Mataupu 20

Faauo ma i Latou e Le o Ni Tagata o lo Tatou Faatuatuaga

“Ia tatou aapa atu e fesoasoani i alii ma tamaitai amiolelei po o a lava eseesega o a latou tapuaiga ma po o fea foi latou te nonofo ai.”

Mai le Soifuaga o Gordon B. Hinckley

A o saunoa ai i se konafesi a taitai faalelotu ia Novema 1994, sa faapea atu ai Peresitene Gordon B. Hinckley:

“E eseese o tatou talitonuga faaleaoaoga faavae. O le iloa ai o o tatou eseesega faalelotu, ou te manatu ua tasi o tatou manatu i lo tatou nofouta i le tiapolo ma faafitauli o le lalolagi ma le siosiomaga o loo tatou ola ai, ma o tatou tiutetauave ma avanoa e tele e tutu faatasi ai mo na uiga i olaga o tagata uma ma le tagata lava ia, lea e faatatau i le mama ma amioga faatamalii, o le faaaloalo mo alii ma tamaitai uma o ni fanau a le Atua, o le manaomia o le ava ma le migao i a tatou sootaga, ma le faasaoina o le aiga o le iunite autu o le lalolagi na faauuina i le lagi.

“… O i tatou uma o loo tauave i o tatou loto se manao e lagolago i e matitiva, ia siia’e i e ua puapuagatia, ia tuuina atu le faamafanafanaga, faamoemoe, ma fesoasoani ia i latou uma o e ua aafia i faafitauli ma tiga po o le a lava le pogai.

“Ua matou iloa le manaomia ona faamalolo i manu’a o le lalolagi, ae suia i le talitonu o le a lelei mea uma, ae sui le faatuatua i le leai o se faamoemoe i le lumanai o o tatou taimi. E tatau ona tatou iloa, e le manaomia ni tuuaiga po o ni faitioga e faasaga i le tasi ma le isi. E tatau ona faaaoga o tatou faatosinaga e faatoamalie ai leo o le ita ma finauga fia tauimasui.

“… O lo tatou malosiaga o loo taoto i lo tatou saolotoga e filifili ai. E i ai le malosiaga e ui lava i o tatou lava eseesega. Ae o loo i ai se malosiaga sili atu i le poloaiga ua tuuina mai e le Atua ia i tatou taitoatasi, e galulue mo le siitiaina ma le faamanuiaina o Ona atalii ma afafine uma, e tusa lava po o a o latou atunuu po o mea e o mai moni ai po o isi eseesega. …

“Tau ina ia faamanuia i tatou e le Alii ia tatou galulue ma le lotogatasi e aveese ai mai i o tatou loto ma tuliese ai mai o tatou tagata elemene uma o le ita, faaituau, faailoga tagata, ma isi upu ma amioga e tupu ai le fevaevaea’i. O faamatalaga faatiga, o le taufaifai faailogalanu, o faaupuga ita, o le faitatala lotovale, o le faasalalauina o faamatalaga faalealofa ma le pa’a’a e le tatau ona i ai so latou nofoaga i totonu ia i tatou.

“Tau ina ia faamanuina i tatou e le Atua i le filemu lea e sau mai ia te Ia. Tau ina Ia faamanuia i tatou i ni agaga lotofaafetai faapea ma se naunau e feoeoea’i faatasi ma le faaaloalo o le tasi i le isi, ma tuufaatasia ai a tatou taumafaiga e faamanuia ai afioaga ua faamanuiaina i tatou, tatou te aumau ai”¹

O le mavae ai o le tausaga talu ona fofogaina lenei savali, sa saunoa atu ai Peresitene Hinckley i se vaega e le o ni taitai faalelotu. Sa o se vaega toalaiti—sa pe na o se 30 tagata—ae sa o se vaega e matuai taua ma o’oo’o o latou aafiaga: o peresitene, o faatonu, ma le au fai lipoti faasalalau na fai ma sui o ofisa tetele o tala fou i le Iunaite Setete. I se “talanoaga manaia ae o nisi o taimi sa malie,” sa ia tuuina atu ai “se vaaiga aoao a le Ekalesia i le lautele o le lalolagi atoa, sa [ia] ta’ua ai ona taumafaiga faafaifeautalai, fesoasoaniga alofa, ma faaleaoaoga, ona ia ofo atu lea e tali ni fesili. … Sa ia taliina ma le faamaoni ia fesili taitasi e aunoa ma se faatuai po o se isi faaiteite o le matamuli.” Sa faaalia e nisi o i latou na auai le tete’i i lona naunau e talanoa [e uiga i le Ekalesia], lea sa ia tali atu ai e faapea, na pau lava le mea o le a ia le talanoa i ai, o faamatalaga ia e uiga i sauniga paia o le malumalu. Sa ia saunoa atu, “Ae e tele lava le avanoa mo isi mea uma.”

