1 Im ālikin men kein, raar kabun̄-jar n̄an Irooj, im raar ilo̧k ippa; im kōm ar jerbal kōn laļ ko im ļamier eaar jej uwaer. Im Irooj eaar kwaļo̧k n̄an eō jān iien n̄an iien jekjek eo ij aikuj jerbale aļaļ kein aļaļ in wa eo.

2 Kiiō n̄a, Nipai, iaar jab ļami aļaļ ko ilo jekjek ko armej rejeļā kaki, iaar barāinwōt jab jek wa eo āinwōt jekjek ko an armej; ak iaar jek wa eo ekkar n̄an wāween eo Irooj eaar kwaļo̧k n̄an eō; kōn menin, eaar jab āinwōt wāween eo an armej.

3 Im n̄a, Nipai, iaar emmakijkijļo̧k n̄an toļ eo, im eaar emmakijkij aō jar n̄an Irooj; kōn menin Irooj eaar kwaļo̧k n̄an eō men ko reļļap.

4 Im ālikin men kein, ke eaar dedeļo̧k aō jek wa eo, ekkar n̄an naan an Irooj, m̧aan ro jeiū raar lo bwe eaar em̧m̧an, im bwe ļam eo an eaar kanooj em̧m̧an, kōn menin, raar bar kōttāik er im̧aan Irooj.

5 Im ālikin men kein, ainikien Irooj eaar itok n̄an jema, bwe kōmij aikuj jerkak im wanlaļļo̧k ilo wa eo.

6 Im ālikin men kein, ilo raan eo ilju, ālikin am kar kōpooj men otemjej, eļap leen wōjke ko im kanniōk jān āne jem̧aden, im hōnni eaar kanooj ļap, im kōbwebweien ko ekkar n̄an men eo Irooj eaar jiron̄ kōm, kōm ar wanlaļļo̧k ilo wa eo, ippān aolep mennin uwe ko am im ine ko am, im jabdewōt men kōm ar bōk ippām, kajjojo ekkar n̄an iiō eo dettan; kōn menin, kōm ar aolep wanlaļļo̧k ilo wa eo, ippān kōrā ro pāleem̧ im ajri ro nejim.

7 Im kiiō, jema eaar keotak ruo nejin ļaddik ilo āne jem̧aden; im eo erūtto etan Jekab im eo edik Josep.

8 Im ālikin men kein, kōm ar wanlaļļo̧k ilo wa eo, im kar bōk ippām kōbwebweien ko im men ko kar jiron̄ kōm, kōm ar jerakļo̧k n̄an lo̧meto im kar uuk m̧aanļo̧k kōm im̧aan kōto n̄an āneen kallim̧ur.

9 Im ālikin kar uuk m̧aanļo̧k kōm im̧aan kōto ium̧win elōn̄ raan, lo, m̧aan ro jeiū im m̧aan ro nejin Ishmael im barāinwōt kōrā ro pāleer raar jino kalimoik er make, jon̄an raar jino eb, im jino al, im jino kōnono naan ko reddo, aaet, em̧ool jon̄an raar meļo̧kļo̧k jān kajoor ta eo eaar bōktok er ijo; aaet, raar kanooj kōnono nana.

10 Im n̄a, Nipai, iaar jino mijak otem mijak n̄e Irooj ab kar illu ippām, im m̧aan kōm kōn am nana, bwe kōmin aikuj kar tūm̧laļļo̧k ilo m̧wilaļ ko in lo̧meto; kōn menin, n̄a, Nipai, iaar jino lukkuun kōnono n̄an er; ak lo raar illu ippa, im ba: Jeban kōtļo̧k bwe ļein jatid en juon irooj iood.

11 Im ālikin men kein, Leman im Lemuel raar bōk eō im lukwōj eō kōn to ko, im raar kōm̧m̧an n̄an eō kōn eļap eddo; kōn menin, Irooj Eaar kōtļo̧k bwe En maron̄ kwaļo̧k kajoor eo An, n̄an kakūrm̧ool An in naan eo eaar kōnono kōn ro renana.

12 Im ālikin men kein, ke em̧ōj aer kar lukwōj eō bwe in jab m̧akūtkūt, kam̧bōj eo, eo kar kōppojak in Irooj, eaar bōjrak an jerbal.

13 Kōn menin, raar jab jeļā ia ren kajebwābweikļo̧k wa eo, kōnke eaar jetak juon lan̄ eļap, aaet, juon lan̄ ekanooj nana, im kar uuklikļo̧k kōm jilu raan ko; im raar jino kanooj lōļn̄o̧n̄ n̄e renaaj kar maļon̄ ilo lo̧jet eo; mekarta raar jab kōtļo̧k eō.

