1 Ngan yana ine nahitabo nga kahuman ni Alma magyakan hine nga mga tugon ngadto ha ira hiya lumingkod dida ha tuna, ngan hi Amulek in bumuhat ngan nagtikang pagtutdo ha ira, nga nagsisiring:

2 Akon mga kabugtoan, maaram ako dire mahinanabo nga kamo in magin ignorante han mga butang nga iginyakan mahitungod han pag-abot ni Cristo, nga igintutdo namon nga usa nga Anak han Diyos; oo, maaram ako nga ine nga mga nahuna-huna in nahitutdo na ha iyo hin labis san-o pa kamo in bumaya ha amon.

3 Ngan sugad ha hangyo niyo han akon hinigugma nga bugto nga iya ipahibaro ngadto ha iyo an iyo bubuhaton, tungod han iyo mga kakurian; ngan hiya in nanmulong ha iyo agud maiandam an iyo nga huna-huna; oo, ngan hiya in mag-aghat ha iyo ngadto hin pagtuo ngan pagantos —

4 Oo, para kamo in magkaada hin dako nga pagtuo sugad han pagtanom han mensahe dida han iyo mga kaburut-on, para kamo makatilaw pagproyba han kaupayan hito.

5 Ngan kami nakapanhuna-huna nga an dako nga pakiana nga aada ha iyo mga huna-huna kun an tinuod ba in aada han Anak han Diyos, o kun waray ba Cristo.

6 Ngan iyo liwat pagkilala nga an akon bugto in nagpamatuod ngadto ha iyo, ha damo ka beses, nga an tinuod aada kan Cristo para ha katalwasan.

7 An akon bugto in tumawag han mga tugon ni Zenos, nga an pagtubos in mahinanabo pinaagi han Anak han Diyos, ngan han mga tugon ni Zenock; nga liwat nakigkayakan hiya ngadto kan Moises, agud ipakita nga ine nga mga nahuna-huna in mga matuod.

8 Ngan yana, kamatuoran, nagpapamatuod ako ngadto ha iyo han akon kalugaringon nga ine nga mga nahuna-huna in matuod. Ungod, nasiring ako ha iyo, nga maaram ako nga hi Cristo in maabot ha mga anak han tawo, agud kuhaon niya an pakasala han iya mga tawo, ngan hiya in magbabayad han mga sala han kalibutan; tungod kay an Ginoo nga Diyos an nagyakan hine.

9 Kay kaangayan nga himoon an pagbayad han sala; kay subay han mahinungdanon nga plano han Waray Katapusan nga Diyos in kinahanglan nga magkaada hin pagbayad han sala, kun dire an ngatanan nga katawhan in dire makakagawas han kamatayon; oo, ngan an ngatanan in nagmatig-a; oo, ngan an ngatanan in nakasala ngan nawara, nga kinahanglan nga mamatay labot la ha paagi han pagbayad han sala nga naangay himoon.

10 Kay kaangayan nga magkaada hin dako ngan katapusan nga pagsakripisyo; oo, ngan dire pagsakripisyo han tawo, dire an hayop, dire an bisan ano nga mananap; kay dire ine pagsakripisyo hin tawo; kundi ine an dire matutopngan nga waray katapusan nga sakripisyo.

11 Yana waray tawo nga nakakagsakripisyo han iya kalugaringon nga dugo nga makakagbayad han mga sala han iba. Yana, kun an tawo in magpatay, kitaa an aton balaod, nga matadong, in makakuha han kinabuhi han iya bugto? Nasiring ako ha iyo, nga Dire.

12 Kundi an balaod in nakinahanglan han kinabuhi hadton nagpatay; sanglit waray ano man nga butang nga makulang han waray katubtuban nga pagbayad han mga sala nga makakasadang para han mga sala han kalibutan.

13 Sanglit, kaangayan nga magkaada hin usa nga dako ngan katapusan nga pagsakripisyo, kun sugad nga magkakaada, o kaangayan nga magkaada, an pag-utod han pagpaagus han dugo; nga sugad nga an balaod ni Moises in matutuman; oo, ngan ine ngatanan matutuman, kada tulbok ngan kudlit, nga waray ano man nga mawawara.

14 Ngan sigurado, ine an bugos nga karuyag sidngon han balaod, kada gutiay nga bahin in nahitotoon han dako ngan katapusan nga sakripisyo; ngan adto nga katumanan ngan katapusan nga sakripisyo amo an Anak han Diyos, oo, ngan waray katubtuban ngan waray katapusan.

