Guruy Ni 29
Thog ni tay fare Babyor ku Mormon e pow riy ni fare Somoel e ke tabab ni nge kunuy yu Israel me muguʼuliy fapi mʼag Rokʼ—Piʼin nra fek yathin e pi yiʼiy nge pi tawaʼath Rokʼ ko tin tomur e rran e ra buch waʼathraed. Napʼan T.Y. 34–35.
1 Ere chiney e musap gaed, gube yoeg ngomed u napʼan ni bayi guy Somoel nib mʼag, u lan e gonop rokʼ, ni pi thin ney e nge yib ngakʼ fapi Gentiles ni boed ni yoeg, ma arame bay mu nanged ni fare mʼag ni tay e en Chitamangiy ngakʼ fapi gidiiʼ ku Israel, ni morngaʼagen e sul ni ngar tayed ko pi binaw ni taferaed, e arame ke tabab ni nge muguʼul.
2 Ma rayog ni ngam nanged ni fapi thin rokʼ Somoel, ni ke weliy fapi profet, e gubin ma bayi muguʼul; ma de tʼuf ni nga moeged ni fare Somoel e ke yinʼ yaran e wub rokʼ ngakʼ fapi gidiiʼ ku Israel.
3 Ma de tʼuf ni ngam lemniged u lan gumʼirchaʼmed ni fapi thin ni kan weliy e ba mʼayfan, ya musap gaed, fare Somoel e ra yib ngaenʼ e mʼag ni tay ngakʼ e gidiiʼ rokʼ ni gidiiʼ ku Israel.
4 Ere napʼan ni bay mu guyed e pi thin ney ni ke yib nga fithikʼmed, ma arame daki tʼuf ni ngam feked yathin fapi muruwel rokʼ Somoel, ya fare sayden ko gechig rokʼ e bay u baʼani matʼaw i paʼ; ere musap gaed, napʼan e re rran nem, ni faʼan gimed ra fek yathin e pi muruwel rokʼ ma rib gur ni nge aw ngomed.
5 Gafgow ngakʼ e enra fek yathin e pi muruwel rokʼ Somoel; arragon, gafgow ngakʼ e enra fek yathin Kristus nge pi muruwel rokʼ!
6 Arragon, gafgow ngakʼ e enra fek yathin e pi yiʼiy rokʼ fare Somoel, me yoeg ni fare Somoel e dakir muruwel u dakean e yiʼiy, fa dakean e prophecy, fa dakean e pi tawaʼath, fa dakean bolowthey, fa gol nag e pi liliy, fa dakean gelingin fare Kan ni Thothup!
7 Arragon, ma gafgow ngakʼ e chaʼ ni be nomeg ni nge yog banʼen ngakʼ ni ra gaʼar ko binem e rran, dariy e maʼangʼang nra gagyeg nag Yesus Kristus; ya enra yoeg e biney e ra boed fachaʼ ni fak moʼoniyanʼ, ya ireram e chaʼ ni dabiyib angin e murnguy ngakʼ, ni boed ni yoeg Kristus!
8 Arragon, ma thingar dab kum nʼaegedfan, ara mu feked yathin, ara kakʼringed fapi Jews, ara bagyaed e piʼin ni ke magaey ko fapi gidiiʼ ku Israel; ya musap gaed, fare Somoel e kumnang e michmich rokʼ ngoraed, ma rarinʼ ngoraed ni boed rogon ni ke michmicheg.
9 Ere thingar dabkum lemniged ni ra yog romed ni ngam togopluw niged e baʼani matʼaw i paʼ Somoel ko baʼani gilaeyʼ, ni nge tileg i gagyeg nag e pufthin me muguʼul fare mʼag ni tay ngakʼ fapi gidiiʼ ku Israel.