Scriptures
uq kaq Nefi 17


17 T’aqa

Irreantum utaq askha unukuna. Nephiman Wiraqocha kamachin huk wanputa ruwananpaq. Wawqenkuna pay kontra kanku, tutayachisqataq karqanku.

1 Hinataq, yapamanta purunpi puriyta qallarispayku, chay pachamanta ñawpaqman intiq lloqsimunanneqman hina purirqayku. Purirqaykutaq, askha ñak’ariykunatataq purunpi atiparqayku, warmiykutaq purunpi wachakurqanku.

2 Wiraqochaq saminchayninkuna noqaykupaq ancha hatun kaqtintaq, purunpi hanku aychawan kawsarqayku chaypas, askha ñukñuyoq wawankupaq warmiyku karqan, kallpasapataq karqanku, ari, qharikuna hina; mana rimapakuspataq puriyninkuta awantayta qallarirqanku.

3 Chhaynaqa, rikunchismi Yayaq kamachiyninkuna hunt’akunanta. Runakunaq wawankuna Yayaq kamachiyniykunata waqaychanqaku chayqa, Paymi paykunata mikhuchin, kallpachan, kamachisqankunata hunt’ayta atinankupaqtaq ñanta allichan; chhaynaqa, nesitasqaykutan Wiraqocha qowarqanku purunpi kanaykukama.

4 Askha watakuna chaypi karqayku, ari, pusaq watan purunpi karqayku.

5 Askha ruruyoq, askha lachiwayoqpiwan kaqtin Waleq nispa sutichasqayku hallp’amantaq chayamurqayku; kay imaymanakunataq mana wañunaykupaq Wiraqochaq allichasqan karqan. Mamaqochatataq rikurqayku, Irreantum nispataq suticharqayku, t’ikrasqa kaspataq askha unukuna ninanta nin.

6 Hinataq mamaqocha patapi karpaykuta hatarichirqayku, askha ñak’ariytaña, sasa imaymanakunata imaña pasarqayku chaypas—ari, ancha askhata, manataq llapantachu qelqayta atiykuman—anchatan kusikurqayku mamaqocha pataman chayamuqtiyku; Waleq nispataq chay hallp’ata suticharqayku, askha ruruyoq kasqanrayku.

7 Hinataq, Waleq hallp’api askha p’unchawkuna kasqay pataman, noqa Nephiman Wiraqochaq arun chayamuwarqan: Hatariy, orqoman wichay, nispa. Hatarispataq orqoman wicharqani, Wiraqochatataq waqyakurqani.

8 Hinaspataq, khaynata Wiraqochataq rimariwarqan: Huk wanputa ruwanki qhawachisqayman hina, llaqtaykita kay unukunata chinpachinaypaq, nispa.

9 Noqataq nirqani: Maytan risaq Wiraqocha, qhawachiwasqaykita hina wanpu ruwanaypaq ruwanakunata ruwanaypaq mineralkunata tarispa chulluchinaypaq? nispa.

10 Hinaspataq Wiraqocha niwarqan, ruwanakunata ruwanaypaq mineral tarinaypaq mayman rinayta.

11 Hinaspataq noqa Nephi, uywakunaq qaranmanta phukunakunata ruwarqani sansata phukunaypaq; nina phukunaypaq phukunakunata ruwasqay patamantaq, ishkay rumikunata takarqani nina horqonaypaq.

12 Kunankamaqa manan Wiraqocha kachariwarqankuchu purunpi purinaykukama askha ninayoq kanaykupaq. Kaytan Pay nirqan: Misk’iyachisaqmi mikhunaykichista, mana wayk’unaykichispaq;

13 K’anchayniykichispiwantaqmi purunpi kasaq, ñantataq allchasaq ñawpaqeykichispi, kamachiyniykunata waqaychankichis chayqa; chhaynaqa, kamachiyniykunata waqaychankichis chayqa, pusasqan kankichis prometisqa hallp’aman; yachankichistaqmi noqaq pusasqan kasqaykichista, nispa.

14 Ari, nillarqantaqmi Wiraqocha: Prometisqa hallp’aman chayasqaykichis patamantaq qankuna yachankichis noqa Wiraqocha Yaya kasqayta; noqa Wiraqocha qankunata wañuymanta qespichisqayta; ari, Jerusalen hallp’amanta qankunata horqomusqayta, nispa.

15 Chayraykun noqa Nephi, Wiraqochaq kamachiyninkunata waqaychanaypaq kallpachakurqani; wawqeykunatataq anyarqani, iñiysapa, k’uchiy-k’uchi ima kanankupaq.

