Bok eo Kein Karuo an Nipai

1 Im kiiō ālikin men kein, ke n̄a, Nipai, iaar kōjjem̧ļo̧k aō katakin ļōm̧aro jeiū, ^ajemām, Liai, eaar barāinwōt kōnono elōn̄ men ko n̄an er, im kōllaajrak n̄an er, ewi jon̄an an ļap men ko Irooj eaar kōm̧m̧an n̄an er ilo bōktok er jān āneen Jerusalem.

2 Im eaar kōnono n̄an er kōn ^ajum̧ae ko aer ioon dān ko, im tūriam̧okake ko an Anij ilo dāpij mour ko aer, bwe ren jamin kar oran̄ļo̧k er ilo lo̧meto.

3 Im eaar barāinwōt kōnono n̄an er kōn āneen kallim̧ur eo, eo em̧ōj aer kar bōk e—ewi jon̄an tūriam̧o eo an Irooj ilo an kakkōl kōm bwe kōmij aikuj kar ko jān āneen Jerusalem.

4 Bwe, lo, eaar ba, iaar lo juon ^avisōn, ilo e ijeļā bwe ^bJerusalem kar ko̧kkure, im n̄e jen kar pād wōt ilo Jerusalem jen kar barāinwōt ^cjako.

5 A, eaar ba, mekarta en̄taan ko ad, jaar bōk juon ^aāneen kallim̧ur, juon āneo ^bejenolo̧k jān āne otemjeļo̧k, juon āneo Irooj Anij eaar kōm̧m̧an bujen n̄an eō bwe enaaj juon āneen jolōt ro ineō. Aaet, Irooj eaar ^ckanejnej kake āniin n̄an eō, im n̄an ro nejū n̄an indeeo im barāinwōt aolep ro naaj tōlļo̧k er jān aelōn̄ ko jān jet kōn pein Irooj.

6 Kōn menin, n̄a, Liai, ij kanaan ekkar n̄an jerbal ko an jetōb eo ilo n̄a, bwe ^aejjeļo̧k enaaj itok n̄an āne in n̄e jab bōktok er kōn pein Irooj.

7 Kōn menin, ^aāniin em̧ōj kōjenolo̧k n̄an e eo E naaj bōktok. Im n̄e āindein im renaaj jerbal n̄an E ekkar n̄an kien ko Eaar liļo̧k n̄an er enaaj juon āneen ^banemkwōj n̄an er; kōn menin, renaaj jamin bōk laļļo̧k er n̄an kōm̧akoko; n̄e āindein, enaaj kōn nana; bwe n̄e nana enaaj pād āneo naaj ^clia kōn kilaer, a n̄an ro rejim̧we naaj jeraam̧m̧an e n̄an indeeo.

8 Im lo, e ejim̧we bwe āniin eaikuj dāpij jān jeļā an laļ ko jet; bwe lo, elōn̄ laļ ko renaaj kobrak āneo, bwe en ejjeļo̧k jikin n̄an jolōt e.

9 Kōn menin, n̄a, Liai, iaar bōk juon kallim̧ur, bwe ^ajon̄an wōt an ro Irooj Anij enaaj kadiwōjtok er jān Jerusalem naaj kōjparok kien ko An, renaaj ^bwōrļo̧k ioon mejān āneo; im renaaj ņojak jān aolep laļ ko jet, bwe ren maron̄ bōk āneo n̄an er make. Im n̄e enaaj āindein bwe renaaj ^ckōjparok kien ko An renaaj jeraam̧m̧an ioon mejān āneo, im enaaj ejjeļo̧k juon enaaj ko̧kkure er, ak bōk āneo aer jolōt; im renaaj jokwe ie ilo ineem̧m̧an indeeo.

10 Ak lo, n̄e iien eo ej itok im renaaj idakunkunļo̧k ilo jab tōmak, ālikin aer kar bōk kōjeraam̧m̧an ko reļļap jān pein Irooj—ippāer ewōr jeļā kōn ejaak eo an laļ, im aolep armej, jeļā kōn jerbal ko reļļap im kabwilōn̄lōn̄ an Irooj jān ejaak eo an laļ; kajoor kar leļo̧k n̄an er n̄an kōm̧m̧an men otemjej jān tōmak; ippāer aolep kien ko jān jinoin, im ālikin bōktok er kōn em̧m̧an eo ejjeļo̧k jem̧ļo̧kin An n̄an āneen kallim̧ur in eaorōk—lo, ij ba, n̄e raan eo ej itok im renaaj joļo̧k Eo Ekwōjarjar In Israel, ^aMessaia eo em̧ool, aer Ripinmuur im aer Anij, lo, ekajet ko An eo ejim̧we naaj pād ioer.

