Mataupu 14

Auauna Atu ma le Loto Atoa i Isi

“Tau ina ia sosolo ifo i o tatou loto le uiga moni o le talalelei ina ia mafai ona tatou iloa ai o o tatou lava olaga, ua tuuina mai ia i tatou e le Atua lo tatou Tama, ina ia faaaogaina e auauna atu ai i isi.”

Mai le Soifuaga o Gordon B. Hinckley

Sa tauivi le Alii faifeautalai talavou o Gordon B. Hinckley i nai ona vaiaso muamua i le avea ai ma se faifeautalai faamisiona i Egelani. Sa ma’i o ia i le taimi na taunuu atu ai, ma sa faafia ma o ana taumafaiga e talai atu le talalelei sa teena pea lava pea. I le taualumaga o lena taimi faigata, sa faamanuiaina ai o ia i le mea sa ia taua mulimuli ane o lona “aso o faaiuga”—o se aafiaga na aafia ai lana auaunaga mo le taimi atoa na totoe o lona soifua.

“Sa ou lotovaivai,” sa ia manatua ai. “Sa ou tusi atu i lo’u aiga i lo’u tama lelei ma fai i ai sa ou lagonaina sa ou faamaumauina lo’u taimi ma ana tupe. O ia o lo’u tama ma o la’u peresitene foi o le siteki, ma o ia o se alii atamai ma musuia. Sa ia tusi mai se tusi puupuu lava ia te au lea sa faapea mai, “Le Pele Gordon, ua ou mauaina lau tusi talu ai nei. E na o le tasi lava la’u fautuaga: faagalo oe lava ia ae alu e galue.’ O se taimi na muamua atu i lena taeao i le ma vasega mo le suesuega o tusitusiga paia, sa ma faitau ai ma la’u soa i fetalaiga nei a le Alii: ‘Aua ai se fia faasaogalemuina lona ola, e maumau ai ia te ia; a o le faamaumau lona ola ona o a’u ma le tala lelei, e faasaoina e ia.’ (Mareko 8:35.)

“O na upu a le Matai, lea na sosoo ai ma le tusi a lo’u tama faatasi ma lana fautuaga ina ia faagalo au lava ia ae alu e galue, sa lagona ifo i lou lava tagata. Faatasi ai ma le tusi a lou tama i lo’u lima, sa ou alu atu ai i le potumoe i le fale i le 15 Wadham Road, lea sa ma nonofo ai, ma tootuli ai ma faia se tautinoga i le Alii. Sa ou osifeagaiga ai o le a ou taumafai e faagalo a’u lava ma faamaumau a’u lava i Lana galuega.

“I lena aso ia Iulai i le 1933 sa o se aso o la’u [faiga] faaiuga. Sa oo mai se malamalama fou i lou olaga ma se olioli fou i lou loto.”¹

Sa le’i aluese atu lena malamalama mai le soifuaga o Gordon B. Hinckley. Mai i lena lava aso, sa ia tuuto atu ai o ia lava i le Alii i le auauna atu i isi. I le maliu o Peresitene Hinckley, sa lisi ai e Peresitene Henry B. Eyring ni nai saofaga a Peresitene Hinckley: fausiaina o malumalu i le lalolagi atoa, faatutuina o malumalu laiti ifo e faanatinati ai le galuega faalemalumalu, faavaeina le Tupe Faaagaga mo Aoga, ma le fauina o le Maota Autu mo Konafesi. Ona ia fai mai lea:

“O lona talatuu patino e tele atu nai lo o lena lisi puupuu ma lo’u malosi e faamatala ai. Ae o mea na ia ausia sa i ai pe a ma le tasi se mea na laugatasia ai. O taimi uma lava sa [faia ai] ina ia faamanuia ai tagata taitoatasi i se avanoa. Ma o taimi uma sa mafaufau ai ia i latou e tau le maua ni avanoa, o tagata masani o loo tauivi e taulima faigata o le olaga i aso taitasi ma le luitau o le ola ai i le talalelei a Iesu Keriso. E silia i le faatasi ona ia popoina lou fatafata i lona tamailima pe a ou tuuina atu se fautuaga ma faapea mai, ‘Hal, na e manatua le tagata o loo tauivi?’”²

“Ou te manao ia ou malosi ma galue,” o le saunoaga lea a Peresitene Hinckley. “Ou te manao e faafetaiaia aso taitasi i se fuafuaga ma se faamoemoega. Ou te manao e faaaoga itula uma ou te ola ai e tuuina atu se faamalosiauga, e faamanuia i latou o e o loo mamafa a latou avega, ina ia atiina ae le faatuatua ma le malosi o le molimau.”³

“Afai o le a tatou tautino e tapuai ma mulimuli i le Matai, pe le tatau ea ona tatou taumafai e faataitai i lona soifuaga o le auauna atu?”

