1 Ngan yana hi Alma, han makita niya nga an mga tugon ni Amulek in nakapagpamingaw kan Seezrom, kay nasabotan niya nga nadakop hiya ni Amulek han iya mga pagbinuwa ngan panlimbong agud hiya in madaot, ngan han pakakita niya nga ine in nagtikang hin pangurog ha pagkahibaro han iya mga sala, ginabrehan niya an iya baba ngan nagtikang pagyakan ngadto ha iya, ngan padig-onon an mga tugon ni Amulek, ngan ipasabot pa hin labaw an mga nahunahuna, o ibuklad an baraan nga mga kasuratan labaw pa han ginbuhat ni Amulek.

2 Ngan yana an mga tugon nga ginyakan ni Alma kan Seezrom in nabati han mga tawo ha palibot; kay an kadamo han mga tawo in duro, ngan hiya in nanmulong ha hine nga paagi:

3 Ngan yana Seezrom, nakita na nga ikaw in nadakop han imo pagbinuwa ngan panlimbong, kay hi ikaw in nagbibinuwa dire la ngadto ha mga tawo kundi ikaw in nagbinuwa ngadto ha Diyos; kay kamatuoran, nahibabaroan niya an ngatanan nga imo mga ginhuna-huna, ngan imo nakita nga amon hinbaroan an imo panhuna-huna pinaagi han iya Espiritu;

4 Ngan hin kit-an mo na nga maaram kami nga an imo plano in usa nga duro hin kaliningbong nga plano, sugad liwat han kamalimbong han yawa, agud magbinuwa nga agud tuyawon ine nga mga tawo agud hira in maiandam kontra ha amon, para kami in pagtamayon ngan pagawson —

5 Ngan yana ine an plano han iyo kaaway, ngan iya ginbuhat han iya gahum ha iyo. Ngan yana karuyag ko nga iyo hinumduman nga kun ano an ginsisiring ko ngadto ha iyo akon iginyayakan ngadto ha ngatanan.

6 Ngan kamatuoran nasiring ako ngadto ha iyo ngatanan amo ine an bitik han kaaway, nga iya iginbutang agud madakop ine nga mga tawo, nga masakop niya, ngan magapos niya kamo han iya mga kadena, ngan gaposon kamo ngadto han waray katapusan nga pagsakit, subay han gahum han iya pagkabariga.

7 Ngan yana han magyakan hi Alma hine nga mga tugon, hi Zeezron nagtikang pangurog hin duro, kay hiya in tinuod hin maupay han gahum han Diyos; ngan hiya liwat in nagmatuod nga hi Alma ngan Amulek in mayada nahibaroan ha iya, kay hiya in natuod nga maaram hira han mga panhuna-huna ngan mga ungara han iya kaburut-on; kay an gahum in iginhatag ha ira agud ira mahibaroan ine nga mga nahuna-huna subay han espiritu han panagna.

8 Ngan hi Seezrom in nagtikang pagpakiana hin maupay ha ira, agud iya mahibaroan hiunong han ginhadian han Diyos. Ngan nagsiring hiya kan Alma: Ano an kahulugan hine nga ginyakan ni Amulek hiunong han pagkabanhaw ngahaw han mga patay, ngan an ngatanan in mabuhat tikang ha pagkamatay, ngaduha adton makatadungan ngan dire, ngan pagdadad-on agud tumukdaw ha atubangan han Diyos ngan hukman subay han ira mga binuhatan?

9 Ngan yana hi Alma nagtikang hin pagsaysay hine nga mga nahuna-huna ngadto ha iya, nga nagsisiring: Ine in iginhatag ha kadam-an agud mahisabotan an mga mestiryo han Diyos; sugad man hira in nakabutang ha ilarum hin usa nga hugot nga pagsugo nga dire nira igpasamwak kundi an subay la han bahin han iya mga mensahe nga iginhatag niya ha anak han katawhan, subay han pagsunod ngan kamadoroto nga ira iginhahatag ha iya.

10 Ngan tungod hine, hiya nga matig-a an iya kasingkasing, hiya in makarawat hin guroguti nga bahin han mensahe; ngan hiya nga dire matig-a an iya kasingkasing, ha iya ighahatag an darudako nga bahin han mensahe, ngada nga ine in maihatag ha iya agud mahibaroan an mga mestiryo han Diyos tubtub nga iya hibaroan hin hingpit an ngatanan.

11 Ngan hira nga matig-a an ira mga kasingkasing, ha ira ihahatag an guroguti nga bahin han mensahe tubtub nga waray na hira mahibaroan hiunong han mga mestiryo; nga pagkahuman hira in kukuhaon nga bariga han yawa, ngan dadad-on han iya panuyo ngadto ha karaotan. Yana ine an kahulugan han mga kadena han empiyerno.

12 Ngan hi Amulek in naghimangraw hin malinaw hiunong han kamatayon, ngan pagbuhat tikang hine nga may kamatayon tipakadto ha usa nga waray kamatayon nga kahimtang, ngan an pagdara ngadto ha atubangan han Diyos, agud hukman subay han iya mga binuhatan.