15 Ngan ha sugad nga hiya in nagdadara han katalwasan han ngatanan nga natuo han iya ngaran; ine an panuyo han hine nga katapusan nga sakripisyo, agud madara an mga surodlan han kaluoy, nga nalabaw han hustisya, ngan nagdadara han paagi ngadto han mga tawo agud hira in magkaada hin pagtuo ngadto han pagbasul.

16 Ngan an kaluoy in makakahatag hin kasadangan nga inaaro han hustisya, nga pagkuguson hira ha butkon han katalwasan, samtang nga hiya nga waray magkaada hin pagtuo ngadto ha pagbasul in igsusumat ha bug-os nga balaod nga gin-aaro han hustisya; sanglit adton mayada pagtuo ngadto ha pagbasul in dadad-on han dako ngan waray katapusan nga plano han pagtubos.

17 Sanglit an Diyos unta in maghatag ngadto ha iyo, mga kabugtoan ko, nga kamo in magtikang magkaada hin pagtuo ngadto ha pagbasul, agud kamo in magtikang magsangpit han iya baraan nga ngaran, agud hiya in magkaada hin kaluoy ha iyo;

18 Oo, ngan panginyupo ngadto ha iya para hin kaluoy; kay hiya in may gahum pagtalwas.

19 Oo, ngan magpaubos kamo han iyo kalugaringon, ngan magpadayon hin pagampo ngadto ha iya.

20 Pakimaluoy ngadto ha iya kun kamo in aadto ha bukid, oo, para ha ngatanan han iyo mga kahayupan.

21 Pakimaluoy kamo ngadto ha iya ha iyo mga puy-anan, oo, para han iyo mga sulod balay, bisan aga, kaurudtohon, ngan gab-i.

22 Oo, ngan pakimaluoy ngadto ha iya kontra han gahum han iyo mga kaaway.

23 Oo, ngan pakimaluoy kamo ngadto ha iya kontra han Yawa, nga kaaway han ngatanan nga kaupayan.

24 Pakimaluoy kamo ngadto ha iya para han iyo mga pananom ha bukid, agud kamo in umuswag tungod hadto.

25 Pakimaluoy kamo para han iyo mga kahayopan ha bukid, agud hira in dumamo.

26 Kundi dire la ine ngatanan; kaangayan ig-buhos niyo an iyo mga kalag ha iyo mga sulod, ngan ha iyo lugar nga sekreto, ngan ha iyo kamingawan.

27 Oo, ngan kun dire kamo makimaluoy ngadto ha Ginoo, himoa nga an iyo mga abilidad in mapuno, padayon nga magampo ngadto ha iya para han iyo kaupayan, ngan para liwat han kaupayan hadton nakapalibot ha iyo.

28 Ngan yana pamati, akon hininigugma nga mga kabugtoan, nasiring ako ngadto ha iyo, ayaw pakasiring nga asya la ine; tungod kay katapos niyo buhaton ine nga mga hitabo, kun iyo tatalikdan adton nanginginahanglan, an waray panapton, ngan dire niyo binibisita adton magsakit ngan nagkukuri, ngan ihatag an kaparte ha iyo katigayonan, kun kamo in mayada, hadton nanginginahanglan — nasiring ako ngadto ha iyo, kun dire niyo bubuhaton an bisan hain hine nga mga hitabo, sigurado, an iyo pagampo in waray kapulsanan, ngan waray kamo pagpupulsan, nga kamo in sugad han mga salingkapaw nga iginwawaray-bale an pagtuo.

29 Sanglit, kun dire niyo mahinunumduman an pagigin mahigugmaon, kamo in sugad hin lamire, nga iginlalabog hadton magpipino, (tungod kay waray kapulsanan) nga gintatamak-tamakan hadton mga rapadapa han tawo.

30 Ngan yana, mga kabugtoan ko, hingyap ko, nga katapos niyo makakarawat hadton damo nga pagpamatuod, tungod kay nakikita nga an mga baraan nga kasuratan in nagtetistigo hine nga mga nahuna-huna, kamo in dumaop ngan magdara han nabuhat ngadto han pagbasul.

