Sopun 25
Atun ewe Aruwen Wareto, ekkewe mi namanam tekia me ekkewe aramas mi ngaw repwe kareno usun fetin mi pwas—Elijah epwe niwinto me mwen ena auchean me anoninenin ran—Anonno ngeni Malachi 4. Arap ngeni Ierin ewe Samon 34.
1 Pun nengeni, ewe ran a feito minne epwe kenir usun ew um; iwe ekkewe mi namanam tekia meinisin, ewer, me meinisin ekkewe ra fori mi ngaw, repwe winiti fetin mi pwas; iwe ewe ran minne a feito epwe kenireno, anon ewe Samonun Mwicheichen Aramas, iwe esap nikiti ngeni ir och warer are paner.
2 Nge ngenikemi ekkewe oua nuokusiti itei, ewe Noun mi Wenechar epwe pwato fiti ewe pochokunen echikar non poun; iwe oupwe feino me marita usun appanen kou non ewe nenien man.
3 Iwe oupwe puratiw ekkewe aramas mi ngaw; pun repwe moromoren fanang fan eipweipwen pechemi non ewe ran upwe fori ei, anon ewe Samonun Mwicheichen Aramas.
4 Oupwe chechemeni ewe annukun Moses, nei chon angang, minne ua annuku ngeni i non Orep fan iten Israel meinisin, ren ekkewe annuk me kapung.
5 Nengeni, upwe tinato remi Elijah ewe soufos me mwen feiton ewe auchean me anoninenin ranin ewe Samon;
6 Iwe epwe akunnu netipen ekkewe sam ngeni ekkewe semirit, me netipen ekkewe semirit ngeni semer kewe, pun usap feito me wichi ewe fonufan ren ew anumamau.