Pi Chep nib Thothup
3 Nephi 6


Guruy Ni 6

Fapi Nephites e ra monʼog gaed—ʼufʼuf, falaʼab, nge ulung nib thilthil e sum—Fare Galasia e kiiʼ u butʼ ni bachane togopluw—Moʼoniyanʼ e wawliy fapi gidiiʼ ngar togopluw gaed nib mʼug nga tamilang—Boʼor e pi profet ni i machib nag e kalngaenʼ min liiʼraed—Pi tamathang pogofan roraed e ra lemniged ni ngar gagyeg niged fare am. Napʼan T.Y. 26–30.

1 Ere chiney e yibi buch ni fapi gidiiʼ ko Nephites e ra suloed ni yaed gubin ko pi binaw roraed u lan e bin riliwʼ nge nelʼ e duw, ni yaed gubin, nra beeʼ ma yow e tabinaew rokʼ, nge gamanman rokʼ, nge yu ulung i garbaw rokʼ, nge os rokʼ nge garbaw rokʼ, nge gubin e pinʼen nib milfan ngoraed.

2 Me yibi buch ni kubay e ggan roraed ni dawor ra kayed nge mʼay; ere ra feked nge un ngoraed gubin e tin ni ke magaey ni dawori kireb, nge gubin e grain roraed ni gubin mit, nge gol roraed, nge silver roraed, nge gubin banʼen roraed nib gaʼfan, mar suloed ko pi binaw roraed nge taferaed, ko leluʼoch nge yimuch, ko binaw nib kan nga leluʼoch nge binaw ni bay nga yimuch.

3 Mar piiʼed e binaw ngakʼ fapi moroʼroʼ ni kar og niged yaed nga lan ba mʼag ni ngar aw niged e gapas ko nam, ni piʼin ni yaed baʼadag ni ngar pired ni Lamanites, ni be yanu rogon urngiraed, ni gomanga yog ni ngar muruwel gaed u dakean e gin ni ngar pired riy; ere aray rogon ni ratayed e gapas u lan gaʼangin yang e nam.

4 Mar tabab gaed bayay ko monʼog mar yoʼor gaed; me mʼay e bin riliwʼ nge nelʼ nge medilip e duw, me yibi yaram lan fare nam; mar falʼeged e motochiyel roraed u rogon nib matʼaw ngu yalen e justice.

5 Ere chiney e dariy banʼen u lan gaʼangin yang fare nam ni be tileg fapi gidiiʼ ko monʼog ni gubin e ngiyalʼ, ma kemus ni faʼan yaedra mul nga fithikʼ e ngongol ni kireb.

6 Ere chiney e Gidgiddoni, nge fare tapuf-oloboch, i Lachoneus, nge piʼin ni kan dugliy raed ni ngar manged gaaʼ, e yaed e kar aw niged e gapas u lan fare nam.

7 Me yibi buch ni yoʼor yungi binaw nni falʼeg, ma kub yoʼor yungi binaw nni sul ngay ngan falʼeg rogon bayay.

8 Ma bayoʼor e kanawoʼ ni gaaʼ nni falʼeg, ma kub yoʼor nochipaʼ i kanawo nni falʼeg, ni yaen u bayang e binaw ngo bayang e binaw, nge rebo binaw ngo rebo binaw, nge bayang ngo bayang.

9 Ere aray rogon ni mʼay e bin riliwʼ nge meruk e duw, ma fapi gidiiʼ e ku yaed be paer u fithikʼ e gapas.

10 Machane me yibi buch u lan e bin riliwʼ nge mereb e duw me tabab boech e maleʼeg thin nga fithikʼ fapi gidiiʼ; ma bay boech e gidiiʼ ni rapuw gaed ngalang ko ufʼuf nge soerokʼ ni bachan e falaʼab roraed ni kari gel, arragon, nge yaeni madaʼ ko ngiyalʼ ni kar thibthib gaed;

11 Ya kari yoʼor e tafalchuwaeyʼ u lan fare nam, maki yoʼor e lawyers, maki yoʼor e pulis.

12 Ere yibi tabab e magagyel ko fapi gidiiʼ ni kar yuyuthael gaed, u rogon e pi falaʼab roraed nge rarograed i fil banʼen; arragon, boech e gidiiʼ e ni fekyathraed ni bachan e gafgow roraed, ma boech e yog ni ngar filed e llowaenʼ ni bachan e pi falaʼab roraed.