Aoaoga a Gordon B. Hinckley

O o tatou olaga o ni meaalofa mai le Atua ma e tatau ona faaaogaina i le auauna atu i isi.

Ua … tele le mativa ma le manao moni i le lalolagi atoa, ua tele naua le tetee ma le le alofa, ua tele naua le leaga o le ola le mama, ua tele naua aiga malepelepe ma aiga ua faatamaiaina, ua tele naua tagata ua tuua toatasi ua ola i olaga faanoanoa ua aunoa ma le faamoemoe, ua tele naua le tiga i soo se mea.

Ma o lea ou te talosaga atu ai ia te outou. Ou te talosaga atu ia te outou e faapea, i a outou sailiga ina ia maua oa o le lalolagi, ia outou foai atu ina ia faaleleia teisi ai le lalolagi.⁴

Afai e tatau ona faaleleia atili le lalolagi, e tatau la ona faia se suiga i le faagasologa o le alofa i loto o tagata. E mafai ona faia lena mea pe a faasili atu la tatou vaai nai lo ia i tatou lava, ina ia tuuina atu lo tatou alofa i le Atua ma isi, ma ia faia o lena mea ma o tatou loto atoa, ma o tatou agaga atoa, ma o tatou mafaufau atoa.

Ua folafola mai e le Alii i faaaliga i onaponei e faapea, “Ma afai e tau-tasi o outou mata i loʼu mamalu, o le a faatumulia o outou tino atoa i le malamalama, ma o le a leai se pouliuli e ia te outou.” (MF&F 88:67.)

A o tatou vaavaai atu ma le alofa ma le agaga faafetai i le Atua, a o tatou auauna atu ia te ia ma le manatu tasi i lona mamalu, o le a alu atu mai ia i tatou le pogisa o le agasala, le pogisa o le manatu faapito, le pogisa o le faamaualuga. O le a faapea ona oo mai se alofa faateleina mo lo tatou Tama e Faavavau ma mo lona Alo Pele, lo tatou Faaola ma lo tatou Togiola. O le a faapea ona oo mai se lagona sili atu o le auauna atu i o tatou uso a tagata, ae itiiti ona mafaufau i le tagata lava ia ae faateleina le aapa atu i isi.

O lenei mataupu faavae o le alofa o le ute moni lea o le talalelei a Iesu Keriso.⁵

Afai o le a tatou tautino e tapuai ma mulimuli i le Matai, pe le tatau ea ona tatou taumafai e faataitai i lona soifuaga o le auauna atu? E leai se tasi o i tatou e mafai ona fai mai sao o lona olaga e anaina e ia lava. O o tatou olaga o ni meaalofa a le Atua E le ona o lo tatou lava malosi ua tatou o mai ai i le lalolagi. Tatou te le o ese foi i lo tatou lava loto. E le o i tatou lava e atofaina o tatou aso, ae e tusa ma le finagalo o le Atua.

E toatele i tatou e faaaogaina o tatou olaga e faapei tatou te pule atoa ai. Tatou te filifili e faamaumau o tatou olaga pe a tatou mananao ai. Ae peitai, o lena mea e avea ma se faalataga o se faatuatuaga maoae ma le paia. E pei ona matuai faamanino mai e le Matai, “Aua ai se fia faasaogalemuina lona ola, e maumau ai ia te ia; a o le faamaumau lona ola ona o a’u ma le tala lelei, e faasaoina e ia.” (Mareko 8:35.)⁶

O’u uso e ma tuafafine pele, o le luitau e maoae tele. O avanoa e faatatau uma ia i tatou. O le a finagalo le Atua tatou te faia Lana galuega—ma faia ma le malosi ma le fiafia. O lena galuega, e pei ona Ia faamatalaina mai, o le “fesoasoani i e vaivai, sii i luga lima ua tautau i lalo, ma faamalosi tulivae ua vaivai.” (MF&F 81:5.

