Guruy Ni 25
U napʼan e bin Lʼagruw e Wub, ma piʼin nib ʼufʼuf nge piʼin nib kireb e yaedra muʼuruf ni boed e pan nib malikʼ—Elijah e rasul u mʼon ko re rran nem nib gaaʼ mab digow—Mu taʼareb nag ko Malachi 4. Napʼan T.Y. 34.
1 Ya musap gaed, fare rran e be yib ni yira muʼuruf riy ni boed ba oven; ma gubin e piʼin nib ufʼuf, arragon, nge gubin e piʼin nib tarinʼ e kireb e bay ra boeded e pan nib mororoy; ma fare rran nibe yib e bay ra mooruf gaed, nibe yoeg fare Somoel ko Yoʼor, nra pagraed ni dakriy likʼngiraed ara papangiraed.
2 Machane, gamaed e piʼin ni nibe yib madguwan fithingag ngomed, e bay yib fachaʼ ni Fak e tin nib Matʼaw nge gol nagmed; ma bay mu pired ngam ilal gaed ni boed pifak e garbaw u lan e sum.
3 Ma bay mu yitʼed nga butʼ e piʼin kireb; ya bay ra manged awat u tan rifrifan aymed u lan fare rran ni bay gurinʼ e rennʼey, nibe yoeg fare Somoel ko Yoʼor.
4 Kagmed manang fare motochiyel ku Moses, ni tapigpig rog, niʼir e gu chiyliy ngakʼ u Horeb ni fan ngakʼ gubin piyu Israel, nib muʼun e pi yalen nge motochiyel ngay.
5 Musap gaed, gura piiʼ Elijah ni fare profet nge yib ngomed u mʼon ni nge yib fare rran rokʼ Somoel nib gaaʼ mab gel e digow riy;
6 Ma bayi sepeg e tawureng rokʼ e pi matam ngakʼ e piʼin bitir, nge tawureng rokʼ e piʼin bitir ngakʼ e pi chitamangraed, mesiy ni nggub gu kireb nag waʼathan e fayleng.