Mai te mea e ha’apa’o maita’i au, e mo’e ānei teie mana’o au ’ore i tō’u ’āpeni ?

E ’ere te ’itera’a i te mana’o au ’ore i tōna ’āpeni i te tahi fāito nō tō ’oe ha’apa’o maita’i. E rave rahi mau ta’ata e pure nei i te mau matahiti e rave rahi ma te fa’aitoito roa i te ha’apa’o i roto i te tauto’ora’a nō te fa’aiti i taua mana’o au ’ore nō rātou ra, ’e tē ’aro noa nei ā rātou i te reira. E ’ere te reira i te ’ohipa mātaro-’ore-hia. E mea ta’a ’ē te fāito pūai o te reira nō te mau ta’ata e rave rahi, ’e e tupu te reira i te mau taime ta’a ’ē nō te hō’ē ta’ata. E tauiui ato’a te tupura’a i ni’a i te mau tāmari’i, te feiā ’āpī ’e te mau mātuatua.

E ’ere paha nā ’oe e mā’iti i te pūai ’e te roa nō te reira ; terā rā, nā ’oe e mā’iti e nāhea ’oe e pāhono atu i te reira. ’Ua fa’a’ite vetahi mau ta’ata ē, e mea tauturu ’ia ha’atumu ana’e i ni’a i te huru te reira e tauturu ia rātou ’ia ’apo i te ha’api’ira’a ’e ’ia tupu i te rahi. Te fa’atū’atira’a i tō tātou hina’aro i ni’a i te hina’aro o te Atua, ’o te hō’ē ïa ’ohipa faufa’a rahi nō te fa’aro’o ’o tē hōpo’i mai i te mau ha’amaita’ira’a rahi i teienei ’e inaha e rahi atu ā te mau ha’amaita’ira’a i roto i te ao a muri atu (hi’o Te Parau Ha’api’ira’a ’e te mau Parau Fafau 59:23).