13 Ngan kun an aton mga kasingkasing in nagmatig-a, oo, ngan kun ginpatig-a naton an aton mga kasingkasing kontra han mensahe, ha sugad nga waray na ine ha aton, kahuman an aton kahimtang in makaharadlok, kay kahuman kita in pagsisirotan.

14 Kay an aton mga pulong in magkokondena ha aton, oo, ngan an ngatanan nga aton mga binuhatan in magkokondena ha aton; ngan kita in dire hiaagian nga waray sala; ngan an aton mga panhuna-huna liwat in magkokondena ha aton; ngan ha hine nga makaharadlok nga kahimtang dire kita makakabuslong ngadto ha Diyos; ngan kita in malilipay pa kun masusugo naton adton mga bato ngan mga bukid nga mahulog ngada ha aton agud maitago kita ha iya atubangan.

15 Kundi dire ine mahitatabo; kita in mabangon ngan matukdaw ha atubangan niya ha iya kahimayaan, ngan ha iya gahum, ngan ha iya kusog, kabantugan, ngan pagkahadianon, ngan aton kakarawaton ha aton waray katapusan nga kaarawdan nga an ngatanan nga iya paghukom in matadong; ngan hiya in matadong han ngatanan nga iya mga binuhatan, ngan hiya in maloloy-on ha anak han katawhan, ngan hiya in may gahum ha pagtalwas han kada tawo nga natuo han iya ngaran ngan nagdadara han hitabo nga kaangayan hin pagbasul.

16 Ngan yana pamati, nasiring ako ngadto ha iyo nga maabot an usa nga kamatayon, an ikaduha nga kamatayon, nga usa nga kamatayon nga espirituwal; nga ine in takna nga hin-o man an mamatay ha iya mga sala, sugad han usa nga temporal nga kamatayon, in mamamatay liwat han kamatayon nga espirituwal; oo, hiya in mamatay ha mga nahuna-huna mahiunong ngadto han kamatadong.

17 Ngan amo adton takna nga an ira mga kasakit in magigin sugad hin usa nga biaw hin kalayo ngan asupre, nga an laga in tipa igbaw ha kadayonan; adto in oras nga hira kakadenahan pailarom ha waray katapusan nga kasakitan, subay han gahum ngan pagkabariga ni Satanas, hiya in magsasakop ha ira subay han iya kaburut-on.

18 Kahuman, nasiring ako ngadto ha iyo, hira in magigin sugad hin waray pagtubos nga nahimo; kay hira in dire matutubos subay han katadungan han Diyos; ngan hira in dire mamamatay, nga nakit-an nga waray kadunotan.

19 Ngan yana in nahitabo nga kahuman ni Alma paghimangraw hine nga mga tugon, an mga tawo in nagtikang pagduro hin paghipausa;

20 Kundi mayada usa nga hi Antionah, nga amo an puno nga magbaralaod ha ira, dumaop ngan nagsiring ha iya: Ano ine nga imo ginyakan, nga an katawhan in mabuhat tikang ha patay ngan mabagbag-o tikang ha pagigin may kamatayon ngadto ha kahimtang nga waray kamatayon, nga an kalag in dire na mamamatay?

21 Ano an karuyag sidngon han baraan nga kasuratan, nga nagsisiring nga an Diyos in nagbutang hin kerubin ngan naglalaga nga espada ha sinirangan ha hardin han Eden, nga bangin an aton una nga mga kag-anak makasulod ngan makakaon han bunga han puno han kahoy han kinabuhi, ngan mabuhi ha kadayonan? Ngan ha sugad nakita naton nga waray higayon nga hira in mabuhi ha kadayonan.

22 Ngan yana siniring hi Alma ha iya: Ine an nahuna-huna nga akon ipapasabot. Ngan yana nakita naton nga hi Adan nakasala ha pagkaon han igindidire nga bunga, subay han pulong han Diyos; ngan sugad nga nakita naton, ngan ha ira pagpakasala, ngatanan nga katawhan in nawara ngan nagin magpakasasala nga mga tawo.

23 Ngan yana pamati, nasiring ako ngadto ha iyo nga kun mahihimo nga mahitabo nga hi Adan in makakakaon han bunga han kahoy ha kinabuhi hadto nga takna, dire hiya magkakamayada hin kamatayon, ngan an panagna in magigin waray kapulsanan, ngan ma hihimo nga an Diyos in usa nga buwaon, kay hiya in nagsiring: Kun ikaw in kumaon, ikaw in piho nga mamamatay.

24 Ngan nakita naton nga an kamatayon in maabot ha katawhan, oo, an kamatayon nga ginsisiring ni Amulek, nga amo an temporal nga kamatayon; sugad man mayada usa nga panahon nga iginhatag ha tawo kun sano hiya poydi magbasul; salit ine nga kinabuhi in nagiging usa nga pagproyba nga kahimtang; usa nga panahon agud mag-andam ha pag-atubang ha Diyos; usa nga panahon agud mag-andam para ha waray katapusan nga kamutangan nga amon iginyakan, nga kahuman han pagkabanhaw han mga patay.