I se tasi o vaega i le taimi o fesili ma tali, sa fai atu ai Mike Wallace, o se tagata faasalalau sinia o le polokalama 60 Minutes, a le televise e faapea, sa manao e fai se lipoti faapitoa e uiga ia Peresitene Hinckley. Sa nofo Peresitene Hinckley ona tali atu lea, “Faafetai lava. O le a ou faaaogaina le avanoa.”²

Sa faailoa mulimuli ane e Peresitene Hinckley e faapea, sa i ai si ona popole e uiga i le faatalanoaina e Mike Wallace, o le sa lauiloa o se tagata faasalalau faigata. Sa ia faamatala mai le pogai sa ia ioe ai e faatalanoa e ui lava i lenei popolega:

“Sa ou manatu o le a tuuina mai ai le avanoa e faailoa atu ai nisi o vaaiga mautinoa o la tatou agaifanua ma le savali i le fia miliona o tagata. Sa tonu ia te a’u, na sili atu le lelei o le lilifa atu i le matagi malosi o avanoa nai lo na o le faapupuu ma leai se mea e faia.”³

O le faatalanoaga faalauaitele sa aofia ai le talanoaga lenei:

Mr. Wallace: “O a ni ou lagona e uiga i tagata e le o ni Mamona?”

President Hinckley: “O le alofa ma le faaaloalo. E toatele a’u uo e le o ni Mamona. Ou te faaaloalo ia i latou. E ese lo’u faamemelo ia i latou.”

Mr. Wallace: “E ui lava i le mea moni latou te le’i vaaia lava le malamalama?”

President Hinckley: “Ioe. I soo se tagata e le auai i lenei Ekalesia, ou te faapea atu, matou te iloa ia uiga mama ma lelei o loo ia te outou. O mai ma aumai se’i vaai pe mafai ona matou faaopoopo atu i ai.”⁴

E oo ane i le taimi na uma ai le faatalanoaga, ua uo ia Peresitene Hinckley ma Mike Wallace. Sa saunoa Mr. Wallace e uiga ia Peresitene Hinckley o se tagata “tausaafia ma magafagafa ma o se taitai tamalii ma talitonu o le a lelei mea uma” o le ua “tatau atoa i ai le faamemeloga lea ua ia mauaina, lea e toeitiiti lava o le lalolagi atoa.”⁵

Sa uunaia i tatou e Peresitene Hinckley ina ia auai faatasi ma i latou e le auai i la tatou faatuatuaga “i faamoemoega lelei o le lotoifale.”

Aoaoga a Gordon B. Hinckley

A tatou manatua, o tagata uma o fanau a le Atua, e faapea ona faateleina lo tatou aapa atu e siitia ma fesoasoani ia i latou o loo faatasi ma i tatou.

E le tatau ona galo ia i tatou, o loo tatou nonofo i se lalolagi e anoanoa’i mea e eseese ai. O tagata o le lalolagi o fanau uma a lo tatou Tama, ma e tele ma eseesega ni talitonuga faalelotu o loo i ai. E tatau lava ona tatou atiina a’e le faapalepale ma le agaga talisapaia ma le faaaloalo o le tasi i le isi.⁶

E le manaomia i soo se atunuu ni feteenaiga i le va o vaega eseese o soo se ituaiga. Ia aoaoina i totonu o aiga o tagata, o i tatou uma o fanau a le Atua, o lo tatou Tama Faavavau, ma e pei lava ona moni le i ai o le tulaga faaletama, e mafai foi ma e tatau ona i ai se tulaga faaleuso.⁷

Afai o le a tatou taulai atu e le aunoa i lena vaaiga o le tofi faalelagi, o le tulaga faaletama o le Atua ma le faaleuso o le tagata, o ni mea moni, o le a faateleina teisi atu lo tatou onosai, faateleina teisi atu lo tatou agalelei, faateleina teisi atu lo tatou aapa atu e siitia ma fesoasoani ma lagolago i latou o loo i ai faatasi ma i tatou. Atonu o le a faaitiitia lo tatou faia o na mea e le talafeagai. O i tatou o fanau a le Atua ma tatou te alolofa ia te Ia. Ia faateleina teisi ona tatou amio a’i ai faapena.⁸

E tatau ona tatou nonofo i le feavata’i, talisapaia, ma faauo atu i tatgata e le auai i la tatou faatuatuaga.