13 Ma boech e ra puwgaed ngalang nga fithikʼ e ufʼuf, ma boech e rib sobutʼaenʼ raed; ma boech e be tay puluwon e kireb, u napʼan ni bay boech ni yibe rinʼ e kireb ngoraed ma yibe gafgow nagraed ma yibe rinʼ gubin mit e gafgow ngoraed, ma darur togopluw gaed, ya yaed ba sobutʼaenʼ nge kalngaenʼ u pʼoewchen Got.

14 Ere aray rogon ni thilthil toelngin e gidiiʼ u lan gaʼangin yang fare nam, ni aram riy me yoyoʼor lungun fare galasia; arragon, ni aram u lan e bin guyey e duw make yoyoʼor lungun fare galasia u lan gaʼangin yang fare nam ma kemus ni buchʼuw ko fapi Lamanites ni michaenʼraed ko fare mich nib riyulʼ; ma dabra chuw gaed riy, ya ri yaed ba miyuluy, ma yaed ba yulʼyulʼ, ma yaed ba dugil u butʼ, mab mʼagaenʼraed ngay u fithikʼ e lʼagaenʼ ni ngar fol gaed ko fapi motochiyel rokʼ Somoel.

15 Chiney e tapgin e re denen ney ko gidiiʼ e baʼaray—Moʼoniyanʼ e bay e gelingin rokʼ nib gel, ni kʼaring e gidiiʼ ngay ni ngar rinʼed gubin mite denen, me langlang nagraed ngalang nga fithikʼ e ufʼuf, me lumelegaenʼ raed ni ngar gayed e gelingin, nge matʼawon, nge falaʼab, nge pinʼen nib mʼayfan nu fayleng.

16 Ere aray rogon ni Moʼoniyanʼ e wawliy gumʼirchaʼen fapi gidiiʼ ngar rinʼed gubin mit e denen; ere ra falfalaenʼ gaed ko gapas ni ba lich e duw.

17 Ere, napʼan ni tabab e bin guyey e duw—ma fapi gidiiʼ e ke nʼuw napʼan ni kar paged yaed nge gagyeg nagraed ko fapi lumel rokʼ moʼoniyanʼ iyaen ko gin ni baʼadag ni nge fekraed iyaen ngay, miyaed rinʼ e miti denen ni baʼadag ni ngar rinʼed—ere napʼan ni tabab e biney, ni guyey e duw, ma kar awgaed nga ba dodow ko denen ni ubchiyaʼ.

18 Chiney e gathi kar denen gaed u fithikʼ e minaenʼ, ya yaed manang e tin baʼadag Got ni fan ngoraed, ya kan fil ngoraed; ere kar dugliyed u wunʼraed ni ngar togopluw gaed ngakʼ Got.

19 Ere chiney e pinnʼey e be buch u lan e pi rran rokʼ Lachoneus, ni fare pagael ni fak Lachoneus, ya Lachoneus e ke yinʼ luwan e chitamangin me gagyeg nag fapi gidiiʼ e re duw innʼem.

20 Ma arame ni tabab i piiʼ e piʼin pumoʼon nga ranoed ni kan lumel ngoraed u tharmiy, ni yaed be yaen u fithikʼ fapi gidiiʼ u lan gaʼangin yang fare nam, ni yaed be machib ma yaed be yoeg e pi denen nge pi ngongol ni kireb ko fapi gidiiʼ, ma yaed be yoeg morngaʼagen fare bayul ni ra tay Somoel ni fan ngakʼ e gidiiʼ rokʼ, ma ra ngan pingeg i yoeg, ma fare foskoyamʼ ni ra tay Kristus; ere ur weliyed ni yaed be micheg fare yamʼ nge pi gafgow nra tay.

