Pukfel
3 Nifai 24


Sopun 24

Noun ewe Samon chon kuno epwe amonnata ewe aan ngeni ewe Aruwen Wareto—Kraist epwe mwomwot non kapung—Israel a annuk pwe epwe moni ew ne engon me ekkoch asor—Ew puken achechem a makketiw—Anonno ngeni Malachi 3. Arap ngeni Ierin ewe Samon 34.

1 Iwe non ewe fansoun pwe a annuku ngeni ir pwe repwe makkei ekkewe kapas minne ewe Sam a fen ngeni Malachi, minne epwe apasa ngeni ir. Iwe non ewe fansoun pwe mwirin ar makketiw a awewer. Iwe ikkei ekkewe kapas minne a urenir, a apasa: Iei anon ewe Sam ngeni Malachi—Nengeni, upwe tinano nei chon kuno, iwe i epwe amonnata ewe aan me mwei, iwe ewe Samon ewe oua fen kutta epwe mwitir feito ngeni an we tempel, pwan mwo ewe chon kunon ewe pwon mi pin, ewe oua pwapwa non; nengeni, i epwe feito, anon ewe Samonun Mwicheichen Aramas.

2 Nge ion epwe engino ngeni ewe ranin an wareto, me ion epwe uta nupwen epwe pwato? Pun i a usun an emon chon nimet ekkei, me usun an emon chon nimeti uf sop.

3 Iwe i epwe mwomwot usun emon chon nimeti me enimenima silver; iwe i epwe enimenima ekkewe noun Levi, me enimenimer usun gold me silver, pwe repwe asora ngeni ewe Samon ew asor non wenechar.

4 Iwe ewe asor an Judah me Jerusalem repwe menemenoch ngeni ewe Samon, usun non ekkewe ranin nom, me usun non ekkewe ier a no.

5 Iwe upwe feito arap ngenikemi non kapung; iwe upwe emon chon pwarata mi mwitir ngeni ekkewe chon pout, me ngeni ekkewe chon nisou, me ngeni ekkewe chon akkapon muan, me ngeni ekkewe ra eriaffou ewe chon angang mi kamo ren niwinin, ewe fefin mi mano punuwan me ewe ese wor seman, me ewe a akunnano ewe chon ekis, me ese nuokusitiei, anon ewe Samonun Mwicheichen Aramas.

6 Pun ngang ewe Samon, use siwin; iei minne ami noun Jacob ouse kareno.

7 Pwan mwo seni ekkewe ranin sememi kewe oua fen no seni ai kewe angangepin, me ouse aneasochisir. Niwinto rei iwe upwe niwin ngonuk, anon ewe Samonun Mwicheichen Aramas. Nge oua apasa: Ifa usun am aupwe niwin?

8 Emon aramas epwe sona seni Kot? Nge inamo oua fen sona seniei. Nge oua apasa: Ifa usun am aua sona senuk? Non ew ne engon me ekkoch asor.

9 Oua anumamau ren ew anumamau, pun oua fen sona seniei, pwan mwo ei unusen muu.

10 Oupwe wato unusen ekkewe ew ne engon non ewe imwen isois, pwe epwe tongeni wor mwongo non imwei; me sotuniei iei non ei napanap, anon ewe Samonun Mwicheichen Aramas, ika usap suki asamwachon nang, me ninau remi ew feioch ina esap naf nenian ren ami oupwe angei.

11 Iwe upwe apungu ewe chon anieno mettoch fan asengesimi, iwe i esap atano foun iran ami we puun; pwan fatami iran kreip esap pwan amworatiw uwan me mwen ewe fansoun non ewe atake, anon ewe Samonun Mwicheichen Aramas.

12 Iwe muu meinisin repwe eita ngenikemi feioch, pun oupwe ew fonu mi murino, anon ewe Samonun Mwicheichen Aramas.

13 Ami kapas ra fen pochokun ngeniei, anon ewe Samon. Nge inamo oua apasa: Met am aua apasa mi ungonuk?

14 Oua fen apasa: Mi namotmwan ne angang ngeni Kot, me met a tufichi ren am aneasochisi an kewe angangepin me am aua fen fetan netipeta me mwen ewe Samonun Mwicheichen Aramas?

15 Iwe iei sia eita ngeni ekkewe mi namanam tekia pwe ir mi pwapwa; ewer, ir ekkewe ra anganga fofforungaw ra feioch; ewer, ir ekkewe ra sotuni Kot ra ennetin ngaseno.

16 Iwe ir ekkewe ra nuokusiti ewe Samon ra kapas fansoun meinisin fengen nefiner, iwe ewe Samon a ausening me rongorong; iwe ew puken achechem a makketiw me mwen i fan iten ir ekkewe ra nuokusiti ewe Samon, me ekkewe ra sufonu itan we.

17 Iwe ir repwe nei, anon ewe Samonun Mwicheichen Aramas, non na ran nupwen upwe forata ai pisek auchea; me upwe umoumoch ngeni ir usun emon mwan a umoumoch ngeni pwisin noun anuon ewe a angang ngeni i.

18 Non na fansoun oupwe niwin me sinei nefinen ekkewe mi tupwon me ekkewe mi ngaw, nefinen i ewe a angang ngeni Kot me i ewe ese angang ngeni i.