Scriptures
uq kaq Nefi 1
Footnotes
Theme

Nephiq Ñawpaqkaq Qelqan

Kamachiynin Yachachiynin Ima

Lehiq, warmin Sariahq, tawa churinkunaq (kurakmanta qallarispa) Lamanpa, Lemuelpa, Sampa, Nephiqpiwan willayninku. Lehiman Wiraqocha willan Jerusalen llaqtamanta lloqsinanpaq. Millay ruwayninkurayku kay llaqtaman Lehi unanchan, hinaspataq payta wañuchiyta munanku. Kinsa p’unchaw purunpi aylluntin purin. Nephi wawqenkunapiwan Jerusalen hallp’aman kutinku, judiokunaq qelqankunarayku. Ñak’ariyninkuq willaynin. Ismaelpa ususinkunawan sawakunku. Ayllunkuta apayukuspanku purunman lloqsinku. Purunpi muchuyninku ñak’ariyninku im. Purisqanku ñan. Hatun unukunaman chayanku. Nephiq wawqenkuna pay kontra hatarinku. Paykunata upayachin, huk wanputataq ruwan. Chay hallp’ata Waleq nispa sutichanku. Hatun unukunata chinpanku prometisqa hallp’aman. Nephiq willasqanman hinan kay, hukniraq rimaypiqa, noqa Nephin kay willayta qelqarqani.

1 T’aqa

Ninamanta saywata unanchayoq qelqatawan Lehi rikun. Jerusalen llaqtaq usqhay tukukuyninmanta Hawisqa hamunanmantapas rimasqan. Judiokuna payta wañuchiyta munanku.

1 Noqa Nephi, allin tayta-mamamanta paqarisqa kaspa, taytaypa llapan yachayninpi chikallantapas yachachisqa karqani; kawsayniypa puriyninpi askha muchuykunata rikuspapas, llapan p’unchawniykunan Wiraqochaq yanapasqan karqani; ari, Yayaq sumaq-sonqo kayninmanta pakasqa imankunamantawan ancha hatun yachayniyoq kaspan, p’unchawniykunapi ruwayniykunamanta huk willayta ruwani.

2 Ari, taytaypa rimayninpin qelqani, kaytaq judiokunaq yachayninku egipsiokunaq rimayninkupiwan.

3 Yachanitaqmi ñawpa-kasqanmanta qelqasqay cheqaq kasqanta, kikiy makiywantaq kayta qelqani; kaytataq ruwani yachayniyman hina.

4 Hinaspataq Judaq inkan Sedekiaspa kamachiyninpa ñawpaqkaq watanpi, askha unanchaqkuna chay kikin watapi chayamurqanku, yuyayninkuman kutirimunankupaq runakunaman unanchaspa; mana chayqa, Jerusalen hatun llaqtan thuñikunan nispa. (Taytay Lehitaq llapan p’unchawninkuna Jerusalenpi tiyarqan).

5 Hinaspataq taytay Lehi risqanman hina llaqtanrayku Wiraqochaman tukuy sonqonwan rimarikurqan.

6 Chhaynataq Wiraqochaman rimarikushanankama ñawpaqenpi kaq qaqa patapi nina saywa rikhurimurqan, askhataq uyarisqan rikusqanpas karqan; rikusqanrayku, uyarisqanrayku imataq, anchatapuni manchakurqan khatatatarqan ima.

7 Hinataq Jerusalenpi wasinman kutispa, puñunan pataman wikch’ukurqan, Nunaq, rikusqan imaymanakunaqpiwan atipasqa kaspa.

8 Khaynataq, Nunaq atipasqan kaspa, huk rikuypi apasqa karqan, hanaqpachatataq kichakuqta rikurqan; Yayankuman takispa yupaychaspapiwan kashaqta hina, mana yupay atina kachakunawan muyurisqatataq Yayata tiyananpi tiyashaqta rikusqanpaq yuyarqan.

