1 Ja’ o jech ti c’alal la jyal jech lo’iletic ti Jesús ta Nefi xchi’uc ti ta boch’otic la jyich’ic iq’uele, (c’otic ta lajchab ti boch’otic la jyich’ic iq’uele, xchi’uc la jyich’ic svu’elic xchi’uc stsatsalic ta sventa ac’ vo’. Ja’ jech la xbech sc’ob ti te bu tsobolique, xchi’uc jech la jyal: Cha vich’ic benticion ti me cha bac’ achiquinic ta sventa ti c’usi chalic ti li’ lajchab viniquetic vu’un la jt’uj ta x-abtejic ta a ventaic xchi’uc ti ja’ avaj abtelique; xchi’uc la jcac’beic stsatsalic ti c’uxi xu’ xaq’uic vo’ ta vo’e; ta ts’acal ti c’alal me la vich’ vo’ ta vo’e, ja’ jech vu’un ta xcac’ vo’ xchi’uc c’oc’ xchi’uc Ch’ul Espíritu. Ja’ jech cha ta xcuxetel a vo’nton ti me cha ch’unune, xchi’uc ti me cha vich’ vo’e, ta ts’acal ti jech laj xa avilun xchi’uc ti laj xa a na’un ti ja’un vu’une.

2 Xchi’uc xtoc, ja’ ech’em ta staic xcuxetel yo’ntonic ti boch’otic ta xch’unic ava’yejic ti jech cha valic ta jamal ti jech laj a vilicun xchi’uc ti jech xana’ic ti ja’un vu’une, jech, ja’ ta staic xcuxetel yo’ntonic ti boch’otic ta xch’unic a va’yejique, xchi’uc ti me tsbic’tajes sbaic leque xchi’uc ti me ta xich’ic vo’e, yu’un ta xich’ic vu’lanel yu’un c’oc’ xchi’uc Ch’ul Espíritu, xchi’uc ta xich’ic ch’aybel smulic.

3 Jech ja’ ta staic xcuxele yo’ntonic ti boch’otic abul sbaic ta sventa Espíritu ti jech ta xtalic ta jtojolale, yu’un ti stuquique ja’ yu’nic ti slequilal vinajele.

4 Xchi’uc ta staic xcuxetel yo’ntonic scotolic ti boch’otic ta x-oq’uique, yu’un ti stuquique ja’ ta xich’ic patbel yo’ntonic.

5 Xchi’uc ta staic xcuxetel yo’ntonic ti manchuetique, yu’un ti stuquique ja’ ta xu’ninic ti banamile.

6 Xchi’uc ja’ ta staic xcuxetel yo’ntonic scotolic ti boch’otic ta xa’yic vi’nal xchi’uc taquin o’nal ta sventa lequilale, yu’un ti stuquique ja’ ta xich’ic nojesel ta Ch’ul Espíritu.

7 Xchi’uc ta staic xcuxetel yo’ntonic ti boch’otic lequique, yu’un ti stuquique ja’ ta staic lequilal.

8 Xchi’uc ta staic xcuxetel yo’ntonic ti boch’otic lec yo’ntonique, yu’un ti stuquique ja’ ta xilic jtotic Riox.

9 Xchi’uc ta staic xcuxetel yo’ntonic ti boch’otic ta spajesic pas c’ope, yu’un ti stuquique ja’ xnich’ontac jtotic Riox.

10 Xchi’uc ta staic xcuxetel yo’ntonic ti boch’otic ta xich’ic nutsel ta sventa jbie, yu’un ti stuquique ja’ yu’nic ti slequilal vinajele.

11 Xchi’uc cha taic xcuxetel a vo’ntonic ti c’alal me ta sventa jbi cha vich’ic albel chopol c’op xchi’uc me cha vich’ic nutsele, xchi’uc ti me jeche’ no’ox c’usi chalic ta atojolalique.

12 Yu’un chataic muc’ xcuxetel a vo’ntonic xchi’uc ech’em no’ox xcuxetel a vo’ntonic, xchi’uc muc’ no’ox ti a motonic te ta vinajele, yu’un ja’ jech la jyich’ic nutsel ti lequil viniquetic ti boch’otic talic ba’yuc jech chac’ c’u Cha’al vo’xuque.

