1 Ere chiney e yibi buch u tomuren ni ke yaen Yesus nga tharmiy, ma fare ulung i gidiiʼ e ra wer gaed nra beeʼ magin ni sor ngay, ma gubin e gidiiʼ nra beeʼ me fek leʼengin nge bitir rokʼ nge sul nga tafen.

2 Me wer thiin u fithikʼ fapi gidiiʼ u dakean e nam ni ku chingyalʼ nem, u mʼon ni nge awe lumor, ni fare ulung i gidiiʼ e kar guyed Yesus, make pigpig ngoraed, ma ku ra yib i mʼug gabul ngakʼ fare ulung i gidiiʼ.

3 Arragon, ni mus ko fare nepʼ ni poloʼ ni garar morngaʼagen Yesus; ma napʼan ni ra wereged e thin riy me yoʼor e gidiiʼ ni un ngay, arragon, rib yoʼor e gidiiʼ, ni un ko muruwel riy e re nepʼ nem, ni nge yog ni rebo rran riy ma yaed bay ko gin ni ra yibi mʼug Yesus riy ngakʼ fare ulung i gidiiʼ.

4 Me yibi buch ni faʼani yibi rebo rran riy, u napʼan ni ke mukun fare ulung i gidiiʼ nga taʼabang, ma musap gaed, Nephi nge walagen ni faseg ko yamʼ, ni fithingan e Timothy, nge beeʼ nib pagael ni fak, ni fithingan e Jonas, nge Mathoni, nge Methonihah, ni walagen, nge Kumen, nge Kumenonhi, nge Jeremiah, nge Shemnon, nge Jonas, nge Zedekiah, nge Isaiah—chiney e ireray fithingan fapi gachalpen ni ke melʼeg Yesus—me yibi buch ni ranoed ngar pired nga lukungun fare ulung i gidiiʼ.

5 Ere musap gaed, fare ulung i gidiiʼ e rib yoʼor ni arame ra guyed rogon ngar kiiʼeged raed nge gaman ragag nge lʼagruw ulung u butʼ.

6 Ere fare ragag nge lʼagruw i gachalpen e ra machib niged fare ulung i gidiiʼ; ma musap gaed, mar guyed rogon nge ragbug fare ulung i gidiiʼ nga dakean e buutʼ, ngar meybil gaed ngakʼ e en Chitamangiy u fithingan Yesus.

7 Ma fapi gachalpen e kur meybil gaed ngakʼ e en chitamngiy u fithingan Yesus. Me yibi buch ni arame ra puw gaed ngalang ngar machib gaed ngakʼ fapi gidiiʼ.

8 Ma napʼan ni kar machib niged fapi thin niʼir e ke weliy Yesus—ni dar thilyeged banʼen ko fapi thin ni weliy Yesus—ma musap gaed, mar ragbug gaed bayay ngar meybil gaed ngakʼ e en Chitamangiy u fithingan Yesus.

9 Mar meybil gaed ni fan ko renʼen ni yaed be athapeg; ya ri yaed be athapeg ni ngan piiʼ fare Kan ni Thothup ngoraed.

10 Ma napʼan nra meybil gaed ni aray rogon ma ranoed nga mirichlen bangi raen, me lekraed fare ulung i gidiiʼ.

11 Me yibi buch ni yaen Nephi nga langgin farengi raen me thapeg e tawfe.

12 Ma napʼan ni sul u fithikʼ e raen ngalang me tabab ko tawfe. Me tawfe nag gubin fa piʼin ni ke melʼeg raed Yesus.

13 Me yibi buch u tomuren ni kan tawfe nagraed ni yaed gubin ma kar suloed u fithikʼ e raen ngalang, me yibi aw fare Kan ni Thothup nga dakeanraed, me suguy raed fare Kan ni Thothup nge nifiy.

14 Ere musap gaed, ri gowa ke chalongbiy raed e nifiy; ni yib u tharmiy nga butʼ, ma fare ulung i gidiiʼ e ra guyed nga oewchraed, mar yoloeyed babyoren; me yib e angel u tharmiy nga butʼ ngar machib gaed ngoraed.

15 Me yibi buch u napʼan nibe machib fapi angel ngakʼ fa piʼin gachalpen, musap gaed, me yib Yesus i sakʼiy nga fithikʼraed nge machib ngoraed.

16 Me yibi buch ni non ko fare ulung i gidiiʼ, me yoeg ngoraed ni ngar ragbug gaed bayay nga dakean e buutʼ, nge ku aram rogon ngakʼ fapi gachalpen ni ngar ragbug gaed nga dakean e buutʼ.

17 Me yibi buch u napʼan ni yaed gubin ni kar ragbug gaed nga dakean e buutʼ, me yoeg ngakʼ fapi gachalpen ni ngar meybil gaed.

18 Ere musap gaed, arame ra tabab niged e meybil; mar meybil gaed ngakʼ Yesus, ni yaed be pining ni Somoel roraed nge Got roraed.