O le auauna atu ia i latou o e matitiva. O le faamafanafana ia i latou o e faavauvau. O le asiasi atu i fafine ua oti a latou tane, ma fanau ua leai ni tama i o latou puapuagatia. O le fafaga o e fiaaai, ia faalavalava i e ua le lavalava, ia malutia i latou o e e leai ni o latou faamalumaluga. O le faia o mea e pei ona sa faia e le Matai, o le “sa femaliua’i ma agalelei.” (Galuega 10:38.)⁷

O la’u savali ia te outou i le aso … e faapea, ia e filifili nei e tuuto atu se vaega o lou taimi, a o e faataatiaina le fuafuaga o lou olaga, ia i latou o e faanoanoa ma matitiva, e aunoa ma le mafaufau e toe tauia mai. E manaomia ou tomai, po o a lava na tomai. O ou lima fesoasoani o le a siia’e ai se tasi mai le faigata o le faanoanoa, O lou leo mausali o le a tuu atu ai le faamalosiauga i nisi o e atonu ua le toe faia se taumafaiga. O ou tomai e mafai ona suia ai olaga, i se auala maoae ma matagofie, o i latou o e manaomia le fesoasoani. Afai e le o le taimi nei, o afea la? Afai e te le faia, o ai la na [te faia]?⁸

Talosia ia tafe atu i totonu o o outou loto le uiga moni o le talalelei, ina ia mafai ona tatou iloa i o tatou olaga, ua tuuina mai ia i tatou e le Atua lo tatou Tama, e tatau ona faaaoga e auauna atu ai i isi.

Afai o le a tatou tuu atu ni auaunaga faapena, o le a faatumulia o tatou aso i le olioli ma le fiafia. O le mea aupito taua, o le a faapaiaina i latou i lo tatou Alii ma le Faaola, o Iesu Keriso, ma i le faamanuiaina o i latou uma o o latou olaga tatou te pa’i i ai.⁹

O le auauna atu o le vailaau sili lea mo le faanoanoa o le tagata mo ia lava, manatu faapito, faanoanoa, ma le tuuatoatasi.

Ou te manatua le asiasi atu i le lotoa o se kolisi lea na ou faalogo ai i le faitio masani, ma faisoo a le autalavou: o faitioga e uiga i le tigaina o le aoga—sa pei o se avega ae le o se avanoa e tofo ai i le malamalama o le lalolagi—o faitioga e uiga i fale ma e uiga i meaai. …

Sa ou fautuaina na talavou, afai na mamafa tele mea e tigaina ai o le aoga, afai latou te manatu e faitio e uiga i o latou fale ma a latou meaai, e mafai la ona ou fautua atu se fofo mo o latou faafitauli. Ou te fautuaina e faataatia ese a latou tusi mo ni nai itula, o ese mai o latou potu, ae o e asiasi i se tasi e matua ma tuua na o ia, po o se tasi o ma’i pe lotovaivai. E masani lava, ua ou iloa afai tatou te faitio e uiga i le olaga, e mafua ona e na o i tatou lava o loo tatou mafaufau i ai.

Mo le tele o tausaga, sa i ai se faailo i luga o le puipui o se faleoloa lipea seevae sa masani ona ou faatau ai. Sa faitauina, “Sa ou faitio ona sa leai ni o’u seevae, seia oo ina ou vaai i se tagata na leai ni ona vae.” O le vailaau e sili ona aoga mo le ma’i o le faanoanoa o le tagata mo ia lava, o le faagalo o i tatou lava i le auauna atu i isi.¹⁰

Ou te talitonu o le toatele o i tatou o le vailaau sili ona lelei mo le tuua toatasi o le galue ma le auauna atu e fai ma sui o isi. Ou te le faaitiitia o outou faafitauli, ae ou te le musu foi e fai atu e faapea, e toatele isi e ogaoga atu o latou faafitauli nai lo o oe. Ia aapa atu e auauna atu ia i latou, e fesoasoani ia latou, e faamalosiau ia i latou. O loo toatele lava tama ma teine o e toilalo i le aoga ona o le manao i sina uai patino atu ma faamalosiauga. O loo toatele lava tagata matutua o loo nonofo i le faanoanoa ma le tuua toatasi ma le popole po o ai o le a aumaia i ai e se talanoaga faatauvaa se fuataga o le faamoemoe ma le susulu. …

O loo toatele i latou o e ua faamanualia ma o e e manaomia se Samaria lelei e fusifusia o latou manua ma fesoasoani ia i latou i le ala. O se agalelei itiiti e mafai ona auamaia ai se faamanuiaga tele i se tasi e faanoanoa ma se lagona manaia i se tagata e faauoina o ia.¹¹