16 Hinataq, rumikunamanta chulluchisqay mineralkunamanta ruwanakunata ruwarqani.

17 Wanputa ruwanaypaq hinaña kasqayta rikuspankutaq noqa kontra rimapakuyta wawqeykuna qallarirqanku: Waq’an wawqenchis, wanpu ruway atinanpaqmi yuyayukun, ari, yuyayukullantaqmi kay hatun unukunata chinpay atinanpaq, nispa.

18 Khaynatan wawqeykuna noqa kontra rimarqanku, manataq llank’ayta munarqankuchu, wanpu ruwayta mana atinayta yuyayukuspanku; manataqmi kreyirqankuchu Wiraqochaq kamachisqan kasqayta.

19 Kunantaq noqa Nephi anchatapuni llakikurqani rumi sonqonkurayku; llakikusqayta rikuspankutaq sonqonku ukhupi kusikurqanku; noqamanta khaynata nispa anchatapuni kusikurqanku: Yacharqaykun wanpu ruwayta mana atisqaykita, yacharqallaykutaqmi mana allin yuyayniyoq kasqaykita; chhaynaqa, manan atiwaqchu chay hatun llank’ay ruwayta.

20 Taytanchis hinataq kanki, sonqonpa waq’a yuyayninkunaq apasqan; ari, Jerusalen hallp’amantan pay pusamuwarqanchis, kay askha watakunataq purunpi puripakurqanchis; warminchiskunataq llank’arqanku wiksayoqña karqanku chaypas, purunpitaq wawakunata wachakurqanku imaymanakunata ñak’arispanku, wañuyllatataq mana. Aswan allinmi kanman karqan paykunapaq wañupuy Jerusalen hallp’amanta manaraq lloqsimushaqtinku, kay ñak’ariykunata llakinankumantaqa.

21 Kay askha watakunan purunpi ñak’arirqanchis, kay llapan watakunapitaq kapuwaqninchiskunamanta, chashkikuyninchis hallp’amantawan ancha kusikuyniyoq kaswan karqan; ari ancha kusisqataqmi kaswan karqan.

22 Yachaykutaqmi Jerusalen hallp’api kaq runakuna chanin runakuna kasqankuta; waqaycharqankun Wiraqochaq yuyaqankunata, taripayninkunata, llapan kamachiyninkunatawan, Moisespa kamachisqa-siminman hina; chhaynaqa, yachaykun chanin runanakuna kasqankuta. Taytanchistaq paykunata tariparqan, noqanchistataq pusamuwarqanchis rimayninkunata uyarisqanchisrayku, ari, wawqenchistaq pay hina, nispa. Kay hina rimaykunawanmi wawqeykuna noqayku kontra rimapakurqanku.

23 Noqa Nephitaq khaynata paykunata rimarqani: Kreyinkichischu Israelpa wawankunamanta kaq taytanchiskuna egipsiokunaq makinkumanta horqosqa kanankuta, Wiraqochaq rimayninkunata mana uyarinkumanchu karqan chayri?

24 Ari, yuyayukunkichischu hark’asqa kasqankumanta horqosqa kanankuta, hark’asqa kasqankumanta paykunata horqomunanpaq Moisesta Wiraqocha mana kamachinmanchu karqan chayri?

25 Yachankichismi Israelpa wawankuna hark’asqa kasqankuta, yachankichistaqmi ancha sasa ruwana ruwanakunawan q’epipasqa kasqankuta; chhaynaqa, yachankichismi hark’asqa kasqankumanta lloqsimusqanku ancha sumaq paykunapaq kasqanta.

26 Yachankichismi chay hatun ruway ruwananpaq Wiraqochaq kamachisqan Moises kasqanta; yachankichistaqmi, Puka Mamaqochaq ununkuna rimayninman hina kayman haqayman t’aqakusqanta, ch’aki hallp’antataq paykuna chinparqanku.

27 Yachankichismi Puka Mamaqochapi egipsiokuna wañusqankuta, paykunataq Faraonpa awqasuyunkuna karqanku.

28 Yachallankichistaqmi Israelpa wawankuna maná sutiyoq mikhunawan purunpi mikhuchisqa kasqankuta.

29 Ari, yachallankichistaqmi paypi kasqan Yayaq atiyninman hina, rumita rimayninwan Moises k’irisqanta, unutaq lloqsimurqan, ch’akiyninkuta Israelpa wawankuna thañichinankupaq.