“Matou te ta’utino atu ua ia i matou le aiā tatau matou te tapuai atu ai i le Atua Mamana e tusa ai ma o matou lava lotofuatiaifo, ma ua matou tuuina atu foi lea lava aiā tatau i tagata uma, e faitalia i latou, pe faapefea, po o fea, po o le a foi le mea latou te tapuai atu i ai” (Mataupu Faavae o le Faatuatua 1:11).

E matuai taua tele lena mea—a o tatou talitonu i le tapuai atu i le Atua e tusa ai ma o tatou aoaoga faavae, e le faapea ai o le a tatou faasausili, pe faafia-amiotonu pe faamaualuluga, ae tatou te faasafua atu i isi le avanoa e tapuai ai e tusa ai ma o latou lava loto. O le tele o faafitauli i le lalolagi e sau mai i feteenaiga i le va o tapuaiga. Ou te fiafia lava e faapea atu, e mafai ona matou saofafafi faatasi ma a’u uo Katoliko ma talanoa ma i latou, e mafai ona matou saofafai i lalo ma a’u uo Porotesano ma talanoa ma i latou. O le a ou tu atu e puipui i latou, e pei ona faia ai e lenei Ekalesia ma o le a faaauau pea ona faia ai, e puipui ai i latou i lenei lalolagi.⁹

Ou te talosaga atu i o tatou tagata po o fea lava o i ai, ia nonofo feavata’i ma le talisapaia o i latou e le auai i la tatou faatuatuaga. E matuai tele lava se manaomia o le ava ma le migao ia i latou e eseese talitonuga ma filosofia. E le tatau ona manatu e faapea, ua maualuluga atu a tatou aoaoga faavae nai lo o isi. Ua tatou ola i se lalolagi o eseesega. E mafai ma e tatau ona tatou ava ma faaaloalo ia i latou o e tatou te le ioe i a latou aoaoga. E tatau ona tatou naunau e puipui aia tatau o isi o e e ono aafia fua i faiga faaituau.

Ou te fia faamanatu atu le saunoaga maoae lenei a Iosefa Samita na saunoa i ai i le 1843:

“Afai ua faaalia na ou naunau ou te oti mo se ‘Mamona,’ ou te toa e folafola atu i luma o le Lagi ua tutusa lava ma lo’u saunia ou te oti i le puipuia o aia tatau o se Peresipetiriane, o se Papatiso, po o se tagata lelei o soo se ituaiga lotu; mo le mataupu faavae lava e tasi lea e solia ai aia tatau a le Au Paia o Aso e Gata Ai lea foi e solia ai aia tatau a le Katoliko Roma, po o soo se isi lava ituaiga ekalesia” (History of the Church, 5:498).¹⁰

E le tatau ona tatou matele i le pipii atu i na o o tatou lava ituaiga [ekalesia]. E le tatau ona i ai so tatou manatu e fuaao i isi. E le tatau ona tatou faafia-amiotonu. E tatau ona tatou agalelei ma faamaoni ma faauo atu. E mafai ona tatou tausisia lo tatou faatuatuaga. E mafai ona tatou ola i la tatou tapuaiga. E mafai ona tatou faatauaina le faiga o a tatou tapuaiga e aunoa ma le faatiga ai i isi. Ou te faaaogaina lenei avanoa e talosaga atu ai mo se agaga o le faapalepale ma le fetausia’i, o le fefaauoa’i ma le alofa atu ia i latou o isi faatuatuaga.¹¹

E le tatau ona tatou feteena’i a o tatou talanoa e uiga i eseesega o aoaoga faavae. E leai se avanoa mo le faatiga. Ae peitai, e le mafai lava ona tatou gauai atu pe fetuunaia lena malamalama ua oo mai ia i tatou e ala i faaaliga ma le tuuina sa’o mai o ki ma le pule i lalo o aao o i latou o e na taulimaina anamua. Ia aua lava ne’i galo ia i tatou, o le toefuataiga lenei o le mea sa faavaeina e le Faaola o le lalolagi. …