21 Ere boʼor iyaed fapi gidiiʼ e ke damomuw nib gel ni bachan e piʼin baʼaram ni kar yipʼed nga oewchraed e pinnʼey; ma piʼin ni kar damomuw gaed e yaed e piʼin pilungen e pilung ko fapi tapuf-oloboch, nge piʼin ni kuʼur manged tolang ko priest nge lawyer; arragon, gubin e piʼin nib lawyer e ra damomuw gaed ngakʼ e piʼin ni ka roeged e pinnʼey.

22 Ma dariy beeʼ nib lawyer, ara ba tapuf-oloboch ara ba tolang ko priest ni bay gelingin ni nge dugliy e yamʼ nga dakean beeʼ ma kemus nigoʼ fachaʼ ni am ko fare nam.

23 Ere bayoʼor e piʼin nra weliyed morngaʼagen e pinʼen nib lʼeag rogon ngakʼ Kristus ni yaed e ra micheged i weliyed nib tamilang, ni fekraed fapi tapuf-oloboch ngar liiʼed raed ngar mʼaed nib miith morngaʼagen, ma morngaʼagen e yamʼ ntay ngoraed e de naʼab fachaʼ ni am ko fare nam ngay nge yaeni madaʼ nga tomuren ni kar mʼaed.

24 Ere chiney e musap gaed, biney e ba togopluw ko pi motochiyel ko fare nam, ni ngan liiʼ beeʼ ngemʼ ma kemus ni faʼanra ke piiʼ fachaʼ ni am ko fare nam gelingraed—

25 Ere iyib ba togopluw nga lan fare binaw nu Zarahemla, ngakʼ fare am ko fare binaw, nib togopluw ngakʼ fapi tapuf-oloboch ni yaed e kar dugiliyed ni nge yimʼ fapi profet rokʼ Somoel, ni de yaen u yalen e motochiyel.

26 Ere chiney e yibi buch nni koelraed ngan fekraed nga pʼoewchen fare tapuf-oloboch ni ngan pufthin nagraed ko kireb ni kar rinʼed, u rogon e motochiyel ni yarmiy e gidiiʼ.

27 Chiney e yibi buch ni pi tapuf-oloboch nem e bayoʼor e fager nge gidiiʼ roraed; ma tin ni magaey roraed, arragon, ba chugur ni nge gubin fapi lawyer nge fapi tolang ko priest, e ra kunuyed yaed nga taʼabang, ngar cheag gaed ngakʼ gidiiʼen fapi tapuf-oloboch ni yaed e ngan pufthin nagraed u rogon e motochiyel.

28 Mar falʼeged ba mʼag u thilraed, arragon, ni woed fare mʼag ni piiʼ e piʼin kakrom, niʼir fare mʼag ni piiʼ me gagyeg nag faʼanem i moʼoniyanʼ, ni ngar peth gaed nga taʼabang nib togopluw ko gubin e tin nib matʼaw.

29 Ere ra peth gaed nga taʼabang ngar togopluw gaed ngakʼ fapi gidiiʼ rokʼ Somoel, mar tayed ba mʼag ni ngar liiʼed raed ngar mʼaed, ma ngar chuweged e piʼin nib buch e roraed ko mathang pogofan ni ur tayed u tane gagyeg ko justice, niʼir e yibe yaen ni ngan gagyeg nag u rogon e motochiyel.

30 Ma dubraed ni ngar fol gaed u yalen e motochiyel nge matʼawon e nam roraed; mar michmich gaed ko mʼag u thilraed ni ngar liiʼed fachaʼ ni am, ma ngar dugiliyed beeʼ nge mang pilung u gaʼangin e nam, ya nge yaeni aw ni fare nam e dab ki puf rogoy riy ma nge milfan ko pilung.