O loo toatele i latou o loo i ai, e mafai ona e siiina a’e a latou avega. O loo i ai i latou e leai ni aiga, o loo i ai i latou o loo fia aai, o loo i ai i latou o e matitiva o loo siomia i tatou. O loo i ai e ua toeaiina ma olomatutua o loo tuua toatasi i maota o tagata matutua. O loo i ai tamaiti e le atoatoa le malosi o le tino ma le mafaufau, ma tagata talavou o loo faaaogaina vailaau faasaina, ma e mama’i ma e nofofale o e o loo fetagisi mai mo se upu alofa. Afai tatou te le faia lenei mea, o ai la e faia?

O le vaifofo silii ua ou iloa mo le popole o le galue. O le vailaau sili mo le faanoanoa o le auauna atu. O le fofo sili lava mo le vaivai o le lui ia fesoasoani atu i se tasi o sili atu le lelava.¹²

Aisea e fiafia ai faifeautalai? Ona latou te faagalo i latou lava i le auauna atu i isi.

Aisea e fiafia ai i latou o e galulue i malumalu? Ona o a latou galuega o le alofa e matuai ogatasi lava ma le galuega sui tele o le Faaola o tagata. Latou te le talosagaina pe faamoemoe foi mo se faafetai mo mea latou te faia. Mo le tele lava o tulaga, e leai lava se isi mea latou te iloa nai lo o le igoa o le tagata o loo latou galulue e fai ai ma sui.¹³

Ia faailoa atu manaoga faatamalii o loo i totonu o outou loto, ina ia aapa atu e faamafanafana, lagolago ma atiina a’e isi. A o outou faia na mea, o le a tuua oe e le ’ona faatamaia o le manatu faapito, ae o le a suitulagaina e se lagona manaia ma matagofie lea e foliga mai e leai lava se isi ala e oo mai ai.¹⁴

“O loo toatele i latou o loo i ai, e mafai ona e siiina a’e a latou avega.”

A tatou aapa atu e fesoasoani i isi, e faapea ona tatou iloa ai o tatou tagata moni.

I se tasi taeao o se Aso Sa i ni nai tausaga ua mavae, sa ou i ai i le maota o le peresitene o se siteki i se nuu laitiiti i Idaho. A o le’i faia le lotu i le taeao, sa faitau faatasi e le aiga i ni nai fuaiupu o tusitusiga paia. O nisi o nei upu o fetalaiga a Iesu o loo tusia i le Ioane 12:24: “E moni, e moni, ou te fai atu ia te outou, Afai a e le pau le fua o le saito i le eleele ma pala ai, e tumau pea o le mea e tasi: ae afai e pala, ona fua mai ai lea o fua e tele.”

E le masalomia lava, sa faatatau atu le Matai i lona lava maliu na fotua’i mai, ma tautino mai, vagana ai e maliu o ia, o le a matuai le aoga lava lana misiona i le olaga. Ae peitai, o loo o’u vaaia i nei upu se isi faauigaga. E foliga mai ia te a’u, o loo fetalai mai le Alii ia i tatou taitoatasi e faapea, seiiloga tatou te faagalo i tatou lava i le auauna atu i isi, o le a tele ina tatou ola i le leai o se faamoemoe moni, aua sa faaauau ona ia fetalai mai, “O le faapelepele i lona ola, e faamaumau e ia i ai; a o le inoino i lona ola i lenei lalolagi, e leoleo ai e ia e oo i le ola faavavau.” (Ioane 12:25.) Po o le, e pei ona tusia i le Luka, “O se saili ia saogalemu lona ola e maumau ai ia te ia; a o se faamaumau ai e faasaoina e ia.” (Luka 17:33.) I se isi faaupuga, o le e ola mo na o ia lava e mamae ma oti, ae o le e faagalo o ia lava i le auauna atu i isi, e tuputupu a’e ma fuga mai i lenei olaga ma i le faavavau.