E mafai ona tatou faaaloalo i isi tapuaiga, ma e tatau ona tatou faia lena mea. E tatau ona tatou iloa le tele o mea lelei latou te faia. E tatau ona aoao a tatou fanau ia onosai ma faauo atu i e e le auai i le tatou ekalesia.¹²

Tatou te le o taumafai e faamanualia isi ekalesia. Tatou te le o taumafai e faatiga i isi ekalesia. Tatou te le finauvale ma isi ekalesia. Tatou te le faafinau ma isi ekalesia. E na o le tatou faapea atu lava ia i latou o isi tapuaiga pe leai foi ni tapuaiga, “Ia outou o mai ma na upumoni o loo ia te outou, se’i vaai pe mafai ona matou faaopoopo atu i ai.”¹³

E mafai lava ona tatou galulue faatasi ma isi mo ni faamoemoega lelei e aunoa ma le fetuunaia o o tatou aoaoga faavae.

E mafai ona tatou galulue faatasi ma i latou o isi tapuaiga i taumafaiga eseese i le taua faavavau e faasaga i mea leaga faaagafesootai lea e faamata’uina ai tulaga faatauaina faapelepele lea e matuai taua lava ia i tatou uma. O nei tagata e le auai i le tatou faatuatuaga, ae o i latou o a tatou uo, tuaoi, ma e e galulue faatasi i ni faamoemoega eseese. Tatou te fiafia lava e tuu atu lo tatou malosi i a latou taumafaiga.

Ae i lenei faiga atoa, e le o i ai se fetuunaiga faaleaoaoga faavae. E le manaomia ma e le tatau ona tatou fetuunaia a tatou aoaoga faavae. Ae o loo i ai se tulaga o le faaaumea a o tatou galulue faatasi.¹⁴

E le tatau ona galo ia i tatou, tatou te talitonu i le agalelei ma i le faia o mea lelei i tagata uma. Ou te mautinoa e mafai ona matuai lelei ona tatou aoaoina a tatou fanau, e faapea ai ona tatou le fefe ne’i aveesea o latou faatuatua a o latou faauo atu ma agalelei atu ia i latou o e e le talitonu i le aoaoga faavae o lenei Ekalesia. … Ia tatou aafia i faamoemoega lelei i afioaga. Atonu e i ai tulaga, e aafia ai tulaga ogaoga o amioga lelei, ae e le tatau ona tatou fetuunaia mataupu o le amioga lelei. Ae o ni tulaga faapena e mafai ona tatou faatuiese ma le faaaloalo ae aua le faia ma le inoino. E mafai ona tatou faailoa atu le faamaoni o i latou o o latou tulaga e le mafai ona tatou taliaina. E mafai ona tatou talanoa e uiga i mataupu faavae ae le o uiga o tagata.

I na faamoemoega ia e faaleleia ai le siosiomaga o le afioaga, ma ua mamanuina mo le faamanuiaina o ona tagatanuu uma, ia tatou savavali atu i luma ma ia loto fesoasoani. …

… Aoao i latou o e ua nafa ma oe [le vaaiga] i le taua o amioga faaaloalo lelei. Uunai i latou ina ia aafia ma ia manatua i feutagaiga faitele, o le leo filemu o talanoaga malamalama e sili atu ona faatauanau nai lo o le feei ma le malomaloa o leo o le tetee. I le taliaina o tiutetauave faapena, o le a faamanuia ai e o tatou tagata ia o latou afioaga, o latou auaiga, ma le Ekalesia.¹⁵

“O lo tatou agalelei e mafai ona avea ma faatinoga aupito faatauanau mo mea ua tatou talitonu i ai.”

E le tatau ona tatou lolo atu i autau a le tiapolo. E mafai ma e tatau ona tatou faatumauina tulaga faatauaina ua talitonu i ai lenei Ekalesia talu mai lava lona faavaeina. O loo i ai se ala e lelei atu nai lo o le ala a le lalolagi. Afai lava e iu ai i le tuua toatasi, e tatau lava ona tatou faia.