11 Aaet, Enaaj bōktok n̄an er ^alaļ ko jet, im Enaaj leļo̧k n̄an er kajoor, im Enaaj bōk jān er jikin ko rej aer jolōt, im Enaaj kōm̧m̧an bwe ren ^bejjeplōklōk im mej.

12 Aaet, n̄e juon epepen ej eļļāļo̧k n̄an eo juon enaaj wōr ^akōto̧o̧rļo̧k bōtōktōk, im loļo̧k ko reļļap ilubwiljier; kōn menin, m̧aan ro nejū, ikōņaan bwe kom̧in keememej; aaet, ikōņaan bwe kom̧in ron̄jake naan ko aō.

13 O bwe kom̧in kar ruj; ruj jān juon kiki em̧wilaļ, aaet, em̧ool jān kiki an ^ahell, im mejaļļo̧k jān kom̧ ^btomede nana ko kom̧ij lokjak kaki, ko rej tomede ko rej lukwōj ro nejin armej, bwe ren kinōōrļo̧k n̄an ron̄ in būrom̧ōj im ^cjorrāān eo ejjeļo̧k jem̧ļo̧kin.

14 Kwōn ruj! im jerkak jān būn̄aln̄al, im ron̄ naan ko an juon ^ajemān eo ewūdiddid, eo neen im pein ej jab to kom̧ naaj kōbabuik ilo ^blōb eo em̧ōļo im lur, jān ijo ejjeļo̧k riito-itak emaron̄ ro̧o̧l; jet wōt raan im inaaj ilo̧k ilo ^ciaļ in an aolepān laļ.

15 Ak lo, Irooj eaar ^apinmuuri aō jān hell; iaar lo aiboojoj eo An, im ij pooļ indeeo ilo ^bpein ^ciakwe eo An.

16 Im ikōņaan bwe kom̧in keememej n̄an kōjparok aolep ^akien ko im ekajet ko an Irooj; lo, men in eaar ļōkatip eo an aō jān jinoin.

17 Buruō eaar eddo kōn būrom̧ōj jān iien n̄an iien, bwe iaar mijak, bwe kōn pen in būruōmi Irooj ami Anij eaar aikuj kar itok ilo dipiio in An ^aillu ioomi, bwe kom̧in ^bm̧wijkōk im jako indeeo;

18 Ak, bwe juon kaje en kar itok ioomi ium̧win ^aelōn̄ epepen ko; im naaj kar lotok kom̧ kōn jāje, im kōn n̄ūta, im matōrtōre kom̧, im kar tōl kom̧ ekkar n̄an ankilaan im kōm̧akoko an ^bdevil.

19 O ro nejū em̧m̧aan, bwe men kein ren jab itok ioomi, ak bwe kom̧in maron̄ juon armej in kāālet im ^ajitōnbōro an Irooj. Ak lo, ankilaan en kōm̧m̧an; bwe ^biaļ ko An rewānōk indeeo.

20 Im Eaar ba bwe: ^aJon̄an wōt ami naaj kōjparok ^bkien ko Aō kom̧ naaj ^cjeraam̧m̧an ilo āneo; ak jon̄an wōt ami jab kōjparok kien ko Aō naaj m̧wijitļo̧k kom̧ jān im̧aan meja.

21 Im kiiō bwe aō en maron̄ wōr an m̧ōņōņō ilo kom̧, im bwe buruō en maron̄ ilo̧k jān laļ in kōn lan̄lōn̄ kōn kom̧, bwe in maron̄ jab wanlaļļo̧k kōn inepata im būrom̧ōj n̄an lōb, kom̧in jerkak jān būn̄aln̄al, ro nejū em̧m̧aan, im kom̧in ^aem̧m̧an, im jek ilo ^bjuon wōt ļōmņak im bōro, juon wōt ilo aolep men otemjeļo̧k, bwe kom̧in jab naaj wanlaļļo̧k n̄an kōm̧akoko.

