’O vai au nei ?

Noa atu te fāito o tō ’oe mana’o au ’ore i tō ’oe ’āpeni, ’o te hō’ē noa tuha’a te reira nō tō ’oe orara’a tahuti. Tō ’oe mana’o nō ni’a iho ia ’oe, e riro ïa i te taui haere i te roara’a o te orara’a. ’A ha’amana’o nā mua roa, te faufa’a rahi, e tamari’i ïa ’oe o nā metua i te ra’i. ’A māramarama e aha te aura’a ’ia riro ’ei tāmari’i nā te Atua.

’Ua ha’api’i te tuahine Joy D. Jones :

« E ha’apāpū mai te Vārua ia tātou tāta’itahi i tō tātou hīro’a atua faufa’a. Te ’itera’a mau ē, [e tamāri’i] ’oe nā te Atua, e ’ohipa te reira i ni’a i te mau tuha’a ato’a o tō ’oe orara’a ’e e arata’i te reira ia ’oe i roto i te tāvinira’a tā ’oe e rave i te mau mahana tāta’itahi. Tē fa’ata’a nei te peresideni Spencer W. Kimball nā roto i teie mau parau hanahana :

« ’O te Atua tō ’outou Metua. ’Ua here ’oia ia ’outou. Tē ha’afaufa’a nei ’oia ’e tō ’outou metua vahine i te ra’i ra ia ’outou ma te fāito ’ore… E ti’ara’a ’ōtahi tō ’oe. E mea ta’a ’ē mau ā, hāmanihia i te ’ite mure ’ore ’o tē hōro’a ia ’outou i te tītaura’a i te ora mure ’ore.

« ’Eiaha roa atu e mana’o uiui i roto ia ’outou i ni’a i tō ’outou faufa’a ’ei ta’ata ’otahi. Te ’ōpuara’a rahi o te ’evanelia, ’o te fa’afāna’ora’a ïa ia ’outou tāta’itahi i te rāve’a ’ia tae’ahia tō ’outou fāito pūai hope roa, ’oia ho’i te haerera’a mure ’ore i mua ’ia noa’a te huru Atua’ [« Privileges and Responsibilities of Sisters », Ensign, Novema 1978, 105]…

« ’A amo ai te Fa’aora ia tātou i te vāhi teitei a’e, e ’ite pāpū maita’i ïa tātou ē, ’eiaha noa ’o vai tātou, e ’ite ato’a rā tātou ’ua fātata roa tātou iāna mai tā tātou i ’ore na i ’ite » (« E faufa’a fāito ’ore », Liahona, Novema 2017, 14–15; tātarahia te mau ha’apāpūra’a).