi he funga ʻo e fonua tokelaú ni.

2 Pea ʻoku ou toʻo ʻeku fakamatalá mei he ngaahi peleti ʻe ^auofulu mā fā ʻa ia naʻe ʻiloʻi ʻe he kakai ʻo Limihaí, ʻa ia ʻoku ui ko e Tohi ʻa ʻEtá.

3 Pea ko e meʻa ʻi heʻeku mahalo ko e ʻuluaki konga ʻo e lekōtí ni, ʻa ia ʻoku lau ʻo kau ki he fakatupu ʻo e māmaní, kae ʻumaʻā foki mo ʻĀtama, mo ha fakamatala mei he taimi ko iá ʻo aʻu mai ki he fuʻu ^ataua lahí, pea mo e ngaahi meʻa kotoa pē naʻe hoko ʻi he fānau ʻa e tangatá ʻo aʻu mai ki he taimi ko iá, ʻoku maʻu ia e he kau Siú—

4 Ko ia ʻoku ʻikai te u tohi ʻa e ngaahi meʻa ko ia naʻe hoko mei he ngaahi ʻaho ʻo ^aʻĀtamá ʻo aʻu mai ki he taimi ko iá; ka ʻoku tuʻu ia ʻi he ngaahi peletí; pea ko ia ia te ne ʻiloʻi iá, ʻe maʻu ʻe ia ʻa e mālohi ke ne lava ʻo maʻu ʻa e fakamatala kakató.

5 Kae vakai, ʻoku ʻikai te u fai ʻa e fakamatala kakató, ka ko ha konga pē ʻo e fakamatala ʻoku ou faí, mei he tauá ʻo aʻu mai ki honau fakaʻauhá.

6 Pea ko hono anga ʻeni ʻo ʻeku fai ʻa e fakamatalá. Ko ia ia naʻá ne hiki ʻa e lekooti ní ko ^aʻEta, pea ko ha hako ia ʻo Kolianitoa.

7 Ko Kolianitoá ko e foha ia ʻo Moloni.

8 Pea ko Moloní ko e foha ia ʻo ʻEitemi.

9 Pea ko ʻEitemí ko e foha ia ʻo ʻEiha.

10 Pea ko ʻEihá ko e foha ia ʻo Seti.

11 Pea ko Setí ko e foha ia ʻo Sipiloni.

12 Pea ko Sipiloní ko e foha ia ʻo Komu.

13 Pea ko Komú ko e foha ia ʻo Kolianitumu.

14 Pea ko Kolianitumú ko e foha ia ʻo ʻAminikata.

15 Pea ko ʻAminikatá ko e foha ia ʻo ʻĒlone.

16 Pea ko ʻĒloné ko ha hako ia ʻo Heti, ʻa ia ko e foha ʻo Heiatomi.

17 Pea ko Heiatomí ko e foha ia ʻo Lipi.

18 Pea ko Lipí ko e foha ia ʻo Kisi.

19 Pea ko Kisí ko e foha ia ʻo Kolome.

20 Pea ko Kolomé ko e foha ia ʻo Līvai.

21 Pea ko Līvaí ko e foha ia ʻo Kimi.

22 Pea ko Kimí ko e foha ia ʻo Molianitoni.

23 Pea ko Molianitoní ko ha hako ia ʻo Lipileikisi.

24 Pea ko Lipileikisí ko e foha ia ʻo Sesi.

25 Pea ko Sesí ko e foha ia ʻo Heti.

26 Pea ko Hetí ko e foha ia ʻo Komu.

27 Pea ko Komú ko e foha ia ʻo Kolianitumu.

28 Pea ko Kolianitumú ko e foha ia ʻo ʻIma.

29 Pea ko ʻImá ko e foha ʻo ʻOma.

30 Pea ko ʻOmá ko e foha ia ʻo Sulu.

31 Pea ko Sulú ko e foha ia ʻo Kipi.

32 Pea ko Kipí ko e foha ʻo ʻOlaihā, ʻa ia ko e foha ʻo Sēleti.

33 ʻA ia ko e ^aSēleti naʻe ʻalu atu fakataha mo hono tokouá mo hona fāmilí, mo ha niʻihi kehe mo honau fāmilí, mei he tauá māʻolungá, ʻi he taimi ʻa ia naʻe ^bveuveuki ai ʻe he ʻEikí ʻa e lea ʻa e kakaí, peá ne fuakava ʻi hono houhaú ʻe fakamovetevete holo ʻa kinautolu ʻi he ^cfunga ʻo e māmaní kotoa; pea fakatatau ki he folofola ʻa e ʻEikí naʻe fakamoveteveteʻi ʻa e kakaí;

34 Pea ko e ^atokoua ʻo Sēletí ko ha tangata kaukaua mo lahi, pea ko e tangata naʻe ʻofeina lahi ʻe he ʻEikí, ko ia ko Sēleti, ko hono tokouá, naʻe lea kiate ia: tangi ki he ʻEikí, ke ʻoua te ne veuveuki ʻeta leá koeʻuhi ke ʻoua naʻá ta taʻe-feʻilongaki ʻi heʻeta ngaahi leá.