14 Im ilo raan eo kein kāāmen, eo im kar uuklikļo̧k kōm, lan̄ eo eaar jino kanooj nana.

15 Im ālikin men kein, nan̄in kar wōran̄ļo̧k kōm ilo m̧wilaļ ko in lo̧meto. Im ālikin kar uuklikļo̧k kōm ioon dān ko ium̧win emān raan ko, ļōm̧aro jeiū rerūtto raar jino in lo bwe ekajet ko an Anij raar wōtlo̧k ioer, im bwe renaaj aikuj jako ijello̧kun wōt n̄e rej ukeļo̧k jān nana ko aer; kōn menin, raar itok n̄an eō, im kar mejaļļi to ko raar pād ilo pā ko peiū, im lo bwe raar kanooj ebbōj; im barāinwōt ne ko neō raar kanooj ebbōj, im eļap kar metak eo.

16 Mekarta, iaar reilo̧k n̄an aō Anij, im iaar wūjtak E aolepān raan eo; im iaar jab ellotaane Irooj kōn en̄taan ko aō.

17 Kiiō jema, Liai, eaar ba elōn̄ men ko n̄an er, im barāinwōt n̄an ro nejin Ishmael; a lo, raar kōnono naan in kōlōļn̄o̧n̄ ko ņae jabdewōt eo enaaj jepiaō; im ro jema im jinō āinwōt ke raar kanooj en̄taan kōn bwijwoļā, im kōnke raar lo eļap en̄taan im būrom̧ōj kōn ro nejier, raar m̧ōjņo̧, aaet, em̧ool ioon jikin aer babu.

18 Kōn būrom̧ōj eo aerro, im kōn nana eo an ļōm̧aro jeiū, kar bōk laļļo̧k er epaak bōk er jān iien in n̄an iioon aer Anij; aaet, uwan ko aer rekar nan̄in bōklaļļo̧k er n̄an babu ilo būn̄aln̄al; aaet em̧ool raar epaake joļo̧k er ippān būrom̧ōj ilo lōb eo eobrak kōn dān.

19 Im Jekab im Josep barāinwōt, bwe raar inono, raar aikuj ekkutkut naajdik er, raar inepata kōn en̄taan ko an jineer; im barāinwōt kōrā eo pālleō kōn dān in jan̄ ko im jar ko an, im barāinwōt ro nejū, raar jab kapidodoik burueer bwe ļōm̧aro jeiū ren maron̄ jeļat eō.

20 Im eaar ejjeļo̧k jabdewōt ijello̧kun wōt kajoor in Anij eo eaar kōlōļn̄o̧n̄ er kōn ko̧kkure, eo eaar maron̄ kapidodoik burueer; kōn menin, ke raar lo bwe raar nan̄in itōn wōran̄ļo̧k er ilo m̧wilaļ ko in lo̧meto raar ukeļo̧k jān men in raar kōm̧m̧ane, im raar kōtļo̧k eō.

21 Im ālikin men kein, ke em̧ōj aer kar kōtļo̧k eō, lo, iaar bōk kam̧bōj eo, im eaar jerbal ilo jabdewōt wāween iaar kōņaan. Im ālikin men kein, iaar jar n̄an Irooj; im ālikin aō kar jar kōto ko raar bōjrak, im lan̄ eo eaar bōjrak, im eaar wōr juon lur eļap.

22 Im ālikin men kein, n̄a, Nipai, iaar kajebwābweik wa eo, bwe kōmin bar kar jerak n̄an āneen kallim̧ur.

23 Im ālikin men kein, ke kōm kar jerak ium̧win elōn̄ raan ko kōm ar ļāwōdeļo̧k āneen kallim̧ur; im kōm ar toļo̧k ilo āneo, im kōm ar kajutak im̧ōn kōppād ko am; im kōm ar ņa etan āneen kallim̧ur.

24 Im ālikin men kein, kōm ar jino kōpooj bwidej eo, im kōm ar jino kallib ine ko; aaet, kōm ar kalbwin aolep ine ko am ilo bwidej, ko kōm ar būktok jān āneen Jerusalem. Im ālikin men kein, raar kanooj eddek; kōn menin, kōm ar kanooj jeraam̧m̧an.

25 Im ālikin men kein, kōm ar lo ioon āneen kallim̧ur, ke kōm ar tōļon̄e āne jem̧aden, bwe eaar wōr kidu awiia otemjeļo̧k ibukun wōjke ko, kau im ox jim̧or, im donkey eo im o̧o̧j eo, im goat eo im goat awiia eo, im kidu awiia otemjeļo̧k, ko raar n̄an an armej kōjerbali. Im kōm ar lo ore otemjeļo̧k, ko jim̧or jān gold, im ko jān silver, im ko jān kōba.