13 Ta bats’imelel ta bats’imelel ta xcal ti ta xcac’ ja’ucoxuc yats’amiloxuc banamile, jech ti ats’am me ch’ay xchi’ile ¿c’uxi xu’ ta xich’ chiumtasel ti banamile? ti me ch’ay xchi’il ti ats’ame yu’un mu xa xtun xchi’uc ta xich’ jipel loq’uel xchi’uc ta xich’ pech’el ta teq’uel yu’un viniquetic.

14 Ta bats’imelel ta bats’imelel ta xcal ti ta xcac’ ja’ucoxuc saquil osil yu’un li’ jteclume. Ti jun jteclum me oy ta ba vitse mu stac’ naq’uel.

15 Ja’ jech, ¿Ti viniquetic me la stsanic junuc cantelae me ta xaq’uic ta yolon jun anmul? Mo’oj; ja’ te ta xaq’uic ta yavil, xchi’uc ta xac’ xojobal ta sventaic ti boch’otic te oyic te ta yut nae.

16 Ja’ jech, ja’uc me jechuc sacuc a xojobalic ta sat ti li’ jteclume, ta sventa ti c’uxi xu’ sq’uelic a lequil abtelique, xchi’uc ti c’uxi xa vac’beic xcuxetel yo’nton jtotic ti ja’ teoy te ta vinajele.

17 Muxavalic me vu’un tal jsoques ti smantaltaquic lequil viniquetique, yu’un ma’uc tal jsoques, yu’un ja’ tal jpas.

18 Yu’un ta bats’imelel cha calboxuc ti mu jlec’uc xchi’uc me jutebuc jeloven ti mantale yu’un scotol xa c’ot ta pasel ta jtojolal.

19 Xchi’uc ja’ jech, cac’oj jmantal xchi’uc smantaltac jtot, ti ac’o xa ch’unicune, xchi’uc ti ac’o xa sutes a vo’ntonic yu’un amulique xchi’uc la’ic ta jtojolal ti me cha sutes a vo’ntonic xchi’uc Espíritue. Ja’ jech te oy avu’nic ti mantaletic ta atojolalique, jech ti mantaletique c’ot xa ta pas el.

20 Ja’ jech, la’ic ta jtojolal xchi’uc stac’ xa colic; yu’un ta bats’imelel cha calboxuc, ti me muyuc xa ch’unbicun ti jmantaltac c’u x-elan cha cac’boxuc li’ ta orae, mu stac’ xa ochic ta slequilal vinajel.

21 A va’yojic o no’ox ti yich’oj alel ta vo’neje, xchi’uc te ts’ibabil ta atojolalic: Muxa milvan, ti boch’o ta xmilvane ja’ xa me te ac’bil bu ta sq’uel talelil Riox.

22 Ti vu’une ta xcalboxuc, ti boch’o ta xilinta xchi’ile ta xich’ vocolil, xchi’uc ti boch’o mu xa tojob me xut xchi’ile, ja’ te ta xich’ aq’uel bu tsobol viniquetic; xchi’uc ti boch’o tu jpimot ta mantal me xut xchi’ile, ja’ xa me teoy ta sc’ac’al c’atinvac.

23 Ja’ jech, me la tal ta jtojolal o me cha c’an cha tal ta jtojolal ti jech xa na’to ti oy a mul yu’un a vermanoe.

24 Batan ta anil ta stojolal a vermano, xchi’uc bic’tajeso aba ta stojolal ba’yuc, ja’o xa tal ta jtojolal ta scotol yut a vo’nton, jech ti vu’une ta xquic’ot.

25 Bic’tajeso aba ta oratic no’ox yu’un a vaj contra, ti c’alal te to oyot ta be achi’uque, yatsame bat stsacot, xchi’uc yatsame xa vich’ tiq’uel ta chuquel.

26 Ta bats’imelel, ta bats’imelel cha xcalbot ti mu c’uxi xu’ xa loc’ te ti me muyucto atojoj jlec’uc slajeb seninee. Jech ti c’alal te to oyot ta chuquele, ¿me stac’ van xa toj junuc senine? ta bats’imelel ta bats’imelel cha calbot ti mo’oje.