35 Pea naʻe hoko ʻo pehē naʻe tangi ʻa e tokoua ʻo Sēletí ki he ʻEikí, pea naʻe ʻaloʻofa ʻa e ʻEikí kia Sēleti; naʻe ʻikai te ne veuveuki ʻa e lea ʻa Sēletí; pea ko ia naʻe ʻikai ke veuveuki ʻa e lea ʻa Sēletí mo hono tokouá.

36 Pea naʻe pehē ʻe Sēleti ki hono tokouá: Toe tangi ki he ʻEikí, heiʻilo naʻá ne taʻofi ʻa hono houhaú meiate kinautolu ko hota ngaahi kaumeʻá, ke ʻoua te ne veuveuki ʻa ʻenau leá.

37 Pea naʻe hoko ʻo pehē naʻe tangi ʻa e tokoua ʻo Sēletí ki he ʻEikí, pea naʻe ʻaloʻofa ʻa e ʻEikí ki hona ngaahi kaumeʻá pea mo honau ngaahi fāmilí foki, pea naʻe ʻikai ke veuveuki ʻa ʻenau leá.

38 Pea naʻe hoko ʻo pehē naʻe toe lea ʻa Sēleti ki hono tokuá, ʻo pehē: ʻAlu, ʻo fehuʻi ki he ʻEikí pe te ne kapusi atu ʻa kitautolu mei he fonuá, pea kapau te ne kapusi ʻa kitautolu mei he fonuá, fehuʻi kiate ia pe te tau ʻalú ki fē. Pea heiʻilo naʻa ʻave ʻa kitautolu ʻe he ʻEikí ki ha fonua ʻa ia ʻoku ^amahuʻinga taha ʻi he māmaní kotoa? Pea kapau ʻe pehē, tuku ke tau faitotonu ki he ʻEikí, koeʻuhi ke tau maʻu ia ko hotau tofiʻa.

39 Pea naʻe hoko ʻo pehē naʻe tangi ʻa e tokoua ʻo Sēletí ki he ʻEikí ʻo fakatatau ki he meʻa kuo lea ʻaki ʻi he ngutu ʻo Sēletí.

40 Pea naʻe hoko ʻo pehē naʻe ʻafio ʻa e ʻEikí ki he tokoua ʻo Sēletí, ʻo ne ʻaloʻofa kiate ia, ʻo ne folofola kiate ia:

41 ʻAlu pea tānaki fakataha hoʻo ngaahi takanga monumanu īkí, ʻa e tangata mo e fefine fakatouʻosi, ʻo e faʻahinga kotoa pē; kae ʻumaʻā foki mo e tengaʻi ʻakau ʻo e fonuá ʻi he faʻahinga kotoa pē; mo ho ngaahi ^afāmilí; kae ʻumaʻā foki mo Sēleti ko ho tokouá, mo hono fāmilí; pea mo ho ngaahi kaumeʻá foki mo honau ngaahi fāmilí, mo e ngaahi ^bkaumeʻa ʻo Sēletí mo honau ngaahi fāmilí.

42 Pea ʻo ka hili haʻo fai ʻení te ke ^aʻalu ʻo taki ʻa kinautolu ki he teleʻa ʻa ia ʻoku tuʻu ʻi he fakatokelaú. Pea te u fetaulaki ai mo koe, pea te u ^bmuʻomuʻa ʻiate koe ki ha fonua ʻoku ^cmahuʻinga lahi hake ʻi he ngaahi fonua kotoa pē ʻo e māmaní.

43 Pea te u tāpuakiʻi koe ʻi ai mo ho hakó, pea te u fokotuʻu hake kiate au mei ho hakó, mo e hako ʻo ho tokouá, mo kinautolu ʻe ʻalu mo koé, ha fuʻu puleʻanga lahi. Pea ʻe ʻikai ke ʻi ai ha puleʻanga ʻe lahi hake ʻi he puleʻanga te u fakatupu hake kiate au mei ho hako ʻi he funga kotoa ʻo e māmaní. Pea te u fai pehē kiate koe koeʻuhi ko e fuoloa taimi ʻo hoʻo tangi kiate aú.