Scriptures
3 Nefi 23


Yoxibal xcha’vinic Capitulo

Ti Jesuse lec la jya’ay ti ya’yejtac Isaiase—La spas ta mantal jteclum ti ac’o xa’ybeic lec smelolal ta sventa lequil viniquetique—Ta xich’ ts’aquel batel ta spoco’ lo’ilic ti ya’yejtac Samuel lamanita vinic ta sventa cha’ cuxesele.

1 Xchi’uc ja’ jech, cha calboxuc tana ti tsc’an ac’o xa va’ybeic lec smelolal ti c’usitic li’e, jech, ja’ jun mantal cha cac’boxuc ti ac’o xa va’ybeic lec smelolal ta c’unc’un ti c’usitic li’e, yu’un muc’tic no’ox x-elan ti ya’yejtac Isaiase.

2 Yu’un ta bats’imelel ti stuque lo’ilaj ta sventa scotol c’usitic ja’ ta sventa jteclumal ti ja’ic snailal Israele, ja’ jech, yu’un ja’ lec ti ac’o xich’ic ec xtoc ti boch’otic ma’icuc snailal Israele.

3 Yu’un c’ot xa ta pasel scotol ti c’usitic la jyale, xchi’uc ta to xc’ot ta pasel, ja’ jech chac c’ucha’al la jyale.

4 Ja’ jech a’yic me ti ca’yejtaque, xchi’uc ts’ibaic me ti c’usitic la jcale, yu’un jech ta baq’uin xchi’uc jech chac c’u cha’al tsc’an jtotic, ta xbat ta stojolalic ti boch’otic ma’icuc snailal Israele.

5 Ti boch’otic ta xa’yic ti ca’yejtaque, xchi’uc ti me ta sutes yo’ntonique, xchi’uc ti me ta xich’ic vo’e, ta xcolic. A’ybeic lec smelolal ti c’usi chalic lequil viniquetique, yu’un me ja’ epic ti boch’otic ta xalic ta jamal ta sventa c’usitic li’e.

6 Ja’ o jech ti c’alal la jyal Jesús ti va’ay lo’iletique, la jyich’ic c’opanel yanvelta, ta ts’acal ti c’alal la jyich’ic albel smelolal scotol ts’ibiletic ti te xa o no’ox yich’ojique, jech la jyich’ic albel: Ja’ jech, ta jc’an ti ac’o xa ts’ibaic yan ts’ibiletic ti bu muyuc a vich’ojique.

7 Ja’ o jech la jyalbe Nefi: Ich’otal ti poco’ lo’iletic bu a nac’oje, xi.

8 Ja’ jech ti c’alal la jyich’ batel Nefi ti poco’ lo’iletique, te la jyac’be ta stojolal, ti Jesuse la sq’uel xchi’uc jech la jyal:

9 Ta bats’imelel cha calboxuc ti vu’un la jpas ta mantal caj abtel Samuel jlamanita vinic, ti ac’o yal ta jamal ta stojolal li’ jteclum, ti baq’uin ta xac’ ta bats’ilequilal sbi ta jventa vu’un ti jtotique, oy ep ch’ul viniquetic ti ta xliquic te ta buoy animaetique, xchi’uc ep ta xvinajic, xchi’uc ta x-abtejic ta slequilal stuquic. Xchi’uc jech la jyich’ic albel ¿me mu jechuc c’ot ta pasel?

10 Ti yajchanc’optaque jech la staq’uic, xchi’uc jech la jyalic: Jech, Cajval, ti Samuele jech la jyal jech chac c’u cha’al a va’yejtaque, xchi’uc scotol c’ot xa ta pasel.

11 Ti Jesuse jech la jyal: ¿c’uxi ti muyuc ats’ibaojic ti c’usitic va’aye, xchi’uc ti ep ch’ul viniquetic iliquique, xchi’uc ti ep boch’otic la jyilique, xchi’uc ti abtejic ta sventaique?

12 Ja’ o jech ti Nefie vul ta sjol ti muyuc ts’ibabil ti va’aye.

13 Ja’ o jech ti Jesuse la spas mantal ti ac’o xich’ ts’ibaele; ti c’u x-elan la jyich’ ts’ibaele, ja’ jech x-elan chac c’u cha’al la spas mantal stuque.

14 Ja’ o jech ti c’alal Jesús la jyalbe smelolal ta jun no’ox o ta scotol ti ts’ibiletic bu la sts’ibaique, la spas mantal ti ac’o chanubtasvanicuc ti yu’un ja’ stuc yalojbe smelolale.