1 Ja’ jech ti c’alal muy ta vinajel ti Jesuse, ti boch’otic te tsobolique la spucanan sbaic batel, xchi’uc la stsacananic batel yajnilic xchi’uc xnich’nabic ti jujun viniquetique, jech sutic batel ta snaic.

2 Ja’ jech la spuclinic batel ya’yejic ta anil ta scotol jteclum, ti c’alal sc’antoox ochac’ubal ti c’alal jech la jyilic Jesús ti boch’otic te tsobolique, xchi’uc ti la spas yabtel ta stojolalique, ti ta sob yoc’omale ta xac’ sba ta ilel yanvelta ta stojolalic ti boch’otic te tsobolique.

3 Jech, sbejel ac’ubal la spuclinic batel ti c’usi ach’ la spas Jesuse, ja’ to ti c’uxi puclij batel ta scotol jteclume, ti yu’un jech ech’em epic tajmec, ti jech tsots abtejic sbejel ac’ubal ti c’uxi xu’ stsob sbaic ta sob yoc’omal, ti te bu ta xac’ sba ta ilel Jesús bu stsob sbaique.

4 Ja’ jech ti ta sob yoc’omal c’alal la stsob sbaic ti viniquetique, ja’ o jech. Nefi xchi’uc sbanquil ti boch’o cha’ cuxi ta animaetique, ti ja’ sbi Timoteo jech chac c’u cha’al xnich’on ti ja’ sbi Jonas, xchi’uc xtoc ti Kumen, xchi’uc Kumnoni, xchi’uc Jeremias, xchi’uc Shemnen, Xchi’uc Jonas, xchi’uc Sedequías, xchi’uc Isaias—Ti ja’ic yajchanc’optac Jesús st’ujoje, jech batic xchi’uc la jyac’ sbaic ta o’lol ti te bu oyic ti boch’otic te tsobolique.

5 Ja’ jech, yu’un tu j-ech’em no’ox ep ti boch’otic te tsobolique, ti jech la svoq’uic ta lajchab tsope.

6 Jech ti lajchavique la jyalbeic ti boch’otic te tsobolique; ti ac’o quejiicuc ta banamil xchi’uc ti ac’o sc’opanic jtotic ta sbi Jesuse.

7 Jech ti jchanc’opetique la sc’opanic ec xtoc ti jtotic ta sbi Jesuse, ja’ o jech liquic xchi’uc la xchanubtasic ti jteclume.

8 C’alal laj yo’ntonic ta xchanubtasel jech chac c’u cha’al lo’iletic la jyal Jesuse, muyuc bu sjeltaic jlec’uc jech chac c’u cha’al yaloj Jesuse, ja’ jech, la squejan sbaic yanvelta xchi’uc la sc’opanic jtotic ta sbi Jesús.

9 La sc’opanic Riox ta sventa c’usi ech’em tsc’anic, ti c’usi ech’em sc’anique ja’ ti ac’o yich’ic ac’bel Ch’ul Espíritue.

10 Ti c’alal la sc’opanic Riox jech chac c’u cha’al va’aye, batic te ta ti’ vo’, te la jyich’ic chi’nel batel yu’un ti boch’otic te tsobolique.

11 Ja’ o jech ti Nefie, yal te ta vo’, jech te la jyich’ic vo’.

12 Jech te loc’ ti ta vo’e, xchi’uc te sjapo ac’ vo’, xchi’uc la jyac’ ta vo’ scotolic ti boch’otic st’ujanoj o no’ox Jesuse.

13 Ja’ o jech ti c’alal la jyich’ic vo’ scotolique, xchi’uc jech loq’uic xa ti ta vo’e, ti Ch’ul Espíritue tal ta stojolalic, xchi’uc yich’ic nojesel ta Ch’ul Espíritu xchi’uc ta c’oc’.

14 Ja’ jech yich’ic pixel jech chac c’u cha’al c’oc’ yileluc, te tal ta vinajel, ti boch’otic te tsobolique la jyilic xchi’uc la jyalic ta jamal; xchi’uc yalictal abatetic ta vinajel, jech la jyich’ic chanubtasel.

15 Ja’ o jech ti c’alal ja’o chanubtasatic yu’un abatetic ti jchanc’opetique, ja’ o jech, c’ot ti Jesuse, la jyac’ sba ta o’lol ta stojolalic xchi’uc la jyich’ic chanubtasel.

16 Ja’ o jech c’opoj ta stojolalic ti boch’otic te tsobolique, xchi’uc la spas mantal ti ac’o squejan sbaic yanvelta ta banamile, xchi’uc la squejan sbaic ec xtoc ti yajchanc’optaque.

17 Ja’ jech ti c’alal scotolic xa ox quejelic ta banamile, la spas ta mantal yajchanc’optac ti ac’o sc’opanic Rioxe.

18 Ja’ o jech, sjapoic sc’opanel Riox, xchi’uc la sc’opanic ti Jesuse, la jyalbeic ti yu’un ja’ Jcoltavanej yu’nique xchi’uc ti ja’ Xrioxique.

19 Ja’ o jech ti Jesuse la sboc’ sba batel ta stojolalic, jech te nomaj batel jutuc ta stojolalic, xchi’uc la snijan sba ta banamil, xchi’uc jech la jyal:

20 Tati, vocol a valbun ti jech la vac’be Ch’ul Espíritu ti li’ boch’otic la jt’ujanane; yu’un ja’ ta sventa xch’unolajel yo’ntonic ta jtojolal ti jech la jt’uj li’ ta sventa scotol banamile.