30 Pusasqaña karqanku chaypas, Wiraqocha Yayanku, Kutichikapuqninku paykunaq ñawpaqenkuta rispa, paykunata p’unchawpi pusaspa, tutanpitaq paykunaman k’anchayta qospa, runaq chaskiy nesitasqan llapan imaymanakunata paykunapaq ruwarqan chaypas rumiyachirqankun sonqonkuta, ñawsayachirqankutaq yuyayninkuta, kutipakurqankutaq Moises kontra, kawsaq cheqaq Yayanku kontrapiwan.

31 Hinataq rimayninman hina paykunata Yaya wañuchirqan, rimayninman hinataq paykunata pusarqan, rimayninman hinataq imaymanakunata paykunapaq ruwarqan, manataq imapas ruwasqan karqanchu, ichaqa rimaynillanwan.

32 Jordan mayuta chinpasqanku patamantaq, kallpasapata paykunata ruwarqan, chay hallp’aq runankunata qarqonanpaq; wañunankukama ch’eqerichinanpaq.

33 Kunanri yuyayukunkichischu chay hallp’aq wawankuna, taytanchiskunaq qarqosqan, prometisqa hallp’api kaqkuna, yuyayukunkichischu chanin paykuna kasqankuta? Manan niykichismi.

34 Yuyayukunkichischu taytanchiskuna aswan akllasqa kanankuta, chay runakuna chanin kankuman karqan chayri? Manan nisaykichismi.

35 Kaqllatan llapa runakunata Wiraqocha munakun; chanin kaqqa Yayaq yanapasqanmi. Ichaqa, kay llaqtaqa Yayaq sapanka rimaynintan alqochasqaku karqan, millay ruwaypi poqosqataq karqanku; Yayaq phiñakuyninpa hunt’aynintaq paykunapi karqan. Wiraqochataq chay hallp’ata paykuna kontra ñakarqan, taytanchiskunapaqtaq samincharqan; ari, paykuna kontran ñakarqan qollochisqa kanankupaq, taytanchiskunapaqtaq samincharqan, chay hallp’api atiyniyoq kanankupaq.

36 Runakuna tiyanankupaq kay pachata Wiraqocha kamarqan, kay hallp’ata hap’inankupaqtaq wawankunata kamarqan.

37 Chanin llaqtatataq Pay hatarichin, huchasapakunaq llaqtankunatataq chinkachin.

38 Ancha sumaq hallp’akunamantaq chanin kaqkunata pusan, millay ruwaqkunatataq qolluchin, paykunapaqtaq hallp’ata ñakan paykunarayku.

39 Hanan hanaqpachapin Pay kamachin, chaytaqmi tiyanan, kay pachataq chakinkunaq sarunan.

40 Yayankupaq Payta kachiqkunatataq munakun. Munakurqanmi taytanchiskunata, paykunawantaq rimanakurqan; ari, Abrahanwan, Isaakwan, Jakobwan ima; yuyarirqantaqmi ruwasqan rimanakuyninkunata, chayraykun Egipto hallp’amanta paykunata horqomurqan.

41 K’aspinwanmi paykunata purunpi pusarqan; qankuna hinan paykunapas sonqonkuta rumiyachirqanku, millay ruwayninkuraykutaq paykunata Wiraqocha muchuchirqan. Nina hina phawaq mach’aqwaykunata paykunaman kachamurqan, muk’usqa kasqanku patamantaq, hanpisqa kanankupaq ñanta allicharqan; llapa ruwanankutaq qhawananku karqan; mana ancha sasa kay kaqtin, ruwanalla kaqtinpiwantaq askha paykunamanta wañurqanku.

42 Mayninpitaq sonqonkuta rumiyachirqanku, millaytataq rimarqanku Moises kontra, Yaya kontrapiwan; chaypiwanpas yachankichismi mana imawanpas tupachina atiyninwan prometisqa hallp’aman pusasqa kasqankuta.

43 Kunantaq kay llapan imaymanakuna pataman, millay-ruwaqman tukupuspanku pacha chayamun, ari, yaqa poqosqa kanankukamaña; manataqmi yachanichu ichapas kunan p’unchaw qolluchisqa kanankupaq hinaña kasqankuta; yachanin qolluchisqa kanankupaq cheqaqtapuni p’unchaw chayamunanta, huk chikallantaq mana, hark’asqa apasqataq paykuna kanqaku.

44 Chayraykun taytayta Wiraqocha kamachirqan purunman lloqsimunanpaq; judiokunapas payta sipiyta mashkarqanku; ari, qankunapas payta wañuchiyta munarqankichis; chhaynaqa runa wañucheqmi sonqoykichispi kankichis, paykuna hinataq kankichis.

