Guruy Ni 12
Yesus e pining nge piiʼ matʼawon fare ragag nge lʼagruw i gachalpen—I piiʼ ba morngaʼag ngakʼ fapi Nephites nib chuchugur nga rogon fabin ni piiʼ ni kanoeg e machib nu dakean e burey ngay—I non nibe Falʼegwaʼath—Machib rokʼ e yaen nge pag, me yinʼ luwan fare motochiyel rokʼ Moses—Gidiiʼ e yibe chiyliy ngoraed ni ngar machalbog gaed ni boed Ir nge Chitamangin ni yow ba machalbog—Mu taʼareb nag ko Matthew 5. Napʼan T.Y. 34.
1 Ere yibi buch u napʼan ni yoeg Yesus e pi thin ney ngakʼ Nephi, nge piʼin ni ke piningraed, (chiney e oren e piʼin ni kan piningraed, ma kan piiʼ gelingraed nge matʼawraed ni ngar tawfe gaed, e yaed ragag nge lʼagruw) ere musap gaed, I kʼiyeg paʼ nga dakean fare ulung i gidiiʼ, me non ngoraed nib gaaʼ laman, nibe gaʼar: Rafelʼ waʼathmed ni faʼan gimed ra motoyil ko thin rokʼ e re ragag nge lʼagruw i gidiiʼ ney ni kug melʼeg u fithikʼmed ni ngar machib gaed ngomed, ma ngar manged tapigpig romed; ma kug piiʼ e gelingin ngoraed ni nge yog ni ngar tawfe niged gimed ko raen; ma tomuren ni kan tawfe nagmed ko raen, musap gaed, bay gu tawfe nagmed ko nifiy nge fare Kan ni Thothup; ere rafelʼ waʼathmed ni faʼanra michaenʼmed ngog min tawfe nagmed, u tomuren ni kam guyed gag ma kam nanged ni gag.
2 Ere bayay, bagaʼ rafelʼ waʼathan e piʼin nra michaenʼ ko thin romed ni bachan e gimed ra yoeg ni kam guyed gag, ma kam nanged ni gag. Arragon, rafelʼ waʼathan e piʼin nra michaenʼraed ko thin romed, marbaed nga butʼ nga fithikʼ e sobutʼaen min tawfe nagraed, ya arame bay ra thap gaed ngakʼ u dakean e nifiy nge fare Kan ni Thothup, ma bayi nʼaegfan e pi denen roraed.
3 Arragon, rafelʼ waʼathan e piʼin ni ke gafgow laniyaenʼraed ni yaedra yib ngog, ya taferaed e fare gilʼilung nu tharmiy.
4 Nge bayay, rafelʼ waʼathan gubin e piʼin ni ma daloloeyʼ, ya yira gapasegaenʼ raed.
5 Ma rafelʼ waʼathan e piʼin muding, ya yaedra tafnaʼ e fayleng.
6 Ma rafelʼ waʼathan gubin e piʼin kar mʼaed ni blig nge balel ni bachane tin nib matʼaw, ya yaedra sug ko fare Kan ni Thothup.
7 Ma rafelʼ waʼathan e piʼin nib sug ko murnguy, ya ra wureng anʼuy ngoraed.
8 Ma rafelʼ waʼathan gubin e piʼin nib machalbog gumʼirchaʼen, ya yaedra guy Got.
9 Ma rafelʼ waʼathan gubin e piʼin yaed ma awnag e gapas, ya yira piningraed ni bitir rokʼ Got.
10 Ma rafelʼ waʼathan e piʼin ni yibe gafgow nagraed ni bachag, ya taferaed fare gilʼilung nu tharmiy.
11 Ma rafelʼ waʼathmed u napʼan nra gathibthib me gafgow nagmed e gidiiʼ, maroeged gubin mit e kireb nib togopluw ngomed nigoʼ baen, ni bachag;
12 Ya gimed e rayog e falfalaenʼ nib gel ngomed ma rra falaenʼmed, ya rib gaaʼ e tawaʼath romed ni bay u tharmiy; ya ku aram rogon nra gafgow niged fapi profet ni ur moyed ni yaed ba mʼon romed.
