1 Ngan yana, anak ko, mayada ako damo nga igsisiring ngadto ha iyo nga duro damo pa han iginsiring ko ha imo kabugtoan; kay waray ba nimo hikit-i an pagkamadig-on han imo bugto, an iya kamatinoohon, ngan kamadoroto han pagtuman han mga kasugoanan han Diyos? Pagsumat, hiya ba in waray paghatag hin maupay nga susbaranan ha imo?

2 Tungod kay waray nimo tagi hin dako nga pagtagad an akon mga tugon sugad han imo bugto, ha butnga han mga tawo nga Zoramite. Yana ine in aada ha akon nga kontra ha imo; ikaw in padayon nga naghihinambog han imo kusog ngan han imo kinaadman.

3 Dire la ine, anak ko. Imo binubuhat adton nakakasakit ha akon; tungod kay imo tinalikdan an imo pagministro, ngan pumakadto han katunaan han Siron nga pag-ultan han mga Lamanite ha paglanat hadton maraot nga babaye hi Isabel.

4 Oo, ngan iya ginkuha an mga kaburut-on han kadam-an; kundi dire la ine amo an hinungdan, anak ko. Ikaw unta in kaangayan nga magserbi han pagkaministro nga igintapod ha imo.

5 Dire ka ba maaram, anak ko, nga ine nga mga butang in mangil-ad ha pangitaan han Ginoo; sugad man, an pinakamangil-ad han ngatanan nga mga sala labot la han pagbuhus han dugo han waray sala o an pagbali-waray han Espiritu Santo?

6 Kay sigurado, kun imo ig-baliwaray an Espiritu Santo han ito in magkaada hin lugar ha imo, ngan maaram ka nga imo ito ginsasalikway, kamatuoran, ine in sala nga waray kapasayloan; oo, ngan hin-o man nga magpatay kontra han kalamrag ngan kaaram han Diyos, dire masayon nga hiya in makakuha hin pagpasaylo; oo, nasiring ako ha imo, anak ko, nga dire masayon para ha iya an pakakuha hin kapasayloan.

7 Ngan yana, anak ko, inaaro ko ha Diyos nga ikaw in dire makasala hin pareho kabug-at nga sala. Dire ko hihisgotan an imo mabug-at nga mga sala, agud samaron an imo kalag, kun ine in dire para han imo kaupayan.

8 Sanglit tuod, dire mo maitatago ine nga mabug-at nga sala ha Diyos; labot kun ikaw in magbasul ine in matukdaw nga usa nga testigos kontra ha imo ha urhi nga adlaw.

9 Ngan yana anak ko, karuyag ko nga ikaw in magbasul ngan talikdan an imo mga sala, ngan dire magsunod ha luyo han kaipa han imo mata, kundi an pagpugong han imo kalugaringon han hine nga mga nahuna-huna; tungod kay labot la kun buhaton mo ine, dire ka ha bisan ano nga paagi in makakapanonod han ginhadian han Diyos. O, panumdum, ngan imo isakob, ngan pudngan an imo kalugaringon han ngatanan hine nga mga nahuna-huna.

10 Ngan nagsusugo ako ha imo nga isakop nga makisagdon ha imo mga kamagurangan han imo mga bubuhaton; kay tuod, in ikaw batan-on pa, ngan ikaw in kinahanglan nga pagmangnoan han imo kabugtoan nga mga lalaki. Ngan manmati han ira sagdon.

11 Ayaw pabay-i an imo kalugaringon nga masulay han waray kapulsanan o linurong nga butang; ayaw pabay-i nga an yawa in magsulay han imo abilidad nga maglanat hadton magraot nga mga babaye. Pagsumat, O anak ko, kadako han karat-an nga imo gindara ngadto han mga Zoramite; tungod kay han pakakita nira han imo binuhatan waray hira tumuod han akon mga tugon.

12 Ngan yana an Espiritu han Ginoo in nagyayakan ha akon: Sugoa an imo mga anak nga magbuhat hin maupay, kay bangin nira madara an abilidad han damo nga mga tawo ha karaotan; sanglit nagsusugo ako ha imo anak ko, nga may pagkahadlok ha Diyos, nga ikaw in dire magbuhat pa hin karat-an;

13 Ngan ikaw in bumalik ha Ginoo ha bug-os nga panhuna-huna, gahum, ngan kusog; ngan dire mo na pagdad-on an mga kasingkasing han kadam-an hin pagbuhat hin maraot; kundi bumalik ngadto ha ira, ngan karawaton an sayop ngan han sala nga imo nabuhat.

14 Ayaw pamiling han karikohan o an waray pulos nga mga butang hine nga kalibutan, kay kamatuoran, dire mo ine madadara.

15 Ngan yana, anak ko, mayada ako igsisiring ha imo mahitungod han pag-abot ni Cristo. Kamatuoran, nasiring ako ha imo, nga hiya in segurado nga maabot agud kuhaon an mga sala han kalibutan; oo, ngan hiya in maabot agud igsumat an malipayon nga sumat han katalwasan ngadto han iya mga tawo.

16 Ngan yana, anak ko, asya ine an pagkaministro ngadto diin ikaw in gintawag, agud igsumat an maupay nga mga sumat ngadto han mga tawo, agud maiandam an ira mga huna-huna; o para an katalwasan in umabot ngadto ha ira, ngan maiandam liwat an mga huna-huna han ira mga anak ngan mahibatian an mga tugon ha oras han iya pagkanhi.

17 Ngan yana pagaga-anon ko an imo huna-huna mahitungod hine nga himangrawon. Tinuod, ikaw in nahipausa kun kay ano nga ine nga mga hitabo in kinahanglan nga ipasabot hin sayo pa tikang hadto. Kundi, nasiring ako ha iyo, dire ba an usa nga kalag han hine nga takna in pareho ka importante ngadto ha Diyos hadton kalag han iya pag-abot?

18 Dire ba kinahanglan nga an plano han pagtubos in kaangayan nga ipasabot hine nga mga tawo ngan ngadto han ira mga anak?

19 Dire ba masayon yana para han Ginoo nga ipadara an iya anghel ngan igsumat ine nga mga maupay nga sumat ha aton upod an aton mga kabataan, kahuman an takna han iya pag-abot?