1 Iwe non ewe fansoun pwe iei a pwan wesino ewe tiwe me nimuen ier, iwe ekkewe aramas ra poputa ne monnuki ekkena esisin me amwarar minne ra fen rongorong, me poputa ne kisino ne ingeno ren ew esisin are ew amwarar seni nang, ina popun pwe ra poputa ne pochokununo me non netiper, me chunnuno non ar ekiek, me poputa ne nukunukumangei minne ra fen rongorong me kuna meinisin—

2 Ra ekiekieta ekkoch mettoch mi namotmwan non netiper, pwe a fis me ren aramas me ren ewe manamanen ewe tefin, an epwe emmwenano me otupano netipen ekkewe aramas; iwe iei Setan a angei sefan nemenem won netipen ekkewe aramas, ina popun pwe a achunnano meser me emwenireno pwe repwe nuku pwe ewe nongonong mi ennet an Kraist ew mettoch mi puch me namotmwan.

3 Iwe non ewe fansoun pwe ekkewe aramas ra poputa ne pochokununo non fofforungaw me angang mi anieput; iwe rese nuku pwe epwe chiwen wor esisin are amwarar epwe kawor; iwe Setan a fein fetan, a emmwenano netipen ekkewe aramas, a otupereno me fori ir pwe repwe fori chommongun fofforungaw me non ewe fonu.

4 Iwe iei a wesino ewe tiwe me wonuen ier; me pwan ewe tiwe me fusuwen ier; me pwan ewe tiwe me wanuen ier; me pwan ewe tiwe me tiuwen ier;

5 Me pwan ew pukun ier a wesino seni ekkewe ranin Mosaia, i ewe a fen king won ekkewe aramasen ekkewe chon Nifai.

6 Iwe wone puku me tiu ier a wesino seni an Liai su seni Jerusalem.

7 Iwe tiu ier a wesino seni ewe fansoun nupwen ewe esisin a kawor, minne a fen affateno me ren ekkewe soufos, pwe Kraist epwe wareto ngeni ewe fonufan.

8 Iei ekkewe chon Nifai ra poputa ne auku ar fansoun seni ei kinikinin fansoun nupwen ewe esisin a kawor, are seni ewe wareton Kraist; iei minne, tiu ier a wesino.

9 Iwe Nifai, i ewe semen Nifai, i ewe a nom ren ewe tumunun ekkewe uruo, ese niwin ngeni ewe fonuen Saraemla, me ese wor ian epwe pwá me ia me non ewe fonu.

10 Iwe non ewe fansoun pwe ekkewe aramas ir mi chok nonnom non fofforungaw, me nukun chommongun afanafan me osini minne ra titino me neir; iwe iei a pwan wesino ewe engon ier; iwe ewe engon me ewin ier a pwan wesino non angangangaw.

11 Iwe non ewe fansoun non ewe engon me unungat ier a poputa ne wor maun me anini fengen non unusen ewe fonu; pun ekkewe chon sonan Katianton ra fokkun chommongono, me ra nieno chommong me nein ekkewe aramas, me atano chommong teninimw, me acheewano watten mano me watten ninnino non unusen ewe fonu, iwe a auchea pwe ekkewe aramas meinisin, ekkewe chon Nifai me pwan ekkewe chon Leiman, pwe repwe angei pisekin maun ne ungeni ir.

12 Iei minne, ekkewe chon Leiman meinisin ekkewe ra siwin ngeni ewe Samon ra chungeni pwir kewe, ekkewe chon Nifai, me ra echimw, fan iten tumunun manauer me punuwer kewe me nour kewe, pwe repwe angei pisekin maun ne ungeni ekkena chon sonan Katianton, ewer, me pwan ar repwe eppeti ar pung, me ekkewe tufichin ar we mwichefen me ar pekin fen, me ar tufichin finata me ar ngaseno.

13 Iwe non ewe fansoun pwe me mwen an ei engon me unungatin ier wesino ekkewe chon Nifai ra nom non pekin anuokus ren unusen kiteter pokiten ei maun, minne mi fokkun eriaffou.

14 Iwe non ewe fansoun pwe ekkena chon Leiman ekkewe ra chungeni ekkewe chon Nifai ra anneanong nein ekkewe chon Nifai;

15 Iwe ar we anumamau a mwokut seni ir, iwe unucher a pwecheno usun chok ekkewe chon Nifai;

16 Iwe nour kewe anuon me nour kewe fopun ra fokkun mesoch, iwe ra anneanong nein ekkewe chon Nifai, me ra iteni chon Nifai. Iwe iei a muchuno ewe engon me unungatin ier.

17 Iwe non ewe fansoun non nepoputan ewe engon me ruanuen ier, ewe maun nefinen ekkewe chon sona me ekkewe aramasen Nifai a soposopono me a fokkun eriaffou; nge inamo, ekkewe aramasen Nifai ra angei tufichin pochokun won ekkewe chon sona, ina popun pwe ra asusefanireu seni fonuer kewe ngeni won ekkewe chuk me ngeni non ar kewe neni mi monomon.

18 Iwe iei a muchuno ewe engon me ruanuen ier. Iwe non ewe engon me nimuen ier ra feito ungeni ekkewe aramasen Nifai; iwe pokiten fofforungawen ekkewe aramasen Nifai, me ar kewe chommong anini fengen me aosukosuk fengen, ekkewe chon sonan Katianton ra angei tufichin pochokun wor.

19 Iwe iei a muchuno ewe engon me nimuen ier, iwe iei ekkewe aramas ra nom non ew nikinikin chommong riaffou; iwe ewe ketinasen kiteter a ittiw wor, ina popun pwe ita repwene pokupokutiw me ren, iwe ei pokiten ar angangangaw.