1 Kunantaq qankuna yachanaykichista munayman, taytay Lehi ch’awchunkunamanta unanchayta tukuqtin, yapamanta payman Wiraqocha khaynata nisqanta: Manan allinchu qan, Lehi, sapan ayllullaykita purunman apasqayki, ichaqa churiykikunaqa sipaskunatan warminkupaq hap’inanku, prometisqa hallp’api ch’awchuta Wiraqochapaq hatarichinankupaq, nispa.

2 Hinataq, payta Wiraqocha kamachirqan, noqa Nephi, wawqeykunapiwan yapamanta Jerusalen hallp’aman kutinaykupaq, Ismaelta aylluntawan purunman apamunaykupaq.

3 Chhaynataq, noqa Nephi, wawqeykunapiwan yapamanta purunpi purirqayku Jerusalenman rinaykupaq.

4 Ismaelpa wasinmantaq rirqayku, paytaq sumaq sonqoyoq chashkiwarqanku, chayraykutaq Wiraqochaq rimayninkunata payman willarqayku.

5 Wiraqochataq Ismaelpa sonqonta ayllunpatawan llanp’uyachirqan, noqaykuwantaq purunman hamurqanku taytaykuq karpanman.

6 Purunpi purishanaykukamataq, Laman, Lemuel, Ismaelpa ususinkunamanta ishkay, Ismaelpa ishkaynin churinkuna ayllunkunapiwan noqayku kontra ankallikurqanku; ari, noqa Nephi, Sam, taytanku Ismael warminpiwan, wakin kinsa ususinkuna kontrapiwan ankallikurqanku.

7 Hinataq chay ankallikuypi, Jerusalen hallp’aman kutiripuyta munarqanku.

8 Kunantaq noqa Nephi, rumi sonqo kasqankurayku llakikuspay, paykunata (Lamanta Lemueltawan) nirqani: Kurak wawqeykunan kankichis, hinari imaynataq rumi sonqoyoq, ñawsa yuyayniyoq imari kankichis, noqa sullk’a wawqeykichis qankunaman rimanaypaq nesitaspaykichis; ari, qankunaman allin ñanta qhawachinaypaq?

9 Imaynataq mana Wiraqochaq rimayninta uyarirqankichischu?

10 Imaynatan qonqarqankichis Wiraqochaq huk kachanta rikusqaykichistari?

11 Ari, imaynatataq qonqarqankichis noqanchispaq hatun imaymanakunata Wiraqochaq ruwasqanta, Labanpa makinmanta qespichiwasqanchista, qelqakunata tarinanchispaq ruwasqantawanri?

12 Ari, imaynatataq qonqarqankichis kay llapan imaymanakunata, runakunaq wawankunapaq munayninman hina Wiraqochaq ruway atisqanta, Paypi iñiyniyoq kankuman chayri? Chhaynaqa hakuyá iñiysapa kasun.

13 Paypi iñiysapa kasun chayqa, prometisqa hallp’atan chashkisun; hamuq pachapitaq yachankichis Jerusalen thuñisqa kananmanta Wiraqochaq rimaynin hunt’akusqanta. Jerusalen thuñikunanmanta Wiraqochaq llapan rimasqan imaymanakunaqa hunt’akunanmi.

14 Wiraqochaq Nunanqa usqhayllan paykunawan churanakuyta qollunqa. Alqocharqankun unanchaqkunata, watana wasimantaq Jeremiasta churarqanku; taytaypa kawsayninta qechuyta munarqanku, hinaspataq chay hallp’amanta payta qarqorqanku.

15 Kunantaq qankunata nisaykichis, Jerusalenman kutinkichis chayqa, paykunawanmi wañunkichis. Munaspaykichisqa chay hallp’aman riychis, yuyariychistaq rimasqay simikunata; rinkichis chayqa, qankunapas wañunkichismi. Khayna rimanaypaqmi Wiraqochaq Nunan niwan, nispa.

16 Hinataq noqa Nephi, kay simikunata wawqeykunaman rimareqtiy, noqawan phiñarikurqanku. Hinaspataq nishu phiñarisqa kaspanku hap’iwarqanku, washkhakunawan watawaspankutaq wañuchiwayta munarqanku, purunpi salqa uywakunaq mikhusqan kanaypaq saqewanankupaq.

17 Ichaqa Wiraqochaman khaynata rimarikurqani: Wiraqocha, qanpi iñiyniy kasqanman hina, wawqeykunaq makinkunamanta qespichiykuway, ari, kallpata qoykuway kay chaqnakunata t’ipinaypaq, nispa.

18 Kayta rimareqtiytaq, makiymanta chakiymantawan waskhakuna pashkarikurqan, wawqeykunaq ñawpaqenkupi sayarispataq yapamanta paykunata rimarirqani.

19 Chhaynataq yapamanta noqawan phiñarikuspanku hap’iwayta munarqanku; ichaqa, Ismaelpa huknin kaq ususin, mamanpas, Ismaelpa hukninkaq churinpas, wawqeykunata nishutapuni mañakurqanku, hinataq wawqeykunaq sonqonku llanp’uyarqan; sipiway atipakuytataq qollurqanku.

20 Hinataq, millay ruwayninkumanta anchatapuni llakikurqanku, ñawpaqeypi k’umurikuspankutaq, noqa kontra ruwasqankumanta panpachanaypaq nishutapuni mañakuwarqanku.

21 Hinaspataq allin sonqowan paykunata llapa ruwawasqankumanta panpacharqani, Wiraqocha Yayankuman panpachayrayku rimarikunankupaqtaq paykunata anyarqani. Khaynatataq paykuna ruwarqanku. Wiraqochaman rimarikuyta tukusqanku qhepamantaq, yapamanta taytaykuq karpanneqman purirqayku.

22 Hinataq taytaykuq karpanman hamurqayku. Noqa, wawqeykuna, Ismaelpa ayllunpiwan, taytaypa karpanman chayamusqayku patamantaq, anchatapuni añaychakurqanku Wiraqocha Yayankuman, arpayta, ruphasqa munachiytawantaq Wiraqochaman munachirqanku.