O lena taeao i le konafesi a le siteki, sa faamaloloina ai le peresitene o le siteki lea sa ou nofo ai, i le mavae ai o le sefulutolu tausaga o se auaunaga faamaoni. Sa matuai tele le sasaa atu o le alofa ma le agaga faafetai, sa le ona o lona tamaoaiga, sa le ona o lona tulaga i le lotoifale o pisinisi, ae ona o le auaunaga maoae sa ia tuuina atu ma le le manatu faapito. Na aunoa ma le mafaufau i mea e fiafia i ai o ia lava, sa faimalaga atu ai o ia i le fiasefulu afe o maila i ituaiga uma o tau. Sa ia faaaluina moni le faitau afe o itula i mea e mananao ai isi. Sa ia tuulafoaia ana lava pisinisi patino ina ia lagolago atu ia i latou o e sa manaomia lana fesoasoani. Ma i le faia o lea mea, sa ola ai o ia ma sa avea ma tagata maoae i le vaai a i latou sa ia tautuaina.¹⁵

O ni tausaga ua mavae sa ou faitau ai i se tala i se tamaitai talavou o le sa alu atu i se nuu maotua e avea ai ma se faiaoga. Sa i ai i lana vasega se teineitiiti sa le’i pasi muamua ma o le na toe le pasi foi. Sa le mafai e le teineitiiti aoga ona faitau. Sa sau o ia mai i se aiga e leai ni mea e ave atu ai o ia i se taulaga e tele atu mo suesuega e iloa ai pe na i ai sona faafitauli e mafai ona foia. O le lagonaina atonu o le faafitauli o le teineitiiti na mafua i ona mata, sa faatulagaina ai e le faiaoga talavou e ave atu le teineitiiti aoga e siaki ona mata, ae e totogi e le faiaoga. Na maua ai se faafitauli na mafai ona faaleleia e matatioata. E le’i leva ae matala atoa atu se lalolagi fou i le teineitiiti aoga. Mo le taimi muamua o lona olaga, ua manino ai lana vaai i upu sa i ona luma. Sa le tele le totogi o lena faiaoga i le aoga maotua, ae mai i lena totogi laitiiti, sa ia faia ai se teugatupe lea na suia atoa ai le olaga o se teineitiiti aoga sa le pasi, ma i le faia o lena mea, sa ia maua ai se vaaiga fou i lona lava olaga.¹⁶

A o e auauna atu, o le a faapea ona faaopoopo atu se vaaiga fou i lou olaga. O le a e maua ni fegalegaleaiga fou ma faaoso fiafia. O le a e maua ni faauoga ma ni fegalegaleaiga lelei. O le a e tuputupu a’e i le poto ma le malamalama ma le atamai, ma i lou gafatia e fai ai.¹⁷

Ou te molimau atu, a o aapa atu outou taitoatasi e fesoasoani i isi, o le a outou maua o outou tagata moni ma faamanuia tele ai le lalolagi o loo outou aumau ai.¹⁸

Ua tuuina atu e le Ekalesia ni avanoa se tele mo auaunaga le manatu faapito.

Uso e ma tuafafine, o le a le mafai ona outou fiafia pe afai tou te ola i le olaga ae na’o oe lava e te mafaufau i ai. Ia galulue punouai i le faamoemoega aupito sili ona lelei i le lalolagi—le faamoemoega o le Alii. O le galuega a korama, ma faalapotopotoga o ausilali, galuega faalemalumlau, galuega o auaunaga faaleuelefea, galuega faafaifeautalai. O le a e faamanuiaina lou lava olaga, pe a e faamanuia i olaga o isi.¹⁹

E leai se isi lava galuega i le lalolagi atoa e faatumulia i le fiafia e pei o le galuega lenei. O lenei fiafia e tulaga ese. E oo mai mai le auauna atu i isi. E moni lava. E tulaga ese. E matagofie.²⁰

“A o e … auauna atu, o le a faaopoopoina se vaaiga fou i lou olaga.”

Ia avea le Ekalesia ma au uo pele. Ia avea ma au soa sili [ona lelei]. Ia auauna atu i soo se mea e valaauina oe e auauna ai. Ia fai le mea e talosagaina oe e fai. O tofiga uma e te umia o le a faaopoopo atu i ou gafatia. E tele ni tiutetauave ua ou auauna ai i lenei faapotopotoga tele. O auaunaga uma lava e aumaia ai ona lava taui.