45 K’uchin kankichis millaykaqta imaymanakuna ruwaypaq, qellataq kankichis Wiraqocha Yayaykichis uyariypi. Rikurqankichismi huk angelta, rimarirqasunkichistaqmi, ari, mayninpitaq arunta uyarirqankichis, Paytaq rimarirqasunkichis llanp’u huch’uy aruwan, mana uyariypaq hinaña kaqtiykichistaq rimayninkunata mana uyariyta atirqankichischu; chayraykutaq qhaqyaq kunkanwan hina rimarqasunkichis, chaytaq kay pachata chhapchirqan ch’eqtakunanpaq hinañapas kanman hina.

46 Yachankichistaqmi tukuy kallpayoq rimariynin kay pachata chinkachiyta atinanta; ari, yachankichismi rimayninwan wank’a-wank’a hallp’akunata panpaman tukuchinanta, panpakunatataq p’akichisqa kananta. Chhaynari, imaqtinmi chhayna rumi sonqoyoq kankichis?

47 Qankunaraykun nunay p’akillikun, nanantaqmi sonqoy; wiñaypaq qarqosqa kanaykichismanta manchakuni. Yayaq Nunanwan hunt’an kashani, chayraykutaq runa-kurkuy mana kallpayoqchu, nispa.

48 Hinataq, kunan kaykunata rimareqtiy noqawan phiñarikurqanku, mamaqochaq ukhunkunamantaq choqaykuwayta munarqanku. Hap’iwanankupaq noqaman hina hamuqtinkutaq paykunata nirqani: Llapa atiyniyoq Yayaq sutinpi kamachiykichis ama llamiwanaykichispaq, Yayaq atiyninwan hunt’an kashani aychaypa ruphayninkamaraq; noqa llamiwaqtaq ch’aki soqos hina ch’akinqa; mana ima hinataq Yayaq ñawpaqenpi kanqa, Yayan payta k’irinqa, nispa.

49 Noqa Nephitaq paykunata nirqani amaña astawan taytanku kontra rimapakunankupaq, yanapawayta mana mananchakuwanankupaqwan; Yayataq wanpu ruwanaypaq kamachiwarqan chayqa.

50 Paykunatataq nirqani: Llapan imaymanakuna ruwanaypaq Yaya kamachiwanman chayqa, atiymanmi chaykuna ruwayta. Kay unukunata—hallp’aman wakiy nispa ninaypaq Pay kamachiwanman chayqa, hallp’an kanman; kayta niyman chayqa, chhayna ruwasqan kanman.

51 Kunanri, chhayna atiyniyoqtaq Wiraqocha, askha utina ruwaykunatataq runakunaq wawankunaq chawpinpi ruwarqan chayri, imaqtintaq mana yachachiwanmanchu huk wanpu ruwaytari?, nispa.

52 Hinaspataq noqa Nephi askha imaymanakunata wawqeykunaman nirqani, tutayachisqa kaspankutaq mana noqa kontra rimayta atirqankuchu p’unchawkuna; manataq hap’iwayta qhariykacharqankuchu, ni ruk’anankuwan llamiwaytapas askha p’unchawkuna. Manan kay ruwayta qhariykacharqankuchu, ñawpaqeypi ch’akiyta manchakuspanku. Chhayna atiyniyoqmi Yayaq Nunan karqan, chay hinataq paykunawan ruwasqa karqan.

53 Hinaspataq Wiraqocha niwarqan: Yapamanta makiykita wawqeykikunaman chutariy, manan ñawpaqeykipi ch’akinqakuchu, ichaqa, paykunatan chhapchiykachasaq, nispan Wiraqocha nin; kaytataq ruwasaq Wiraqocha Yayanku kasqayta yachanankupaq, nispa.

54 Hinataq makiyta wawqeykunaman chutarirqani, manataq ñawpaqeypi ch’akirqankuchu, ichaqa, rimayninman hinan paykunata Wiraqocha chhapchikacharqan.

55 Paykunataq nirqanku: Cheqaqtan yachayku qanwan Wiraqocha kasqanta, yachaykun Wiraqochaq atiynin chhapchiwasqankuta, nispa. Ñawpaqeypitaq urmarqanku, noqa yupaychawanankupaq hinañataq kasharqanku, ichaqa manan noqa kacharirqanichu: Wawqellaykichismi kani, ari, sullk’a wawqeykichis; chhaynaqa, Wiraqocha Yayaykichista yupaychaychis, tayta-mamaykichistataq hatunchaychis, Wiraqocha Yayaykichis qonasuykichis hallp’api p’unchawniykichis hatunyananpaq, nispa.