19 Me yibi buch ni chuw Yesus u fithikʼraed, me yaen buchʼuw nga orel roraed me siroʼ nga dakean e buutʼ, me gaʼar:

20 Chitamag, gube oge magaer ngom ni kam piiʼ fare Kan ni Thothup ngakʼ e pichaʼaney ni yaed e kug melʼeg raed; ma bachan e mich roraed ngog mug melʼeg raed u fithikʼey u fayleng.

21 Chitamag, gube ning ngom ni ngam piiʼ fare Kan ni Thothup nga dakean gubin e piʼin ra michaenʼraed ko thin roraed.

22 Chitamag, gur e kam piiʼ fare Kan ni Thothup ngoraed ni bachan e michaenʼ roraed ngog; ma gur e kam guy ni ke michaenʼraed ngog ya kam rungʼag lamraed, ma kar meybil gaed ngog; ma kar meybil gaed ngog ni bachan e gubay roraed.

23 Ere chiney Chitamag, gube meybil ngom ni fan ngoraed, nge gubin e piʼin nra michaenʼraed ko thin roraed, ni manga yog ni michaenʼraed ngog, ni gomanga yog nug paer u fithikʼraed ni boed gur, Chitamag, ni gabay u fithikʼag, ni gomanga yog ni ngad taʼareb gaed.

24 Me yibi buch u tomuren ni ke muʼ Yesus ko meybil ni aray rogon ngakʼ e en Chitamangiy, me yib ngakʼ fa piʼin gachalpen, ma musap gaed, kuyaed be ululiy, ni darur talgaed ko meybil ngakʼ; ma darur yoeged e thin nib yoʼor, ya yaed manang ko mang e ngar piiʼed e meybil riy, me lʼagaenʼraed.

25 Me yibi buch ni yibliy raed Yesus u napʼan ni yaed be meybil ngakʼ; me siminmin ni ke falfalaenʼ ngoraed, ma raʼen e falfalaenʼ rokʼ e mat nga dakeanraed, ere musap gaed ra wechwech gaed ni boed falʼngin e falfalaenʼ nge ku aram rogon ko mad rokʼ Yesus; ere musap gaed, wechwech nra tayed riy e rib gel fini wech, arragon, ni dariy banʼen u fayleng ni aram rogon fini wechwech.

26 Me gaʼar Yesus ngoraed: Mmeybil gaed; ni yug aram rogon ma dar talgaed ko meybil.

27 Me chel roraed bayay, me yaen buchʼuw nga orel me siroʼ nga butʼ; me meybil bayay ngakʼ e en Chitamangiy, ni gaʼar:

28 Chitamag, gube oge magaer ngom ni kam machalbog nag e piʼin ni kug melʼeg, ni bachan e micheanʼ roraed, ma gube meybil ni faraed, nge piʼin ni kura micheanʼ raed ko thin roraed, ni gomanga yog nra machalbog gaed u fithikʼag, u dakean e michean roraed ko thin roraed, ni boed faraed machalbog u fithikʼag.

29 Chitamag, dagur meybil ni fan ko fayleng, ya fan ngakʼ e piʼin ni kam piiʼ ngog u fayleng, ni bachan e micheanʼ roraed, ni manga yog ni ngar machalbog gaed u fithikʼag ni boed gur, Chitamag, ni gabay u fithikʼag, ni gomanga yog ni ngad taʼareb gaed, ni nge yog nug rir u fithikʼraed.

30 Ma napʼan ni yoeg Yesus e pi thin ney me yib bayay ngakʼ pi gachalpen; me guy ni kuyaed be meybil ngakʼ, ni darur tal gaed; me siminmin ni falfalaenʼ nga dakeanraed bayay; ma musap gaed riyaed ba wechwech ni boed Yesus.

31 Me yibi buch niki yaen bayay buchʼuw nga orel nge meybil ngakʼ e en Chitamangiy;

32 Ma dariy ba yunmon ni rayog ni nge yoeg e thin ni ke piiʼ ni meybil, ara yog ni nge yoloey beeʼ e pi thin ni ke piiʼ ni meybil.

33 Ma fare ulung i gidiiʼ e rrungʼaged mar mar mecheged; me mab gumʼirchaʼraed mar nanged fan u lan gumʼirchaʼraed e pi thin ni ke piiʼ ni meybil.

34 Machane, rib yoʼor mab maʼangʼang e pi thin ni piiʼ ni meybil ni dabiyog i yoloey, ara nge yog ni nge yoeg beeʼ.

35 Me yibi buch u napʼan ni ke muʼ Yesus ko meybil me sul bayay ngakʼ pi gachalpen, me gaʼar ngoraed: Mich ni erfini gel e dawor gguy u fithikʼ gubin fapi Jews; ere deyog nug dag ngoraed e maʼangʼang nib gaaʼ, ni bachan e micheanʼ roraed ni dariy.

36 Rriyulʼ ni gube yoeg ngomed, dariy bagyaed ni ke guy bogi banʼen nib felʼ ni boed ni kam guyed; ara kar rungʼaged bogi banʼen nib felʼ ni boed ni kam rungʼaged.