9 Huknin kaqta hanaqpachamanta urayamuqta rikurqan, kay kachaq k’anchaynintaq chawpi p’unchaw intiq k’anchayninmanta aswan k’anchayniyoq karqan.

10 Huk chunka ishkayniyoqtawanmi payta qatikushaqta rikurqan, k’anchayninkutaq atiparqan hanaqpachapi qoyllurkunaqta.

11 Urayamuspataq pachaq patanta rirqanku; ñawpaqkaqtaq hamuspa taytaypa ñawpaqenpi sayaspa huk qelqata payman qorqan, ñawinchananpaq kamachispa.

12 Hinataq qelqata ñawinchashanankama Wiraqochaq Nunanwan hunt’asqa karqan.

13 Ay! Ay, Jerusalenmanta! Rikurqanin millay-millanaykikunata, nispan pay ñawincharqan. Ari, askha imaymanakunatan Jerusalenmanta taytay ñawincharqan—runakunantin qolluchisqa kananmanta; askha, q’anchinawan wañunankumanta, askhataq Babiloniaman piñaschasqa apasqa kanankumantawan.

14 Hinaspataq, taytay askha ancha sumaq imaymanakunata ñawinchaqtin rikuspan ima, kusikuypi askha imaymanakunata Wiraqochaman khaynata qaparirqan: ancha hatun, ancha sumaqmi ruwayniykikuna, Wiraqocha llapa atiyniyoq Yaya! Hanaqpachaq hanaqninpin tiyanayki; atiyniyki, sumaq-sonqo kayniyki, khuyapakuyniykipiwantaq hallp’aq llapa runankuna patapi; khuyapakuyniyoq kaspaykitaq qanman hamuqkunata mana wañunankuta saqenkichu, nispa.

15 Khaynatan taytay rimarqan Yayanta yupaychaspa, nunantaq anchatapuni kusikurqan. Tukuy sonqontaq hunt’a karqan rikusqan imaymanakunarayku, ari, payman Wiraqocha qhawachisqan imaymanakunarayku.

16 Kunantaq noqa Nephi, mana llapantachu willani taytaypa qelqasqankunamanta. Ashkha imaymanakunatan qelqarqan, rikuypi mosqokuypiwan rikusqanmanta; askha imaymanakunatawantaq qelqarqan churinkunaman unanchasqanta, rimasqantawan, manataq llapantachu kaykunamanta rimasaq.

17 Ichaqa, p’unchawniykunapi ruwayniykunamantan qelqasaq. Hinaqa, taytaypa qelqankunatan huch’uyyachini, kikiy makiywan ruwasqay raphikunapi; taytaypa qelqankunata huch’uyyachisqay patamantaq kawsayniypa willayninta qelqasaq.

18 Chay hinaqa, yachanaykichistan munani taytay Lehiman chhaytukuy ancha sumaqkunata Jerusalenpa thuñikuyninmanta Wiraqocha rikuchisqan pataman runakuna chawpiman rispa, uyarisqanmanta, rikusqanmanta ima unanchayta willaytawan qallarirqan.

19 Hinaspataq judiokuna paymanta asikurqanku, paykunamanta sut’inchasqan imaymanakunarayku; cheqaqtapunin rimarqan huchallikuyninkunamanta millay-millay kayninkumantawan; sut’incharqantaqmi rikusqan, uyarisqan, qelqapi ñawinchasqanpiwan ch’uyatapuni Hawisqa hamunanmanta willasqanta, kay pacha kutichikapusqa kananmantawan.

20 Kaykunata uyarispataq judiokunaqa paywan phiñarikurqanku, ari, ñawpa unanchaqkunata qarqosqankuta, rumikunawan chanqaspa sipisqankuta hinan pay wañuchiyta munarqanku. Ichaqa noqa Nephi, qhawachisaykichis Wiraqochaq sumaq khuyapakuynin iñiyninkurayku Pay akllasqan runakunawan kasqanta; paykunata kallpachaspa, qespiypaq kallpayoq kanankukamaraq.