1 Ta bats’imelel, ta bats’imelel ta xcal ti oyto yantic jchijtac ti ma’icuc ti li’ ta banamile, xchi’uc me ja’uc ta sbanamil Jerusalene, xchi’uc me ja’uc ti li’ ta banamil bu nopolic no’ox bu la jpas cabtele.

2 Ti boch’otic va’ay ta xcale, ja’ic ti boch’otic muyucto ya’yojbicun ca’yejtaque; yu’un muyuc baq’uin la jcac’ jba ta ilel ta stojolalic.

3 Jech laj xa quich’ mantal yu’un jtotic ti jech tsc’an chi bat ta stojolalic c’uxi xu’ xi ya’ybicun jc’ope xchi’uc ti c’uxi xich’ic atael ta jchijtaque, ti c’uxi jtsopicuc no’oxe, xchi’uc ti junuc no’ox xcha’bielique, chi bat chbat cac’ jba ta ilel ta stojolalic.

4 Xchi’uc ta jpas mantal ti ac’o xa ts’ibaic ti li’ lo’iletic ta ts’acal ti c’alal me libate, ta sventa ti c’uxi xu’ xich’ic ti li’ jteclumal ta Jerusalene, ti boch’otic la jyilicune xchi’uc ti boch’otic la xchi’nicun ta lo’ile, muyuc ta sc’anbeic jtotic ta jbi ti c’uxi xu’ xich’ic chanubtasel yu’un Ch’ul Espíritu ta aventaic vo’xuc jech chac c’u cha’al yantic jvoq’uic muyuc c’usi sna’ic ta sventa lo’iletic bu cha ts’ibaic xchi’uc cha naq’uic ti c’uxi xu’ xich’ic ac’bel yilic ti boch’otic ma’icuc snailal Israele, ti c’uxi ja’ xa ta slequilalic boch’otic ma’icuc snailal Israel, ti scomelal xnich’nabic ti boch’otic, ti jech ta xich’ tanijel batel ta scotol banamil ta sventa smulique, ja’ to jech xu’ ta xich’ic tsobel o me ja’ c’uxi xu’ xich’ic iq’uel batel ta jtojolal ti vu’un jcoltavanejun yu’nique.

5 Ja’ jech ta jtsob ta xchan jotal xchiquin banamil; ja’ to jech te ta xc’ot ta pasel cu’un ti c’usi la jyal jtotic ta sventa scotol jteclum ta snailal Israele.

6 Xchi’uc oy benticion yu’nic ti boch’otic ma’icuc snailal Israel ti jech la xch’unicune, ja’ no’ox ta Ch’ul Espíritu, ti jech ta xalboxuc ta jamal ta jventa vu’un xchi’uc ta sventa jtotique.

7 Ja’ jech, ja’ no’ox ta sventa xch’unolajel yo’nton ta jtojolal, xi ti jtotique, xchi’uc ta sventa ti muyuc xch’unolajel a vo’ntonic vo’xuc snailal Israel, ta bats’imelel ta xc’ot ta stojolalic ti boch’otic ma’icuc ta snailal Israel ta slajebal c’ac’al, ti c’uxi xu’ xich’ic ac’bel yilic ti saquil c’usitic li’e.

8 Jech, abul sba ti boch’otic ja’ snailal Israel muyuc xch’unolajel yo’ntonique; xi ti jtotique—jech ti boch’otic talemic li’ ta sba banamile, la stanijic batel jteclumal ti ja’ic snailal Israele, xchi’uc la xpech’ic ta teq’uel.

9 Ta sventa slequilal jtotic ta stojolalic boch’otic mu ja’icuc snailal Israele, jech chac c’u cha’al ta sq’uel talelil jtotic ta sventaic boch’otic ja’ic jteclumal snailal Israel, ta bats’imelel, ta bats’imelel ta xcal ti ta ts’acal me c’ot ta pasel scotol ti c’usitic li’e, xchi’uc ti me yich’ic tuch’esel ti ja’ic jteclumal snailal Israele, xchi’uc ti me ta xat yo’ntonique, xchi’uc ti me chamique, xchi’uc ti me yich’ic nutsel ta stojolalique, xchi’uc ti me mu xich’ic c’anel ta stojolalique, xchi’uc ti me ja’ no’ox ta slabanic ta stojolalique.