25 Ngan yana, kun ine in dire tungod han plano han pagtubos, nga igin-andam tikang pa han kahimo han kalibutan, dire magkakamayada han pagkabanhaw han mga patay; kundi mayada usa nga plano han pagtubos nga iginandam, nga nahitatabo han pagkabuhi ngahaw han mga patay, nga amo an iginyakan.

26 Ngan yana pamati, kun mahihimo nga mahitabo la nga an aton una nga mga kag-anak nahingadto ngan nakakaon han bunga han kahoy han kinabuhi hira unta in nagin kairo ha kadayonan, kay waray kita panahon nga mag-andam; kun masugad an plano han pagtubos in nakawang, ngan an saad han Diyos in nawaray kapulsanan, ngan waray hinungdan.

27 Kundi kalipay, kay ine in dire sugad; kay adto in iginsugo ngadto han mga tawo nga hira in kinahanglan mamatay; nga kahuman han kamatayon, kita in madangat ha paghukom, bisan an pareho nga paghukom nga amon iginyakan, nga amo an katapusan.

28 Ngan kahuman igsugo han Diyos ine nga mga hitabo ngadto ha tawo, kamatuoran, nakita niya nga kaangayan nga an tawo in mahibaro mahitungod han mga hitabo diin amo an iginsugo ngadto ha ira;

29 Sanglit nagpadara hiya hin mga anghel nga makipagkayakan ha ira, nga naghimo nga an mga tawo in makakita han iya kahimayaan.

30 Ngan tikang hadto nga panahon hira in nagtikang pagtawag han iya ngaran; sanglit an Diyos in nakipaghimangraw ha mga tawo, ngan iginpasabot ngadto ha ira an plano han pagtubos, nga igin-andam tikang pa han pagkahimo han kalibutan; ngan ine iya iginpahibaro ha ira subay han ira pagtuo ngan pagbasul ngan ira baraan nga mga buhat.

31 Sanglit, hiya in naghatag hin mga kasugoanan ngadto han mga tawo, kay hira an una nga nagtalapas han una nga mga kasugoanan ngadto han mga nahuna-huna nga temporal, ngan magigin sugad han Diyos, maaram han maupay ngan maraot, nga nagbutang ha ira mga kalugaringon nga kahimtang hin paggawi, ha kahimtang nga gumawi subay han ira mga kaburut-on ngan kalipayan, bisan hin pagbuhat hin maraot o maupay —

32 Tungod hine an Diyos in naghatag ngadto ha ira hin mga kasugoanan, kahuman igpahibaro ha ira an plano han pagtubos, agud hira in dire magbuhat hin maraot, an sirot hadto in amo an ikaduha nga kamatayon, nga usa nga waray katapusan nga kamatayon sugad han mga nahuna-huna nga para ha kaupayan; kay ha sugad an plano han pagtubos in dire magkakamayada hin gahum, kay an buruhaton han hustisya in dire maguguba, subay han pinakahataas nga kaupayan han Diyos.

33 Kundi an Diyos in nagtawag han mga tawo, ha ngaran han iya Anak, (ine an plano han pagtubos nga igin-andam) ngan nagsisiring: Kun kamo in magbabasul, ngan dire kamo magmamatig-a han iyo mga kasingkasing, ha sugad ako in magkakamayada hin kaluoy ha iyo, pinaagi han akon Bugtong nga Anak;

34 Sanglit, an hin-o man nga magbabasul, ngan dire magmamatig-a an iya kasingkasing, in magkakamayada hin pag-angkon han akon kaluoy pinaagi han akon Bugtong nga Anak, ha pagpasaylo ha iya mga sala; ngan hiya in masulod ha akon pahuwayan.

35 Ngan an hin-o man nga magtitig-a han iya kasingkasing ngan magbubuhat hin pakasala, tinoud, igsusumpa ko an akon kasinahon nga hiya in dire makakasulod han akon pahuwayan.

36 Ngan yana, akon mga kabugtoan, pamati nasiring ako ha iyo, nga kun kamo in magmatig-a han iyo mga kasingkasing kamo in dire makakasulod han pahuwayan han Ginoo; salit an iyo mga sala an mag-aayat ha iya agud iya ihulog an iya kasinahon ha iyo sugad han una nga pag-ayat, oo, subay han iya saad ha urhi nga pag-ayat sugad han una, tipakadto ha waray katapusan nga karaotan han iyo mga kalag; sanglit, subay han iya saad, ngada han katapusan nga kamatayon, sugad han una.

37 Ngan yana, mga kabugtoan ko, tungod kay maaram kita hine nga mga nahuna-huna, ngan ine in tinuod, kita in magbasul, ngan dire patig-ahon an aton mga kasingkasing, nga dire naton pag-ayaton an Ginoo nga aton Diyos nga ihatag an iya kasinahon ha aton hine nga ikaduha nga kasugoanan nga iya iginhatag ha aton; kundi sumulod kita han pahuwayan han Diyos, nga igin andam subay han iya pulong.