E aha te mana’o o te ’Ēkālesia nō ni’a i te tauira’a i tōna ihota’ata ?

« E parau fa’aa’o te feiā fa’atere o te ’Ēkālesia ’eiaha e mā’iti e rapa’au iāna ’aore rā e tāpū iāna nō te taui i te ’āpeni o tōna fānaura’a (‘tauira’a ’āpeni’). E fa’aara te feiā fa’atere ē, mai te mea e ravehia te reira, e tumu ïa nō te mau ’ōpanira’a ti’ara’a melo ’o te ’Ēkālesia.

« E parau fa’aa’o ato’a te feiā fa’atere ’eiaha e taui i tōna ihota’ata. Te tauira’a i tōna ihota’ata, ’o te tauira’a ïa i te huru ’ahu ’e te fa’anehenehe, ’aore rā te tauira’a i tōna i’oa ’aore rā te mono i’oa, te huru ’oia e parau i te parau nōna, ta’a ’ē atu i tōna ’āpeni fānaura’a. E fa’aara te feiā fa’atere i te ta’ata e taui i tōna ihota’ata ē, e tu’uhia te tahi mau ’ōpanira’a ti’ara’a melo ’o te ’Ēkālesia nō te roara’a ’o taua tauira’a ihota’ata ra.

« I roto i te mau ’ōpanira’a, tē vai nei te fāri’ira’a ’aore rā te fa’a’ohipara’a i te autahu’ara’a, te fāri’ira’a ’e te fa’a’ohipara’a i te parau fa’ati’a nō te hiero, nā reira ato’a te fāri’ira’a i te mau pi’ira’a i roto i te ’Ēkālesia. Noa atu ā e tāpe’ahia te tahi mau maita’i ’o te ti’ara’a melora’a, e fāri’ihia te ’āmuira’a i te tahi atu mau ’ohipa a te ’Ēkālesia.

« Te ta’ata e fa’ahuru ’ē i tōna ’āpeni ’aita rā e rave i te rā’au, ’aita e tāpū iāna ’aore rā ’aita e taui i tōna ihota’ata, ’e e mea ti’amā, e nehenehe tāna e fāri’i i te mau pi’ira’a i roto i te ’Ēkālesia, e fāri’i i te parau fa’ati’a nō te hiero ’e te mau ’ōro’a o te hiero.

« Tē vai ra te mau tamari’i, te feiā ’āpī ’e te feiā pa’ari tei hōro’ahia te ’oromona e te taote nō te tāmarū i te fifi hīro’a ’āpeni ’aore rā te mana’o ’ōnohi. Hou teie ta’ata e ha’amata ai i taua rapa’aura’a ra, e mea faufa’a ’ia māramarama ’oia (nā reira ato’a te mau metua ’o te tamari’i ’aita i ti’a te matahiti) i te mau mea ataata ’e te mau mea maita’i o te reira. Mai te mea e melo ’aita e tāmata ra i te taui i tōna ’āpeni ’e e mea ti’amā ’oia, e nehenehe tāna e fāri’i i te mau pi’ira’a i roto i te ’Ēkālesia, e fāri’i i te parau fa’ati’a nō te hiero ’e te mau ’ōro’a o te hiero.

« Mai te mea e fa’aoti te hō’ē melo ’ia taui i tōna i’oa ’aore rā te mono i’oa, e nehenehe te reira e pāpa’ihia i te vāhi nō te i’oa pi’i i ni’a i te parau melora’a. E nehenehe e pi’i iāna i te reira i’oa i roto i te pāroita » (« Ta’ata hi’o ’ē i tōna ’āpeni », Buka Arata’i : Te tāvinira’a i roto i te ’Ēkālesia a Iesu Mesia i te Feiā Mo’a i te Mau Mahana Hope’a nei, 38.6.21).

’Aita tā te ’Ēkālesia e fa’aotira’a pāpū nō ni’a i te mau tumu te mau ta’ata e hi’o nei ia rātou ’ei ta’ata fa’ahuru ’ē i tō rātou ’āpeni » (Buka arata’i rahi, 38.6.21).