Ae o le a le mafai lava ona tuua na o i tatou. Ou te mautinoa e faitau miliona tagata i le lalolagi atoa o e e faanoanoa i le tiapolo o loo latou vaaia ua siomia ai i latou. Latou te fiafia i [mea] mama, i [mea] lelei, ma i [mea] faagaeetia. O le a faapea foi ona siia’e o latou leo ma tuu atu lo latou malosi i le faasaosaoina o na tulaga faatauaina, ia e alagatatau mo le faatumauina ma le atinaeina.¹⁶

Ia tatou tatalo mo autau o le lelei. Ia tatou aapa atu e fesoasoani i alii ma tamaitai o le agalelei, po o a lava o latou manatu faale-ekalesia ma po o fea foi o latou aumau ai. Ia tatou tutu malosi e tetee atu i le tiapolo, i totonu o o tatou atunuu ma atunuu mamao. … E mafai ona avea i tatou ma se faatosinaga mo le lelei i lenei lalolagi, i tatou uma taitoatasi.¹⁷

A tatou faia isi ma le alofa, faaaloalo, agalelei, ua tatou faaali atu o i tatou o ni soo moni o Iesu Keriso.

A o tatou tauaveina i luma la tatou misiona tulaga ese, tatou te galulue i lalo o se poloaiga ua tuuina mai ia i tatou e se Alii toetu, o le na fetalai mai i lenei tisipenisione mulimuli ma faaiu. O Lona faamoemoega tulaga ese ma matagofie lenei. Tatou te tautino atu ma molimau atu ia te Ia. Ae e le tatau ona tatou faia lena mea ma le faasausili po o le faafia-amiotonu.

E pei ona faamatalaina e Peteru, o i tatou o “se tupulaga ua filifilia, o tupu ma ositaulaga; o le nuu paia, ma le nuu na faatauina mai.” Aisea? Ina ia mafai ona tatou “ta’uta’u atu ona lelei na ia valaau atu ia te [tatou] nai le pouliuli e oo i lona lava malamalama e matua ofo ai” (1 Peteru 2:9). …

… Ia avea i tatou ma ni soo moni o Keriso, e ola i le Tulafono Faaauro, o le faia i isi o mea tatou te mananao latou te faia mai ia i tatou. Ia tatou faamalolosia o tatou lava faatuatua ma faatuatua o a tatou fanau, a o tatou agalelei atu ia i latou o e e le auai i le tatou ekalesia. O le alofa ma le faaalolao o le a faatoilalo ai elemene uma o le tetee malosi. O lo tatou agalelei e mafai ona avea ma manatu aupito sili ona faatauanau mo mea ua tatou talitonu i ai.¹⁸

Ou te fia fautua atu, ia tatou atiina a’e se uiga faaalia o le aapa atu e fesoasoani i isi o e e le auai i le tatou ekalesia, e faamalosiau ia i latou, e taitai i latou i se auala agalelei ma agaalofa agai atu i na fegalegaleaiga ia e mafai ona faailoa atu ai i latou i polokalama matagofie a le Ekalesia.

Ou te mafaufau i le solo a Edwin Markham:

Sa ia tusia se li’o na tuu ai a’u i fafo—
Le talitonu, tetee, o se mea e le ano moni i ai.
Peitai sa ia i ma’ua ma Alofa le poto e manumalo ai:
Sa ma tusia se li’o sa i ai o ia i totonu!19

E le tatau lava ona tatou faalialiavale i lea tulaga [la tatou tapuaiga], pe manatu faasausili i soo se itu. O ia ituaiga o amioga e le tusa ai ma le Agaga o Keriso lea e tatau ona tatou taumafai e faaaoao i ai. O lena Agaga e mau i le loto ma le agaga, i se tulaga leleoa ma e le faalialiavale o o tatou olaga.

Ua ia i tatou uma ni tagata ua tatou moomoo e fia faataitai i ai, ua latou atinaeina se uiga o se faataitaiga o le matagofie o le talalelei ua latou faatinoina i a latou amio, e aunoa lava ma se upu, i o latou olaga.

E mafai ona tuutuu teisi i lalo o tatou leo. E mafai ona tatou faafoi atu le lelei i e agaleaga mai. E mafai ona tatou ataata pe a vave ona oso le ita. E mafai ona tatou amio pulea ma loto pulea ma lafoai i nuu le aina soo se tauemuga e fai mai ia i tatou.²⁰

Pe ua tatou malamalama moni ea, pe ua tatou malamalama i le taua tele o mea ua ia i tatou? O le tuluiga lenei o augatupulaga o le tagata, le lautusi faaiu o le vaaiga i aafiaga o le tagata.