10 Jech la spas mantal jtotic ti jechuc xcalboxuque; Ti baq’uin ta sa’ smulic ta sventa c’u x-elan chanubtasvanejemun ti boch’otic mu ja’icuc snailal Israele, xchi’uc ti me jeche’ no’ox ta stoy sba yo’ntonic ta scotol muc’tiquil jteclumetic xchi’uc ta scotol jteclum ta scotol banamile, xchi’uc me ja’ nojemic ta chopol c’op, xchi’uc ta lo’lavanej, xchi’uc ta chopoliletique, xchi’uc ta scotol ta chop epal c’opile, xchi’uc milbaile, xchi’uc ta jlo’lavanej paleetique, pich’ o’ntonale, xchi’uc chopol ta mucule; ti me la spasic scotol ti c’usitic va’aye, ti me mu sc’anic ti slequil c’usi li chanubtasvane, ja’ jech, ta jloq’ues ta stojolalic ti saquil c’usi li chanubtasvane, xi ti jtotique.

11 Ja’ to jech te ta jna’ ti c’usi calojcutic xchi’uc li’ jteclumale, vo’ot snailal Israel, ta xquich’boxuc batel li’ jlequil c’ope.

12 Xchi’uc ta xcac’boxuc a vilic vo’xuc snailal Israel, ti boch’otic ma’icuc snailal Israele muyuc stsatsalic ta a tojolal, ba’yuc ta jt’ab ta co’nton ti c’usi la jcal ta a tojolale vo’ot snailal Israel, xchi’uc ta xa votquin lec ti saquil jlequil c’ope.

13 Jech ti me la sutes yo’ntonic xchi’uc ti me sutic batel ta stojolal ti boch’otic ma’icuc snailal Israele, ja’ jech, ta xich’ic atael ta jteclumal ta snailal Israel xi ti jtotique.

14 Xchi’uc muyuc ta xcac’ ac’o batuc jteclumal ta stojolalic ti ja’ic snailal Israel jech bat ta stojolalic chbat yich’ic pech’el ta teq’uel ta yacanique, xi ti jtotique.

15 Ti me muyuc sutictal ta jtojolale, xchi’uc me muyuc cha’ybicun li’ jc’ope, vu’un ta xcaq’uic, jech ta xcaq’uic ti jteclumaltac snailal Israel, ba jeloicuc ta o’lol ta stojolalic; xchi’uc cha pech’ic ta teq’uel, ja’ jech tspasic jech chac c’u cha’al ats’am ti ch’ayem xa xchi’ile, yu’un ja’ xa jech muyuc xa c’usi xtun o, ja’ xa no’ox ta xich’ jipel xchi’uc ta xich’ pech’el ta teq’uel ta yacanic jteclumal. Snailal Israel.

16 Ta bats’imelel, ta bats’imelel cha calboxuc ti ja’ jech la spasun ta mantal jtotic: Ti ac’o xcac’ ta spuculal osilic li’ jteclum ti li’ banamile.

17 Ja’ jach, ta xc’ot ta pasel ti ya’yej lequil vinic Isaias ti jech ta xal:

18 Ti jchabivanej viniquetic avu’nique ta stoy yeic; jmoj ta xq’uejinic, yu’un ta xilic ta satic stuquic ti c’alal ta x-ac’atic sutel yu’un Cajvaltic te bu muyuc uts’intaele.

19 ¡Avanic ta sventa xcuxetel yo’ntonic! ¡q’uejinic ta jmoj ta sventa ti te muyuc c’usi oy ta yosilal Jerusalene! yu’un ti Cajvaltique laj xa spatbe yo’nton ti steclumale, xchi’uc laj xa scolta ti Jerusalene.

20 Ti Cajvaltique la st’anan xch’ul c’ob ta satic scotol jteclum, xchi’uc ta scotol sti’iltac banamil ta xilic coltael yu’un Riox.