1 Pea te u hiva ki hoku ʻofaʻangá ʻaki ʻa e ^ahiva ʻo hoku kaumeʻá, ʻo kau ki heʻene ngoue vainé. ʻOku maʻu ʻe hoku kaumeʻa ʻofá ʻa e ngoue vaine ʻi ha moʻunga kelekele moʻui ʻaupito.

2 Pea naʻá ne ʻaaʻi ia mo fetuku mei ai ʻa e ngaahi maká, peá ne tō ʻi ai ʻa e ^avaine lelei tahá, mo ne langa ha fale leʻo ʻi hono lotolotongá, mo fokotuʻu foki ʻi ai ha tataʻoʻanga uaine; peá ne tatali ke tupu mei ai ʻa e ngaahi kālepi, ka naʻe tupu mai ko e kālepi vao.

3 Pea ko ʻeni, ʻe kakai ʻo Selūsalema, mo e kau tangata ʻo Siutá, ʻoku ou kole ke mou fakamaau ʻiate au pea mo ʻeku ngoue vainé.

4 Ko e hā mo ha meʻa kuo lava nai ke mei fai ki heʻeku ngoue vainé ʻa ia ʻoku teʻeki ke u fai ki ai? Kā ʻi heʻeku tatali ke tupu mei ai ʻa e ngaahi kālepí, naʻe tupu mai ia ko e kālepi vao?

5 Pea ko ʻeni fanongo; kau fakahā kiate kimoutolu ʻa ia te u fai ki heʻeku ngoue vainé—te u ^atoʻo mei ai ʻa hono ʻaá, pea ʻe keina ia ʻo ʻosi; pea te u holoki ʻa hono ʻaá, pea ʻe molomoloki hifo ia;

6 Pea te u fakaʻauha ia; ʻe ʻikai ʻauhani pe ngoueʻi ia; kā ʻe tupu ai ʻa e ngaahi ʻakau ^atalatala mo e talatalaʻāmoa; pea te u fekau foki ki he ngaahi ʻaó ke ʻoua naʻa nau ^bʻuha ki ai.

7 He ko e ^angoue vaine ʻa e ʻEiki ʻo e Ngaahi Kau Taú ʻa e fale ʻo ʻIsilelí, pea ko e kau tangata ʻo Siutá ʻa ʻene ngaahi ʻakau leleí; pea naʻá ne ʻamanaki ki he ^bfakamaau totonu, kae vakai, ko e fakamālohi; ki he māʻoniʻoní, kae vakai ko e tangi.

8 Malaʻia ʻa kinautolu ʻoku nau fakahoko ʻa e ^afale ki he fale, kae ʻoua kuo ʻikai toe ha potu, ʻo tuku ^btoko taha pē ʻa kinautolu ʻi he lotolotonga ʻo e fonuá.

9 Naʻe folofola ʻa e ʻEiki ʻo e Ngaahi Kau Taú, ʻi hoku telingá, ko e moʻoni ʻe lala ʻa e ngaahi fale lahi, pea ʻi ha ngaahi kolo lalahi mo matamataleleí ʻe ʻikai ha kakai.

10 ʻIo, ko e ʻeka ʻe hongofulu ʻo e ngoue vainé ʻe maʻu mei ai ʻa e ^apate pē ʻe taha, pea ʻe tupu mei he homa ʻe taha ʻo e tengaʻi ʻakaú ʻa e ʻefa pē ʻe taha.

11 ʻE malaʻia ʻa kinautolu ko ia ʻoku tuʻu hengihengi hake, ke ^akumi ki he kava mālohí, pea fai atu ʻo aʻu ki he poó, kae ʻoua kuo nau konā ʻi he ^buainé!

12 Pea ʻoku nau ʻomi ʻenau haʻapé, mo e violá, mo e timipalé mo e fulutá, mo e uainé ki heʻenau ngaahi kātoangá; ka ʻoku ʻikai te nau ^atokanga ki he ngāue ʻa e ʻEikí, pe fakakaukau ki he ngāue ʻa hono toʻukupú.

13 Ko ia, kuo ʻalu ai ʻa hoku kakaí ki he pōpula, koeʻuhí he ʻoku ʻikai te nau maʻu ʻa e ^aʻilo; pea kuo mate ʻi he fiekaia ʻa honau kau tangata ongoongoá, pea kuo mate ʻi he fieinua ʻa honau tokolahi.

14 Ko ia, kuo teuteu ʻa heli ke maʻu ha kakai tokolahi ange; pea ko honau nāunaú, mo honau tokolahí, mo ʻenau laukaú, pea mo ia ʻoku fiefiá, ʻe ʻalu hifo ki ai.

15 Pea ʻe ʻohifo ki lalo ʻa e tangata lāuvalé, pea ʻe fakavaivaiʻi mo e tangata mālohí, pea ko e fofonga ʻo e fie māʻolungá ʻe fakavaivaiʻi ia.