27 Jech tana, ja’ jech la jyich’ ts’ibael ta vo’nej ti mu xamulibaje.

28 Ja’ jech ta xcal vu’un, ti boch’o ta sq’uel jun ants ti yu’un ta xpich’ o’ntae, mulivaj xa ta yo’nton.

29 Jech tana, cha calboxuc mantal ti ac’o mu xa vaq’uic ochuc c’usitic no’ox va’ay ti ta a vo’ntonique.

30 Yu’un ja’ lec ti ac’o xa loq’ues abaic ti ta c’usitic va’ay, ti jech cha tsac a curusique, xchi’uc ti jech cha vich’ic jipel batel ta c’atinvaque.

31 Ts’ibabil o no’ox, ti voch’o ta xicta yajnile, ac’o yac’be svunal ti jech ta xictae.

32 Ta bats’imelel, ta bats’imelel cha calboxuc me oy boch’o ta xicta yajnil, ta scoj yu’un oy c’usi ta spas xchi’uc yan vinique, ti va’aye, me oy boch’o bat yic’ ti sutemal antse, ta xmulivaj xa xchi’uc.

33 Xchi’uc ts’ibabil o no’ox: ti mu xa paych’un mantale, yu’un ja’ cha pas ti c’usi a valojbe Cajvaltique.

34 Xchi’uc ta bats’imelel, ta bats’imelel cha calboxuc: ti mu c’usiuc xa valic ta jech no’oxe, me ja’uc ta c’usi oy te ta vinajel, yu’un ja’ te ti te bu joybil ta yabat Rioxe.

35 Xchi’uc me ja’uc ta banamil, yu’un ja’ scajleb yacan:

36 Xchi’uc mu xa bal jech ta ajol no’ox, yu’un mu stac’ xa pas jun tsotsil jolil sac xchi’uc ic’.

37 Ti c’alal sc’anto xa c’opojique: Jech, me jeche, mo’oj me mo’oje, yu’un ti me epto c’usi la vale, chopol xa o.

38 Xchi’uc ja’ jech, ts’ibabil; satil xchi’uc satil, stanal eil xchi’uc stanal eil.

39 Ti vu’une ta xcal ti mu xa pas c’usi chopole, ti c’alal sc’antoox smajbot jot a ts’et choe, ac’bo xtoc ti jote.

40 Xchi’uc me oy boch’o ta stic’ amul ta sventa mantale, xchi’uc me ta spojic li’ a natil c’u’e, comtsanbo xtoc li’ a xaquitae.

41 Xchi’uc me oy boch’o ta xic’ot batel ta xanubal junuc revae, batan achi’uc chibuc reva.

42 Ti me oy boch’o c’usi tsc’anbote, ac’bo, xchi’uc me oy boch’o tsc’an c’usi xch’amanbote, mu xa jalanbe.

43 Ja’ jech xchi’uc te ts’ibabil xtoc ti ac’o xa c’an a achi’iltaque, xchi’uc ti ac’o xa c’an avaj contrae.

44 Ja’ jech, ti vu’une ja’ jech ta xcal: c’anic a vaj contraic, xchi’uc xa vac’be benticion boch’o chopol chc’opoj ta atojolalic, xchi’uc lec xa c’anic boch’o mu sc’anojoxuc, xchi’uc c’opanic Riox ta stojolalic boch’otic ta xelc’anoxuc xchi’uc boch’o ta snutsoxuc.

45 Ti c’uxi ja’ucoxuc xnich’on jtotic ti ja’ teoy te ta vinajele, ti ta sloq’ues c’ac’al ta stojolalic boch’otic lequic xchi’uc boch’otic chopolique.

46 Ja’ jech ti c’usitic va’ay ti oyic o no’ox ta vo’nej ti ja’ te oyic ta sventa mantaletique, jech c’ot xa ta pasel scotol ta jventa vu’un.

47 Ti c’usitic oy ta vo’neje jelovenic xa, scotol ti c’usitic oye yich’oj xa pasel ta ach’.

48 Ja’ jech, ta jc’an ti lecanic jech chac c’u cha’al vu’une, o me ja’ jech chac c’u cha’al Riox te oy ta vinajel tu jleque.