Ae le faapea o le a tuu ai i tatou i se tulaga o le faasausili. E leai, e tatau ona faalotomaulalo ai i tatou. E tuu mai ai i o tatou luga, se tiutetauave e le mafaamagaloina, ia aapa atu ai ma le alofa i isi tagata uma, i le Agaga o le Matai, lea sa aoao mai, “Ia e alofa atu i le lua te tuaoi, ia pei o oe lava ia te oe” (Mataio 19:19). E tatau ona tatou lafoa’i ese le faafiaamiotonu, ma o ese mai i lou manatu ifo ua na o oe lava. …

O i tatou i lenei augatupulaga, o taunuuga ia o mea uma sa muamua atu. E le lava le na ona iloa o [oe] o se tagata o lenei Ekalesia. Ua i o tatou luga se matafaioi paia. Ia tatou talia ma faataunuuina.

E tatau ona tatou ola o ni soo moni o le Keriso, ma ia alolofa i tagata uma, taui atu le leaga i le lelei, aoao atu ala o le Alii e ala i faataitaiga, ma faataunuuina le galuega tele ua Ia tuu mai mo i tatou.²¹

Mai le tatalo o le faapaiaga o le Nofoaga Autu mo Konafesi i le Aai o Sate Leki, Iuta: [I le avea ai ma tagata] o Lau Ekalesia, tau ina ia matou faauo atu ma faaaloalo. Tau ina ia matou faatumauina tulaga faatonuina ma faiga masani ua iloa ai i matou ma tuu atu ai i isi le avanoa po o ai, “po o fea, po o le a foi le mea latou te tapuai atu i ai” [Mataupu Faavae o le Faatuatua 1:11]. Faamanuia ina ia matou aapa atu o ni tuaoi lelei ma ia loto fesoasoani i tagata uma. Tau ina ia matou siiae lima ma faamalolosia tulivae ua vaivai o soo se tasi o mafatia [tagai MF&F 81:5]. Tau ina ia matou nonofo faatasi i le filemu ma le talisapaia ma le faaaloalo o le tasi i le isi.²²

Fautuaga mo Suesuega ma le Aoaoina Atu

Fesili

I a tatou fegalegaleaiga ma isi, aisea e aoga ai le manatua o i tatou uma o fanau a le Atua? (Tagai vaega 1.) E mafai faapefea ona tatou atiina ae le talisapaia ma le faaaloalo faateleina mo isi? E mafai faapefea e tagata matutua ona aoao tamaiti ia talisapaia ma faaaloalo i isi?
Toe faamanatu le fautuaga a Peresitene Hinckle e uiga i a tatou sootaga ma tagata e le auai i le tatou tapuaiga (tagai vaega 2). E mafai faapefea ona tatou iloa pe o tatou faaali atu le faasausili po o le faafia-amiotonu i nei sootaga? E mafai faapefea ona tatou faaali atu le faauo ma le alofa faateleina ia i latou e ese o latou talitonuga?
Aisea e taua ai i tagata o le Ekalesia ona galulue faatasi ma isi tagata i faamoemoega lelei? (Tagai vaega 3.) O a ni faataitaiga o ni taumafaiga faapena? E mafai faapefea ona avea i tatou ma se faatosinaga malosi atu mo le lelei i o tatou lotoifale?
O a ni mea e mafai ona tatou aoao mai e uiga i le avea ma soo mai le aoaoga Peresitene Hinckley i le vaega e 4? O a ni auala na e vaai ua faatoilalo ai e le alofa ma le faaaloalo ni lagona o le tetee. Aisea e avea ai a tatou amio e faaali atu i isi “o le faatinoga aupito faatauanau mo mea ua tatou talitonu i ai”? Mafaufau i ni auala faapitoa e mafai ona e aapa atu ai i isi?

Mau Fesootai

Mataio 7:12; Luka 9:49–50; Ioane 13:34–35; 1 Ioane 4:7–8; MF&F 1:30; 123:12–14; Mataupu Faavae o le Faatuatua 1:13

Fesoasoani mo Suesuega

“A e lagonaina le olioli e maua mai le malamalama i le talalelei, o le a e manao e faaaoga mea na e aoaoina. Ia taumafai ia e ola e tusa ma lou malamalama. O le faia ai faapena o le a faamalosia ai lou faatuatua, malamalama, ma le molimauTalai La’u Talalelei [2004], 19).