21 Tati, ta jc’anbot ac’o xa vac’be Ch’ul Espíritu scotolic ti boch’otic ta xch’unic ti c’usitic ta xalique.

22 Tati, la vac’be Ch’ul Espíritu yu’un la xch’unicun vu’un; cha vil ti ta xch’unicune, ja’yo cha va’ybeic ti c’usi chalique, xchi’uc ta xc’opojic ta jtojolal, ta xc’opojic ta jtojolal yu’un li’ jchuq’uique.

23 Jech tana Tati, ta jc’anbot ta stojolalic xchi’uc scotolic ti boch’otic ta xch’unic c’usi ta xalique, xchi’uc ti c’uxi xu’ ta xch’unicun vu’une, xchi’uc c’uxi vu’nucun ta stojolalic jech chac c’u cha’al vo’te. Tati vo’ot oyot ta jtojolal, ti c’uxi junuticuc oe.

24 Ja’ o jech ti c’alal la sc’opan jech va’ay jtotic ti Jesuse, sut batel te ta yajchanc’optac, ja’ jech, ti stuquique muyuc xlubic ta sc’opanel, jech muyuc liquel liqueluc c’usi chalic, yu’un yich’ojic albel ti c’usi xu’ sc’anique, xchi’uc nojemic ti ta c’usi tsc’anique.

25 Ja’ jech ti Jesuse la jyac’ sbenticion ta stojolalic ti c’alal ja’o jech ta sc’opanique, xchi’uc ti tse’imol ta sate te c’ot ta stojolalic, xchi’uc ti xojobal sate c’ot ta sbaic, ja’ jech, sac comic jech chac c’u cha’al sac xchi’uc sc’u’tac Jesús, xchi’uc ja’ jech, ti saquile muyuc bu jech saquil, jech, muyuc bu xquiltic li’ ta banamil ech’em sac jech chac c’u cha’al saquile.

26 Ti Jesuse jech la jyal: C’opanic o ti Rioxe, ja’ jech, muyuc bu xlaj yo’ntonic o ta sc’opanel ti Rioxe.

27 Ja’ jech la svoc’ sba batel jutuc yanvelta ta stojolalic xchi’uc te la snijan sba ta banamil, jech te la sc’opan yan velta ti jtotique, jech la jyal:

28 Tati ta jtojbot ta vocol ti jech la sacubtasic ti boch’otic la jt’uj ta sventa xch’unolajel yo’ntone ta jc’anbot ta stojolalic, xchi’uc ti boch’otic ta xa’yic c’usi ta xalique, xchi’uc ti c’uxi xu’ xich’ic sacubtasel ta jventa ta sventa xch’unolajel yo’ntonic ta ya’yejic jech chac c’u cha’al la jyich’ic sacubtasel ta jventae.

29 Tati, muyuc ta jc’anbot ta sventa sbejel banamil, ja’ no’ox ti ta boch’o la vac’bun li’ ta sbejel banamile, ta sventa xch’unolajel yo’nton, ti c’uxi xu’ xich’ic sacubtasel ta jventa, ti c’uxi ja’uc te oyucun ta stojolalic jech chac c’u cha’al vo’te, Tati vo’ot oyot ta jtojolal, ti c’uxi junuticuc oe, ti c’uxi vu’nucun ts’uiltasbilucun ta stojolalique.

30 Ja’ o jech ti c’alal la jyal va’ay lo’iletic ti Jesuse, tal yanvelta ta yajchanc’optac, xchi’uc ja’ jech, ti stuquique muyuc lajem yo’ntonic ta sc’opanel ti Jesuse; jech ti stseimole te c’ot ta stojolalic yanvelta, ja’ jech, sac comic jech chac c’u cha’al Jesús.

31 Ja’ o jech nomaj no’ox batel jutuc yanvelta, xchi’uc la sc’opan jtotic.

32 Yu’un ti oq’uile mu stac’ xal ti c’u x-elan la sc’opan Rioxe, xchi’uc me ja’uc stac’ sts’iba junuc vinic ti c’u x-elan la sc’opan Rioxe.

33 Ti boch’otic te tsobolique la jya’yic xchi’uc ta xalic ta jamal; xchi’uc la sjam sba ti yo’ntonique, xchi’uc la jya’ybeic smelolal ta yo’ntonic ti lo’iletic c’u x-elan la sc’opan Rioxe.

34 Ja’ jech, muc’tic xchi’uc alaq’uic sba ti lo’iletic la jyal c’alal la sc’opan Riox, ti jech mu stac’ xich’ ts’ibaele, xchi’uc me ja’uc stac’ xcholbe batel smelolal ti vinique.

35 Ja’ o jech ti c’alal laj yo’nton ta sc’opanel Riox ti Jesuse, sut batel ti te buoy yajchanc’optaque, jech la jyal: Muyuc ba’quin xquil ti jech ech’em smuc’ul xch’unolajel yo’ntonic Judioetique, muyuc xcac’ ta ilel muc’tic lavalic sba sq’uelubil ta sventa chopolil.

36 Ta batsimelel cha calboxuc ti muyuc boch’o junucal yu’nic ti jech yiloj o no’ox ti c’usitic muc’tic jech chac c’u cha’al la vilic vo’xuque, xchi’uc ti jech ya’yojic c’usitic muc’tic jech chac c’u cha’al la va’yic vo’xuque.