31 Oo, ngan karuyag ko nga kamo in dumaop ngan dire na patig-ahon an iyo mga kasingkasing; kay kamatuoran, yana an takna ngan panahon han iyo katalwasan; ngan tungod hine, kun kamo in magbasul nga dire patitig-ahon an iyo mga kasingkasing, yana dayon an mahinungdanon nga plano han pagtubos in dadad-on ngada ha iyo.

32 Kay kamatuoran, ine nga kinabuhi asya an takna nga an tawo an mag-andam pag-atubang ha Diyos; oo, ngan kamatuoran an henerasyon hine nga kinabuhi asya an henerasyon agud an tawo in magbuhat han ira mga buruhaton.

33 Ngan yana, sugad han iginsisiring ko ha iyo hadto, tungod kay damo man hin duro an iyo mga testigos, sanglit, ako in nahangyo ha iyo nga dire niyo pagihaon an panahon han iyo pagbasul ngada ha waray katubtuban; tungod kay kahuman hine nga henerasyon han kinabuhi, nga iginhatag ha aton agud mag-andam para ha kadayonan, kamatuoran, kun dire naton pag-upayon an mga adlaw samtang nga buhi pa kita, mahinanabo nga maabot an gab-i han kamasirum diin waray na buruhaton nga mahihimo.

34 Ngan dire kamo makakasiring, kun kamo na in madara ha kamakaharadlok nga kahimtang, nga ako in magbabasul, ngan ako in mabalik ngadto han akon Diyos. Dire, dire niyo maisisiring ine; tungod kay adton espiritu nga nag-angkon han iyo mga lawas han takna nga kamo in bumaya na hine nga kinabuhi, in amo la gihapon nga espiritu in magkakaada hin gahum pag-angkon han iyo mga lawas didto hadto nga waray katapusan nga kalibutan.

35 Kay makabirido, kun iyo gin-iniha adton panahon han iyo pagbasul ngada han iyo kamatayon, sigurado, kamo in masasakop han espiritu han yawa, ngan iginlain na niya kamo para ha iya; sanglit, an Espiritu han Ginoo in gumawas ha iyo, ngan waray dida ha iyo, ngan an yawa in mayada han ngatanan nga gahum ha iyo; ngan ine an tinubtuban han kahimtang hadton magraot.

36 Ngan ine maaram ako, tungod kay nagsiring an Ginoo nga dire hiya naninimalay han dire baraan nga templo, kundi ha kaburut-on han mga magtadong; oo, ngan nagsiring liwat hiya nga mga mag-upay an malingkod han iya ginhadian, agud dire na gumawas; kundi an ira panapton in pabubusagon pinaagi han dugo han Kordero.

37 Ngan yana, akon hinigugma nga kabugtoan, hingyap ko nga iyo hinumduman ine nga mga nahuna-huna, nga iyo pagbuhaton an iyo katalwasan nga may kahadlok ha atubangan han Diyos, nga dire niyo ig-baliwaray an pag-abot ni Cristo;

38 Ngan dire na kamo makiglantugi kontra han Espiritu Santo, kundi iyo karawaton ine, ngan dad-on niyo an ngaran ni Cristo; ngan kamo in mag-paubos bisan ngada ha tapo-tapo, ngan magampo ha Diyos, bisan hain nga lugar diin kamo in aadto, ha espiritu ngan ha kamatuoran; ngan kamo in mabuhi nga magpapasalamat ha adlaw-adlaw, han damo nga mga kaluoy ngan mga bendisyon nga ihahatag ha iyo.

39 Oo, ngan ako liwat gin-aagda ko kamo, mga kabugtoan ko, nga magpadayon magmangno ha pagampo, agud dire kamo madara han mga pagsulay han yawa, ngan dire niya kamo pagdad-on, ngan dire niya kamo masakop ha urhi nga adlaw; kay kamatuoran, kamo in babaloson hin dire maupay nga butang.

40 Ngan yana akon hinigugma nga mga kabugtoan, gin-aabi-abi ko kamo nga magin maantoson, nga iyo pag-iloban an ngatanan nga kasakitan; ngan dire kamo magtamay kontra hadton nagtabog ha iyo tungod han iyo duro nga kakablasan, kay kamo in bangin magin magpakasasala sugad ha ira;

41 Kundi kamo in magkaada hin pag-antos, ngan pag-ilobon adton mga kasakitan, nga mayada mahugot nga paglaum nga maabot an usa ka panahon nga kamo in mapahuway hadton iyo mga kasakitan.