16 Kā ʻe hakeakiʻi ʻa e ʻEiki ʻo e Ngaahi Kau Taú koeʻuhi ko ʻene ^afakamāú, pea ko e ʻOtua ʻa ia ʻoku māʻoniʻoní ʻe fakahaohaoaʻi ia koeʻuhi ko ʻene māʻoniʻoní.

17 Pea ʻe toki kai ʻa e fanga lami ʻo hangē ko ia kuo nau anga ki aí, pea ʻe kai ʻe he kakai mulí ʻa e ngaahi potu lala ʻo e kakai koloaʻiá.

18 Malaʻia ʻa kinautolu ʻoku tohoakiʻi mai ʻa e angahalá ʻaki ʻa e ngaahi afo ʻo e ^afielahí, mo e angahalá ʻo ^bhangē ko ha maea tohó.

19 ʻA kinautolu ʻoku pehē: Tuku ke ne ^afai vave, fakatoʻotoʻo ʻa ʻene ngāué, koeʻuhi ke tau ^bmamata ki ai; pea tuku ʻa e ngaahi fakamaau ʻa e Tokotaha Māʻoniʻoni ʻo ʻIsilelí ke ʻunuʻunu mai, pea haʻu, koeʻuhi ke tau ʻiloʻi ia.

20 Malaʻia ʻa kinautolu ʻoku ^aui ʻa e koví ko e leleí, mo e leleí ko e kovi, mo pehē ko e ^bpoʻuli ʻa e māmá, mo e māmá ko e poʻuli, mo fokotuʻu ʻa e koná ko e melie, mo e melié ko e kona!

21 Malaʻia ʻa kinautolu ʻoku nau ^apoto ʻi honau mata ʻonautolú mo nau fakapotopoto ʻi honau mata ʻonautolú.

22 Malaʻia ʻa kinautolu ʻoku fai mālohi ʻi he inu uainé, mo e kau tangata mālohi ʻoku nau felīngiaki ʻa e kava mālohí;

23 ʻA kinautolu ʻoku fakatonuhiaʻi ʻa e angahalá koeʻuhi ko e totongí, mo ^atoʻo atu ʻa e māʻoniʻoni ʻa e māʻoniʻoní meiate ia!

24 Ko ia, hangē ʻoku keina ʻe he ^aafí ʻa e ^bmohuku mōmoá, pea tutu ʻo ʻosi ʻe he ulo ʻo e afí ʻa e ^ckafukafú, ʻe popo ʻa honau aká, pea ʻe mōmoa ʻo puna hake ʻa honau fisí ʻo hangē ko e efu; koeʻuhi kuo nau liʻaki ʻa e fono ʻa e ʻEiki ʻo e Ngaahi Kau Taú, mo nau ^dfehiʻa ki he folofola ʻa e Tokotaha Māʻoniʻoni ʻo ʻIsilelí.

25 Ko ia, kuo tupu hake ʻa e ^ahouhau ʻo e ʻEikí ki hono kakaí, pea mafao atu ʻa hono toʻukupú ke tauteaʻi ʻa kinautolu, pea kuó ne taaʻi ʻa kinautolu; pea tetetete ʻa e ngaahi moʻungá, pea haehae ʻa honau ngaahi sino maté ʻi he lotolotonga ʻo e ngaahi halá. Neongo ʻeni kotoa ʻoku teʻeki lolou hono houhaú, ka ʻoku kei mafao atu hono toʻukupú.

26 Pea te ne hiki hake ha ^afuka ki he ngaahi puleʻanga mei he mamaʻó, pea te ne ^bsisī kiate kinautolu mei he ngataʻanga ʻo māmaní; pea vakai, te nau haʻu ^cvave mo fakatoʻotoʻo; ʻe ʻikai hela pe humu ha taha ʻiate kinautolu.

27 ʻE ʻikai ha taha ʻiate kinautolu ʻe tulemohe pe mohe; pea ʻe ʻikai vete ʻa e nonoʻo ʻo honau kongalotó, pea ʻe motuhi ʻa e nonoʻo ʻo honau topuvaʻé;

28 ʻE māsila ʻa ʻenau ngaahi ngahaú, pea ʻe fusi ʻa ʻenau ngaahi kaufana kotoa pē, pea ʻe fefeka ʻa e pesipesi ʻo ʻenau fanga hōsí ʻo tatau mo e maka-afi, pea ʻe teka ʻa ʻenau ngaahi veʻe teká ʻo tatau mo ha ʻahiohio, ko ʻenau ngungulú ʻo hangē ha laioné.

29 Te nau ngungulu ʻo hangē ko ha fanga ^alaione mui; ʻio, te nau ngungulu, pea puke ʻa e meʻa kuo poó, pea ʻave ʻa ia kuo nau poó ki ha potu ʻoku haó, ʻa ia ʻe ʻikai ha tokotaha ʻe faʻa fakahaofi ia mei ai.

30 Pea ʻi he ʻaho ko iá te nau ngungulu kiate kinautolu ʻo hangē ko e ʻuʻulu ʻa e tahí; pea kapau te nau sio ki he fonuá, vakai, ko e fakapoʻuli mo e mamahi, pea ʻe fakapoʻuli ʻa e maama ʻi he ngaahi langí.