13 Rriyulʼ, nriyulʼ, ni gube yoeg ngomed, kug piiʼmed ni ngam manged sol ko fayleng; machane faʼanra mʼay e bidaey ko sol ma uw e ngan sol nag u fayleng? Fare sol e ngiyalʼ nem e dakuriy banʼen nib felʼ ngay, ere ngan yinʼ nga wean nge yitʼ e gidiiʼ nga butʼ nga ni yaen u dakean.
14 Rriyulʼ, nriyulʼ, ni gube yoeg ngomed, kug piiʼmed ni ngam manged magael ko pi gidiiʼ ney. Bbinaw ni bay u dakean e falang e dabiyog I mithaeg.
15 Musap gaed, ma gaelʼ e gidiiʼ e kendal me tay nga tanggin e pakit? Dangay, ya ma tay nga tagilʼ e kendal, nge mat nga dakean gubin e gidiiʼ ni bay u naʼun.
16 Ere mu paged e magael romed nge mat nga dakean pi gidiiʼ ney, ni nge yog ni ngar guyed e muruwel romed nib mangil mi yaed taʼfan e Chitamangmed ni bay u tharmiy.
17 Dab mu lemniged ni kugub ni ngug gatheay fare motochiyel ara fapi profet. Gathi kugub ni ngug gatheay, ya nggu muguʼuliy;
18 Ya rriyulʼ ni gube yoeg ngomed, dariy bang fa boechi yang ko fare motochiyel ni ke chuw, machane gubin make muguʼul rog.
19 Ere musap gaed, kug piiʼ ngomed fare yalen nge fapi motochiyel rokʼ e Chitamag, ni nge michaenʼmed ngog, ma ngam kalgaed ngaenʼmed ko pi denen romed, magmed yib ngog u fithik e mʼingaenʼ nge kalngaenʼ. Musap gaed, bay fapi motochiyel u pʼoewchmed, ma yalen e ke muguʼul.
20 Ere mired ngog me yog ni ngam thap gaed; ya rriyulʼ ni gube yoeg ngomed, dariy rogon me yog ni ngam maroed nga lan fare gilʼilung nu tharmiy ma kemus ni faʼan gimed ra fol ko pi motochiyel rog, niʼir e kug chiyliy ngomed e ngiyalʼ ney.
21 Kam rungʼaged ni ki iyoeg e piʼin kakrom, ma kun yoloey u mʼon ni ngam baed, ni dab mu liiʼ beeʼ ngemʼ, ma enra liiʼ beeʼ ngemʼ e ra af riyaʼen u napʼan pufthin rokʼ Got.
22 Machane gube yoeg, ni enra damomuw ngakʼ walagen e ra af riyaʼen u napʼan e pufthin rokʼ. Ma enra gaʼar ngakʼ walagen, dariy gamʼingim, e ra sabliy e ulung; ma enra gaʼar, Gur e gab meechiyang, e ra gafgow ko nifiy u infierno.
23 Ere, faʼan gimed ra yib ngog, ara mu adaged ni ngam baed ngog, me yib ngaenʼmed walagmed ni ke rinʼ banʼen nib togopluw ngomed—
24 Ma ngam maroed ngakʼ walagmed, ko sommʼon ngam falʼeged e puruyʼ romed, ma arame nga finim baed ngog u poloʼ i gumʼirchaʼmed, ma gura fekmed.
25 Mu falʼeg thilmew e chaʼ ni toʼogor rom nib gur ko ngiyalʼ ni gimew taʼab paʼ I kanwoʼ, ya richey me oloboch ngom, min yinʼem nga kalbus.
26 Rriyulʼ, nriyulʼ, ni gube yoeg ngomed, gimed e dariy liyiben magmed chuw u wur nge madaʼ ko ngiyalʼ ni kam piiʼed fare senine ni poloʼ. Ma napʼan ni gimed bay u kalbus, rayog ni ngam piiʼ taʼareb e senine? Riyulʼ, nriyulʼ, ni gube yoeg ngomed, ni Dabiyog.