O lenei mea … o le a manaomia ai lou tautinoga le manatu faapito, lou faamaoni ma le faatuatua le faavaivai. O le a e auauna atu i le tele o tulaga a o le’i faamaeaina o outou olaga. O nisi o na mea e ono foliga mai e laiti, ae e leai se valaauga e laitiiti pe le taua i lenei Ekalesia. E taua valaauga uma. E manaomia valaauga uma i le faaalualuina i luma o le galuega. Ia aua ne’i ta’ufaatauvaaina se tiutetauave i totonu o le Ekalesia. …

Ia fai se avanoa mo le Ekalesia i lou olaga. Ia faatupulaia lou iloa o ona aoaoga faavae. Ia faateleina lou malamalama i lona faalapotopotoga. Ia faateleina pea le malosi o lou fiafia i ona upumoni e faavavau.

E ono valaau atu le Ekalesia e te faia se osigataulaga. E ono valaau atu e te tuu atu le mea sili ona lelei e mafai ona e ofoina atu. O le a leai se totogi i lenei mea, aua o le a e iloa ai, o le a faapea ona avea ma se teugaoa lea o le a totogi auauai atu ia te oe mo le umi lava e te ola ai. O le Ekalesia o le sapalai aupito tele lea o upumoni e faavavau. Ia opogi ma taofi mai i ai.²¹

E te fia fiafia? Ia faagalo oe lava ae galue punoua’i i lenei faamoemoega maoae. Ia tuu atu au taumafaiga e fesoasoani ai i tagata. Ia atiina a’e se agaga o le faamagalo atu i lou loto e faasaga i soo se tasi atonu na faatiga ia te oe. Ia vaai atu i le Alii ma ola ma galue e siia’e ma auauna atu i Ona atalii ma afafine. O le a oo ina e iloa se fiafiaga lea e te lei iloa muamua pe afai o le a e faia lena mea. Ou te le popole pe fia lou matua, pe fia foi lou laitiiti, soo se mea lava. E mafai ona e siia’e tagata ma fesoasoani ia i latou. Ua silafia e le lagi o loo matuai toatele lava tagata i lenei lalolagi o loo manaomia le fesoasoani. E matuai toatele naua. Ou uso e ma tuafafine, ia tatou aveese le uiga leaga o le manatu faapito mai o tatou olaga, ae tutu sa’o teisi atu ma aapa maualuga teisi atu i le auauna atu i isi. … Ia tutu sa’o teisi atu, tutu maualuga teisi atu, faamalosi i latou ua vaivai tulivae, ma sii i luga lima o i latou ua tautau i lalo. Ola i le talalelei a Iesu Keriso. Faagalo oe lava.²²

Fautuaga mo Suesuega ma le Aoaoina Atu

Fesili

Na aoao mai Peresitene Hinckley e faapea, o o tatou olaga o ni meaalofa mai le Atua, ina ia faaaogaina e auauna atu ai i isi (tagai i le vaega 1). E mafai faapefea ona tatou faia le auauna atu i isi o se faiga masani o le olaga? O le a lou manatu i le uiga o le auauna atu ma le manatu tasi i le mamalu o le Atua? Na faapefea ona faamanuiaina oe i auaunaga a se isi tagata?
Aisea e fesoasoani ai le auauna atu ia i tatou e faatoilalo ai le popole ia i tatou lava, manatu faapito ma le tuua toatasi? (Tagai vaega 2.) E aumaia faapefea e le auauna atu le fiafia ia te oe? A o e faitau i faamatalaga a Peresitene Hinckley e uiga i tagata o loo manaomia le fesoasoani, ia iloilo po o a ni auala tou te mafaia ma lou aiga ona aapa atu e auauna atu ai.
Aisea e fesoasoani ai le faagalo o i tatou lava i le auauna atu i isi e “iloa ai [o tatou] tagata moni”? (Tagai vaega 3.) O a ni mea e mafai ona tatou aoao mai i tala i le vaega e 3?
Na fautua mai Peresitene Hinckley, “Ia galulue punouai i le faamoemoega aupito sili ona lelei i le lalolagi—le faamoemoega o le Alii” (vaega 4). O a ni faamanuiaga ua aumaia i lou olaga e auaunaga i le Ekalesia?

Mau Fesootai

Mataio 20:25–28; 25:34–40; Ioane 13:35; Mosaea 2:16–18; 18:8–9; MF&F 64:33

Fesoasoani mo Suesuega

“A o e suesue, ia mataitu manatu e oo mai i lou mafaufau ma lagona e oo mai i lou loto”(Talai La’u Talalelei [2004], 18) Mafaufau e faamaumau uunaiga e te maua, tusa lava pe le fesootai i upu o loo e faitauina. Atonu o mea tonu ia o loo finagalo le Alii e te iloaina.