22 Bwe kom̧in jab naaj lia kōn juon kalia eo ekōmetak; im barāinwōt, bwe kom̧in jab bōktok ioomi inepata an Anij eo ^aejim̧we, n̄an ko̧kkure, aaet ko̧kkure eo jim̧or an jetōb im ānbwin.

23 Kom̧in ruj, ro nejū em̧m̧aan, kom̧in kōņak wānōk ^anuknuk in tariņae eo. Pikūrļo̧k tomede ko kom̧ij lokjak kaki, im wōnm̧aantak jān ittinad, im jerkak jān būn̄aln̄al.

24 Jab bar kōpata ņae m̧aan eo jātimi, eo ļōmņak ko an raar wūlio, im eo eaar kōjparok kien ko jān iien eo jaar likūt Jerusalem; im eo eaar juon kein jerbal ilo pein Anij, ilo bōktok kōj ilo āneen kallim̧ur; bwe n̄e eaar jab e, jenaaj kar mej kōn ^akwōle ilo āne jem̧aden; mekarta, kom̧ ar pukot n̄an ^bbōk mour eo an; aaet, im eaar ļap an en̄taan kōn kom̧.

25 Im ikanooj mijak im wūdiddid kōn kom̧, n̄e enaaj bar en̄taan; bwe lo, kom̧ ar ņotaik e ke eaar pukot kajoor im ^amaron̄ ioomi; ak ijeļā bwe eaar jab pukot kajoor im maron̄ ioomi, ak eaar pukot aiboojoj an Anij, im jeraam̧m̧an indeeo eo ami.

26 Im kom̧ ar ellotaan kōnke eaar alikkar n̄an kom̧. Kom̧ij ba bwe eaar kōttuaak; kom̧ij ba bwe eaar ^aillu ippemi; ak lo, an kōttuaak eaar kōttuaak eo an kajoor in naan in Anij, eo eaar ilo e; im men eo kom̧ ar ba illu eaar m̧ool eo, ekkar n̄an men eo ej ilo Anij, eo eaar jab maron̄ dāpiji, kwaļo̧ke ilo kajoor kōn nana ko ami.

27 Im emennin aikuj bwe ^akajoor in Anij eaikuj kar pād ilo e, em̧ool n̄an an maron̄ kar jiron̄ kom̧ bwe kom̧in pokake. Ak lo, eaar jab e, ak eaar ^bJitōbōn Irooj eo eaar ilo e, eo eaar ^ckōpeļļo̧k lo̧n̄iin n̄an kōnono bwe en kar jab maron̄ kiili.

28 Im kiiō ro nejū em̧m̧aan, Leman, im barāinwōt Lemuel im Sam, im barāinwōt ro nejū em̧m̧aan im rej ro nejin Ishmael, lo, n̄e kom̧ naaj eo̧ron̄ ainikien Nipai kom̧ jamin jako. Im n̄e kom̧ naaj eo̧ron̄ e ij likūt n̄an kom̧ juon ^akōjeraam̧m̧an, aaet, em̧ool kōjeraam̧m̧an eo aō m̧oktata.

29 Ak n̄e kom̧ jamin eo̧ron̄ e ij bōkļo̧k kōjeraam̧m̧an eo aō ^am̧oktata, aaet, em̧ool kōjeraam̧m̧an in aō make, im enaaj pād ioon.

30 Im kiiō, Zoram, ij kōnono n̄an kwe: Lo, kwōj ^arikarejeran Leban; mekarta, kar bōktok eok jān āneen Jerusalem, im ijeļā bwe kwōj juon jeran ļeo nejū em̧ool, Nipai, indeeo.

31 Kōn menin, kōnke kwaar niknik ineōm enaaj jeraam̧m̧an ^aippān ineen, bwe rej pād im to aer jeban etto ioon mejān āniin; im ejjeļo̧k, ijello̧kun wōt nana ilubwiljier, naaj kōmetak ak kainepataik bwijjier ioon mejān āniin indeeo.

32 Kōn menin, n̄e kom̧ naaj kōjparok kien ko an Irooj, Irooj enaaj kōjenolo̧k āniin n̄an ineem̧m̧an eo an ineōm ippān ineen ļeo nejū.