27 Musap gaed, i yoloey e piʼin kakrom ni gaʼar, dab mu pirew beeʼ ni gathi mabgol rom;
28 Machane gube yoeg ngomed, ni enra sap ngakʼ beeʼ nib ppin, me dirngal nag, e ke denen ni galong u lan gumʼirchaʼen.
29 Musap gaed, nggu piiʼ ba motochiyel ngomed, ni dab mu paged rebe pinnʼey nge rich nga langgin gumʼirchaʼmed;
30 Ya kab felʼ ni gimed ra fek yathin e pinnʼey, niʼir e gin ni gimed ra fek e kuruth romed riy, ko bin ni ngan tharbogmed nga infierno.
31 Kan yoloey ni gaʼar, enra chuw rokʼ leʼengin, e nge falʼeg babyoren nge piiʼ ngakʼ.
32 Rriyulʼ, nriyulʼ, ni gube yoeg ngomed, ni enra chuw rokʼ leʼengin, ni bachan e iling, e ke wawliy fare pin nge rinʼ e tin nib galong; ma chaʼ nra leʼengiy fare pin ni ke chuw ko pumoʼon rokʼ e ke rinʼ e tin nib galong.
33 Ma kun yoloey ni gaʼar, dab mu thʼaebed i micheg banʼen nib baen, ya ngam rinʼed e tin ni kam michmich niged u mit Somoel ni ngam rinʼed;
34 Machane rriyulʼ, nriyulʼ, ni gube yoeg ngomed, dab mu thʼaebed i micheg; nga tharmiy, ya ireram gilʼilungun Got;
35 Ara fayleng, ya ireram gilʼiʼay;
36 Ara mu thʼaebed i micheg u loelugmed, ni bachan e dabiyog ni ngam talimor niged bagaf i piy ara mu wechwech niged;
37 Machane ngam paged e sabethin romed nge paer ni Arragon, arragon; nge Dangay, dangay; ya nʼen nra yib nge yoʼor ko tiney e ke kireb.
38 Ere musap gaed, kan yoloey ni gaʼar, puluwon reb e damit reb e damit, nge reb e nguwol reb e nguwol;
39 Machane gube gaʼar ngomed, dab mu togopluw niged e kireb, ya enra bat nag e baʼan matʼaw i linglingimed, ma kagmed pingeg barbaʼ ngakʼ;
40 Ma faʼanra fekmed beeʼ nga tagil e puf-oloboch me fek e bin langgin e mad romed, ma ngam paged ngki fek e bin wuruʼ e mad romed;
41 Ma enra tawasar ngomed ni ngam uned ngakʼ u lan rebo yathog, magmed un ngakʼ u lan lʼagruw.
42 Mu piiʼed ngakʼ e chaʼ ni be maen ngomed, ma chaʼ ni be maen ngomed e dab mu feked oewchmed rokʼ.
43 Ma musap gaed kun yoloey ni gaʼar, ngam tʼufeged e chaʼ ni buguliyoror romed ma ngam fananikayed e chaʼ nib toʼogor romed;
44 Machane musap gaed gube gaʼar ngomed, mu tʼufeged e pi toʼogor romed, ma ngam falʼeged waʼathan e piʼin ni yaed be ger nagmed, ma ngam rinʼed e tin nib mangil ngakʼ e piʼin nibe fananikaymed, ma ngam meybil ni fan ngakʼ e piʼin nibe muruwel ngomed u fithikʼ e sasaliyeb nge piʼin nibe gafgow nagmed;
45 Ni nge yog ni ngam manged e pi bitir rokʼ e Chitamangmed ni bay u tharmiy; ya ire be gagyeg nag e yalʼ rokʼ nge mat nga dakean e piʼin nib kireb nge piʼin nib mangil.
46 Ere pinʼen ni un weliy ni kakrom, ni bay u tane motochiyel, e ke muguʼul rog.
47 Tin kakrom e ke mʼay, ma gubin banen ni ke beʼech.
48 Ere gubaʼadag ni ngam machalbog gaed ni boed gag, ara boed e Chitamangmed ni bay u tharmiy nib machalbog.